الرهان

الرهان 12

#الرهان١٢
#زينب_الموسوي
اتصلت بفيصل لحد ماايدي تعبت ومايجاوب لجئت للبجي بعد مااعرفت مراح يسامحني ودخلت غرفتي اكمل البجي وغفيت ساعه التسعه باليل سمعت صوت فيصل يسال دعاء سيف رجع
رجع العصر ومافتحنا الباب وراح
وليش مافتحتوا الباب
بعد ماانأمن بيه هم يسووي مصيبه ويبلينا
تعشيتي لو بعدج في اكل لو تحبين
تسلم عمو مسالت على سمر واتصلت بيك كم مره مجاوبت
عوفيه هذا الموضوع اني اتصرف بيه
سمعت هذي الجمله عرفت عقابي راح يكون عسير
انتظرت يدخل للغرفه مدخل خليت ميكب لبست اكثر الملابس انحراف بالعالم وانتظر وظليت انتظر
شويه وصل سيف افندي دخل گعدوا ياكلون ولا عبالك في ادميه محبوسه بالغرفه بعدها
دعاء اصعدي لغرفتج عندي حجي ويه سيف
صار عمو
لبست روب وگفت بالممر اسمع زين ودعاء تشوفني لان بقت واكفه على الدرج
شنو قصدك من الي سويته اليوم گدام جماعتك تتصور انت وياهم احسن مني طول عمري اعاملك ادمي بس اليوم ثبتتلي انت حيوان وداخلك اسود
عمو والله نادم كان القصد اقهر سنفوره ودعاء
لاتكول سنفوره اسمها سمر مرت عمك وثانيا ليش تقهرهن رجوله هذي تقهر بنات وحده بت عمك وحده مرت عمك گدام شباب اغراب
تسرعت عمو سامحني القصد كان تعرف هنه ميحبنك اثنينهن مستفادات منك
وانت تحبني ليش محجيت بالرهان من اجيت وگتلك احب سمر وراح اخطبها والبنيه سالتها جاوبت مااريد سيف حجينا رجال لرجال ليش سمحت بالرهان على عمك من بنات اثنين وگدام الشله وصديقك يگول ضحكنا بيومها انت رجال المفروض تردهن اثنينهن والي ضحك ترگعه بالكاع
مكنت اعرف بالرهان ومصار گدام الشله كذبت
من دعاء سمعت الجمله اشرت علامه النصر
يمتى عرفت بالرهان
بعد ماخطبت سمر وسكتت حتى انت تتزوج وتفرح
لا سكتت حتى اشتريلك سياره سيف انت مستفاد اكثر منهن سمر لحد الان  ماشتريتلها سياره ومااخذت غير المهر
عمو اني اسف واعتذر منك ومن البنات اذا تريد
البنات مالك علاقه بيهن وتنزل على صفحتك صوره الي والك وجوها اعتذار منك لاتخلي العالم تتفرج علينا اني معتبر نفسي ابوك الا اذا انت متريد اكون ابوك
عمو انت تاج راسي والله طيش شباب وعناد وبس
دخلت للغرفه واني مطمىنه راح اخذ قاط رزاله وبعدين يسامحني صارت ب١باليل وهو گاعد يم سيف افندي سوالف وحجي وعتب واني ملطوعه انتظر مليت ديثكل علينا شيخ فيصل
دخل وگفت على اساس حتى يشوف حسني وجمالي حجيت
فيء
اششش ولاكلمه ماالومج الوم نفسي الي مشت ورا مراهقه روحي نامي ومااسمع صوتج مااگدر اطردج ولا اطلكج واصير مضحكه للشله مالتج اخذته شهر وعافته وسيف ودعاء مااريدهم يعرفون بهذا الشي يسافر سيف واترك الغرفه الج وانام بالمختبر
ميصير هيج في يعني تسمع منهم كلهم وتسامحهم واني لا سيف حجالك كلشي ودعاء وافتهمت اسمع مني
مااريد اسمع وتعرفين طبعي لااعرف اصيح ولا اضرب فسكتي احسن
اذا الصياح والضرب يخليك تسمعني سويها الله يخليك فيء ماتراهنت حتى اخذك واتزوجتك  وكنت ممنطني وجهه تراهنت اغير ملابسك وحياتك  وبيني وبين دعاء اقسم بالله محد يدري تراهنت اني وياها اغيرك وبعدين حبيتك اني اول وتراهنت اخليك تحبني  بيش احلفلك وعيونك عندي اغلى من روحي
ليش كنتي متاكده احبج
ماادري فيء لان حلوه يمكن
لو كلتي هذا زوج ومشايف بنات وراح يوگع بسرعه
مااجذب گلت ميعرف بنات وراح ميصدك وحده مثلي تحبه
ليش كم مره تراهنتي على غيري وكسبتي الرهان
والله العظيم ولامره انشاالله اموت اذا اجذب
وشنو كانت جائزه الرهان
مااگدر اگول شي تافه فيصل كانت سوالف مراهقات وحجي بنات گاعدات بغرفتهن ويتمنن كل ميطلع ممثل مطرب رياضي نكول حنتزوج هذا وهذا ابو جهالي وهذا صاك هذا حجينا
شنو الجائزه احجي
سيف كان يحبني انت تدري ودعاء تحب سيف الي تفوز بالرهان تاخذ سيف
اذا تريدين تاخذين سيف شلون تراهنتي تخليني احبج واخذج معناه انتي مكنتي تريديني الي
وانتي ودعاء كذبتوا الرهان كان منو تفوز بسيف
هذي الحقيقه بس بعدين حبيتك الك
او حسبتيها صح وشفتي الفائده اكبر اذا اخذتيني
لا والله مافكرت هيج اقتربت منك حسيتك انسان يستحق الحب وبعمري لحظه وحده ماحبيت سيف واساله كم مره گال اريدج كتله احنا اصذقاء
انتي مخبله شاربه شي هسه گلتي تراهنت حتى اخذ سيف
فيء حجي مراهقات كل شويه نريد واحد ونحب واحد والله
وشمدريني هذا مو حجي مراهقات
اقتربت منا فيء  كم مره كنت وياي بالفراش الرجال يعرف بتلك اللحظات البنيه الي وياه تحبه لو لا اسال نفسك تعرف احبك وكل جزء بيه رايدك وذايب بيك لاتغالط روحك فكر ويه نفسك الليله وسامحني اني اخذتك لان عقلك جبير وراح تاخذ بيدي ونعبر اكبر من هاي المشكله
روحي نامي سمر عوفيني ويه نفسي
على راحتك بس فدوه لاتنقهر زايد لااني ولاغيري نستاهل
دخلت لفراشي بالكوه مسيطره على نفسي والي حجيته مكنت مفكره بيه ولامحضرته ولا كنت اعتقد عندي القدره على توصيل افكاري اله لكن الانسان من يحس كلماته راح تكون سبب في نقاذ حبه يجد الكلمات تطلع  من قلبه مو لسانه
فيصل خلص ليلته على الكرسي بغرفتنا والصبح من گعدنا نفس الشي مطايقني وحتى الجهة الي اني بيها ميباوعلها
فيء حبيبي اذا ضايج مني اروح لبيت امي لحد تفكر ويه نفسك وارجع
اذا تريدين تروحين روحي محد لازمج