الـدخيل

بارت ٣٦

-

يسمع ضحك من الصاله، و يوقف من فراشه، الوقت متأخر منو بيضحك لهالدرجه؟، يدخل للصاله و يلقى الاضاءه مسكره و جسم قاعد القنفه مو واضح الا من شاشة التلفزيون، و عرف انه طلال ابتسم و قعد على القنفه بعيد عنه، و ما حس فيه طلال، مرت دقايق، و فهد يبتسم على ضحك طلال

تصير دعايه، و يعتدل طلال بقعدته "ليش ما نمت؟" يفز طلال بشهقه بسرعه، و يفتح فهد الليتات بسرعه

"فهد!!! مب كذا ياخي طق اي شي و بعدين من متى انت هنا؟" يسأله بخوف و يرفع فهد جتفه

"قبل لا تصير الدعايه بدقايق ليش قاعد لهالحزه؟" يسأله و ينزل طلال رجله عالارض بعد ما كان منسدح عالقنفه

"مدري ما جاني النوم قلت اشوف التلفزيون" يقول له واقف من مكانه

"وين رايح؟" يسأل بسرعه توقعه بيروح ينام لانه جاء

"اسوي اكل" يقول له و يطلع فهد تليفونه بسرعه

"تبي مطعم؟" يسأل و يلوي طلال شفايفه

"لا رايح للجمعيه اليوم شريت اكل" يقول له مأشر عالمطبخ و يرجع ايده لجيب بنطرونه

"اوكي براحتك" يهز فهد راسه و يروح طلال للمطبخ، يفتح الثلاجه و يجيب اكله بسرعه و يقعد عالقنفه على بداية الفلم، اما فهد قام من مكانه راح لغرفته و طلع زقارته، اشعلها و فتح الدريشه و وقف جدامها معاه تليفونه يطقطق فيه و يدخن بالجو البارد

طلال استغرب ان فهد راح و ما رجع و حس انه سوا له شي غلط او ضايقه، لكن ما يبي يزعجه بالاضافه ان ما عنده موضوع يتكلم فيه معاه، لذا ما ازعج نفسه بانه يروح له و كمل يشوف الفلم

-

الساعه ٦:١٧ المغرب

"وربي اخرفنه اجيب راسه هالسلوقي هذا" يرد خالد و يضحك علي على رده

"مو متزوج؟" يسأل فهد، قاعدين بالصاله جدامهم الاكل و الفلم شغال و مشعل مشغول بايباده يطالع يوتيوب، لكن طلال مو معاهم قال انه راح يتأخر بالجامعه اليوم

"بلى متزوج ويع العن شكله هذه حركاته و متزوج؟" يسأل علي بتقزز و خالد على وجهه علامات مبين انه متقزز

"شجوه يلعن شكل محنته مو مطيفتها زوجته؟" يضحك فهد و يضحكون معاه و مرزوق حاس انه مكانه غلط بينهم كون متعب متزوج

"مثلاً مثلاً لو ادري ان علي متزوج بفضحه عند زوجته" يقول خالد و يخزه علي

"نعم؟" يعتدل بقعدته ملتفت لخالد

"اي خير شنو تلعب على الحبلين؟" يعتدل خالد قعدته و ملتفت لعلي بعد

"اخسي العب عالحبلين العب فيك انت بس حبيبي" يبتسم علي و يبتسم له خالد و يقرب منه