A Kristine Series Fanfiction: Elisse, Dearest (Completed)

Chapter Five

Sa unang pagtatagpo pa lamang nilang dalawa kanina ni Vivian ay 'di maipaliwanag ni Elisse kung bakit nararamdaman niyang mabigat ang loob nito sa kaniya sa 'di niya malamang dahilan.

Pagkatapos nilang kumain ay muli silang bumalik sa kanilang kwarto kung saan siya kinompronta ni Vivian.

"Sipsip!" pasinghal na paratang ni Vivian kay Elisse.

Napatingin ang lahat sa kanila dahil sa pagkabigla.

Gumuhit ang pagkalito sa mukha ni Elisse. 'Di alam kung bakit siya pinagbintangan ni Vivian ng ganoon. Gusto niya sanang magsalita. Pero, nagdadalawang-isip siya kung papatulan niya 'to. Sa halip ay si Sarah ang gumawa n'on para sa kaniya.

"Anong sinabi mo?!" galit na tanong ni Sarah kay Vivian. "Kasalanan ba ni Elisse kung naging paborito kaagad siya ni Rikki?! Kasalanan ba niya kung mas magaling at mas maganda siya kesa sa 'yo?!"

Ngayon ay alam na ni Elisse kung bakit gano'n na lamang ang pagkamuhi ni Vivian sa kaniya simula't sapul nang dumating siya sa club. 'Yon ay sa kadahilanang nanggagalaiti si Vivian dahil mas maganda raw siya kung ihahambing kay Vivian ayon na rin sa sinabi ni Sarah.

Bagaman sa una'y nahirapan si Rikki kay Elisse ay nakipag-cooperate pa rin 'to sa huli. At dahil sa kahusayang pinakita niya'y nagustuhan siya kaagad ng manager nila.

Nag-alburuto ang dugo ni Vivian dahil sa sinabi ni Sarah. Imbis na sugurin ang kaaway na si Sarah ay si Elisse ang pinagbuntunan nito.

Sinunggaban kaagad ni Vivian ang buhok ni Elisse. Napahiyaw si Elisse sa sakit. Biglang nanumbalik sa kaniyang alaala ang ginawa sa kaniya ni Nelia ilang araw pa lang ang nakakalipas. Heto ngayon at tila nauulit na naman ang kasaysayan. She was traumatized. Nag-panic siya.

Tumulong si Sarah at ang ilang mga babae sa pag-awat kay Vivian sa pagsabunot na ginagawa nito kay Elisse. Naging matagumpay naman sila sapagkat nagawa nilang pakawalan si Elisse mula kay Vivian.

Humihingal silang lahat. Pero, 'di pa rin nagpapigil si Vivian. Umarangkada 'tong muli. Pinangsalag ni Elisse ang kaniyang braso. Nahablot ni Vivian ang kaniyang polseras.

"Ibalik mo sa 'kin 'yan!" galit na utos ni Elisse kay Vivian. Akmang si Elisse naman ang susugod kay Vivian. Pero, natilihan siya nang bumukas ang pinto ng kanilang silid.

Tumambad sa kanila ang galit na galit na mukha ni Rikki. Sa tabi niya'y si Bruno. Naaktuhan nila si Elisse sa gano'ng ayos na animo'y tigreng dadambahin ang kalaban.

"Elisse!" tawag nito sa pangalan niya na parang siya ang puno't dulo ng kaguluhang naganap.

Bigla namang umarte si Vivian na animo'y inapi.

"'Di po siya ang pasimuno–" depensa kaagad ni Sarah.

"Shut up, Sarah!" putol sa kaniya ni Rikki, 'di pa rin nito hinihiwalayan ng tingin si Elisse. "Kabago-bago mo pa lang dito. Pero, ganyan na ang attitude na pinapakita mo!"

Gusto mang mangatwiran ni Elisse. Pero, animo'y nalunok niya ang kaniyang dila.

"Akala ko pa naman ay 'di ka sakit ng ulo," Rikki said, his voice laced with disappointment. "Nagkamali pala 'ko. Sige, Bruno! Damputin mo ang babaeng 'yan at i-bartolina."

Kaagad namang sinunod ni Bruno ang utos ng kaniyang amo. Hinawakan niya si Elisse sa braso nito't kinaladkad palabas ng silid. Iwinawaksi ni Elisse ang mga kamay ni Bruno sa kaniyang braso. Pero, parang mga bakal 'tong nakakapit sa kaniya.

"Nasasaktan ako!" daing niya rito. "Bitiwan mo 'ko!"

Nadaanan niya ng paningin si Vivian. Naaninag niyang nginisian siya nito.