#طوبى "جنة طوبى"
#جمان_فريد
#الجزء_119"أنا وياك"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#القرآن
ماذا لو أقبلنا على القرآن بحضور قلب ؟!
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃سأعتني بكِ جيداً ،
سأحميكِ دوماً من أي أمرٍ يودُ أن يُؤذيكِ ،
سأحتضن حبكِ رغم حزنكِ وبؤسكِ
ودموعكِ وإحباطكِ وسخطكِ ،
سأسبِقُ اسمكِ بالدعاء قبل اسمي ،
سأُحافظُ عليكِ و سأُحبكِ أكثر مما أحببتُ نفسي 🍃
_______________________________________
في حديقه كانوا مقعمزين مع بعض يتعشوا وهما يحكوا عن حدث مفاجئ ومميز بالنسبه ليهم..
🍃اميمه:حبه قصته غريبه هلبه ومرات تقول مجنونه لاسمعت عنه ولاشفته في تلفزيون ولاقريت عنه في روايه اغرب من الخيال..ديما وين يخطر عليا نقول لروحي معقوله في راجل يحب هكي في الدنيا!!
شرب اسامه من العصير بعدين قال..
/جديات لما سمعت القصه منك استغربتها هلبه وفي نفس الوقت وجعني فاهم اللي مر بيه وعاناه الفترة هادي كلها..
شافتله بإبتسامه وهي تاكل..
وهو شافله بعدين ابتسم وقال..
/واهو ربك عطاه مايبي زي ماعطاني..
غيرت نظرها عنه ونزلت عيونها وهي مبتسمه بخجل وهو ضحك ع خجلها ورجع ياكل وعيونه المغرمه عليها..
🍃ومن المصحه للي قاعده طير فيها القلوب المحبه حوالين صحابها بمشاعرهم للمزرعه اللي كانت فيها قلوب ترجف لهفه ع بعضها لكن اصحابها بعاد عن بعض..
🌼هي قاعده في دارها..صلت العشاء وقعدت مقعمزة في مصلاها تفكر في كلامه..الكلامه اللي قاعد يتردد ع مسامعها كلمة كلمة..وتتسائل في نفسها..
"ياربي شن قصده!؟ شن يبي يوصلي!؟
معقوله كلام غرفه صح!؟"
رفعت حواجبها وقالت..
/غرفه!
ناضت من مكانها ومشت لشنطتها اللي كانت محطوطه ع السرير..طلعت منها الهاتف وقعمزت..
خشت ع سجل المكالمات..خدت نفس عميق بعدين حطت ع رقم غرفه واتصلت بيها...
نادى تلاته مرات بعدين انفتح الخط..
"ياهلا وغلا"
طوبى بإبتسامه..
/وبيك..شن جو توا؟
"تمام الحمد لله..شن جوك انتي!؟'
طوبى تنهدت وقالت..
/ملخبط هلبه هلبه..
"علاش خيرك!"
طوبى بضحكه..
/ماتخافيش مافيش حاجه تخوف غير صارت معاي حاجه لخطبتني هلبه هلبه فاضيه انتي!؟
"تي ايه فاضيه فاضيه قولي شن صار معاك!؟"
🍃🍃🍃🍃🍃
خشت بسفرة العشي للصاله حطتها قدام امها واختها وقعمزت وهي تقول..
عواطف؛هاتي ولدك هاتي
مدت نجاح ولدها لأختها وهو يقول..
"ابي كرونة"
ضحكوا وعواطف قالت..
/كل شي مكرونه عنده زي تيم
نجمه بإبتسامه؛تيم مغلى عليه الخبزة والمكرونه
ع خشته هو واخته ومرت عمه اللي كانت رافعه ولدها في حضنها وهي تقول..
/معاش ينشد هدا معاش ينشد..
ضحكوا عليها ونجاح قالت..
/جيبيه جيبي مستاحشاته هلبه..
قدمت صفاء بولدها لنجاح وعطتهولها..
قعمزت راما جنب حناها اللي كانت تسرقلها في نظرات كلها أسف..
🍃شكل وجهها يبي وقت بش يولي مقبول للي يشوفه لكن اللي حواليها كانوا يحسسوا فيها ان شكلها عادي ومقبول جدا بالنسبة ليهم رفعا للمعنويات...🍃
قعمزت خوها جنبها وبدت تاكل وتوكل فيه وهي تهدرز عادي ومستمتعه جدا باللمه..
بدت ع وجهها ابتسامه فرح حلوة لما سمعت عمتها نجاح قالت..
"يما اني حامل"
عواطف لما سمعتها شن قالت بانت الفرحه في وجهها لكن دموع الحزن عبوا عيونها وهي تقول..
/الله يبارك الله يبارك..
نجمه بفرح:الحمد لله الحمد لله..تحلي عويناتك ع خير يابنتي..
صفاء بإبتسامه:مبارك نجوحه تحلي عويناتك ع خير..
نجاح وهي مبتسمه ودموعها في عيونها..
/الله يبارك فيكم..لكن تعرفوا والله ماتوقعتها بكل حتى لما تعبت اليومين اللي فاتوا قلت حي علياشكلها جتني الكورونا قلت لعبد الحفيظ يرفعني ندير فحص ونعاين ورفعني ودرت التحاليل وسبحانك ياربي فحص الكورونا سلبي وطلعت حامل..
نجمه:الله يبارك..باهي درتي جهاز!؟
نجاح؛ايه يام ليا 7اسابيع..
صفاء:الله يبارك..ان شاء الله تجيك بنيه..
نجاح بإبتسامه؛يارب..
راما:مبارك عمتو..
وهي مبتسمه ردت عليها..
/الله يبارك فيك ياسمحه..
ضحكت راما..
عواطف؛ردي بالك توا وخلي راجلك يساعدك زوز ولاد معناتهم صعبه..
نجاح:ولد حفيظ اغلب النهار في حوش جده مع حناه وعمته واني قعدت دابي وداب هالكركوب..
عواطف بشي من الحزن:ياريتك جبتيه معاك استاحشته..
نجاح:لإني بنبات ماقدرتش نجيبه..
نجمه؛وشن فيها كان بات في شني بيثقل علينا..
نجاح؛هكي بوه يبي يام..شافت لأحمد كيف يتلاحق في السفرة قالت..تي باهي باهي تو نوكلك..
صفاء:هاتيه عنك نجوحه..
نجاح وهي توكل في احمد..
/لالاخليه اهو ياكل..شن حال امك؟.
صفاء بإبتسامه؛حال الخدمه موسم اعراس عاد..
نجاح:ربي يعاونها..
🍃🍃🍃🍃
"مليون في الميه يبوا فلوس ولاجايبيلي مصيبه ع راسي'
نسرين وهي مقعمزة في الصاله قالت..
/انتي اتصلي بيه وشوفي شن يبي
"لالا..لانتصل بيه لايتصل بيا زي مايقولوا الباب اللي يجيك منه الريح سده واستريح "
نسرين:كان مااتصلتيش بيجوك مرة تانيه..
"لالا لما ماندورهمش يفهموا برواحهم اني مانبيلهم خلطه"
نسرين:كان مش جايك منهم خير ربي يصرفهم عنك..
"آمين"
نسرين تنهدت وقالت..
/غير امتى تروح سدرة خاطري في طلعة لينا مع بعض برواحنا زي ايام زمان..
"ياريت والله..بالك اليومين الجايات تروح"
نسرين؛ايه حتى المهدي قال هكي..مش عارفه هما شن خطر عليهم المشي للحوازة؟
"سدرة تبي تغير جوها عارفتيها انتي متغششه ع طوبى"
نسرين بضيق:مافيش عليها اخبار..
"لامافيش غير اللي قتلك عليه قبل "
نسرين بألم..
/ربي يشفيها..
🍃🍃🍃🍃
"مش قتلك اني ياطوبى مش قتلك! من لما عرفت مااقتنعتش انه دار هكي من باب الواجب والشهامه ايه هو راجل شهم ومواقفه حلوة لكن مش لهالدرجة'
طوبى وهي حاطه يدها ع خدها المحمر والساخن من الخجل قالت بعدم استيعاب..
/ياربي مش قادرة نصدق! باهي شن الكلام اللي قالاته صاحبة السوريه..كلام السوريه نفسها ايام النازحين قصدي مافهمتش معقوله تكون كذابه!؟
"هو الواضح انها تبيه وشكلها شايفه عليه شي خلاها تعرف ان عينه عليك ناضت بعداتك عنه بطريقتها"
رفعت طوبى حاجبها وقعدت ساكته..
"اسمعي مدام هو قالك هكي خلاص باينه الراجل يبيك ياطوبى ويبي يكمل معاك وصلك هالرساله واضحة وصريحة"
غمضت عيونها بشده وهي مبتسمه بخجل وفرح وتقول..
/ياربي..قلبي قريب يطلع من مكانه..خاطر عليا نطلع توا ونمشيله نحضنه..
"الوي ياليلى علوي"
ضحكت طوبى من قلبها وصوت ضحكتها سمعه عبد القيوم اللي كان في الكوجينه يدير في العشي..ناهيك عن حالته المعروفه وين يسمع ضحكتها كان يبي يعرف في من تكلم وشن قاللها بش خلاها تضحك من قلبها هكي..
قعد يقطع في ورق السلطه وهو مبتسم وقلبه يرفرف وسط ضلوعه..
🌼"ماتخليهاش تجي منك بكل لكن بينيله بطريقه غير مباشرة انك حتى انتي تبي تكملي معاه المشوار يعني خليه يفهم انك متقبلتيه"
طوبى بخجل وتوتر..
/كيف!؟
"اللي بعتهولك هدا وقته..امتى يشوفك مهتمه بنفسك وتحاولي ديما تباني قدامه في احلا حالاتك هو يفهمها بروحه"
حكت جبهتها بخجل شديد وتوتر وهي تقول..
/مش عارفه نحس فيها صعبه..
"علاش صعبه!؟ طوبى حبيبتي استوعبي هدا راجلك وانتي مرته استوعبي"
خدت نفس عميق وقالت..
/تو نحاول..
"خليك فالحه وماتفرطيش في حبك"
ابتسمت طوبى ابتسامه حلوة وقلبها يدق بقوة...
"ايه وردي بالك تجيبله سيرة السوريه بكل ولاتلمحي عليها من كلامه واضح مش مركز عليها من باب الحرص ماتفتحيش عيونه عليها"
رفعت حاجبها مرة تانيه وهزت راسها وهي تقول..
/عندك حق...
☘ونهت مكالمتها مع غرفه وهي تفكر في كلامها..صعب جدا تنفد نصايحها..خافت من انها تندفع بمشاعرها اتجاهه ودير تصرفات غير محسوبه مرات تخليه يهزا عليها ويشوفها وكأنهاراميه نفسها عليه..هي هكي فكرت..وطبيعي جدا يكون هدا تفكيرها..
انتفضت بفزع لما سمعت باب الدار يدق..
"طوبى اطلعي تعشي"
خدت نفس وقالت..
/شويه وجايه..
ناضت وجت وقفتها قدام المرايه..حولت ملايه الصلاة وشافت شكل البيجامه اللي لابستها..استمرت وقفتها للحظات قدام المرايه بعدين مشت طول لدولابها"خزاناتها"
🍃🍃🍃🍃
"مراة الله يبارك عليها زين وادب وعلم ماتوفقتش في زواجها الاول لأن راجل طلع ماينفعش يضرب فيها ويعامل فيها اسوأ معامله قعدت معاه سته شهور مارتش معاه يوم تحكي بيه"
عمر بضحكه؛بتطلع معقده من الرجاله وتكرهني في شبح عمري حظه وعارفه..
ضحكت سميرة وقالت..
/معاش تقول هكي..صدقني المراة الله يبارك عليها والله ياعمر لو مانعرفش انها بنت حلال ومراة مقومه مانكلمك عليها بكل..
عمر هز راسه وقال..
/عارف عارف..لكن مرات هي كان تسمع بقصتي ماترضاش..
سميرة:اني تو نعرف شنو نحكيلها ياعمر تو نشرحلها كل شي ونفهمها اللي صار معاك بالزبط..
تنهد وقال:الحق نبي نتزوج ونستقر خلاص لهذا بنقولك امشي في الموضوع واللي فيها الخيره يجيبها ربك..
ابتسمت سميرة وقالت..
/إن شاء الله..
ع خشة محمد شنيبه عليهم وهما مقعمزين في الكوجينه
شاف لسميرة وقال..
/السلام عليكم..
ردوا عليه السلام وسميرة قالت..
/شن الامور؟.
قاللها:اليوم نحس في روحي خير من قبل..
عمر:مع الوقت تولي زي قبل ان شاء الله،غير ابدا حافظ يابوي..
رد عليه وهو يشوفله بإمتعاض..
/كان تحطوا عقولكم في رووسكم معاش يصيرلي شي..
ابتسم عمر بإمتعاض وسميرة ناضت وهي شاده ضحكتها وتقول..
/خل نوتيلك عشاك..
طلع وهو يقول..
/جيبيه للجناح..
وتوجه بطريقه للجناح وهو ماشي فات من قدام مغليه اللي كانت فيها نسرين تعشي في امها..
امها اللي كانت تشوف لملامح التعاسه الباديه ع وجه بنتها وقلبها موجوع عليها...
🍃🍃🍃🍃🍃
طلعت من دارها وهي تمشي بتوتر..
قبل لتوصل في الكوجينه وقفت..خدت نفس..تصنعت الثبات وهي تخفي في توترها بعدين كملت طريقها..
خشت للكوجينه لقاته مقعمز وهو عاطيها بالظهر في يده هاتفه كان مشغول بيه..
قدمت لكرسيها وخراته وهي تشوف للعشي اللي دايره قلاية معلاق وجنبها سلاطه وجرجير وطاسة عصير فراوله..
قعمزت وعيونه يسرقولها في النظر..
شافها لابسه بلوزة لونها بنفسجي غامق ورافعه شعرها ذيل حصان..
شافتله رد نظره بسرعه للهاتف..غيرت عيونه عنها وتوترها زاد ..
خدت الخبزة وكسرتها وبدت تاكل..
ابتسم وحط هاتفه ع جنب وبدي ياكل حتى هو والصمت مسيطر عليهم..
هو يسرقلها في النظر وهي خايفه تشوفله..
شرب من العصير شويه وقال..
/لأول مرة نحس ان جو طرابلس كئيب..
وقفت ماكله وشافتله..
بإبتسامه قال..
/قبل في عيني كانت زاهيه حتى في عز الحرب لكن فمشيتي الاخيره بانت باهته من غير روح..
حست بحرارة جسمها ارتفعت كانت تبي تهوي ع نفسها من كثر ماسخنت..بلعت ريقها وقالت..
/مرات..لأن الخريف خش وانت ماتحباش..
ضحك ع كلامها بعدين خدي طاسة العصير وشرب منها..
وهي زادت توترت نزلت عيونها لصونيتها وولت تاكل..
حط الطاسه وهو يشوفلها بإبتسامه بعدين ولى ياكل حتى هو..
حافظ ع صمته بش يخليها تتعشى براحتها لكن هي ماكانتش مرتاحه..تاكل بسرعه واحساسها ان مركز عليها بالنظر زايدها توتر...
كملت عشاها وناضت وهي تقول..
/خليلي الماعين وبرا تريح..
هو قال:تمام..بعد تكملي تعالي للصاله..
شافتله..
ناض وهو يقول بإبتسامه..
/ضيعنا وقت واجد..
توسعوا عيونها بخوف..
رفع حواجبه وقال بإبتسامه تعجب..
/شكلك نسيتي دروس الخط !
رخت عيونها وقالت وهي مبتسمه بإحراج..
/لالا في بالي غير قلت يرتاح الليله..
ضحك وقال..
/من لما روحت واني مرتاح..مشي طلع من الكوجينه وهو يقول..
/نرجى فيك...
بعد مااختفي من قدامها بدت ع وجهها ابتسامة خجل حلوة حطت ايديها ع وجهه وهي تضحك بصمت بعدين نزلتهم وبدت تلم في الماعين وقلبها يدق بقوة..
🍃🍃🍃🍃
في دار المعيشه..
فرشت عواطف ليها ولأختهاوالصغار بيباتوا فيها..
بعد مارقدوا الصغار دارت سفرة نسكافيه وكاكاو ومعاها حلو وكملوا سهريتهم هي واختها عليها..
🍃عواطف:واضحه تبي تتزوج..
نجاح؛من حقها لكن هدا مايعنيش انها تنسى صغارها مرة وحده!..
عواطف بحزن؛مش عارفه كيف هان عليها تيم محمد وراما نقولوا كبار ويفهموا لكن هدا قاعد صغير عمره مافاتش العامين مازال يبيها..
نجاح بتهكم؛ع اساس خوك خير منها..
عواطف؛هداكا خليه بروحه..تقول عمره ماتزوج في حياته مسحور سحر في ابتسام هادي مايشوف في حد معاها صغارها عنده اهم من صغاره..
نجاح:شن بيقول الواحد..الله المستعان وخلاص..
سكتوا لحظات وهما يشربوا في النسكافيه والكاكاو..
عواطف سرحت شويه ونجاح تشوفلها حطت فنجان الكاكاو متاعها وقالت..
/عطوفه..
عقدت عواطف حواجبها وهي تشوفلها..
نجاح:جايبتلك موضوع..
بدت ع وجه عواطف ملامح الضيق وهي تقول..
/بالله عليك سكري عليه الموضوع هدا..
قالتلها:غير اسمعيني قبل..
عواطف برفض وهي مضايقه..
/لالا وخيتي بالله عليك الموضوع هدا معاش تفتحيه معاي جربت حظي مرتين سادني،اني توا متريحه نفسيا ومش ناقصني شي الزواج سكرت بابه مرة وحده..
سكتت نجاح وهي مضايقه..
عواطف وهي تشوف لاختها بشي من الحزن..
/بعد اللي مريت بيه عرفت ان مش كل شي الزواج بالنسبه للمراة بالذات بعد اللي صار لنسرين شنيبه قداش حسدتها ع ربيع وبيني وبين نفسي كنت نقول علاش ربي ماعوضنيش زيها وتوا نحمد في ربي ألف مرة اللي ماصارليش زيها..تعبوا عيونها دموع وهي تقول..صح اللي مريت بيه مش شويه لكن هي تحسيها جتها زي الصدمه بعد ماتعيشي مع راجل يكون كويس معاك ويهنيك وفجأة يتغير عليك ويخليك في نص الطريق موعرها يانجاح..اني متأكده توا انها نادمه اللي تزوجت مرة تانيه..
تنهدت نجاح بضيق وقعدت ساكته..
مسحت عواطف دموعها وهي تقول..
/الحمد لله ربي رزقني القناعه وخلاني راضيه بنصيبي مش هكي وبس عوضني بطريقه خير من اللي كنت نبيها معاش نبي شي تاني بعد هكي غير حسن الخاتمه بس..
ابتسمت نجاح وقالت..
/بعد طول عمر ع الطاعه..تصدقي ريحتيني عليك..
ضحكت عواطف وقالت..
/اشربي الكاكاو اشربي..
نجاح شافت فنجانها وقالت..
/تم..مداته لأختها وقالت..نوضي جيبي..
عواطف؛عينك نوضي جيبي بروحك..
نجاح؛تي غير نوضي هيا من غير تنبله..
عواطف فنصت فيها وقالت..
/تنبله! قوليها لروحك اللي من لما جيتي وانتي طارحه رجليك ومقعمزة..
نجاح بضحكه:اني ضيفه ياقرده..
عواطف بإزدراء:نوضي نوضي خير مانمد يدي..
ناضت نجاح وهي تقول بضحكه..
/حقيرة..
عواطف:يانجاح..
خدت نجاح المخده وحدفتها عليها وطلعت تجري وهي تضحك وتسمع في عواطف تقول..
"تو تولي وتحصلي ياتافهه"
🍃تكرار تجربة الزواج بعد فشل في تجارب سابقه غالبا يكون اشبه بالمجازفه للمراة بشكل خاص معروفه نظرة المجتمع للمراة المطلقه يابال لو اطلقت مرتين مافي شي يشفعلها عند الناس..
لهذا أي وحده طالعه من تجربة زواج فاشله لازم تكون متأنيه وحريصه لو قررت تتزوج مرة..متأنيه وحريصه في الاختيار ماترضاش باللي يجي..والاهم من هدا كله انها تكون مقتنعه وراغبه مش تحت الضغط لأنها لو تزوجت تحت الضغط حتكرر نفس المأساة..
🌼وطوبى ملازمها خوف تكرار المأساة اللي مرت بيها لهذا ماقدرتش تفرح هلبه لماعرفت ان عبد القيوم يكنلها مشاعر اعجاب كانت او حب وعندها من الاسباب مايخليها تخاف من التعلق بيه..
اولهم وضعها..مرات مع الوقت تنفد طاقة تحمله ويمل ويتخلى عنها..
وتانيهم موقف اهله..اهله مايبوهاش ولو عرفوا بزواجه منها حتصير بينه وبينها مشاكل مرات توصل للقطيعه وحاجه زي هادي اكيد حتوجعها وتنغص عليها..
وتالتهم وهو الأهم..طليقها المهووس بيها..هو توا بعيد عنها واخباره مقطوعه بس مادامه ع قيد الحياة وارد جدا يطلع في حياتها مرة تانيه ويتسببلها في ضرر اكبر اما عن طريق بنتها او عن طريق زوجها الحالي..الراجل اللي تحبه من كل قلبها..
🍁قعمزت جنبه وفي يدها كراستها كانت تشوفله وهو لاهي باللابتوب..شويه وسكره وحطه ع الطاوله بعدين قربها وقال..
/ ياام عيون اسماح ، واطي عيونك عني ..
شافلها وكمل يقول...
/هذوبك تقول ارماح ، شالن معاي خذني..
هي كانت تشوفله بصدمه وعيونها مفتوحات ع وسعهم ضمت الكراسه وكأنها شادة بيها قلبها عما يطلع منها...
ضحك ضحكه خفيفه وغير نظره للطاوله وهو يقول..
/هي خل نقولوا بسم الله ونبدوا..
قدم للطاوله وقال..
/كيف ماتعرفي خط الثلث اصعب انواع الخطوط يبي منك تركيز وانتباه..
قرب ليه كراس خاص بالخط العربي لأحد اشهر الخطاطين في العالم الإسلامي..
فتحه وقاللها:هذى كراس خطاط عراقي يعتبر من اشهر واهم الخطاطين في العالم العربي حاليا يسرد فيه تركيب خط الثلث..مدهولها وقال..تفرجي وشوفي الابداع اللي لاقبله ولابعده..
🌼في عز الفجعة الحلوة اللي صابت قلبها منه وفي عز هيامه بيه وهو يحكي عن حاجه يحبها لما شافت الكراس راحت مرة تانيه في عالم الفن الجديد اللي بادي ياخد في قلبها..
خدت منه الكراس وقعدت تتفرج..
كان في شرح ع طريقة الكتابه بالسرد والرسم وهي تقلب في الصفحات وتشوف قالت..
/هندسة..
ابتسم..
قامت عيونها فيه وقالت..
/وكأنه يهندس في الحروف والكلمات..
بإبتسامه قال:وهو هذى فن الخط العربي..هندسة الحرف والكلمه..
ابتسمت بحماس وقالت..
/زدت تحمست..
ضحك وقال:خلاص هاتي..خدي منها الكراس وحطه قدامه..وهي نبدوا بالشويه ديدش ديدش ع قولتكم..
ضحكت طوبى..ضحكه مليانه بهجه من قلبها طالعه وهو قلبه هايم فيها..
☘وبدي يعلم فيها..وهو يشرح كانت تهيم في تفاصيله زي ماقاعده تهيم في تفاصيل الفن اللي يحبه..
زاد جاذبية ع جاذبيته..زاد بريق ع بريقه..وهي متاخده بيه..
اما هو كان ملاحظ نظراتها وفرحان بيها ومستمع بالحالة اللي هو فيها...
🌼عبد القيوم:انتي تتعلمي ماشاء الله هذى غير الخلفيه اللي عندك عليه من الورشه اللي حضرتيها..المهم توا بنعطيك واجب..رفع حاجبه وقال...وحطي في بالك راني واعر ماعنديش في التساهل نهائي راك تجيني بكرا من غيره..
قالت بضحكه:غير دقيقه مش غدوة بنطلعوا امتى بنلحق!
هو قال:بعد الفجر ابدي فيه..
بإبتسامه قالت..
/باهي..
ابتسم وهو يكتب بعدين مدلها كراستها وقال..
/خشي ع اليوتيوب حتلقي فيه مايساعدك..
خدت الكراسه وقالت..
/تمام..ناضت..
هو قام عيونه فيها وقال..
/وين!؟
هي قالت..
/خلاص بنرقد بنلحق ندير الروتين متاعي قبل ليسيطر عليا النوم..
ابتسم ابتسامه يخفي بيها ضيقه وهو يهز في راسه بعدين قال..
/تصبحي ع خير..
هي بإبتسامه قالت..
/قدامك كل خير..
ولفت ومشت وماكانتش تبي تمشي وتخليه بس هو خوفها مصر يخلي الحواجز موجوده بينها وبينه..
وصلت في الدار وفتحت الباب التفت شافتله..
لقاته يشوفلها بإبتسامه حلوة..
ردتله الابتسامه وخشت وسكرت الباب..
تنهد من وسط قلبه وغمض عيونه بشدة ورمي بظهره ع ظهر الكنبه وهو يقول..
/ااه ياقلبي..
☘وهي بعد ماخشت حطت الكراسات ع الزيانه وبدت طول بروتينها..دهنت بالزيت المرقي..لبست بيجامه مريحه وخدت المصحف وقعمزت ع السرير..
وبدت تقرا في سورة البقرة اللي نوت تحفظها وللآن حفظت منها جزء كامل...
ولأنها تعودت عليها من لزومها ليها كملت قرايتها في نص الساعه...
حطت المصحف ع الكامدينو..وخدت هاتفها وخشت الفيس..تبي تنزل منشور في صفحة "الحنة"
كان المنشور عبارة عن جملة وحده..
"القرآن للقلب حياة"
ضحكت من قلبها لما شافاته اول من تفاعل ع المنشور..
تنهدت بعدين طلعت من الصفحه وبدت تتصفح..
قابلها منشور ع صفحتها كان اشارة من صاحبتها عبير ليها ولباقي قروبهم الدراسي..
المنشور كان ذكرى..فيه صورة فيها شناطيهم وهواتفهم وهما حاطينهم جنب بعض بطريقه حلوة ومكتوب فوق المنشور تاريخ هداكا اليوم وجنبها كلمه اصدقائي باللغة الانجليزيه..
فاحت ع طوبى ريحة هديكا الايام الحلوة ابتسمت بعيون مليانه دموع وخشت علقت..
(أستاحشتكم)
لحظات وتجيها اشعارات..صاحباتها كلهم ردوا عليها واولهم عبير..
(بيبو ياقلبي اني اكثر)
(حي بيبو واخيرا فقدناك هلبه)
(قطوسة القروب وينك ياهلال العيد)
(مش مصدقه عيوني بيبو اللي علقت يابنات!)
وهي تقرا وتضحك ودموعها ينزلوا..
لحظات وجاها اشعار ع الماسنجر ضمتها عبير صاحبتها لقروب داروه مؤخرا سموه "اجدع صحاب"
مسحت دموعها وهي تضحك وخشتله طول وخدتها الهدرزة معاهم..
كانت كلها اشواق واخبار جديده عن حياة كل وحده فيهم حكوا عن ذكرياتهم ايام الدراسه وعن جديد اخبار الكليه متاعهم..
☘طوبى مابتش تخبرهم عن زواجها ممكن من الاحراج او الخوف المهم انها فضلت ماتقول شي كانت تحكي عن حياتها عادي وكأنها قاعده في حوشها مع بنتها واهلها..☘
وفي عز هدرزتهم جتها رساله من عبد القيوم..
رفعت حواجبها وقلبها يدق بسرعه..فتحتها طول..
(ماصارش من سيطرة النوم!)
عضت ع شفها السفلي وهي تضحك بعدين بدت تكتب في الرد..
(خدتني الهدرزة مع صحباتي..صحباتي ايام الجامعه)
شويه وبعتلها..
(باهي فوتيهم وتعالي ناخدك نا بالهدرزة)
حطت يدها ع خدها اللي كان سخون واحمر من الخجل معاش عرفت شن ترد عليه..
لما عطلت بالرد بعتلها.
(شكله النوم خطر عليه توا يسيطر مرة تانيه)
حطت يدها ع عيونها وهي تضحك..
(شكلك فتيني وعديتي لصاحباتك مقيوله من لقي احبابه نسي اصحابه)
حطت يدها ع فمها وهي تفكر شن بترد عليه وع قد مافكرت ماطلعتش معاها الا جمله وحده..
(تصبح ع خير)
شويه ورد..
( تنسيد سالخير إيمانين)
ضيقت عيونها وهي مبتسمه بعدين بعتتله..
(تصبحي ع خير بالتارقي!؟)
رد عليها..
(Yes)
ضحكت ونسخت الجمله نفسها وبعتتهاله..
🌼قراها وهو يضحك بعدين تنهد وقال..
/ااه ياروح روحي انتي..
طلع من الماسنجر ومشي لصفحته الشخصيه وبدي يكتب في ابيات شعريه سبق نشرها في صفحته بس هالمرة نزل بس بيتين..
☘ سوا واعية وإلا فـ سابع نومه
خاطي غرامك ما غرام نرومه ☘
🌼قرتهم طوبى وهي تتأمل فيهم وتقول في نفسها..
"معقوله نسي البنت اللي كان يحبها وحبني بسرعه هكي!..ياخوفي يطلع يبي ينساها بيك ياطوبى..."
تنهدت وقالت:استغفر الله..
رجعت قرت الأبيات مرة تانيه..ارتسمت ع وجهها ابتسامه حلوة وين خطر عليها كلام غرفه..
《خليك فالحه وماتفرطيش في حبك》
وبدون ماتحسب حساب لأي شي..تفاعلت مع المنشور بأعجبني..
☘وهو لما شاف تفاعلها ابتسم من قلبه اللي كان مجنون بنبضاته...
🍁ويقعد ع الفيس بوك لعند ماسكرت..وكمل ليله وشوقه محرم عليه النوم لعند ماجت الساعه تلاته الصبح وينزل عليه النعاس ويريح في النوم...
🌼🌼🌼🌼
ويطل الفجر..
ويفيقوا الزوز بمنبهات القلوب المتعلقه بالصلاة..
هو مشي للجامع..وهي صلت في دارها...
بعد ماكلمت الصلاة قعدت في مصلاها تذكر في الله..
مرة تسبح..مرة تصلي ع النبي ومرة تقول في تاج الذكر..
وهي تأدي في عباداتها بكل حالاتها سوا صلاة اوذكر او قراءة قرآن كانت تحس بأوجاع في جسمها..وضيق في التنفس..ومرة تنميل في راسها..ومرة وخز في انحاء متفرقه في جسدها وكل هالاعراض تعاملت معاها بالتجاهل وكل ماتزيد في تجاهد في العباده كانت تحس بقوة كبيرة في داخلها تزيد معاها..
🌼طلعت الشمس..
ناضت حولت الصلايه والمصليه وحطتهم في اماكنهم..
بعدين مشت لدولابها..
فتحاته..وبدت دور في حوايجها لعند مالقت بلوزة بيضا كم طويل فيها ورد بالوان زاهيه كانت طولها لنص فخد..
طلعتها..وطلعت بنطلون جينز ازرق باهت..
قعدت تشوفلهم بشي من التردد ويرجع كلام غرفه يتردد ع مسامعها..
《ماتخليهاش تجي منك بكل لكن بينيله بطريقه غير مباشرة انك حتى انتي تبي تكملي معاه المشوار يعني خليه يفهم انك متقبلتيه》
هزت راسها بالموافقه بعد ماحسمت امرها وقررت تلبسهم..
🌼🌼🌼
بعد مالبستهم وقفت ع المرايه..ابتسمت بحب..بعدين ضيقت عيونها شويه وهي تفكر..التفتت للشنطه اللي بعتتهالها غرفه..ومشتلها طول...
☘☘☘
وفي الطريق كان عبد القيوم مروح من الجامع وهو يكلم في المهدي هاتفيا..
/مع العشرة نجوها ان شاء الله..
"باهي اعزمنا حتى بالكذب"
ضحك وقال..
/حاضر لكن مش اليوم بكرا بإذن الله"
"خلاص اتفقنا هي مانعطلش عليك..نتلاقوا"
عبد القيوم:وانت طيب..السلام عليكم..
"وعليكم السلام.."
نهي عبد القيوم المكالمه لما وصل في باب المزرعه..
خش بالسيارة..درس..بعدين نزل ومشي بإتجاه الورد..
قطف وردة جوريه وتوجه للحوش..
اول ماوصل في الباب شم ريحة القهوة ابتسم وقلبه فرفح..
فتحه وخش وسكره وراه..قدم كم خطوه ووقف في مكانه فجأه..
لما شافها مقعمزه ع الصالون وثانيه ركابه فوق وحاطه عليهم الكراسه وتكتب..
شكلها في عيونه كان احلى من الورده اللي في يده..زاهيه اكثر منها..
لبستها..وتسريحه شعرها اللي كانت رافعه جزء منه كعكه والباقي طلقاته..تفاصيلها الحلوة هادي اللي اول مرة يشوفهم فيها خلوه يزيد ينسحر بيها ويذوب في غرامها..
🌼هي من كثر انسجامها مع حبها الجديد ماانتبهتش ليه لما خش لعند ماشمت ريحة عطره..
قامت عيونها وشافت يمينها..
وااه لو تعرف شن دارت لما خلاته يشوف عيونها المرسومات هما من غير شي سالبات عقله..!
احمر وجهها خجلا من نظراته وحاولت تخفي ارتباكها لما قالت بإبتسامه..
/تيفاوت نالخير..
ابتسم..وقدملها..قعمز ع كرسي محاديها..مدلها الورده وهو يقول..
/ارهيقم هولان"نحبك هلبه"
حست بشعور حلو بالمرة لما سمعت النبرة اللي قال بيها هالجمله وبإستفهام سألاته..
/شن معناها؟"
ضحك وقال..
/صباحك سعيد
ابتسمت وهي تقول..
/اها..ار..سكتت بعدين قالت..عاودها ترا!؟
هو قال ..
/كان تبي تردي عليا قولي..
.. ارهيقي.."نحبك"
بضحكه قالت..
/وشن معناها هادي!؟.
رد يقول بإبتسامه..
/وصباحك..يعني نقولك صباحك سعيد وانتي تردي عليا وصباحك..ارهيقم هولان..ارهيقي..
هي بإبتسامه قالت..
/اممم..باهي هي عاود قولها بش نرد عليك..
تنهد وقال..
" ارهيقم هولان"..
ردت عليه بإبتسامه ونبرة حلوة..
"ارهيقي"..
هو فهديكا اللحظه حس روحه مش ع الارض..طاير مع قلبه من غير جوانح..مش قاصدتها صح..بس يكفيه يعرف انها فعلا تحبه وهالشي خلاه يتخيلها قالتها وهي فاهمه معناها الحقيقي...
توترت وارتبكت من نظراته ليها..مدت الكراسه وقالت..
/ترا شوف..
هو ضحك بعدين قال..
/امسكي هذي قبل..
ضحكت وخدت الورده..وهو خدي الكراسه وعيونه عليها وهي تتفرج ع الورده بملامحها الخجوله..
غير نظره للكراسه وهو يتنهد وهي تسرقله في النظر..
شاف الواجب اللي عطاهولها بعدين قال..
/كويس..
هي قالت..
/بصدق!
شافلها وقال بإبتسامه..
/حاجه تانيه حطيها في بالك مش حنجاملك في الموضوع هذى نهائي..
ابتسمت وقالت..
/ايوه هدا الصح..نزلت رجليها وناضت وهي تقول..خل نجيب القهوة..
ومشت وهو يتبع فيها بنظراته المسحورة وقلبه ماباش يهدا...
☘☘☘
وشربوا القهوة وهما يحكوا عن فن الخط اللي ولى قاسم جديد مشترك بينهم يقوي ارتباطهم الروحي والقلبي ببعض..
وبعد القهوة دارت طوبى الفطور وماخلاته يدير معاها شي وهو قعد مقعمز يتأمل فيها..فراشه حلوة ملونه طير حواليه وتخليه يهيم معاها...
🌼بعد الفطور..
جهزوا انفسهم وطلعوا متوجهين للمزرعه المهدي قعدوا غادي عشرة دقايق بعدين خدوا جنة وطلعوا..
🍃سدرة:حسيتها فرحانه وحيويه بزياده اليوم..
المهدي بإبتسامه؛ماهو البنادم لما يكون حدا اللي يحبه قلبه هكي يصير فيه..
سدرة ابتسمت وهي رافعه حاجبها وقالت..
/بانت فيك الحاجه هادي هلبه ماجري في وجهك الدم كان بعد خديتني...
ضحك وحط يده ع شعرها ونكشه..
هي يدوب ضحكت بعدين تنهدت بضيق..
هو ابتسم وضمه لقلبه وقال..
/ديما نقولك خليها ع الله..
هي بعيون مليان دموع قالت..
/يارب...
🍃🍃🍃🍃
الساعه 11:30صباحا..
طلعت غرفه من باب الكوجينه..شافت من بعيد حسين مع صغارها يلاعب فيهم وحداه امه واختها فردوس..
تنهدت ومشت ناحيتهم لما قربت توصل فيهم قالت..
/خالتي خيرك واقفه هني!؟
وسلمت عليها بالخد وحسين يسرقلها في النظر..
صفيه:ياحنه جيتك نبيك تمشي معاي بش نحجزوا في حاجات اللمه اللي بنديروها لمرت يوسف..
غرفه:على ماليها اللمه خالتي..
صفيه:اني قلتلهم نديروها مع يعض نبيها كبيره ومطنطنه وانتي نعرفك ماتحطي عينك كان ع الحاجه الباهيه هدا علاش قلت نعبى عليد تختاري معاي..
ضحكوا وغرفه قالت بضحكه..
/حاضر..
وقف حسين ع حيله وقال..
/اني بنرفعكم..
شافتله وقالت..
/ماتقيدناش ارجوك خلينا براحتنا..
عقد حواجبه وقال..
/ياودي باهي غير بري وتي روحك وسقديني..
غرفه برفعة حواجب..
/من اولها!
ضحكوا وفردوس قالت..
/تي بري وفكينا من نشافكم..
مطت شفايفها بملل ومشت بتخش للحوش..
حسين:تبي تكسير راس..
فردوس برفعة حاجب. /حسين!
صفيه بضحكه..
/ماتعدليش عليه..
شاف لأمه وهي مضيق عيونه وفردوس تضحك عليه..
🍃ولحظات وطلعت غرفه وهي لابسه بلوزه طويله للركبه لونها ابيض عليها جيلي طويل لونه زيتي وبنطلون اسود وشاربه بيضا مزركشه بخطوط لونهم ويني وشنطه يد سودا السير متاعها ع هيئه سلسال لونه ذهبي..
هو ع قد ماعجباته ع قد ماكانش راضي ع طلعتها بهالشكل لكن فضل السكوت حاليا..
☘وطلع بيهم من الحوش وقعد يمشي ع حسب ماتوجهم غرفه وهو يحاول يوسع باله ع قد مايقدر..
وبعد جوله دامت ساعتين ونص ع المعامل والمحلات عزمهم حسين ع الغدي في احد المطاعم..
وهما يتغدوا فتحوا موضوع زواج طوبى مرة تانيه..
🍃حسين:باهي اني مش موجود بوي اللي هو عمها موجود قاعد اولى من خالها راهو..
غرفه:مع احترامي لعمي لكن عمرنا مالقيناه في حاجه ولاعبينا عليه في شي..
صفيه:عندها الحق بوك حتى معاكم انتم هكي..
سكت حسين وهو مضايق..
غرفه برجاء:بالله عليكم حاولوا تتفهموا الوضع ماصدقنا ولى حالها باهي ونفسيتها تعدلت..
عقد حواجبه ونزل عيونه بعدين هز راسه بالموافقه وقال..
/هو اني قتله بنجيكم اليومين الجايات..
صفيه:من رايي نمشولها كلنا..
شاف حسين لأمه..
غرفه بإبتسامه:يصير..كلمه انت حسين وشوفه امتى يناسبه..
ضيق عيونه وقال وهو يفكر..
/حاضر تو تشوفه..
🍃🍃🍃🍃
الساعه 7:30مساءا..
واقفه ع الشباك وعيونها عليهم بنظرات قلق ممزوجه بالغضب وهي تقول..
/شن مازال تبي ياحقير شن مازال تبي..ربي يهديك يامهدي ربي يهديك..
🍃المهدي:مامنعتكش عنها هي اللي ماتبيش تشوفك..
مختار بإبتسامه وهو رافع حاجبه..
/تقعد اختي في النهايه خليها بيني وبينها..
المهدي تهكما:اختك هادي مرتي ياباشا..
مختار بنفس الابتسامه..
/ولو..ماليكش حق تخش بيني وبينها...
المهدي تنفس بعصبيه وقال..
/اللهم طولك ياروح..
مختار:ياداخل بين البصله وقشرتها مابينوبك منها الا ريحتها بإختصار اللي بيخش في علاقتي مع خواتي يندم هلبه يامهدي..
شافله المهدي بطرف عينه بنظرات حاده..
ومختار مازال مبتسم ببرود..
فجأه انفتح الباب الخارجي متاع المزرعه..
شافله المهدي وهو ضام شفايفه لداخل بغضب واسف..
التفت مختار وشافله...
ع طلعة سدرة وهي تمشي بسرعه من الحوش وقفت في مكانها لما شافت عبد القيوم درس سيارته..
انفتح الباب اللي جنب السواق..
نزلت طوبى وهي رافعه جنه في حضنها..
وعبد القيوم نزل وسكر الباب ومشي ناحيتهم هدا كله بدون مايلاحظوا حد من الموجودين..
وقف عبد القيوم ع طوبى وقال..
/هاتيها عنك..
طوبى ابتسمت وقالت..
/لالا مش لازم تو ندخلها بروحي..
🍃من بعيد شويه كان مختار يشوفلهم وع وجهها باديه ملامح الدهشه..عقد حواجبه وضحك بنفس الدهشه بعدين غير نظره للمهدي..
المهدي ماحولش عيونه عن عبد القيوم وطوبى..
غير نظره عن المهدي عيونه جو في عيون سدرة اللي كانت تشوفله بحده وعيونها مليانات دموع..
ضحك تاني وغير نظره عنها ومشي متوجه لطوبى وعبد القيوم...
#انا_وياك
#طوبى
...يتبع....
