Lyrical Paradox | ✔

❝Ang Panaginip❞

Madalas sa ating pagtulog

Tayo ay naglalakbay

Patungo sa isang daigdig

Doon tayo nabubuhay

Ang mga mata'y pikit

Sa realidad kung saan

Mga pighati't paghihirap

Ay ating tinatakasan

Tayo ay iba sa ating mundo

Mundo na kung tawagin ay paraiso

Ating mga pangarap sa buhay

Ay nakakubli lamang dito

Wala ni isang nakaaalam

Kung hindi tayo lamang

Masayang naglalakbay

Sa mundong isang panaginip lamang

Doon ay masaya

Ngunit dito ay lumuluha

Bakit nga ba kabaligtaran

Ang ating nararanasan?

Minsan atin ng hiniling

Na sana'y hindi na magising

Hindi na mamulat pa

At masaktan ang damdamin

Masakit isipin na sa ating panaginip

Doon pa tayo maligaya

Ngunit sa ating mundong ginagalawan

Puro kasinungalingan ang dala

Alin nga ba ang mas makatotohanan?

Ang mundong ating sinilangan

O ang mundo na tayo mismo ang bumuo

At matagal na nating pinapangarap?

Sana sa pagdaan ng mga araw

Sa dami ng panaginip na dumalaw

Umayon ang kapalaran sa iyo

Na ang isa ay maging totoo