ALI (Completed)

Chapter 2: Ali

"Ehem! Ang sweet niyo pong couple." Magiliw na wika ng server ng Jollibee. Gulat na napatingin si Jodilyn sa babae. Turn na pala nila para um-order. Masyado siyang nilibang ng lalaki.

Napakunot noo si Jodilyn sa server. "Hindi kami magboyfriend/girlfriend o mag-asawa." Wika niya. Napatungo naman ang server sa pagkapahiya. "Pasensya na po ma'am."

"Akala ko ba sinabi mo kanina sa mga babae na asawa mo ako?" Biglang singit sa usapan ng lalaki. Pinandilatan ng mata ni Jodilyn ang lalaki senyales na manahimik ito. Ibinaling niya ulit ang tingin counter. "Isang order ng 2 pc chicken joy with drink."

"For dine in, ma'am?"

"Yes." Tumingin siya sa lalaki. "Ano gusto mo?" Bagot na tanong niya.

"Ikaw." Diretsong sagot ng lalaki. Pinandilatan ulit ni Jodilyn ang lalaki. "Umayos ka nga! Nagugutom na ako." Panenermon niya pa. Napatungo ang lalaki sandali at tumingin sa counter.

"Sss..."

"Sundae?"

Umiling ang lalaki.

"Sss..."

"Sprite?"

Umiling ulit siya.

"Sss..."

"Soup?!" Naiiritang sambit ng Jodilyn. Tila napipikon na talaga siya.

Mahirap bang banggitin ang io-order-in niya?!

Wika niya sa sarili.

"Ano nga?!" Sigaw niya kaya napaiktad ang server at ang lalaki.

"Spaghetti!" Biglang sigaw ng lalaki. Sabay na napabuntong hininga ang dalawang babae. Nasabi na din ng lalaki ang gusto niyang kainin.

Ilang minuto ang lumipas ay nailagay na ng server ang mga pagkain sa tray kaya bintbit na ito ni Jodilyn papunta sa bakanteng mesa at kasunod naman niya ang lalaki.

"Di ka pa ba uupo?" Inis na tanong ni Jodilyn. Kanina pa nakatayo ang lalaki at animo'y kinikilatis ang upuan. Napapatangang napatingin ang lalaki kay Jodilyn at umupo na.

"Kumain ka na." Sabay lapag ni Jodilyn ng plato ng spaghetti sa tapat ng lalaki.

Tinitigan lang ito ng lalaki na parang iniinspeksyon. Napakamot sa ulo si Jodilyn.

Ano bang gagawin ko sa lalaking 'to!

"Ito, tinidor. Gagamitin mo 'yan para tusukin ang spaghetti." Kinuha naman ito ng lalaki. Namimilog ang mata niyang kinikilatis ang tinidor at sunod niyang ginawa, ginawa niya itong suklay at parang nakikiliti pa sa ginagawa.

Palihim na natatawa si Jodilyn. Maya-maya pa ay biglang sumeryoso siya. "Akin na nga 'yan!" Sabay hablot ng tinidor. Sinimulan niyang haluin ang lumalamig na spaghetti. Pinaikot niya ang tinidor sa spaghetti at itinapat sa bibig ng lalaki. "Ibuka mo ang bibig mo at isubo mo." Mariing utos niya. Sumunod naman ang lalaki.

Pagala gala pa ang mga mata niya habang nginunguya ang pagkain. Maya-maya pa ay inabot na ni Jodilyn ang tinidor sa lalaki at kusa na itong natuto sa kung paano gamitin ang tinidor.

Sa wakas ay nakakain na ng matiwasay at tuloy tuloy si Jodilyn. Halos tatlong oras din sila na nasa Jollibee dahil ang tagal kumain ng lalaki. Nang matapos na siya ay tumitig ng seryoso si Jodilyn sa lalaki.

"Saan ka ba nakatira?" Panimulang tanong nito.

"Kahit saan saan lang. Wala kasi akong sariling tahanan eh." Malungkot na wika ng lalaki. Bahagyang nakaramdam ng awa si Jodilyn sa lalaki. Nanatili itong nakatitig sa lalaki na sumisipsip ng softdrinks sa straw. Gumawa pa ito ng kalokohan at hinipan ang straw kaya lumikha ito ng mga bula kaya napalitan ang pagka-awa ni Jodilyn hanggang sa mandiri siya sa inasal ng lalaki.