ﺍﻻﻳﺎﻡ ﻣﺮﺕ ﻭﺍﻟﺘﻘﻮﻝ ﺍﻻﺳﺒﻮﻋﻴﻦ ﺍﻟﺠﺎﻱ ﻓﻴﻬﻦ ﻭﺩ ﻋﻤﺘﻬﺎ ﺩﻳﻞ ﺑﻘﻦ ﻟﻲ ﻗﺪﺭ ﺍﻟﺴﻨﺔ .. ﺍﻫﺎ ﺍﻳﺎﺯﻭﻝ ﻏﺎﻳﺘﻮ
ﻭﻛﺖ ﺍﻻﺳﺒﻮﻋﻴﻦ ﺍﻧﺘﻬﻦ ﺍﺗﺼﻠﻮ ﻋﻠﻴﻨﺎ ﻣﻦ ﺍﺑﺮﺍﻫﻴﻢ ﻣﺎﻟﻚ .. ﻭﻗﺎﻟﻮ ﺟﻴﺒﻮ ﺍﻟﻤﺮﻳﺾ .. ﻳﻌﻨﻲ ﺍﻟﺪﻛﺘﻮﺭ
ﺍﻻﻟﻤﺎﻧﻲ ﺟﺎ ﻭﺧﺎﻳﺐ ﺍﻟﺮﺟﺎ ﺩﻩ ﻣﺎﺟﺎ ..
ﺍﻫﺎ ﻳﺎﺯﻭﻝ ﺷﻠﻨﺎ ﺻﺎﻟﺢ ﺷﻴﻞ ﻭﺭﻛﺰﻧﺎﻫﻮ ﻓﻲ ﺍﻟﻜﺮﺳﻲ ﺍﻟﻮﺭﺍ ﻓﻲ ﺍﻟﻌﺮﺑﻴﺔ .. ﻭﻫﻮ ﻣﺎﻓﻴﻬﻮ ﺣﺮﻛﺔ
ﻭﻻﻛﺸﻴﺸﺔ ﺑﺲ ﻭﺍﻋﻲ .. ﻭﺍﻳﺪﻳﻬﻮ ﺩﻳﻞ ﺑﻘﻦ ﻧﺎﻋﻤﺎﺕ ﺯﻱ ﺍﻳﺪﻳﻦ ﺍﻟﻄﻔﻞ .. ﻭﺟﺴﻤﻮ ﺩﻩ ﺑﻘﻰ ﻧﺎﻳﺮ ﻣﻦ
ﺭﻗﺎﺩ ﺍﻟﻀﻞ .. ﻭﺍﻟﺒﺖ ﺍﻟﻤﻤﺮﺿﺔ ﺍﻻﺳﻤﻬﺎ ﺍﺳﻤﺎﺀ ﺩﻱ ﻣﺸﺖ ﻣﻌﺎﻧﺎ ﺑﺎﻟﻠﻪ ﺍﻟﺘﻘﻮﻝ ﺻﺎﻟﺢ ﺩﻩ ﺍﺧﻮﻫﺎ ..
ﻏﺎﻳﺘﻮ ﻓﻲ ﻧﺎﺱ .. ﺳﺒﺤﺎﻥ ﺍﻟﻠﻪ ﺭﺑﻨﺎ ﻗﺎﺳﻢ ﻟﻴﻬﻢ ﺍﻻﺧﻼﻕ .. ﻭﺍﻻﺻﺎﻟﺔ ..
ﺍﻟﻤﻬﻢ ﻭﺻﻠﻨﺎ ﻫﻨﺎ .. ﻭﺍﻟﺪﻛﺘﻮﺭ ﻃﻠﺐ ﻓﺤﻮﺻﺎﺕ ﻭﺗﺤﺎﻟﻴﻞ ﻭﺻﻮﺭ ﻭﺭﺍﺟﻊ ﻛﻞ ﺍﻟﻤﻠﻔﺎﺕ ﺍﻟﻘﺪﻳﻤﺔ ﺑﺘﺎﻋﺔ
ﻋﻼﺟﺎﺕ ﺻﺎﻟﺢ ..
ﻭﻗﺎﻝ ﺍﻟﺰﻭﻝ ﺩﻩ ﺑﺘﻠﺰﻣﻮ ﻋﻤﻠﻴﺔ . ﻓﻲ ﺍﻟﻨﺨﺎﻉ ﺍﻟﺸﻮﻛﻲ . ﻭﻣﺤﺘﺎﺝ ﻳﺮﻗﺪ ﺑﻌﺪ ﺍﻟﻌﻤﻠﻴﺔ 45 ﻳﻮﻡ .. ﻭﻗﺎﻝ
ﺍﻟﺰﻭﻝ ﺩﻩ ﺑﻘﻮﻡ ﺯﻱ ﺍﻟﺤﺼﺎﻥ .
ﺑﺲ ﺍﻟﻌﻤﻠﻴﺔ ﻛﺎﻧﺖ ﺗﻜﻠﻔﺘﻬﺎ 21 ﻣﻠﻴﻮﻥ ﻓﻲ ﺍﻟﺰﻣﻦ ﺩﺍﻙ .. ﻛﺎﻧﺖ ﺑﺘﻮﺩﻱ ﺍﻟﺰﻭﻝ ﺍﻻﺭﺩﻥ .. ﻭﻧﺤﻦ ﺷﻔﻨﺎﻫﺎ
ﻛﺘﻴﺮﺓ ﺷﺪﻳﺪ .. ﻭﺍﺗﻜﻠﻤﻨﺎ ﻣﻊ ﻧﺎﺱ ﺍﻻﺩﺍﺭﺓ ﺑﺘﺎﻋﺔ ﺍﻟﻤﺴﺘﺸﻔﻰ ﻭﺑﻌﺪ ﺗﻠﺘﻠﺔ ﺧﻠﻮﻫﺎ ﻟﻴﻨﺎ 19 ﻭﻧﺺ .
ﻭﻣﺎ ﻣﻌﺮﻭﻑ ﺗﺘﻢ ﻭﻻ ﻣﺎﺗﺘﻢ .. ﺍﺑﻮﻱ ﻗﺎﻝ ﻟﻲ ﺍﻧﺎ ﺑﺪﺑﺮ ﺍﻟﻌﺸﺮﺓ ﻭﺍﻧﺖ ﺗﺪﺑﺮ ﺍﻟﺘﺴﻌﺔ ﻭﻧﺺ . ﻭﺑﺎﻗﻲ
ﺍﻟﻤﺘﻄﻠﺒﺎﺕ ﺍﻻﺩﻭﻳﺔ ﻭﻏﻴﺮﻭ ﻧﺘﺸﺎﺭﻛﻬﺎ ..
ﺍﻧﺎ ﻃﺒﻌﺎ ﻭﺍﻓﻘﺘﺎ .. ﻟﻮ ﺑﻌﺖ ﺍﻟﺒﻀﺎﻋﺔ ﺍﻟﻌﻨﺪﻱ ﻋﻠﻰ ﺍﻟﻜﺎﺵ ﺍﻟﻌﻨﺪﻱ ﻳﺎﺩﻭﺏ ﻣﻤﻜﻦ ﺗﺘﻢ .. ﻏﺎﻳﺘﻮ ﺍﻟﺴﻮﺍﻫﺎ
ﻓﻴﻨﺎ ﺍﻟﺒﻨﻘﻮ .. ﺍﻟﻤﻨﺠﻞ ﻓﻲ ﺍﻟﺒﺮﺳﻴﻢ ﻣﺎﺳﻮﺍﻫﺎ .. ﺍﻟﻠﻪ ﻳﻠﻌﻦ ﺍﻟﺒﻨﻘﻮ ﻭﻳﻠﻌﻦ ﺍﻫﻠﻮ ﻭﻧﺎﺳﻮ ..
ﺍﺩﻭﻧﺎ ﻣﻮﺍﻋﻴﺪ ﺑﻌﺪ 11 ﻳﻮﻡ ﻟﻠﻌﻤﻠﻴﺔ .. ﻭﺭﺟﻌﻨﺎ ﺍﻟﺒﻴﺖ .. ﻃﺒﻌﺎ .. ﺍﻟﻮﺩ ﺳﺎﻟﻢ ﻣﺎﻓﺎﺭﻗﻨﻲ ﻭﻻﺩﻗﻴﻘﺔ ..
ﻭﺷﺎﻳﻞ ﻣﻌﺎﻱ ﺻﺎﻟﺢ ﺍﺧﻮﻱ ﻣﻦ ﺣﺘﺔ ﻟﻲ ﺣﺘﺔ .. ﻧﻌﻢ ﺍﻟﺼﺎﺣﺐ ﻭﺍﻟﺼﺪﻳﻖ ..
ﺗﻮﺏ ﻋﻠﻰ ﺍﻟﺠﻤﺎﻋﺔ ﺍﻟﻔﻲ ﺟﺒﺮﺓ ﺍﻟﺒﻤﺸﻲ ﻟﻴﻬﻢ ﺻﺎﻟﺢ ﻳﺘﺴﻄﻞ ﻣﻌﺎﻫﻢ .. ﻣﺎﻓﻴﻬﻢ ﺍﻱ ﺯﻭﻝ ﺟﺎﻫﻮ ﺯﻳﺎﺭﺓ
