فاعل خير

بارت 14

#فاعل خير
#بقلمي طيبة الربيعي
البارت الرابع عشر

(للكاتبة طيبة الربيعي)
منو؟ استغربت
دزيت "منو حضرتج؟"
جاوب "حضرتك، تعرفيني بس الظاهر نسيتي"
عزة منو هذا، بس لا سوالف روى هاي
اتصلت بيهة
روى: والله عاش من سمع صوتج
نبأ: روى هاي انتي الي ددزين رسائل من رقم غريب؟
روى: شنو
نبأ: اكو احد ديزدلي من رقم ماعرفة ويحجي بالالغاز، عليج الله اذا انتي كولي
روى: لا والله مو اني، وين هو اني بطني صايرة بخشمي الي خلك هل سوالف، خابري شوفي منو
نبأ: لا يمة ماريد، خيولي بعد ماجاوب
روى: كولي لسامر خاف واحد من اصدقائة
نبأ: لج هو منو يعرف رقمي من اصدقائة، محد يعرفة بس انتو واهلي
روى: ماعرف والله، دبدلي صارلة سنين عندج خاف واحد من زملاء الجامعة(للكاتبة طيبة الربيعي)
نبأ: اي هم صحيح يجوز، لج روى عندي خبر يخبل
روى: يا الله كولي
نبأ: اني حامل
ياريتني محجيت، زرفت الطبلة مال اذاني
بهلهولتهة
باركتلي وكالت لازم عليهة طلعة هاي
كتلهة انشاءلله يجي سامر واخبرة اني همينة
اريد اطلع ضايجة، من رجع ورة العشة
صعدنة سوية، تونة فتنة للغرفة شالني
ضحكت: مخايف علة ظهرك
بقة واكف ويباوعلي وجهة مابي اي ردة فعل
تلمست خدة: حبيبي شبيك
يباوعلي وجامد، خوفني(للكاتبة طيبة الربيعي)
نبأ: شبيك سامر
تنفس: معقولة الطفل بسرعة كبر، ثكلانة حيل
باوعتلة صفح وضحكت: بعدني ممار علية شهر
مشة للسرير خلاني وصعد يمي يتلمس بطني
سامر: نباوي هيج ويصير عندي طفل، يصيحلي بابا ومن يتوكح اصلخة براشدي معدل
نبأ: خربت الجملة بالأخير
ضحك وكرص خدي
سامر: حليانة
ضحكت: والله اليوم بيك شي، شكو
سامر: ليش لازم اكو شي، غير مريتي واتغزل بيج
لعبت بياختة: اريد اكلك شي
سامر: كولي(للكاتبة طيبة الربيعي)
نبأ: يصير نطلع وية روى واحمد، اليوم كتلهة عالحمل وكالت نطلع
سامر: اي ليش لا
دك فونة
سامر ...طرت من الفرحة من سمعت الخبر
صدك نسيت كل همومي، الحمدلله ربي
من ينسد باب تفتحلي بوب من رحمتك
مرت الايام والله فاتحهة بوجهي كلش
مادري هاي البنية كصتهة خير
والقاصة بدت تنملي شوية شوية
يعني فد شهر اذا استمر الرزق يزيد هيج اكدر
اسدد الديون العلية(للكاتبة طيبة الربيعي)
دك جهازي باوعت أحمد، باركلي وعزمنة عالغدة باجر
يمهم بالبيت ومناك نطلع، كتلة لا خل نروح للمطعم
مرتك حامل خطية مو مال تسوي عزيمة
والعندي تريد تغير جو
كال خوش لعد حضرو نفسكم معزومين علة احسابي
تشكرت منة وسديتة، ثاني يوم كلت الوائل يروح
وية صالح للمحل لان معزومين، ونبأ لحت الة فطوم
تجي، كتلهة ناخذهة بس انتي المسؤولة عليهة
كالت بعيني، اوف شكد احبهة ياربي
معقولة هو هذا الحب الحقيقي، من تحب
اليحبك ويكون اكو تبادل بالمشاعر، مشاعر مو مزيفة
لو علة مصلحة، مشاعر هيج من الله سبحانه
وصدق ربي سبحانه من كال
《 وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ 》(للكاتبة طيبة الربيعي)
صدق الله العظيم، يعني قذف حب نبأ
بكلبي بشكل مو طبيعي، من ارجع للبيت
عبالك راجع لجنتين
جنة امي وجنة مريتي
الحمدلله ربما نراه خيراً وهو شراً
الله بعد عني نور وقربلي نبأ
الي جنت مستحيل اتوقعهة تصير من نصيبي
سبحان الله انقلبت الموازين
بيوم وليلة، طلعت من الحمام
لكيت نبأ تهفي علة اضافرهة
سامر باستغراب: شتسوين
نبأ ...ثاني يوم شفت فطوم تفتر بالبيت
كلبي انكسر عليهة مبين ضايجة
اوف ياروحي ضايجة مثل خيتج
لجيت الة تجي(للكاتبة طيبة الربيعي)
وسامر وافق حياتي ميرفضلي طلب🙄
يمة لا احسد نفسي ويكلب علية
دخل يسبح واني كعدت اصبغ اضافري
ماروني واني بيضة طلع فد شي
صارلي هواية ممصبغة وويييي من زمااان
من ايام الجامعة
نبأ: صبغت اضافري وداريدهن ينشفن
سامر: وليش تصبغين اضافرج، غير طالعين
باوعتلة: اي ولان طالعين صبغتهن، غير اعدل نفسي
سامر: مسحي نبأ يجذب الصبغ، ماحبة
يبووو علية، صارلي ساعة اصبغ واعتني بي
اوف يا سامر
والله كلبي وجعني
اباوع لأيدي صارت تخبل وانوب تعبت عليه
لزمت ظهري: سامر والله ظهري انكسر عليه، فدوة بس هل مرة تنسيت عالصبغ
باوعلي صفح: كلاوجية وين اكو حامل تتنسة عالصبغ
كمت حاوطتة بيدي وخليت راسي(للكاتبة طيبة الربيعي)
علة صدرة: حباب بس هل مرة، شوفة شلون صار حلو تقبل هل جمال ينمسح؟
اخذ نفس وزفرة بعصبية
سامر: آخر مرة هاي
بستة: ماشي حياتي
دخلت فطومة مبدلة وشحلاتهة
فاطمة: يلة مو متت حر
ضحكنة ثنينة
سامر: الله مسلطج علينة انتي
شلتهة بوستهة: تغار منهة لان شكرة
سامر: ها بدينة بالعيارة، اذا طلع ابنج عليج شتسوين بية، تذبيني بدار العجزة مو بعيدة عليج
ضحكت: تسوة الاشكر والأحمر حبيبي، لو كل الزلم مثلك جان اتزوجتهم اجمعين(للكاتبة طيبة الربيعي)
سامر: دبدلي لا اندمج علة حجايتج هاي
بدلنة وطلعنة، شفت روى فدوة الحمل لايكلهة
واحمد ضعفان
سامر: شنو ماخذة من عافية الولد ولج
روى: دمشي وانتة ماخذ من عافية نبأ، الظاهر انتة الشايل الحمل
سامر: تسكتهة لا اضرب بطنهة اخليهة اجيب
ضحكنة اني وأحمد، بس احمد مدري شلونة
ضحك بس عبالك مطالعة من قلبة
انتبهت علية سامر أشرلة يعني شكو
أحمد اشر براسة ماكو شي
تغدينة وضحك وسوالف
فطومة ضاجت كامت تحوص
متحب تبقة كاعدة تحب تفتر
شاورت سامر من شفت روى واحمد يحجون
وممنتبهين علينة(للكاتبة طيبة الربيعي)
نبأ: سامر فطوم ضاجت واني اريد افتر شوية، راح اخذ روى ونروح وانتة شوف احمد شبي خطية مبين ضايج
سامر: وين تفترين يمعودة ماتشوفيهة كلهة شباب
نبأ: حبيبي منروح بعيد اكو محل قريب منا عجبني اشوف شنو بي، منطول
انطاني محفظتة
نبأ: ماشتري شي بس اباوع ماكو داعي
باوعلي بخزرة: آخر مرة هاي نبأ ترديني هيج، اشتري اليعجبج
تلمست ايدة: خلاص حبيبي اعتذر والله ماقصدي شي
سامر: ديلة روحي ولتتأخرين
نبأ: ماشي قلبي
اخذت روى ورحنة نفتر(للكاتبة طيبة الربيعي)
سامر ...احمد معجبني عرفت صاير شي مضوجة
لان احمد بعادتة مرح وميضوج لهل درجة
الة اذا صاير شي جدي
سامر: خير احمد شبيك شصاير
جر حسرة: هيج لتشغل بالك
سامر: دحجي انتة هيج راح تشغل بالي، شكو
احمد: سوالف النسوان التعبانة
سامر: يا ستار هم شكو
احمد: يومية عركة موتني، اريد اطلع ااجر شقة، امي ادور المشاكل دوارة وهاي العندي ماتتحمل كلشي وكتلت روحهة من البجي، اكلهة طببي منا وطلعي مناك ليش تهتمين، ماكو انوب تزيد
سامر: يعني امك الغلطانة؟
احمد: اي حيل تضغط علة روى واني اشوف بعيني بس والدة ماكدر احاجيهة، كلت اكسر الشر واخذ روى واطلع، ابوية موافقني بس امي بعدني مامحاجيهة(للكاتبة طيبة الربيعي)
سامر: زين ليش يعني روى مقصرة بحق احد بالبيت وامك هيج وياهة
احمد: هو هذا الكاتلني مامقصرة بشي الله شاهد، حامل وتشتغل اني اكلهة ارتاحي والوالدة مادري شبيهة كابة علة روى، هية ماتحبهة جي ماخذت بنت اختهة
سامر: هنا السالفة، لعد توكل واطلع قبل لتزيد المشاكل بس لاتغضبهة تضل والدتك وواجب ترضيهة
احمد: اي انشاءلله
ضل بالي يمهة وانوب طالعة حلوة زايد اليوم
كاعد علة اعصابي(للكاتبة طيبة الربيعي)
شوية ورجعن فطوم بيديهة شعر بنات
ونبأ كلشي مامشترية، شلون بهاي الفاهية اني
نبأ ...رجعتلة المحفظة شاورني
سامر: ليش مامشترية شي
نبأ: حبيبي وداعة بابا كلش ممحتاجة اصلا كمت علمود فطوم وعلمود تكلم احمد تشوف شبي
سكت مجاوبني، من رجعنة للبيت كالب خلقتة
وبليل طلعهة بفطوم
سامر: كومي انخمدي يلة
نبأ: ليش خليهة
سامر: انتي لتدخلين شي ميخصج لتفكين حلكج
شالهة واخذهة، هية ساكتة مبجت بس
شفتهة ضاجت، اوف يا سامر اوووف
رجع فاير وتمدد حتة منطاني مجال اكلمة
واني سكتت خايفة ليزيد والله مابية حيل
بليل كلش حسيت عليه حضني(للكاتبة طيبة الربيعي)
حضنتة يلة نمت، ثاني يوم جان طبيعي
فهمتة اقتنع، ورة اسبوعين تقريباً
من رجع سامر من الشغل جان ضايج
نبأ: شبيك حبيبي شصاير
سامر: ماكو شي
مقبل يحجي بس متأكدة صاير شي
حاولت افتهم من روى خاف احمد سامع شي
كالت انمار رايح لسامر للشغل ومتصالحين
كلش فرحت، مهما يكون يبقون اصدقاء
وبيناتهم زاد وملح مو صداقة يوم يومين
بس ماعرف ليش ضايج شنو المشكلة
مكدرت اسكت اريد اعرف منة شصاير
كلي: انمار اجة وتصالحنة
نبأ: عفية حبيبي مهما يصير تبقون اصدقاء وعشرة عمر(للكاتبة طيبة الربيعي)
سامر: ماعرف ماحسة مثل قبل
نبأ: ميخالف يجوز متوهم
سامر: لا، صديقي واعرفة
استمرت الايام عادية ماكو شي جديد
احمد لاكي شقة ويريد يطلع بس امة مموافقة
وكالت اذا تطلع اتبرة منك
كاللهة اذا ماتخلص المشاكل بينج وبين روى
اني اطلع، هية من يومهة مالهة شغل بروى
الحمدلله الله رازقني بأم ثانية مو عمة
فعلاً محظوظة
وبيوم اجاني مسج من غير رقم
من قريت الرسالة انصدمت(للكاتبة طيبة الربيعي)
"مرحبا نبأ شلونج، اني نور، اذا قريتي رسالتي ياريت تردين علية اطلب منج تسامحيني عالسويتة بيج، فعلا محتاجة دعائج، تعرفين المرض الي الله بلاني بي وهسه داتعالج وبعد اسبوع العملية، حيكصون الثدي مالي واريدج تسامحيني وتدعيلي خاف متنجح لو متنفع العملية اريد اروح لربي مرتاحة، مشتاقتلج واللمتنة الحلوة اني وياج وروى، ياريت تسامحوني"
من قريتهة دمعت عيني واتذكرت العشرة الي بينة
العشرة متهون الة على ابن الحرام
متحملت كلبي وجعني عليهة
دزيتلهة "هلو نور اني مشتاقتلج اكثر، انشاءلله تشفين وتكومين بالسلامة حبيبتي واني مسامحتج من كل كلبي صدكي وانشاءلله ترجع لمتنة بس اطيبين"(للكاتبة طيبة الربيعي)
دزتلي "اشكرج نبأ ام كلب الجبير، لتكطعين بية محتاجتكم صدكي"
بقيت على تواصل وياهة، ومرات نحجي
مكالمة بفراغي ومن سامر مموجود
ماريد اكلة اعرف مراح يوافق
واني ماريد ادخلة بيني وبين صديقتي
مهما يكون بيناتنة زاد وملح
والفات مات النظر للماضي مثل النظر للساعة
الخربانة، لا تقدم ولا تأخر
نجحت عملية نور الحمدلله
وروى عندهة علم بهل شي
واتفقنة نروح نزورهة بس بدون علم
سامر، واحمد همينة يدري رغم مموافق
بس لخاطر العشرة(للكاتبة طيبة الربيعي)
وهو هم انقهر عليهة، واني حرت شلون
اكذب عليه، صعبة حيل وهو محذرني
كلشي ولا الكذب لو اضم عليه شي
فعلا انحطيت بموقف كلش عسير
كلت اكلم عمتي
كتلهة كيت وكيت
كالت معليج روحي انتن صديقات
ومدام متندمة البنية وتوهة طالعة من الموت
المسامح كريم وانتي صيري احسن منهة
وبيومهة الصبح
كلمت سامر: حبيبي
سامر: ها(للكاتبة طيبة الربيعي)
نبأ: ذبني يم اهلي اليوم، مشتاقتلهم
سامر: وشكد تبقين
نبأ: يومين بالأكثر
سامر: دكومي اذبج هسه، وباجر بليل اجي عليج، تعرفيني ماحب تباتين بعيدة عني
نبأ: ماشي قلبي مثل متريد
وبيومهة اتفقنة روى تجيلي البيت اهلي
عود نطلع للسوك محتاجين شغلات نسائية
احمد يدري بس سامر كلشي ميدري
وكوة لازم نفسة ميكدر يضم علة سامر
لعد اني شكول اوف ياربي
رحنالهة جان شكلهة يبجي الصخر
ضعفانة عبارة عن هيكل عضمي
وهالات سود
كمنة نبجي وهية تبجي ويانة
اوف مأسات
بقينة يمهة بالساعتين
بجينة وضحكنة وتذكرنة ايامنة الحلوة
ماما مقبلت عالسويتة(للكاتبة طيبة الربيعي)
ومن رجعت رزلتني وكالت ميصير تضمين
علة رجلج، كتلهة ميخالف نور متندمة
والبنية مو بصحة جيدة حتة ارفضلهة هل طلب
نسوان اخوتي كالعادة شايخات
واحس اكو حركة بالبيت غريبة
احس ماما ضامة علية شي
كل ما اسألهة تكول ماكو شي وتغير الموضوع
اوف عبالك لغز
مرت الايام والاشهر
وبيوم خابرت ماما تبجي
نبأ: شبيج يوم شكو
ام نبأ: يمة اخوتج يردون يبيعون البيت وكلمن ياخذ حصتة
كلبي وجعني، شلون يبيعون بيت ابوية
وامي مفكرو بيهة؟ وين تكعد؟ ويامن؟
يعوفوهة وحدهة شلون ادبر حالهة وهية مرة جبيرة؟(للكاتبة طيبة الربيعي)
سامر ...رجعت من الشغل مالكيت نبأ
بس مرة صالح تصب العشة
صعدت مستغرب وينهة، طبيت لكيتهة تحجي
بالجهاز وصايرة حمرة
عصبية والدمعة محصورة بعينهة
سامر: ولج شكو
تحجي بالجهاز وبجت
اخذتة منهة، عمتي
سامر: عمة شكو شصاير
ام نبأ: عمة ولدي يردون يبيعون البيت وكلمن ياخذ حصتة
سامر: عمة ولا يهمج بيتنة مفتوح الج الله موجود
ام نبأ تبجي ونبأ تبجي
سديتة منهة، حاولت اهديهة انهارت
وانوب حامل موزين علة اعصابهة(للكاتبة طيبة الربيعي)
عطت بيهة: هسه دخلينة نفتهم ليش تبجين!
نبأ: مفكرو بماما وين تروح؟؟ شلون يعوفوهة وحدهة
وتبجي احتركت حرك
ثاني يوم اخذتهة ورحنة لبيت اهلهة
الافتهمتة كلمن يريد يطلع ابيت وحدة
وام نبأ يشترولهة بيت ابحصتهة ويكعدوهة بي
والله ماعرف من يا ملة ذولة
شلون ينطيهم كلبهم يذبون والدتهم؟
والله عجيب، كتلهة عمة ولا يهمج تجين يمنة
واذا فد نوب اخذلج بيت يمنة ونجي اني ونبأ
نعيش وياج، خطية مقهورة علة ولدهة
تكول ماريد شي منهم بس الحنية
شرايدة اني
اوف كطعت كلبي(للكاتبة طيبة الربيعي)
وهاي بس تبجي وفايرة تريد تكب بوجوههم
واني كوة لازمهة، اخذت عمتي باتت يمنة
ونبأ موتتني بس تبجي
سامر: كافي عمري هسه انتي عليمن مقهورة، متكيفين تعيشين وية امج
نبأ ...شكد قهروني الانذال، روحو انشاءلله
متتهنون وادعي من كل كلبي عليكم
انشاءلله تطلع حوبة امي بيكم
قلب والدة وحركتو حرك ربي يحرككم دنيا
وآخرة، ونسوان اخوتي ربي يطلعهة بيجن
وحدة وحدة، كل السويتنة وية امي ووياية
ربي يطلعة بيجن بالكبر من يكبرون اولادكم
نبأ: عفية سامر عوفني بحالي
سامر: شلون يعني اعوفج بحالج، لتبجين كافي كتلج
كمت اريد اطلع من الغرفة(للكاتبة طيبة الربيعي)
مخنوكة اريد ابجي وسامر ديضغط علية
جرني ورجعني عالسرير
وحضني: اذا تبجين ابجي علة صدري، خليني اشيل عنج مثل ماتشيلين عني
واني مصدكت جلبت بفانيلتة
طلعت دموعي كلهة
والبكلبي كلة طلعتة
ارتاحيت شوية وهو يمسد علة شعري
لحد ما غفيت
ثاني يوم امي كالت اريد ارجع
مارتاح الة ابيتي
مقبل تبقة
رجعهة سامر ومخلاني اروح ابات
سامر: كافي تقهرين بروحج، يجازون همة والله عبالج حوبتهة متعثرهم
نبأ: خايفة عليهة سامر خايفة، بيهة سكر متتحمل
سامر: كولي يا الله، ما بيهة الة العافية
نبأ: ونعمة بالله(للكاتبة طيبة الربيعي)
استمرت الايام وعرضو البيت للبيع
والي فاجئني ميردون ينطوني حصتي
يكولون انتي متزوجة ومو بعازتهة
واني الي جنت مفكرة اخذ حصتي
وانطيهة لأمي
والله ماخليكم تتهنون
هذا حقي
سامر ...مايردون ينطوهة حصتهة
هنا عاد اني تخبلت، رحت تعاركت وياهم
وكتلهم اذا ماتمشون عالحق ادخل القانون
اخوهة الوسطاني: دخل القانون، عساس راح يفرشولك السجادة الحمرة وينفذون التأشر عليه
استهزو وكامو ينفخون بريشاتهم
احمد ابوه ضابط بالاستخبارات
متقاعد وعندة عرف هواي(للكاتبة طيبة الربيعي)
اجيت احاجي عمتي مقبلت
ام نبأ بقهر: لا يمة عوفهم مهما يصير يبقون ولدي وطالعين من كلبي، ماريد منهم شي، يمة نباوي ام كلب الجبير تنازليلهم واخذي حصتي حبيبتي فدوة اروحلج ماريدكم تتخاربون علمود الفلوس
نبأ: ماما شدتحجين؟؟ كل الديسوي وكلبج يشفق عليهم؟!
ام سامر: عمة كلب ام شتحجين انتي، حسبي الله ونعم الوكيل بنسوانهم، هنة ساس البلة الاخوة شعليهم
تبهذلنة حيل
نبأ موتتني لا تاكل لا تشرب
وكلة تبجي، صراحة خفت عليهة
وانوب حامل
يعني بروحين مو مال تهمل روحهة
نبأ ...اني بيا حال وسامر يكلي ميصير
تهملين نفسج انتي بروحين(للكاتبة طيبة الربيعي)
مو بيدي نفسيتي مسدودة
كلبي ميت علة ماما، معقولة امي
ام كلب الطيب، الي ضحت بشبابهة علمودنة
تالي هيج تتجازة؟ ومن منو؟ من ولدهة؟
والله زحمة، حيل زحمة
سامر بعصبية: وتالي وياج! فتحي حلكتج!
نبأ: مااااريد
خنزر بعيني: تفتحي لو شلون
نبأ: كافي سامر كتلك مااشتهي
سامر ...فتحت حلكهة بالقوة وخليت لكمة بي
ذبتهة وركضت للحمام اسمعهة تتقيء
استغفرت ربي وطلبت الصبر والهداوة
راح ابتلي بيهة، رحتلهة للحمام(للكاتبة طيبة الربيعي)
لكيتهة منتهية وجههة اصفر وروحهة رايحة
جبتهة بالسياسة وكلتهة جم لكمة
استغفرالله ربي واتوب اليه
تعبتني حيل
حتة بالشغل بالي يمهة
نبأ ...بيوم اتصل بية اخوية الجبير
تعجبت اول مرة يسويهة
وكع الفون من ايدي من بجة وكلي
"راحت امي نبأ راحت"
حاولت استوعب الجملة
نبأ: شنو راحت، وين راحت
اخوية الجبير: صعد عندهة السكر وراحت يم ربج
فقدت التوازن ورجلية انشلن
شنو؟(للكاتبة طيبة الربيعي)
سامر ...واكف كدام المراية توني طالع من الحمام
امشط بشعري، وابواع لنبأ من المراية
تحجي وية اخوهة، شو هاي وكعت
ركضت عليهة: وج شبيج
متجاوب جامدة
ضربتهة علة خدهة علة كيف
سامر: نبأ شبيج فهميني!
باوعتلي مدمعة ومصدومة
نبأ: ماما ماتت سامر
ضليت اباوع بعيونهة
مامصدك السمعتة
عيوني دمعت وياهة
يتبع ...🌺

اعتذر منكم بشدة، لكن الضروف مسمحتلي اكتب وانشر
عندي دراسة كومة ومدالحك اكتب
انشاءلله اعوضكم
وهل بارت شبه طويل لخاطر عيونكم وتعوضياً عن البارحة، هذا كل الي لحكت اكتبة اعذروني
قرائة ممتعة❤

امي❤