#طوبى "جنة طوبى"
#جمان_فريد
#الجزء_123"ياربيع أيامي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#ذكر_الله
«إن ذكر اللّه عز وجل يُذهب عن القلب مَخاوِفه كلّها، وله تاثير عجيب في حصول الأمن، فليس للخائف الذي قد اشتد خوفه أنفع من ذكر اللّه عز وجل، إذا بحسب ذكره يجد الأمن ويزول خوفه..
ابن القيم رحمه الله.. 🚫تنويه🚫
اخترت نختصر العرس التارقي ومانتعمقش في التفاصيل بسبب التنوع والاختلاف الكبير في عادات التوارق حتى في افراحهم لهدا سكرت باب الجدل قبل لينفتح وقررت نسرد احداث الفرح بإختصار وسطحيه مع حبي واحترامي لطوارق ليبيا في كل مكان...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"سكنتَ فؤادي مُنذ أوّلِ نظرةٍ
وما زلت في لُبِّ الفؤادِ تجُوبُ!"🍃
________________________________________
في هالليلة الربيعيه جميله..
مسموعه اصوات الافراح في احدى مناطق مدينة الكفره..
من حوش جدة عبد القيوم اللي حلوا عليه طوبى واهلها ضيوف كلهم بدون استثناء كانوا حاضرين..
سدرة وفردوس وغرفه واريج و مطيره وصفيه وحتى هاديه وعرب بنغازي سالمين وكاريمان..
كلهم كانوا موجهين انظارهم لطوبى اللي خطفت القلوب بطلتها بالزي التارقي اللي زادها بهاء وتميز وجمال وقوة حضور..
مش هما بس..حتى صفيه بنت عمة راجلها وخالاته اللي جو يحضروا هالليله مع بعض الجيران..
خالاته اللي ماكانوش متقبلين ارتباط ولد اختهم بيها الليله حسوا بشعور عدم التقبل بدي يتبدد خشت خواطرهم وعجبتهم هلبه وحبوا بنتها..جنونه اللي كانت ترقص مع مئاب ع اصوات الاغاني والدربوكه التارقيه..
🍀حضور جزء من اهل العريس ليلة الفرح عند العروس تعتبر حالة استثنائية لأن وضع طوبى وعبد القيوم من اساسه استثنائي..
ومش هدا بس اللي كان استثناء..اليوم اللي بعد هدا حتقام ليله فرح تانيه في قاعة افراح وتلبس طوبى الفستان الأبيض..رغبة عبد القيوم وامنيته ومافي حد قدر يعترض عليها...
🍁عبد القيوم اللي كان متصدر الموجودين في خيمة الفرح وهو لابس الزي المميز للعريس التارقي وحتى طريقة لبس عمامته"الشاش"كانت مختلفة جدا عن المعتاد..
الحضور من اقرب الناس ليه..عمامه بن عمينه خواله وولادهم..الحاج جبريل الصابر عديله المهدي ولد عم زوجته حسين وبوه عبد المطلب ولايمكن تكمل فرحته من غيرهم اعز اصحابه ربيع وسامي اللي اختاروا يلبسوا تارقي في هالليله..
وايضا من ضمن الحضور كان موجود صديقه عيسى وبعض من اصدقائه من مدينته وبنغازي...
كلهم لاحظوا فرحته الكبيره اللي كانت تتناثر من عيونه واكثر من كان فرحان لفرحته عمه عبد الله وخاله عبد القادر عاشوا الحب وعارفين اللي مر بيه ومن قلوبهم تمنوا من الله دوم فرحته عمره كله...
🍃لكن عماته..
"افف استغفر الله العظيم"
هادي وحده من عماته قعمزت جنب اختها سليمه وهي معصبه شافتلها وقالت..
/كنك؟
قالتلها بنرفزة..
/الجيران يسألوا قالوا مش قلتوا بدير فرحها في طرابلس ليش بكره بدير حفلة في القاعه..
مررت سليمه نظرها ع الحاضرات وهي تقول بإبتسامه مصطنعه..
/وانتي شن قلتي!؟
=شن بنقول كذبت وقلت عبد القيوم يبي هك..
هزت سليمه راسها بصمت ومن داخلها كانت مستاءة جدا..
🍃🍃
ومن جنوب شرق البلاد لغربها تحديدا العاصمه طرابلس..
كان عمر مقعمز مع اخته نسرين في دارها يهدرزوا عن موضوع مقلق للغايه..
🍃عمر:قريب طار من الفرح لما خبرته وعاد اكيد عارفه فرحته مش بنضال..
نسرين بخوف:هو شن قالك بالزبط؟
عمر:ماقال شي لكن واضح متأمل هلبه..
قالتله:قول زاد توهم..خديجه قالتلي داير في شقته قطاطيس وورد ومعلق صورة المراة في داره..
عمر بصدمه:كيف!!
سكتت نسرين وهي تمسح ع فخدها بتوتر وخوف..
عمر وهو مصدوم..
/المراة ع ذمة راجل الزفت!
نسرين بخوف:وكان يعرف الله اعلم شن يدير خوك حالته موليه خطيره هلبه ياعمر..
مسح عمر بيده ع شعره للخلف وهو معصب وخايف في نفس الوقت...
🍃🍃🍃🍃
مقعمزة في دارها شاده كتاب ديني تقرا فيه..
ع طلعة راجلها من الحمام وهو لابس "ديشمبر"بعد مادار "دوش"..شافلها شويه بعدين غير نظره لولده لقاه راقد ع سريرهم بعمق..
رد نظره ليها بعدين مشالها..لما وصل فيها نزل لراسها وطبع عليه قبله طويله ولما بعد شويه قال..
/مشتاق..
ابتسمت فاتن بالغصب وقالت..
/نحس في روحي تعبانه شويه ومش في المود..
وقف ع حيله بعدين مشي قعمز جنبها ع الكنبه وقال..
/ملاحظ انك وليتي تتهربي مني..
ضحكت وقالت بإستغراب..
/نتهرب!
هز راسه بصمت..
فاتن بضحكه..
/معقوله مختار تفكر هكي!معقوله مش ملاحظ ان علاوي متعبني هلبه خلاني منهكه طول اليوم..
مختار:باهي واني..ليا عليك حق ولاماليش..ماقريتش الحاجه هادي في الكتب اللي وليتي معتكفه عليهم هلبه الفترة الأخيره..
بلعت فاتن ريقها وهي مبتسمه ابتسامه تخفي توترها..
سكرت الكتاب وحطاته ع جنب وجت بتقرب منه هو بعدها وناض وقف وهو يقول..
/الامور هادي مايمشيش حالها بالمجامله..ومشي للدولاب بيطلع منه ملابس..
هي اللي كانت تشوفله بشي من الريبه قالت..
/اسفه مختار..حبيبي..
هو خدي حوايجه وطلع من الدار بدون مايرد عليها..
غمضت عيونها بأسف شديد..ضربت بايديها ع جبهتها وقالت بغضب مكتوم..
/غبيه..
🍃اما هو خش لمكتبه سكره عليه ولبس حوايجه وهو معصب..
مشي للمنظومه شغلها ع سنفونيه لأحد الموسيقين العالميين ومشي تمدد ع كرسيه الجلد وغمض عيونه..
وحواليه تحوم ذكرى مؤلمة كل مايتفكرها تبدا عنده رغبه شديده في جريمة وفي نفس الوقت يزيد نفوره من أي شي ليه علاقه بالدين..
🔺️🔺️🔺️قبل اكثر من عشرين عاما🔺️🔺️🔺️
حامل قلبه المجروح وهو ماشي ناحية اكثر مكان يحبه المكان اللي شافها فيه اول مرة كان مقهور وهو يسمع في صوتها تكلم في حد..
وقف في مكانه ورا شجره وعيونه المليانة غضب وغيره ودموع عليهم..
هي اللي كانت مقعمزه مع خطيبها وشاده في يدها مايشبه الدفتر..
كانت تقول..
/ماتتصورش قد ايه فرحت بهديتك دي..
خاطبها قال بإبتسامه..
/ومازال بعدين نعلمك القرآن كله ونزيد نعرفك بالإسلام..
بإبتسامه قالت..
/تعرف..انا حاسه ان ربنا كافئني بيك بعد مادخلت الاسلام..
هو قاللها بإبتسامه..
/انتي اللي ربي كافئني بيك ..
نزلت عيونها وهي مبتسمه بخجل..
ضحك ع خجلها بعدين قال..
/ان شاء الله يعدوا هالشهرين في طرفة عين..
ناضت وهي تقول بإبتسامة خجل..
/استأذن..ومشت بسرعه خشت داخل وخاطبها معاها بعيونه اللي باين فيهم الحب عكس عيون مختار اللي كانت مليانة حقد ودموعه ينزلوا..
🔺️🔺️🔺️الوقت الحاضر🔺️🔺️🔺️
خدي الريموت وعلى صوت المنظومه ع الاخر وكأنه المكتب حينهد ع راسه من قوة الصوت وهو غمض عيونه وحط ذراعه عليهم..
🍃🍃🍃🍃
فهالوقت..
فايزة مقعمزة في وسط شقتهاوحواليها بناتها كانت تحكيلهم عن سفرتها للبنان شن دارت وين دهوروا "تجولوا" هي وصفاء بنتها واشرف وفي عز هدرزتهم وصل فيديو لفايزة فتحاته طول ضحكت وهي تقول..
/ياوخيتي سلمها..
قربوا تفرجوا معاها ابتسموا ببهجة ومروة قالت..
/تجنن طوبى كيف طالعه..
تاله:محلاها محلاها..
فايزة بإبتسامة حب:الله يبارك..
🌼🌼🌼🌼
وداروا عادات وطقوس الأفراح للعريس التارقي وكله كان موثق بعدسة سامي فيديو وصور..
الاجواء للناس اللي اول مرة تحضرها كانت جدا ممتعه وعجبتهم هلبه لكن العريس مش قادر يصبر كان تواق ومشتاق جدا لشوفة عروسه بالزي التارقي..
وبعد طول انتظار جاته اللحظه اللي تمناها..
🌼"هي بالشويه عليك ياسمحة"
هادي صفيه واخده طوبى من يدها بطلعها لراجلها في جنان الحوش..المكان اللي بيشوفها فيه كان مستخطي والسور حوالين الحوش عالي..
يراجي ع نار وهويشوف للباب اللي بتطلع منه ومش طايقه صبر..
بانت عليه وحده لابسه عبايه وخمار عرفها صفيه بنت عمته..
قدم كم خطوة بعدين وقف لما شافها طالعه..
هو وقف..والزمان وقف..والدنيا وقفت وخلت من كل شي جماد مخلوق حي..ومعاش شاف ولاحس بغيرها..
وزي المعتاد كل مرة يشوفها فيها وكأنها الأولى حتى بعد ماولت زوجته..بس هالمرة كان احساسه بهالشي قوي بزياده لدرجة ان عيونه شبه مارمشوش..
☘صفيه بصوت مسموع ليها ولطوبى..
/الو عبدو ..الرقم المطلوب خارج نطاق التغطيه..
ضحكت طوبى وهي خجلانه ع الآخر وقلبها يرفرف وسط ضلوعها..
صفيه بضحكه:هي خل نخش ونريحكم من العزول..
وخشت داخل..
تنهدت طوبى وهي مبتسمه رفعت ثوبها وقدمتله وكل ماتقدم خطوة قلبه يجن جنونه..
وصلت فيه وقعدت تتأمل فيه وهي تقول..
/تجنن ياعمري الله يبارك عليك..
عيونه اللي ماكان باين غيرهم من وجهه نظراتهم ليها كانت مليانه شوق ع عشق تغزل في كلام الحب غزل..
رفعت يدها لوجهه ونزلت لثامه وبانت عليها ابتسامته اللي تحبها..
حطت يدها ع خده وقالت..
/تصدق شفت اللحظه هادي في الحلم..والله حلمت بيها حلم اول مابدي قلبي يتحركلك..نضت من النوم وقتها وقلبي يدق بقوة وكأنك قاعد معاي..
تكلم بنبره حلوة وقال..
/انا حلمت بيها راقد وواعي ايام وليالي وتخيلتك واجد وانتي لابسة تارقي لكن ع قد ماتخيلت ماجي شي قدام اللي تشوف فيه عيني..عيني اللي ماشافت ولاحتشوف اجمل منك..جمالك اللي مايعرف كان يزيد ويغرقني فيك اكثر اكثر..
نزلت عيونها وهي مبتسمه بخجل..
شد وجهها بإيديه وقال..
/بحتي فيا ياعمري ماتخليش وجهك السمح يغيب عن عيني
رفعت عيونها فيه وهي تقول..
/ديما دوخ فيا بكلامك..
بهويام قال: والله انا اللي دايخ من 13سنه..
ضحكت من قلبها وضحكتها الحلوة طيرت ماقعد من عقله..
☘ومن وراء احد الشبابيك..
سدرة بصدمه:غبارة وخروا وخروا..
وخروا اللي كانوا واقفات معاها ع الروشن وهما يضحكوا بإحراج..
ومطيره اللي كانت واقفه مع صفيه مرت خوها وكاريمان وسالمين بعيد عليهم قالت..
/هادي اخرة القصقصه البايخة ياقصقصات..
سدرة بإحراج..
/اني كنت نبي نطمن عليها بس..
مطيره:هذا اللي ينقال عليه عذر اقبح من ذنب..
ضحكوا اللي حواليها ومعاهم صفيه بنت عمة عبد القيوم..
🍁🍁🍁🍁
ويطلع عبد القيوم للرجاله والسعاده تشع من وجهه..
لما شافه ربيع ضحك وبدي يغني في اغنيه عبد القيوم المفضله..
"نك لغ الزمن"
ويشاركوه الغني صحاب عبد القيوم عرب وتوارق واصواتهم كانت عاليه وموحده وهو يمرر في نظره عليهم وضحكته مافارقتش وجهه..
اصواتهم وصلت لحوش جدته اللي قاعدين فيه عروسته واهلها واقاربه كلهم كانوا مبتهجين وطوبى بطير من الفرح
وعيون خالاته عليها يتكلموا عليها وهما مبتسمات وهالشي لاحظوه سدره وغرفه وكاريمان وسالمين وكانوا فرحانات بيه..
قريب من الحوش هذا كان حوش سليمه اللي داروا فيه عرس عبد القيوم كانوا الموجودات فيه يتهامسوا منهم من يقول في كلام طيب وفي اللي كلامهم كان خبيث وعاد وجوه عماته ع قد ماحاولوا يتصنعوا الفرح كان باين فيها عدم الرضا بالذات الكبيره فيهم خنقتها العبره ودموعها نزلوا وقالت بصوت مسموع لخواتها..
/خسارة ياعبدو ماكنت نحساب نحضر فرحك وانا مقهورة..
خواتها لما سمعوا شن قالت شدوا دموعهم بقوة وسليمه زاد ضاق صدرها اكثر ماهو ضايق..
🍃🍃🍃🍃
وتعدي هالليله الثالثه ع التوالي وعبد القيوم وطوبى بعاد عن بعض هو يبات في حوش خاله عبد القادر مع ضيوفه ونساباته وهي في حوش جدته بين احبابها..
🌼"اريج مبردك جيبي التليفون"
اريج:قتلك انسيه لغدوة..
غرفه بضحكه:خليه هكي متمرمد وليلته سودا..
طوبى بفجعه:اعوذ بالله من الشيطان الرجيم بعيدوبر عليه..
ضحكوا اريج وغرفه..
جاهم صوت سدرة وهي تقول..
/ارقدوا وخلوا هالخنفورة يرقد.."تقصد ولدها"
قعدوا يضحكوا بعدين طوبى زادت ضمت جنة لحضنها وقالت..
/خل نرقد مش باهي لبشرتي السهر..
غرفه واريج بتهكم..
/اممم..
غمضت عيونها وهي تضحك بكتمان..
🌸وعدت عليهم هديكا الليله من احلى ليالي العمر ومن اصعبها ع عبد القيوم اللي الشوق عنده واصل حده..
🍃🍃🍃🍃
مع طلوع فجر اليوم التاني..
بعد الصلاة سكرت طوبى ع روحها وحده من الديار قرت سورة البقرة كامله بعدين اغتسلت بمية الرقيه..
ولما طلعت تفطر معاهم بدت بشراب ميه مرقيه مع سبعة تمرات عجوة..
ولما تختلي بنفسها تردد في الصلاة الابراهيميه اللي كانت ملازمتها زي النفس الايام الاخيره..
من جهة تانيه..
كانت غرفه حاصله في ولادها اللي الحوا عليها يطلعوا لحسين لبستهم بمساعده اريج بعدين طلعوله مع ولد صفيه وهو تلقاهم من الباب وعبد القيوم كان معاه..
حسين بضحكه:صباح الخير يازعامه..
ردوا عليه وهما عاقدين حواجبهم..
"صباح الخير"
وعبد القيوم يضحك عليهم...
☘عند امهم..
كانت مشغوله بترتيب حوايجهم وجنبها اريج تجهز في ملابسها بش تاخد دوش..
فجاة وصلت لغرفه رساله ع هاتفها..
غرفه:اكيد جماعة المدار النفاخين..
رفعت هاتفها وشافت الرساله ع الستار لقتها واصله من رقم غريب..استغربت وفتحتها وبدت تقرا..
اريج التفتت وشافتها لقت ملامح الاشمئزاز مع التساؤل باديات ع وجهها قالتلها بضحكه..
/خيرك!؟
غرفه بنفس الملامح قالت..
/اسمعي البراده اسمعي..
ياصباح الاناناس ع اغلى الناس..
ياصباح الاحساس ع اللي اغلى من الالماس..
ياصباح التفاح وين نشوفك نرتاح..
ياصباح الخوخ وين نشوفك ندوخ..
لاوفي اللي الاخير كاتب المرسل
فارس البوادي..
اريج كانت تسمع وهي تضحك من قلبها..
غرفه بخوف:تي غير شن يضحك فيك اني بديت نخاف راهو هدا نفسه الصقر الوحيد لما حضرته ومعاش وليت نعلق بعتلي هني يانهاري من وين عرف رقمي!!؟..
اريج هدت ضحك لما استاقظت وقالت..
/ايه صح!! تعرفي هدا شكله حد يعرفك..
غرفه وهي تفكر..
/مني باهي!!
اريج:زعما هذا عدنان!
سكتت غرفه شويه وقالت..
/صح مايبانش عليه من هالنماذج لكن مستفز وحركته لما جاني للجامعه تخليني نشك فيه..
اريج بضحكه:يحسابك بطيحي بالجو هدا ولاشني!؟
قالت بإزدراء:من الاول ماهضمته ولاخشلي راس..رفعت حاجبها وقالت..لو نتأكد ان هو حق هدا وين بنفضها الشراكه..
🍃🍃🍃🍃
ماشيه بطريقها لحجره المكتب وهي رافعه ولدها في حضنها لما قربت توصل فيها طلعت منها امينه وين شافتها قالت..
/صباح الخير..
فاتن:صباح الخيرات يفطر؟
حركت راسها بالنفي وقالت..
/طلع من شويه راح مع الاقجم للمطار..
فاتن وهي تفكر قالت..
/ايه صح اليوم عنده سفره..تنهدت بضيق وقالت..وتيلي الفطور شويه وجايه..
هزت امينه راسها بإيجاب ومشت متوجهه للكوجينه وخلت فاتن غارفه في افكارها وقلقها..
🍃🍃🍃🍃
قبل الظهر بساعه وصلوا المحجوب ونبيله للكفره..
جيتهم تأجلت لليوم بسبب مشغولياتهم وع وصولهم يدوب طوبى سلمت ع نبيله وطلعت مع هاديه وركبوا سيارة حسين اللي رفعهم لاحد صالونات التجميل في المدينه تملكه صديقه لصفيه اتفقت معاها تخلي طوبى تجهز نفسها عندها ولعيون صفيه المزينه وافقت بشرط ماتطلعش طوبى ع الزباين ولاتخليهم يشوفوا مكياجها وهي بس تقعد تتفرج عليها..
☘"لاقوة الا بالله..ابداع في الحطة ابداع"
طوبى وهي مازال تشتغل ع وجهها قالت بإبتسامه..
/تسلمي..
قالتلها بإبتسامه:نخليك تكملي شغلك براحتك وانا نعدي نشوف شغلي..
طوبى:ربي يعاونك..
مشت بتطلع وهي تقول..
/تسلمي ياعسل..وطلعت وسكرت الباب وخلت طوبى تتفنن في حطتها للزينه تبي تطلع بطلة تفرح بيها قلب حبيبها وتبهر عيونه وتخلي كل من يحبه يفرحله ومايتحسرش عليه..
🍃وفي هالوقت..
كانوا زوز من عماته ومعاهم صفيه في الحوش اللي بيدخلوا فيه العرسان يرقوا فيه ويعطروا فيه ووجوهم متجهمه وصفيه تسرقلهم في النظر وهي مضايقه ومتخوفه يديروا اي شي ينغص ع العرسان فرحتهم..
🍀🍀🍀
وتمر الساعات ويجي الوقت اللي تبدا فيه الحفله..
قاعة الفرح بدت تزحم بالمعازيم غير عائلات العرسان اصحابهم وجيرانهم..
وطوبى كانت واصله فيها في وقت مبكر لكن قعدت مقعمزة في دار العروسه ومعاها اريج و وغرفه والصغيرونات..جنه ومئاب..
🌸جنه بإندهاش وهي تشوف لأمها قالت..
/محلاها..
ضحكوا وطوبى قالت بضحكه..
/حتى انتي محلاااها..
حطت جنه ايديها ع عيونها خجلا وهما يضحكوا عليها..
غرفه بإبتسامه:نجيها هالعسيسيلة..
طوبى:ونجي أوبي القمر..
مئاب كانت شاده في فستان امها وهي تتأمل في طوبى وخلاص..
اريج:مستغربه فيك..
شافولها وابتسموا بعدين قالت طوبى..
/اهل عبادة جو كلهم؟
حافظوا اريج وغرفه ابتسامتهم بش يخفوا بيها وضيقهم وجاوبوها مع بعض..
"ايه..جو كلهم"
بان في وجه طوبى انها تبي تسألهم عن عماته لكن قعدت ساكته..
اريج حبت تغير الجو لما قالت..
/غريب كيف خليتي شعرك مطلوق ع طوله!
ابتسمت وقالت..
/اليوم مميز لازم يكون فيه استثناءات..
غرفه:اهم شي راجلك يكون عنده علم.
ابتسمت بغمزة وقالت..
/تو يمشيها..
ضحكوا وهي نزلت عيونها بخجل..
🌼🌼🌼🌼
وبعد ماتعبت القاعة بالمعازيم جي وقت خشة العروس..
وخشت طوبى ع زفة "طلت ونور الحسن" بدون موسيقى..
العيون كلها انبهرت بيها حتى اللي اصحابها مش راضيين عنها ولاقابلينها..
🌼الى جانب فستان زفافها اللي كان موديله مميز ومحتشم شعرها اللي خلاته مفرود ع طوله ومغطي ظهرها كله ومتخطيه..مزين ب"هيدبيس" لونه ابيض..ومن القدام مدايره جمتها "غرتها" اللي كانت طويله شويه ع جنبي وجهها وحده اكبر من التانيه..مع زينة وجهها اللي ابرزت جمال العيون الاسيويه ولونها المحير وملامح جمالها المميز..🌼
كانت تمشي ع اغنيه الزفه وقدامها اريج وغرفه..
اريج تصور بكاميرا الفيديو وغرفه كانت موجه شاشة هاتفها لطوبى بش تشوفها اميمه اللي كانت متصله فيديو..
طوبى لما شافت اميمه كيف تشوفلها بإبتسامة حب ودموعها في عيونها رفعت يدها اللي فيها الباقه وحيتها بيها واميمه ردت عليها بمجموعة قبل متلاحقة..
☘عند طاولات الحضور..
كاريمان وهي تمسح في دموعها قالت..
/ربي يبارك عليها ويحرسها ويحميها..
واللي حواليها أمنوا ورا دعائها وهما يتأملوا في طوبى..
نصهم يدمع زي كاريمان والنص التاني كان مبتسم بحب..
شويه وكلهم رفعوا ايديهم في مرة يحيوا فيها لما شافتلهم وحيتهم..
سدرة بنبرة مرتعشه:نجيها ياربي..
سالمين شافتلها وهي مبتسمه بحزن..
🍃وغيرت طوبى نظرها عنهم للطاوله اللي فيها اهل عبد القيوم..حيتهم حتى هما..
خالاته وبناتهم ردوا عليها اللي بحركة الراس واللي برفع اليد
اما عماته داروا رواحهم ماشافوهاش صفيه شافتلهم كيف يظاهروا انهم منشغلات بالهدرزة غيرت نظرها عنهم لطوبى حيتها بيدها وبعتتلها القبل..
وطوبى تصنعت الابتسامه ومن داخلها كانت مضايقه ع الاخر..
مش غير هي حتى سدرة وكاريمان وسالمين اللي شافوا الحركة اللي صارت..
🍃وكملت طوبى زفتها وقعمزت ع الكوشه وغرفة واريج ساعدوها بعدين نزلوا وخلوها..
شويه ومشتلها صفيه وقفت عليها وقالت..
/يابختك ياولد خالي يابختك..
ضحكت طوبى بخجل..
صفيه بإبتسامه:ماينلام شن مادار عشانك لأنك حاجه تسوى..
طوبى بإبتسامه حب..
/تسلمي صفصف حبيبتي..
صفيه:ياقلبي..قولي عجباتك القاعه؟
مررت طوبى نظرها عليها وقالت..
/حلوة بالمرة..
☘واشتغلت اغاني حفلات الزفاف وكلها بدون موسيقى اريج حملتهم في فلاش وعطتهم للمسؤوله ع المنظومه متاع القاعة..
كانت الاجواء راقيه وجميله واريج وغرفه قعدوا حوالين طوبى ماكانوش يبوها تلاحظ نظرات عمات عبد القيوم وتجهم وجوههم وكأنهم مقعمزين في عزي..
🍃"روفي نبي اكب"..اركب
هادي جنة تترجى في غرفه تركبها للكوشه لاحظتها امها وقالت..
/ركبيها غرفه..
ابتسمت غرفه بالغصب وركبت جنه..وجنة مشت طول لأمها..
🍃غزاله بتهكم:عروس جايه مع بنتها هدية!
بريكه:بحتوا للناس كيف يتفرجوا..
سليمه قعدت تمرر في نظرها ع المعازيم كان شغال عندهم الغمز واللمز بدت ع وجهها ملامح الاستياء..
وهدا كله كان ع عيون سدرة اللي نادت ع اريج..
شافتلها فردوس وعرفت علاش نادتها ردت نظرها لطاولة عمات عبد القيوم وهي مضايقه..
وصلت فيهم اريج وقالت..
/نعم خالتي..
سدرة:جيبيلي جنة..
هزت اريج راسها وهي مضايقه ولفت ومشت للكوشه..
كل اللي ع الطاوله استاؤوا من الموقف..وسالمين وكاريمان كانت عيونهم ع طاولة عمات عبد القيوم وهما يرمقوا فيهم بنظرات حادة..
🍃"هي تعالي جنو حبيبي نمشوا لخالتو سدرة بش تعطيك نقالها"
رفعت اريج جنه ومشت وطوبى بعيونها معاها غيرت نظرها عنها وشافت لعمات راجلها هالمرة كانوا يشوفولها بملامح باين فيها الكره..
غرفه كانت تحاول تسيطر ع اعصابها ع قد ماتقدر ماتبيش دير تصرف ينحسب ضد اختها بس من داخلها كانت مقهورة لأبعد حد..
اما طوبى كعادتها تبلع وتمشي لعيون راجلها لأنه يستاهل وفي نفس الوقت ماتبي شي يخرب فرحتها..
لكن..
عند طاولة خالات عبد القيوم..
🍃خالته الكبيره قالت..
/سليمه وخواتها يديرن في حركات تقهر..
اختها التانيه قالت..
/حتى انا ماحبيتش الجو اللي دايراته هك يخلوا الناس تكثر الدواوي..
وحده من بنات اختهم قالت..
/وجعتني العروس مسكينه طفنها..
قعدوا يشوفوا لطوبى شويه بعدين وحده فيهم قالت..
/لعيون خيتي الله يرحمها ولعيون عبادي صبن خلونا نعدولها ونغنوا عليها..
شافوا لبعض بعدين ابدوا موافقتهم ع كلامها..
وينوضوا كلهم وياشروا لباقي بنات عيلتهم في طاوله تانيه وناضوا معاهم ومشوا للكوشه..
شافوهم اهل طوبى كانت نظراتهم ليهم نظرات ريبه واستغراب..
وحده من بنات خالاته طلبت من صفيه تخليهم يطفوا المنظومه وهي طول لبت طلبها..
وصلوا في طوبى وحاوطوها وبأصوات متقطعه قالوا..
"ماشاء الله عليك..ربي يبارك..ربي يهنيكم"
وطوبى توزع في نظرها عليهم وهي مبتسمه وترد عليهم..
وبدت اول وحده بأول شتاوة..
"حتى كان خطينا هلنا..في دار الزنين نزلنا"
ردوا وراها وطوبى تسمع وتشوف وهي مبتسمه..
"الصيت العالي ماخلوه..دزوله كراهب جابوه"
صفيه خشت فيهم وبدت تشتي..
"الطير الحر منين تعلا...تبع جرتها ماولا"
..ناضوا كاريمان وسالمين ومشولهم بش يشاركوهم اول ماوصلت كاريمان قالت..
"مربيها منقوش الجيب..لاتوجع لادير العيب"
تحمسوا اريج وغرفه قعدوا يردوا وراهم ويصفقوا..
سالمين..
"عينك كيف تمنت جاها..وعليها يكمل مولاها"
ناضوا باقي نساوين اهل العروس وانضمولهم..
وحده من خالات عبد القيوم قالت..
"قيسك ع الصلايه طول..حصلتيه ولد اصول"
🌼واستمروا بشوط الشتاوات اللي غنوا فيه اهل العريس ع العروس والعكس وخلوا طوبى فرحانه من وسط قلبها..
لكن سليمه وخواتها طبعا ماعجبهمش اللي صار وخدوا موقف من خالات عبد القيوم...
🍁🍁🍁🍁
عبدالقيوم اللي كان وسط احبابه في خيمة الرجاله يهدرز ويضحك وجوه فوق الريح اللي يشوفه يعرف مدى فرحته اللي كان يوزعها ع العالم مازال تبد..
واحد من عمامه قال لخوه عبد الله..
/اول نحقه فرحان هك الفرحة باينه في عيونه..
عبد الله بإبتسامه:حاز اللي تمناها سنين من عمره من حقه يفرح..
شافله خوه بأسف بعدين غير نظره لعبد القيوم..
☘☘☘☘☘
وعدت ساعات الحفله وكانت الاجواء لطيفه بعض الشيء..
بعد ماتعشوا المعازيم وصل موكب العريس استقبلاته وحده من خالاته ودخلته للدار..
=ياودي مانلومك ياعبادي ونهنيك..
ضحك بإحراج..
طبطبت ع ذراعه وقالت..
/شويه وتجيك عروسك..ومشت طلعت من الحجرة وسكرت الباب وخلاته في حالة توتر وانتظار..
🌼🌼🌼🌼
وعروسه اول ماجتها خالته وطلبت منها تمشي معاها للحجره وخبرتها ان يستنى فيها غادي قلبها فر فران سبقها ليه قبل خطواتها وع قد ماتقدر حاولت تخفي لهفتها الكبيرة عليه..
وصلوا في باب الحجره وخالتها قالت..
/خشيله..
ومشت وخلتها وطوبى من التوتر كانت تاخد في شهيق وزفير..
🍁 داخل..
واقف قدام المرايه يدير في اخر نظره ع طلته قبل لتخش عليه..هو فهاليوم بالذات كانت متوتر لأبعد حد توتر مبالغ فيه والسبب معروف..
سمع الباب دق دقة وحده..ماباش يلتفت قعد يشوف لوجهه في المرايه وبس..التوتر كله راح وحل محله شعور تاني..
اللهفه هو كان ملهوف يلتفت ويشوفها..
يعني مازال حتطلع اجمل من ماكانت عليه امس!
سمع باب الدار انفتح وشويه وتسكر...
فاحت عليه ريحة عطرها هني وبدون مقدمات التفت..
لما جو عيونه عليها جمد في مكانه ماقدرش يرمش حتى..
وكأنه اول مرة يشوفها..ايه اول مرة يشوفها هكي..
عروس بكل معنى الكلمه..بفستانها الابيض وزينتها اللي خلتها وكأنها حوريه نازله من فوق...
هو ماتخيلش يشوفها اجمل من اللي شافها عليه امس..
بس هي ديما معاه فوق الخيال والتوقعات...
اما هي..
عجبها هلبه بالبدله الرسميه كان كعادته جذاب للغايه طاغي الحضور بس ماقدرتش تشوفه احلى من ماكان عليه امس..
امس كان غير..ظاهريا كان غير..
بس المختلف اليوم هو نظرات عيونه اللي تحولوا من عدم الاستيعاب لنظرات تانيه اول مرة تشوفهم...
دقات قلبها تسارعت لما شافاته جاي ناحيتها خطوة وراها تانيه لين وصل فيها...
لما وقف قدامها..قعدوا عيونه معلقات في عيونها..
ولاول مرة ماتنزلهمش خجلا...
هي اصلا مش قادره نظرات عيونه ماخلوهاش...
نظراتهم حلوة بالمرة حلوة لدرجة انها ماتقدرش تحرم عيونها يشوفوهم...
توسعوا عيونها شويه لما شافت لمعه من اول ماعرفاته ولامرة شافتها..
لمعة دموع...واللمعه زادت بانت..لين غرقوا عيونه بالدموع وانحبسوا فيهم..دموع تخلطوا مع نظراته الحلوه اللي سلبت عقلها وخلتها في عالم تاني..
وكأنهم مايكفوش هالنظرات بس يزيد عليهم ابتسامه حالها من حالهم اول مرة تشوفها ع وجهه...
زادتها على مابيها...
زادوا توسعوا عيونها لما حست بيده حاضنه يدها اليمين...ورفعها بهدوء وحطها ع قلبه وخلا يده عليها...
حست بيهم..دقات قلبه ياما سمعتهم وحست بيهم قبل بس اليوم غير...فهاللحظه كان شعورها غير..
حست وكأن يدها لمست شغاف قلبه....
بدت ترتسم ع وجهها ابتسامه شويه شويه..لين ولت ابتسامه حلوة زي ابتسامته..
ضغط بيده ع يدها المحطوطه ع قلبه وكأنه يقوللها..
"حسيتي شن درتي فيه!؟"
هي هني مر عليها شريط ذكرياتها معاه من اول ماتحركله قلبها ليوم اعترافه ليها بحبه حبه الكبير اللي ياما عبر عنه بشتى الطرق والوسائل وهي ماوصلها منه شي بعد هدا كله سألت نفسها سؤال.
"معقوله كنت عميا لهالدرجه!؟ معقوله كان احساسي بيك معدوم لهالدرجه!؟ كيف ماشفتش!؟ كيف ماحسيتش!؟ علاش معاه كنت غبيه هكي!!!؟"
فاجئها لما تكلم اول مرة في لقائهم هدا وقال..
/ياما دعيت لربي نقوله يارب وانت ادري باللي في القلب وهو كان شايف هالحب وعارفه عارف قداش تعذبت عشان نحافظ عليه ونخليه طاهر مايدنسه شي ياما حطني في اختبارات تعبتني بكل معنى الكلمه وطلعت منها ناجح وانا محافظ ع حبك في قلبي كيف ماكان اول ماربي حطك فيه..وفي النهاية كفائني بإني نلت مطلوبي وعشت معاك احلا ايام حياتي..
وهي تشوفله بعيون مليانه دموع..
/احلا ايام حياتك!؟
رفع يدها وطبع عليها قبله طويله بعدين شافلها بعشق وقال..
/الايام اللي انت فيها جنبي هن احلا ايام حياتي..
ضماته لقلبها وقالت بنبرة حلوة بالمرة..
/نحبك ونموت فيك..
وهو كان مكتفي بالصمت حاضنها وهو مغمض عيونه ويامازال في كلام قاعد في قلبه ياما من كلام خاطره يقوله يراجي في الوقت المناسب بش يطلع...
تباعدوا عن بعض لما سمعوا دقة الباب..
وقفت جنبه وشدت فيده وهو شبك اصابع ايديه في اصابع ايديها وشدهم بقوة..
"عبدو ننغ"
ضحك وقال:الدوشة..
ضحكت طوبى وقالت..
/خشوا خشوا..
انفتح الباب وخشوا خالاته وعماته وهما لابسات عباياتهم وحجابهم وبدوا يغنوا عليهم..
سليمه وخواتها مثلوا انهم طايرات من الفرح قدامه وطوبى ماتبيش تشوفلهم نهائي قعدت مركزه مع خالاته وصفيه اما هو من فرحته كان يشوف في كل شي حلو ومبهج ويزيد فرح ع فرحه..
🍁🍁🍁🍁
وروح بعروسه اللي كانت طول الطريق تردد في الصلاة الابراهيميه بهمس وهو جنبها يقرا في سورة الفلق همسا مرات ومرات..
🌼ويوصلوا في حوشهم..
درس السيارة قدام الباب الدخلاني مباشرة نزل بعدين مشالها فتح الباب ونزلها..
سكر السياره وخداها وقعد يمشي بيها لين وصلوا في الباب فتحه ودخله بعدين خش بعدها وسكر الباب..
عبد القيوم بإبتسامه..
/خشي ياسمحه خشي..
رفعت شويه من الكاب وقعدت تشوف في ارجاء الحوش ديكوره حلو بالمرة وهادي يشبه ديكور حوش المزرعه..
لما وصلت لوسط حولت الكاب..
هو ركز ع شعرها وقال..
/تعرفي هذى وين لاحظت انك طالقتيه.
ضحكت وقالت رقيته وقريت الرقيه اكثر من مرة قبل لنخش ع الناس..
تنهد وهو يتامل فيها كيف تتكلم بعدين قال..
/في خاطري نبي نديرها تضحكي عليها نهارك..
بضحكه قالت..
/شن هي!!..
وفجأة يرفعها في حضنه ويدور بيها وهي تضحك من قلبها..
قاللها:قتلك تضحكي تشوفي!
طوبى بضحكه..
/ياربي قداش يهبل الراجل اللي عطيتهولي هدا..
☘☘☘☘☘
"تريحت لما شفت شن داروا خالاته"
سالمين:ماكنتش نعرفهم طلعوا خير من اللي عرفتهم وعاشرتهم وظنيت فيهم خير..
سدرة بضيق:معذورين..
سالمين ودموعها في عيونها..
/كلا انا لايمكن نعذرهم شن ماكان السبب..
وقعدت دس في حوايجها وهي معصبه..
☘وفي دار تانيه..
كانت كاريمان تكلم في راجلها هاتفيا..
/فرحانه وجوها سمح..
"الحمد لله..باهي قولي كلهم بكرا مروحين؟"
كاريمان:ايه وراهم مشاغل حتى هما..
سكت شويه بعدين قال..
"تمام تصبحي ع خير"
ردت عليه بإبتسامة حب..
/قدامك كل خير..
نهت المكالمه وشافت للهاتف وهي تقول.
/مش هاينه عليه تقعد وحدها هنا..تنهدت بعدين بدت تبدل في حوايجها..
🌼🌼🌼🌼
وطوبى بعد مابدلت فستان الزفاف جهزت نفسها للصلاة..
صلت العشاء..بعدين نادت عبد القيوم بش يصلوا ركعتين..
☘بعد الصلاه..حط يده ع راسها وقال الدعاء..بعدين طبع عليه قبله وقال..
/جعانه؟
طوبى:نص نص وانت؟
عبد القيوم؛لاانا شبعان ع الاخر..
ضحكت وقالت:باهي برا جيبلي ماناكل..
رفع حاجبه اليسار وهو يشوفلها بطرف عينه وينوض ويمشي يطلع من الدار..
هي ناضت وسكرتها وبدت تهيأ في نفسها ليه بعد ماكملت جمعت ايديها وقرت سورة الفاتحه بعدين الفلق مرارا وتكرارا..وفي الاخير نفثث ع يدها ومسحت نفسها بيهم..
دق الباب..
خدت نفس عميق وقالت..
/خش..
☘ويفتح الباب ويخش كان جاي يسألها عن حاجه..
لكن نسي حتى اسمه وين جو عيونها عليها..
🌼واراد الله واخيرا ان ينولهم مبتغاهم ويرزقهم يعيشوا حبهم هالليله تحت عينه الراضيه وباركلهم فيها...
☘"نَادَيْتُهُ بِاسْمِهِ فَأَجَابني:عيوني لَمْ أَعُدْ أَذْكُرُ بَعْدَ عُيُونِهِ مَاذَا كنُتُ أُرِيد♥️☘
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
تاني يوم..
في طريق العودة الطويله لطرابلس..
كانوا السيارات متحركه ورا بعض زي الموكب وفي سيارة حمايه ماشيه وراهم..
في وحده من السيارات العاليه كانت لحسين..
جنبه راكبه امه ووراها بالزبط غرفه في حجرها بنتها وحداها ولادها يلعبوا بهاتفها ووراهم مطيره وفردوس واريج..
مئاب رقدت في حضن امها وامها كيف بادي ينعس فيها النوم..
وولادها يتفرجوا ع اغاني الاطفال في هاتفها ويغنوا معاها..
فجأه جتها رساله ع الماسنجر مهاب فتحها يلقى مقطع فيديو ويفتحه طول بدون تردد ويصدح صوت اغنيه في السيارة كلماتها تقول..
"يابوعبعاب تعال خبر يابوعبعاب
يابوعبعاب انت صادق مانك كذاب
خبر واسرع في الجيه وروف عليا
وخبر بوجمة مسفيه راه قلبي ذاب
يريد يدز معاك جواب يابوعبعاب تعال خبر"
هدا كله واريج وامها ميتات بضحك يكتموا فيه ومطيره تضحك معاهم وتشوف لغرفه كيف رايحه في النوم ماتندري ع حاجه..
صفيه بضحكه استغراب..
/من اللي يسمع فيها..
مهاب فهمها وقال..
/اغنيه عند ماما..
حسين برفعة حاجب..
/امك ولت تسمع في بو عبعاب!
مطيره بضحكه..
/مانحكيلك ولى فنانها المفضل..
حسين:لامعاش نستغرب عليها شي..
اواب:اععي حولها..
مهاب:نعرفش..
اريج وعيونها مدمعات من الضحك قالت..
/هات حبيبي نحولها..
مدلها مهاب الهاتف شافت المرسل لقاته الصقر الوحيد2
حطت يدها ع فمها وهي تضحك بعدين حطت ع اليوتيوب وقالت بصوت تاعب من الضحك..
/خود هوبا..
خدي مهاب الهاتف ولهي بيه مع خوه..
حسين:خيرها مالهاش حس امهم..
مطيره:متنخه ياسيدي ماتندري عليها منين زارقه..
رفع حاجبه بعدين بدي يغني وهو يقول..
/ايييه..يابوعبعاب تعال خبر..
كلهم قعدوا يضحكوا وغرفه وبنتها قاعدين غارقين في النوم
#ياربيعي_أيامي
#طوبى
...يتبع....
