#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الحقد هو تشبع القلب بالسوء والكره..هو امتلاء العين بالنظرة السوداويه..وهومصدر كل شر يملك النفوس🍃
________________________________________
🍀يوم الإثنين
1فبراير...سنة 2021..
🌼واخيرا جي يوم مناقشة طوبى لمشروع تخرجها ومع حماسها الشديد للمناقشة كانت في غاية التوتر اللي حاولت تخففه بذكر الله والصلاة على رسول الله ولأن المناقشة كانت مغلقه مش حيحضر معاها حد من عيلتها او اصحابها لكن اللي جي منهم قعد يستنى فيها برا بش يشاركوها فرحتها بعد ماتطلع..
🍁في الممر اللي يرفع لقاعة المناقشه..
كانوا اريج وغرفه واقفات ع صديقات طوبى اللي منهم عبير يهدرزوا..
وبعيد عليهم شويه كان عبد القيوم مقعمز ع كرسي ملهي روحه بهاتفه لعند ماتطلع زوجته..كان متوتر حتى هو وهالتوتر بان عليه من رجله اللي كانت تهز بإستمرار..
☘"سعدودها كلمت وافتكت"
اريج:ايه والله اني مع المشروع مازال عندي مواد..
عبير:زيك بالزبط..
غرفه:كله يفوت بسرعه وتوصلوا في اليوم هذا حتى انتم وتفتكوا..
عبير:مايفوت لين تطلع روحي صعب ياوخيتي مع راجل وصغار تقدري توقفي والله لولا اني وصلت لآخر المطاف كنت وقفت قيدي لعند ماولدي يكبر شويه..
غرفه:من هالناحية عندك حق..
وحده من صديقات طوبى قالت..
/هذا علاش اجلت العرس لبعد ما نتخرج..
عبير:تفكري صح..
🌼وفي هاللحظه طلعت طوبى من القاعه ومعاها المشرفه واستاذة تانيه كانوا يكلموا فيها وهما مبتسمات وهي تسمع فيهم وع وجهها ابتسامة خجوله..
اريج شافتها وقالت..
/طلعت..
سمعها عبد القيوم شاف لباب القاعه ناض وقف وقعد يشوفلها بلهفه..
🌼"ربي يوفقك ياطوبى ويفتح عليك"
طوبى بإبتسامه:آمين..وحتى انتي استاذة تعبتي معاي هلبه بارك الله فيك..
=وفيك حبيبتي وان شاء الله نسمعوا عنك كل طيب..
طوبى:ان شاء الله..
الاستاذة التانيه قالت..
/موفقه ياطوبى..
طوبى:تسلمي بارك الله فيك..
والتفتت القدام بتمشي عيونها ماجوش الا عليه هو ابتسمتله ابتسامه حلوة هو ردهالها..
ويهجموا عليها غرفه واريج وصاحباتها وهما يسألوا..
"هاه شنو..شن صار فيك"
طوبى:وتسألوا!! ممتاز طبعا..
ضحكوا وضموها غرفه واريج وهي تضحك معاهم...
عبد القيوم قعد واقف يشوفلها كيف فرحانه وتضحك وهي تكلم فيهم كان يلقى يمشي ياخدها منهم ويشاركها فرحتها هو وبس..
☘وفي عز انسجام البنات في هدرزتهم معاهم شافتله عبير لقاته يشوف لطوبى وباينه في نظراته اللهفه..
ابتسمت ومررت نظرها ع اللي حواليها وقالت..
/خلاص خلوها تمشي لراجلها..
طوبى شافتله بإبتسامه حب وكان يبادل فيها نفس الابتسامه..
غرفه وهي مبتسمه قالت..
/بريله بيبو..
هزت طوبى راسها بإيجاب ومشتله طول كانت تتمنى لما توصل فيه تحضنه..
وصلت فيه وقالت بحماس..
/ممتاز..
هو قال:ماقلتيش جديد..
ضحكت وهو حط يده ورا راسها وقرب طبع قبله عليه..
☘وحده من صاحباتها قالت..
/يهبلوا .
غرفه وهي تشوفلهم قالت بإبتسامه..
/اللهم بارك..
تعكرت ابتسامة صديقة طوبى وهي تشوف لغرفه واريج وعبير شدوا ضحكاتهم..
🌼بعد عبد القيوم عن طوبى ومشي خدي باقة ورد كان حاطها ع طاوله جنب الكرسي اللي مقعمز عليه..
طوبى لما شافت الورد بلدي ضحكت هو جاها بيه مدلها الباقه وقال..
/نبيك تحبيه كيف مااني نحبه..
خدي الباقه وشمت الورد بعدين قالت..
/ومن قالك مانحباش!؟ اي حاجه تحبها اتوماتكيا نحبها معاك..
ضحك ع كلامها بعدين قال..
/عدي ديري جوك مع صاحباتك بعدين اطلعيلي برا تلقيني نرجى فيك في المكان اللي تحبي تقعمزي فيه..
قالتله بإبتسامة..
/باهي..
قاللها وهو يشوف لعيونها:ارهيقم ..
ردت عليه وهي تشوف لعيونه..
/ارهيقي..
تنهد بعدين لف ومشي وهي قعدت واقفه تشوفله لعند ماادرق عن عيونها تنهدت بإبتسامه بعدين لفت ورجعت للبنات...
🍃🍃🍃
فهالوقت كانت سدرة في حوش طوبى مع فردوس وصفيه يجهزوا للحفلة البسيطه اللي بيديروهالها..
وهما مشغولات بالتجهيز كانوا يحكوا عن موضوع مهم..
🍃صفيه:عندي احساس صايره معاه حاجه ليها علاقه بهداكا المشروع..
فردوس:حسين ماحاولش يعرف!؟
صفيه:قالي مادخليش بيه..
فردوس:معقوله مش شاغله وضع بوه بكل!؟
صفيه بضيق:تعرفي شن شكل علاقته بيه يافردوس ومن قبل قايلهالي مايطمع مني بشي..
فردوس بأسف:لاحول ولاقوة الا بالله..
سدرة بضيق وقلق..
/حتى عمتي فيها شي وين نكلمها نحسها اشبح كيف زي اللي تبي تسكر بسرعه واهي اليوم مش جايه للحفله..
فردوس بخوف:حتى اني حاسه بيها متغيرة..ياخوفي يطلع اللي في بالي صح..
سدرة شافتلها بخوف..
صفيه:قصدك صار شي خلاهم يبيعوا الحوش؟
سدرة وفردوس قعدوا يشوفوا لصفيه بصمت؛هالفكرة في عقولهم ليها وقت لكن من خوفهم ماقدروش يبوحوا بيها..
حركت صفيه راسها بالنفي وقالت..
/لالا مااظنش حسين قالي بوه مايبيش الحاجه الوحيده اللي قعدت من ريحة عمي الله يرحمه نسيتوا مختار قداش عرض بش يشريه وماباش يسلم فيه!
سدرة بلعت ريقها وقالت..
/وقتها ماكانش محتاج ياامي..
صفيه:باهي كان دار هكي علاش بيدرقوا حقهم في النهايه حوشهم ويديروا فيه مايبوا من يقدر يحاسبهم..
فردوس بضيق:صعب هلبه ياخالتي كنا زي الحوش الواحد وكان يبيعوه لحد براني..ماقدرتش فردوس تكمل باقي كلامها خنقتها العبره وقعدت تبكي..
سدرة نزلوا دموعها وهي تشوفلها..
صفيه بحزن:ان شاء الله لا يابنتي ان شاء الله لا..ماهو قتلكم كان دارها ماعنده علاش يدرقها معناها مادارهاش..
كلام صفيه اللي قالاته وهي تخفي في خوفها الكبير ماقدرش يخلي فردوس وسدرة يكفوا عن البكي..
🍃اساسا سدرة كانت جايه متكدرة والسبب المكالمه اللي دارت بيها وبين عمة عبد القيوم سليمه في اليوم السابق..
سليمه كانت تكلم فيها من غير نفس وللاسف سدرة انجبرت تتحمل وتساير وتعطيها الحق المهم عندها وقتها مايصير شي يفسد علاقة طوبى بعبد القيوم..
🍃🍃🍃
وفي مدرستها..جنة اللي ولت تقرا في الحضانة غادي كانت مقعمزة مع عمتها نسرين في حجرة الادارة شاده هاتفها بين ايديها وتغني مع...
🍃"من حبيب بابا"
جنة:انا..
"من روح بابا"
جنة:انا..
"علشان خاطر مين بابا يخاطر يتعب مية سنة"
جنة:بابا بابا هييه..
"ياقلب بابا انتي ياعيونه"
نسرين وهي تشوفلها وتسمع فيها وفي بوها شن يقولوا كانت مبتسمه وعيونها مدمعات..
جنة:بابا اشرب عصيرة..
ضحك وقال..
"حاضر ياقلبي..وهاه تو نشربه كله"
قالتله:مشوي مشوي"بشوي" تو تشركي" تشرقي"
ضحكت نسرين..
"ياعمري كان نوصل فيك ناكلك"
جنة رفعت حواجبها وقالت تعجبا:تاكلني!!
ضحك وقال..
"ايه ماك مارشميللو مش انتي قلتيلي اني مارمشميلو"
سكتت شويه وهي تفكر بعدين قالت..
/لالا ني جنة جنه..
ضحكوا ونسرين قالت..
/سلمها هي ولسانها..
"الله يبارك عليها..نسرين"
نسرين:نعم؟
"مافيش اخبار عن امها"
بلعت نسرين ريقها وقالت..
/حالها زي ماهو..
"مش عارف علاش حاسك مدرقه عليا حاجه.."
عقدت حواجبها وقالت..
/شن بندرق عليك!!؟..
"مرضها خطير ولا!! قلبي واكلني عليها هلبه يانسرين"
نسرين بضيق..
"ربي يشبح فيها وخلاص"
سكت وجنه وهي تشوف للشاشه قالت..
/بابا عاش تبكي..
نسرين ناضت وخدت الهاتف منها لقت الجالي حط يده ع عيونه ويبكي قالتله بحزن..
/جالي..
مسح عيونه وقال..
/خلاص نسرين بنسكر..سلام..سلام..ونهي المكالمه..
جنة وهي تشوف لعمتها قالت..
"خيره بابا"
طبست عليها نسرين وابتسمت بضيق وهي تقول..
/شي حبيبتي عنده عمل..هي نوضي نمشوا للألعاب..
نزلت جنه من ع الكرسي وقالت..
/باه..
خدتها عمتها من يدها ومشت طلعت بيها من المكتب..
🍃🍃🍃🍃
طلعت من المعهد تمشي بسرعه بإتجاه سيارة راجلها
فتحت الباب وركبت وهي تقول..
/شن جو..
اشرف بإبتسامه جانبيه قال..
/تمام..وتحرك بالسيارة وهو يقول..بنفوتوا ع مدرسة راما بنروح بيها سواق الباص صارله ظرف..
صفاء:بالله شيرو خودلنا شاورما امس خطرت علينا اني وياها قلتلها تو نقول لعمك ياخدلنا لما يروح بيا..
اشرف:اللي ديري فيها انتي خير من متاع القهاوي..
صفاء بضحكه:عارفه لكن متنبله نديرها..
ابتسم وقال..
/تمام ناخدلكم انتم وعواطف..
صفاء:لاعواطف مروجمه معاش تاكل فيها الماكله هادي..
☘وقعدوا يهدرزوا كل شويه ع حاجه وفي نص الطريق وقف اشرف ع مقهى معروف خدي منه الشاورما بعدين كمل طريقه لمدرسة راما..
اول ماوصل غادي درس قريب ع الباب وقعد يوزع في نظره ع المكان..ضيق عيونه بتركيز لما لمح سيارة محمد المهدي، زاد ركز بنظره عليها تأكد انها سيارته وين شافه فيها عقد حواجبه بعصبيه وقال..
/شن يدير هني هدا!
صفاء بأستغراب..
/مني!؟
قال بعصبيه..
/ولد المهدي شنيبه..
شافت صفاء وين يشبح بدت ع وجهها ملامح التوتر والخوف لكن قالت..
/عادي يعني مرات جاي لوحده تانيه..
سكت اشرف وقعد شاد ع الدومان بقوة وصفاء تشوفله بخوف..
لحظات وبدوا يطلعوا الطالبات واشرف يشوفلهم ويراقب في محمد ع طلعة راما ومعاها بنت خالتها..
فرح مشت ركبت السيارة اللي دايرهالها بوها بسواق..
اما راما دورت ع سيارة عمها لعند ماشافتها ومشتله..
وصلت فيهم فتحت الباب وركبت وهي تقول..
/السلام عليكم..ريحة شاورما..
صفاء بإبتسامة ارتباك:ايه..
واشرف مش معاهم كل تركيزه ع محمد..
🍃ومحمد شافه ولاحظ انه مركز عليه ومع هذا مااهتمش قعد واقف بالسيارة..
تحرك اشرف بصمت وهو يغلي من الغضب..
ومحمد قعد واقف شويه بعدين تحرك حتى هو....
🍃🍃🍃🍃
"نتلاقوا في الحوش"
طوبى بإبتسامه:ان شاء الله..السلام عليكم..
ردوا عليها اريج وغرفه..
/وعليكم السلام..ومشوا بطريقهم لخارج الكليه وخلوا طوبى ماشية بطريقها لراجلها..
وصلت في المكان اللي قاللها عليه لقاته مقعمز يتكلم بالهاتف ابتسمت..غيرت نظرها عنه جي ع زوز بنات مقعمزات مقابلاته لكن مش قدامه مباشرة بعاد شويه كانوا يشوفوله..
تبدلت ملامح ابتسامتها للغيره شافت لراجلها لقاته يشوفلها بإبتسامه وهو ينهي في الكالمه..
اول ما وصلت فيه نزل الهاتف وقال..
/قعمزي ياسمحه..
طوبى:لالا نوض نمشوا غادي..اشرتله ع مقعد بعيد عاطي بالظهر..
هو ناض وقف وقال بإستغراب..
/تمام..
خدت يده وشدتها وهي تقول..
/هيا.
هو حس ان في شي غريب وزع نظره ع المكان شاف البنات يشوفوله وحده مبتسمه والتانيه تضحك..
طوبى بغيرة:شن عندك غادي..
شاف القدام وهو يضحك ومشي بيها..
طوبى:شن يضحك فيها!
عبد القيوم بضحكه..
/تو من جدك تغاري وانتي اللي تعرفي ان مافي وحده تسواك في نظري ولاعيوني شافن ولايشوفن غيرك..
طوبى:هو اني عارفه الحاجة هادي لكن الحرص واجب..
ضحك بصدمه وقال..
/لاهذي تحكي من جدها! معقولة متخيله اني ممكن نبحت في غيرك!؟
طوبى برفعة حاجب..
/انت ديرها وشوف كيف نقلبلك ع وجه التاني..
وصلوا في الكرسي وقعمزوا..
شافلها بإبتسامه وقال..
/تمام مش مناقشك ولاعاد نثبتلك شي بالكلام نخليك تحقي بعيونك وتحسي بقلبك وبس..
شافتله بطرف عينها وهي مبتسمة..
ضحك بعدين حط يده في جيب البالطو وقال..
/غمضي الحايرات..
حطت ع باقه ع وجهها..
ضحك عليها وطلع من جيبه علبه صغيره وقال..
/حوليها وشوفي..
نزلت الباقه وشافت ليده ابتسمت بعدين خدت العلبه وفتحتها..بدت ع وجهها ملامح الانبهار..
شافت خاتم فضة ع هيئة وردة في نصها حجر زمرد اخضر كان ناعم وحلو بالمرة..
عبد القيوم وهو يتأمل في ملامحها قال..
/عجبك؟
طوبى بضحكه ودموعها في عيونها..
/شفت تعليقي عليه يومها ولا!؟
☘علقت ع صفحة عارضه خاتم شبيه بيه تسأل عن السعر☘
هو قاللها:كان ماشفت تعليقك كنت ناويه تشريه من فلوسك صح!؟
قالتله بإبتسامه..
/ايه صح..بس عادي يعني..
خدي نفس بعدين قال..
/خل نكون معاك صريح ياقلبي انتي لعند توا قاعد حاطه بيني وبينك حواجز مرات نحس فيك تعاملي فيا برسمية وكأني مش راجلك..
بدت ع وجه طوبى ملامح الضيق فهمت قصده من كلامه بطريقه تانيه وهو عرف انها فهمت غلط لهذا قال..
/مايمشيش تفكيرك لغير قصدي..اللي نقصده ياطوبى انك لعند توا مش واخده راحتك معاي من ناحية الصرف مثلا..ولا مرة جيتي قلتيلي نبي فلوس عشان ناخد هذيك الحاجه ولاقلتي في حاجه عجبتني نبيك تاخدها ليا وماإلى ذلك مش عارف ليش قاعده متحفظه في حاجات واجده معاي..
نزلت عيونها اللي كانوا معبيات دموع للخاتم وهي تشوفله قالت..
/لأني نحس في روحي مقصرة معاك هلبه ومحملاتك فوق طاقتك نتحشم نجي نطلب منك شي واني مش قادرة نعطيك حقك عليا..
هو عقد حواجبه قال..
/بصراحة فاجئتيني واجد..ماتوقعتش وحده بعقليتك وتفكيرك تكون هذي فكرتها عن الزواج مبدأ خود واعطي..
مسحت دموعها وقالت..
/مش هكي..بس اني نحس..خنقتها العبره وهي تقول..هكي نحس وخلاص..
حول من يدها العلبه سكرها وحطها ع جنب وشد ايديها الزوز وهو يقول...
/اسف ياعمري مش قصدي نضايقك ولانخرب عليك فرحتك..لكن نبيك تعرفي اني عمري ماراجيت منك مقابل اللي ندير فيه معاك من حبي لك ياطوبى ومستعد نعطيك عمري كله وروحي ومش مهم عندي انتي شن تعطيني..ياقلبي نا نبي نحس اني منك وليك نبي نحس اني اقربلك من روحك..
شافتله وقالت بنبرة باكيه..
/وانت هكي والله من بعد ربي مافي حد قريب عليا من البشر غيرك وخاطري ع قد ماديرلي وتفرح فيا نفرحك حتى اني..
مسح دموعها وهو يقول بإبتسامه..
/انتي بروحك فرحة ياقلبي فرحة عمري كله..
ابتسمت وسط دموعها وهي تقول..
/ديما هكي تقول في كلام يدوخ مانعرفش نرد عليه..
قاللها:لاتعرفي غير مش مكانه بس..
نزلت عيونها وقالت بخجل شديد..
/عبد القيوم!!
ضحك بعدين خدي العلبة وقال..
/باهي خوديه دسيه والبسيه بعدين في حوش هلك وتعالي لسدرة بالذات وريه لها وقولي بحتي في عبد القيوم يحبني اكثر منك..
خدت العلبه وهي تضحك بعدين قالت..
/الله اعلم شن بتطلع جايبتلي حتى هي ع العموم خل نشوف هديتها ونقارن بينها وبين الهديه متاعك وبعدين نحدد من فيكم يحبني اكثر..
كيف جي بيرد عليها جاه اتصال قال بإنزعاج..
/تي حل ياراجل..
طوبى بضحكة: من هو؟
طلع هاتفه من جيب بالطوه وقال..
/هذكي اللي يبي يشري السيارة بالغصب.
ضحكت طوبى..
هو ابتسم بعصبيه بعدين شاف للهاتف اختفت ابتسامته وقعدت عقدة حواجبه...
هي استغربت تبدل ملامح وجهه قعدت تشوفله بصمت..
فتح الخط ورد..
/ايوه
"السلام عليكم ابو نسب"
عبد القيوم:وعليكم السلام..
"كيف الحال"
عبد القيوم:الحمد لله..شن حالك انت..
"الحمد لله..ابونسب اني توا في الكليه اللي تقرا فيها طوبى ندور فيها روحت هي!؟"
شافلها وقال..
/لامازلنا هنا
"مازلنا معناها قاعدين مع بعض تمام قولي وينكم وماتخليهاش تعرف اني نكلم فيك"
هز راسه وقال..
/انت وين توا؟!
🍁وقعد يدل فيه ع مكانهم وطوبى تشوفله وهي تحاول تتوقع في من يكلم لعند ماشافاته مركز بنظره ع جهة معينه شافتلها وبدت ع وجهها ملامح المفاجأة..
🍃"شفتكم شفتكم"
نهي المكالمه ومشي بإتجاههم..
وصل فيهم وقال..
/السلام عليكم..
ناضله عبد القيوم وهي لما شافت راجلها وقف وقفت معاه..
مختار مد يده وصافحه وهو يقول..
/كنت نبي نجي بكري شويه لكن انشغلت..
هز عبد القيوم راسه بدون مايرد بعدين شافله وهو يصافح في طوبى ويقول..
/هاه شنو مشت امورك؟
طوبى:ايه الحمد لله ناقشته وخديت تقدير ممتاز..
ابتسم وقال..
/مش جديد عليك..طلق يدها وقال..ماقدرتش نخلي يوم زي هذا يفوت من غير مانديرلك فيه حاجه تقدري تعتبريها رد جميل...
طوبى بإستغراب:جميل شني!؟
هوقال:في اسبوع ولدي صح ماجيتيش لكن بعتي هديه واليوم اني جيتك بروحي لكن هديتك حتوصلك بعدين في شارع القهوة..
سحبت طوبى يدها وقالت..
/مشكور..
هو قال:العفو..موفقه دائما..شاف لعبد القيوم..نشوفوك..سلام...
ولف ومشي والزوز لحقوه بعيونهم ونظراتهم ليه كانت مختلفه..
ضيق..وريبة..
لما درق عنهم شاف عبد القيوم لطوبى بعدين قال..
/نطلعوا؟
هزت راسها بالموافقه..التفتت خدت الباقه والشنطة وين جت بتمشي هو خدي منها شنطتها وشد يدها لبسها الشنطه وهي تشوفله بحب..شافلها وقال بإبتسامه..
/هيا..
ومشي بيها وهو شاد يدها بقوة استغربت فيه بس مع هذا كانت تحس بشعور سعاده لايوصف بكل حركة حلوة يديرهالها...
🍃🍃🍃🍃🍃
"انتي جيبيها ومادخلكش بالباقي"
هذا ربيع اللي كان واقف في المطعم متاعه يكلم في اخته هاتفيا..
"باهي ياسيدي تو نقوللها وان شاء الله خير"
ربيع بإبتسامة:ان شاء الله..هي طيري..ونهي المكالمه وهو يوزع في نظره ع المكان ويفكر..ضحك..بعدين رفع هاتفه وحط ع رقم معين ودار اتصاله...
🍃فهالوقت..
وصلت سيارة عبد القيوم قدام مدرسة سدرة..
نزلت منها طوبى ومشت خشت داخل وهو قعد يستنى فيها فالسيارة وين جي بيفتح الراديو يكسد عليه جاه اتصال..
خدي هاتفه من مكانه المخصص جنبه وشاف المتصل ابتسم ورد..
في نفس اللحظه درست قدامه سيارة عدي اللي جي بيروح بأخته لحوش اهله..بعد مادرس انشغل بهاتفه..
☘وداخل..
اول ماخشت طوبى للمدرسه تلاقت هي ومدرسات تعرفهم سلموا عليها وهدرزوا شويه بعدين مشت وين مافي الحضانه...
**********
زهرة بإبتسامه:ربي يحفظها نبيهه وذكيه وتعرف دير هلبه حاجات بروحها..
طوبى وهي تشوف لجنة ابتسمت بعدين ردت نظرها لزهره وقالت..
/باهي انتي شن حالك وشن دايره؟
زهرة؛الحمد لله رب العالمين نخدم ونربي في صغاري وربي غانيني من فضله..
طوبى:الحمد لله..المهم مانوصيكش يازهرة في حالة احتجتي شي كلميني طول..
ردت عليها وهي تقول بإبتسامه..
/بارك الله فيك..
☘وخدت طوبى جنه ومشوا بطريقهم لخارج المدرسه وهما يهدرزوا لكن قبل ليطلعوا بشويه تلاقوا هما وزينب سلموا ع بعض وسألوا عن احوال بعض..
زينب بإبتسامه:اليوم الفضانيه..
طوبى وهي مبتسمه قالت..
/الله يبارك ربي يتمم ع خير..
زينب؛ آمين..العرس ان شاء الله بعد العيد هاه بنقولك من توا راك معزومه لازم تجي..
هزت راسها وقالت..
/بإذن الله..
رن هاتف زينب شافاته وقالت بضحكه..
/نتلاقوا..السلام عليكم..
طوبى:وعليكم السلام..
ومشت زينب بسرعه وطوبى وراها وهي تقول لجنه..
/بنديروا حفله حلوة في الحوش..
جنه بفرح..
/حفله حفله..هييه حفله..
وطوبى تسمع فيها وتضحك..
☘برا..
وصلت زينب في سيارة خوها فتحت الباب وركبت وهي تلقي في السلام رد عليها بعدين قال بإنزعاج..
/وينك هدا كله وين!
قالتله:هاني جيت..
شغل السيارة وهو متنرفز وكيف جي بيتحرك جو عيونه ع طوبى وهي طالعه مع بنتها..نسي كل شي ونسي نفسه وقعد متسمر وهو يشوفلها..
اخته شافاته قالت بضيق..
/عدي!
هو معاش يسمع في شي ولاعاد يندري على شي ومااستاقظش الا لما شاف السيارة اللي ركبت فيها..
زينب بعدم رضا..
/غلط هكي ياعدي حرام عليك المراة ع ذمة راجل!
عدي وهو عاقد حواجبه بصدمه قال..
/السيارة هادي نعرفها كويس!
قعد مركز مع سيارة عبد القيوم لين فاتت من جنبه ولان عبد القيوم كان فاتح روشن الباب شافه وهو يتكلم ويضحك..
رد نظره لاخته وقال وهو مصدوم لأبعد حد..
/عطوها لهدا!!! يقولولي اني لا ويعطوها للتارقي!!!؟
زينب بتوتر وقلق:نصيبه ياوخيي نصيبه..
غير نظره عنها القدام وهو مازال في حالة صدمه بعدين شغل سيارته وتحرك..
🍃🍃🍃🍃
الساعه 2:30بعد الظهر..
خشوا سهى والهام لمطعم رييع..
ليهم مدة طويله عليه من المرة اللي جاوبوا فيها صديقتهم بش ديرله اعلان..
لكن اللقاءات بين ربيع والهام تكررت هلبه خلال هالفترة لما تجي زيارات لسهى وهاللقاءات كانت من تخطيط سهى بطريقه غير مباشرة..
☘قعمزوا ع وحده من الطاولات وعيون الهام دور في ربيع..
وفي عيون كانت تشوفلها من بعيد شويه صاحبتهم قالت عليها..
/تبان اصغر منه بهلبه..
عبد القيوم؛قالي فرق العمر بينهم 15سنة..
طوبى:باهي توا اني كيف ندير بنمشي نفتح معاها الموضوع ع اي اساس اخته اولى مني!..
قاللها بضحكه..
/قال نبي نديرلها لقطه تبين كيف راغبها ومتمسك بيها..
ضحكت طوبى وهي تحرك في راسها يمين ويسار..
عبد القيوم:توكلي ع الله..
هزت راسها بعدين مشت بإتجاه طاوله سهى والهام وخلت عبد القيوم لاهي مع جنه..
☘الهام:مش جعانه هلبه..
سهى:كلا اني ميتة جوع..
"السلام عليكم"
رفعوا عيونهم فيها بعدين سهى وقفت وهي تقول بإبتسامة مفاجأة..
/طوبى!
☘وقدمتلها وسلموا ع بعض بالخد وهالسلام بالنسبه لطوبى غير مقبول في مكان عام لكن انحرجت سهى..☘
سألوا عن احوال بعض بعدين سهى عرفت الهام وطوبى ع بعض..
🍁طوبى بإبتسامه:عادي نقعمز شويه؟
سهى:اكيد حبيبتي تفضلي تفضلي..
وخرت طوبى الكرسي وقعمزت وهي نقول..
/مش واخد من وقتكم هلبه..شافت لإلهام بعدين قالت بضحكه..جاياتك انتي تقدري واسطه ولامرسال..
استغربوا سهى والهام..
طوبى حست بالاحراج..حكت خدها بسبابتها بعدين قالت بإبتسامه..
/راجلي يكون صاحب ربيع..
سهى بتساؤل:مني من صحابه؟
طوبى وهي تشوفلها قالت..
/عبد القيوم..
سهى بدهشه:التارقي!
ابتسمت طوبى وهزت راسها بإيجاب..
سهى قالت:راجل كويس هلبه عبد القيوم عوضك ربي خير ياطوبى..
طوبى بإبتسامه:تسلمي حبيبتي..ردت نظرها لإلهام وقالت..
/طبعا لأنهم صحاب هلبه اكيد يحكوا لبعض كل شي وربيع حكي لعبد القيوم ان في وحده معجب بيها هلبه وراغب يتزوجها لكن خايف ترفضه..
سهى قعدت تشوف لإلهام كيف لون وجهها تغير للأحمر وباينه في عيونها لهفه تحاول درقها..ابتسمت..
ضمت طوبى ايديها لبعض وهي مكمله تقول..
/وهالوحده هادي انتي..
نزلت الهام عيونها وهي مبتسمة بخجل..
سهى:هذا علاش كلمني وطلب مني نجيبك هني..الهام ربيع ليه مده عينه عليك وناوي معاك الحلال وانتي مش خافي عليك شي من وضعه تعرفي عنه كل شي وتعرفي كويس علاش طلق مرتين..
طوبى:التجربه التانيه اني شاهده عليها هي مافيها شي ينعاب لكن الظروف كانت اقوى من انه تخليه يكمل معاها..
كلام طوبى عن نسرين اكيد مش حيعجب سهى لهذا قالت..
/انتم عيلة الله يبارك عليكم تشرفوا اللي يناسبكم وانتي لومي صاحبتي ليك عمر متأكده انك حتعوضي خوي وحتى هو حيعوضك ويعوض صغويرتك..
طوبى التزمت الصمت واكتفت بالإستماع..
اما الهام قالت..
/والله شن بنقولك..نفتح الموضوع مع اهلي ونرد عليك..
سهى بأستغراب..
/قصدك مرات يرفضوا!؟
ابتسمت وهي تقول..
/لامش هدا قصدي بس يعني هدا الطبيعي..
طوبى بإبتسامه:معناها انتي ماعندكش مشكله!؟
نزلت عيونها وهزت راسها بالموافقه وهي مبتسمه بخجل..
سهى بفرح:ربي يكمل ع خير..
ناضت طوبى وهي تقول...
/ان شاء الله..نستأذن..
سهى:راجي شويه طوبى عطيني رقمك خل نتواصلوا ونواصلوا بعض..
ابتسمت مجامله وقالت:باهي معليشي عطيني تليفونك نسجله..
فتحت سهى رمز الشاشه ومدت الهاتف لطوبى..
🍁وبعد ماعطتها طوبى الرقم ولت لطاولتها لقت جنه وعبد القيوم يلعبوا في لعبة"حجيل ومجيل".
ضحكت وهي تقعمز بعدين قالت..
/هدا شنو؟
هو قال:لهيتها عشان تسكت كانت مسكرة راسها تلحقك..
جنه:اص مامي اص..هيا عبدو طاب الفروش..
طوبى قعدت تضحك بدون صوت..
وعبد القيوم قال بضحكه..
/طاب ياسمحة طاب هاتي ايديك..
مدتله جنة ايديها هو خداهم وباسهم الزوز وطوبى تتأمل فيه بإبتسامه..
شافلها وهو يقول..
/شن صار معاك؟
طوبى:طلعت طايبه ليها وقت..
قال بضحكه:معناها صار منهم..
قالتله:ان شاء الله..لكن ياريت تنصحه مايعاودش اللي داره مع نسرين ومايحطش ذنب ولية تانيه في رقبته..
قاللها:والله تعبت ونا ننصح فيه وحتى سامي نبه عليه واجد وهو قال هالمرة مش كيف اللي قبلها..
طوبى:ان شاء الله يكون هكي..
عبد القيوم تنهد وقال...
/ان شاء الله..هي قوليلي شن تبي تاكلي..
خدت القائمه وقعدت تشوف فيها وهي تقول..
/بناخد شي خفيف ورانا عشي ثقيل..
ويرن هاتفها عقدت حواجبها وشافتله..ابتسمت وقالت..
/امي كاريمان..
ابتسم عبد القيوم وهي فتحت الخط وردت وجنة تتفرج عليها...
🍃🍃🍃🍃
"قالي نبي نعرف في شن كان خير مني بش فضلتوه عليا"
نبيله بتعاطف..
/شكله حبها هلبه..
المحجوب:بشكل غريب لدرجة انه تغير هلبه اول ماعرفته كان شخصيه هاديه وغالبه عليها الحكمة توا ولى عصبي ويدير في تصرفات غير محسوبه..
ضمت نبيله شفايفها لداخل بأسف بعدين خدت طاسة العصير رشفت فيه وردتها لمكانها..رفعت عيونها في راجلها اللي كان يتغدا فكرت للحظات بعدين قالت..
/معاش دويت بكل عن موضوع عدنان الاشتر..
بلع بعدين قال وهو عاقد حواجبه..
/فتحت الموضوع مع سدرة قالت سكره غرفه ماتبيش كلام في حكاية الزواج نهائي..
ابتسمت نبيلة بإستغراب بعدين ولت تاكل..
المحجوب قال..
/حسيتك فرحتي!
نبيله:لامش هكي..بس كنت متخوفه من الموضوع خفت يصير مع صغار خوي زي ماصار مع هلبه زيهم رفضوهم ازواج امهاتهم وامهاتهم تخلوا عنهم وتشردوا..
المحجوب:غرفه ماتسلمش في صغارها يانبيله..
نبيله:عارفه..لكن الواحد من خوفه يحط في باله كل الاحتمالات..
هز راسه ورجع ياكل وهي بعد ماكانت تشوفله للحظات ولت تاكل وكملوا باقي غداهم بصمت وفي عقولهم دوشة هلبه افكار...
🍃🍃🍃🍃
وبعد العصر كانت طوبى ببنتها في حوشها مع اهلها الحفله اللي داروها برغم حلاوتها كانت ناقصة في عيونها بسبب غياب اميمه وهاديه..وغياب مطيره الغريب والمفاجئ بالنسبة ليها..
🍃"ان شاء الله ديما ناجحه"
غرفه قالت هالدعاء وهي تعطي لطوبى في هديتها كانت علبه مجوهرات متوسطه الحجم فيها انسيال وخاتم ذهب فرحت بيهم طوبى هلبه..
بعدين جي دور اريج اللي كانت هديتها مميزة مجموعه مكياج من ماركه غاليه..
طوبى:نهارك يابنت هادم غاليات هلبه!..
اريج:مايغلوش عليك يانصي..
ضمتها طوبى وهي تضحك واللي حواليهم كانوا يشوفولهم بإبتسامه..
وجي بعد اريج دور صفيه وفردوس..
فردوس هدتها ساعة من ماركه معروفه وصفيه هدتها شنطة وحتى هي من ماركه مشهورة..
سدرة المنتهى:طبعا اني بروحي هديه..
ضحكوا..
طوبى ضمتها وباستها من خدها وقالت..
/واحلى هديه..
ابتسمت سدرة وقالت..
/الحق احترت وماعرفتش شن ناخدلك وفي الاخير استقريو ع حاجة..
بعدت طوبى وهي تشوفلها بحماس وفضول..
سدرة مشت للطاوله اللي في صاله كانت عليها حاجة مغلفه خدتها وجت بيها لطوبى وقالت..
/افتحيها..
خدتها طوبى وحولت الغلاف لقتها لوحة صغيرة من فخار منقوش عليها اسمها واسم بنتها وراجلها بخط جميل جدا..شكل اللوحه والزخرفه اللي حواليها كانوا حلوات بالمرة..
سدرة:حطيها في اي مكان قنين في حوشك..
طوبى وهي مبتسمه ودموعها في عيونها قالت..
/تجنن تجنن..
وضمت سدرة مرة تانيه بقوة وسدرة حضنها ودموعها في عيونها..
غرفه:الحق غلبتنا..
صفيه وهي مبتسمه قالت..
/صدقتي..
فجأة..رن جرس الانترفون..
كلهم استغربوا..
صفيه:حسين قالي بنعطل..
اريج:تو نمشي نشوف مني..
مشت اريج لمكان الانترفون خدت السماعة وردت..
/مني..
"اني مندوب يااختي من ***** جايب معاي طلبيه للأخت طوبى الواعر"
استغربت هلبه وقالت..
/باهي لحظه..
سكرت ومشن بسرعة ولت للصاله وهي تقول..
/واحد قال مندوب من ***** جايبلك طلبيه طوبى..
سدرة:زعمه راجلك دايرلك مفاجأة؟
طوبى عقدت حواجبها وقالت..
/لامش هو..تو نطلع نشوفه..
سدرة:وين ماشيه!!؟
طوبى:عارفه من باعتها ماتخافيش..ومشت طلعت من الصاله واريج لحقتها..
سدرة بأستغراب..
/زعما من مني!؟
غرفه بإمتعاض:اللي في بالي مافيش غيره..
فردوس:قصدك مختار!؟
رفعت غرفه حواجبها نزلتهم ردا ع فردوس.
تأففت سدرة بضيق بعدين مشت بتلحق طوبى واريج..
☘برا..
طلعوا اريج وطوبى بعد مالبسوا حجابهم..
فتحت طوبى الباب لقت شاب واقف بسيارته قدام الحوش لما شافها نزل من السياره وفتح الباب الخلفي وطلع بوكس كبير ومشي بيه لفم باب..
طوبى قالت:حطه هني..
حطه وين ماقالتله..
قاالتله:قداش تبي خوي!
قاللها:لامجاني بااختي..
ومشي ركب السيارة شغلها وتحرك..
طوبى:ساعديني ندخلوه روجه..
طلعوا الزوز دخلوه وسكرت اريج الباب برجلها..
اريج:رزين..
حطوه ع الارض وطوبى وهي تشوفله بإستغراب بدت تفك في الشريط اللي عليه..
قدمولهم سدرة وغرفه وفردوس وصفيه وهما يشوفوا للصندوق..
حولت طوبى الغطا وتشوف قدامها ماخلاها تتفاجىء هلبه..
مجموعة كتب دينيه لأهم العلماء طوبى قامتهم واحد وهي تشوفلهم بفرح ومش مصدقه..
سدرة كانت تشوف لفرحتها بنظرات كلها حزن..
اما غرفه قالت..
/معناها مش من مختار!؟
طوبى:لامنه هو
فردوس:كيف عرفتي!؟
شافتلهم وقالت..
/جاني للكليه بش يباركلي وقالي زي مابعتي لولدي هديه اني بنردهالك..
ابتسمت غرفه تهكما واريج ضحكت وهي تحرك في راسها يمين ويسار..
فردوس وهي مبتسمه قالت..
/حسيتك فرحتي بيها هلبه..
ضحكت وقالت..
/ الصراحه...ايه..
🍁🍁🍁🍁
الساعه 12:00منتصف في الليل..
واقف يشوف للكتب كيف صافتهم مع بعض ع الرف وهو يقول..
/انا حسيتها اكثر هديه فرحاتك..
شربت طوبى من مية الرقيه بعدين قالت..
/لاوالله كلهم فرحت بيهم لكن هديه مختار رغم انها في قيمتها كبيرة هلبه ماخلتنيش نحس جيهته بأي شعور حلو حتى الامتنان نعرفه زين مايحبش حد يكون خير منه مايبي يخلي حد يكون صاحب فضل عليه كيف ماهو يفكر طبعا..
التفت شافلها بعدين ابتسم وقال..
/ماقلتيش من طلع يحبك اكثر..
بضحكه قالت..
/جنوني..جابتلي اكثر لعبه تحبها وقالت..قلدتها طريقة كلامها..هدية تاعك ماما هديه تاعك..
ضحك وقدملها وهويقول..
/ربي يحفظها ومايحرمني من امها العسل هذي..
وصل فيها وضمها بقوة وهي حضناته وقالت بضحكه..
/خنقتني..
🍃🍃🍃🍃
وبعيد عن البلاد..في بلاد بعيده في قارة تانيه..
اليونان..
في عز البرد..كان في واحد واقف قبالة البحر متلحف بشال مغطي نص وجهه..سرحان بفكره اللي سافر بيه لبلاد المعشوقه اللي يعشقها عشق مرضي مجنون مخليه مازال عايش معاها في خياله قاعده لهاللحظه في نظره مرته ولايمكن يرضى يخليها تكون لغيره..
البلاد اللي هو فيها كانت محتفظه بذكريات حلوة ليها معاه..ايام مستعد يدفع نص عمره ويرجع يعيشها..
🔺️🔺️🔺️قبل ثلاث سنوات🔺️🔺️🔺️
كانوا مقعمزين في مكان جميل وكل شي فيه طبيعي..
هي متوسده ذراعه وهو يغنيلها بالإيطالي بعد ماكمل قالت..
طوبى بضحكه:يهبل صوتك بالايطالي احلى من
العربي بهلبه..
الجالي بإبتسامه:ماسألتيش عن معنى الاغنيه..
بعدت وهي شاده ذراعه وقالت بإبتسامه..
/ترجمهالي..
تنهد وقاللها:هذا واحد يعبر لحبيبته عن شكل حياته من غيرها كيف ولت بارده ومافيهاش روح وهو ماحسش بقيمتها الا بعد ماخسرها..
طوبى بضحكة استغراب..
/وعلاش تغنيلي فيها !؟
ضحك وقال..
/لإني نحبها مش اكثر..
ابتسمت بدون ماتعلق ورجعت حطت راسها ع كتفه..
هو قاللها:ياودي خلاص فوتيها نغنوا غيرها..
زيديني عشقا زيديني..يااحلى نوبات جنوني زيديني..
ضحكت طوبى وهو ضمها لحضنه وكمل غني...
🔺️🔺️🔺️الوقت الحاضر🔺️🔺️🔺️
بنبرة مخنوقه قعد يغني في الاغنيه الايطاليه..
",come vorrei, come vorrei,amoremio "
وعقله يتردد كلام نسرين عنه وقلبه يتقطع عليها..
🍃🍃🍃🍃🍃
"قتلك شدت تليفوني وقعدت تغني اغنيه هنيدي متاع مين حبيب بابا وبعدين بدت تهدرزلي بابا في التليفون وبابا وبابا نفس الدوة اللي تقول فيها المده اللي فاتت"
غرفه بخوف:لاهادي رسمي تكلم في بوها..
فردوس بقلق:اولامس لما روحت من عندهم شدت العابها وقعدت تغني يابابا تعالى وجيوبك مليانه..
اريج لما سمعت اخر جمله قالتها امها حست بوجع في قلبها الاغنيه هادي ياما غناها بوها وهما صغار شدت دموعها بقوة وقالت..
/نقوللكم حاجه..في النهايه هدا حقه وحقها مادام ماتقدرش تعيش معاه خلوها تتواصل معاه ع الاقل من بعيد..
فردوس ركزت ع ملامح وجه بنتها وين شافت الدموع في عيونها عرفت انها تفكرت بوها من الاغنيه..
غرفه:في حالة كان بوها شخص طبيعي يااريج لكن الجالي وضعه معروف اني خايفه يبدا يتعلق ببنته ويروحلها ووين يلقى طوبى متزوجه ياخدها..
فردوس بحزن:والله حتى اني هذا اللي مخوفني تعرفي لو صارت الحاجه هادي حاسه طوبى حتخلي عبد القيوم..
اريج؛ماتقدرش تحبه هلبه..
فردوس:لكن مش اكثر من بنتها
غرفه بضيق؛كلام فردوس صح..لو حست انها حتخسر جنة تخليه طول..
اريج بألم:شن هذا ياربي!! استغفر الله العظيم ..
غرفه بحزن:طوبى ماعندهاش حظ للأسف..
نزلوا دموع فردوس وهي تقول..
/معاش تقولوا هكي ربي يقوي سعدها ان شاء الله ربي يقوي سعدها..
الزوز قالوا مع بعض.
"يارب..آمين"
🍀🍀🍀🍀
بعد مرور يومين...
☘"لالافوتيها الصبغه هادي تخليك تباني زي المريضه اصبغي الغامق خير"
اماني صديقه اريج..
/وشن بتغير فيا !؟
اريج:في الوان تغير استني خل ندورلك عليهم..
وكيف جت بتاخد هاتفها من ع الطاوله خش الاستاذ متاع المادة للقاعة..
ساد الصمت المكان الا من صوته هو لما قال..
/السلام عليكم..
ردوا عليه وهي ردت معاهم وكانت مصدومه..
"وعليكم السلام"
حط نضال حاجاته ع الطاوله..صفق بإيديه وحركهم حركه دائريه وهو يقول..
/بسرعه بسرعة بسرعه..
ضحكوا الطلبه بعدين ناضوا البنات قعمزوا في الخلف والشباب القدام..
اريج وصاحبتها ماناضوش لأنهم كانوا مقعمزات في الخلف وهي كانت تشوفله بفرح لما لاحظت ان يده المصابه تحسنت بزياده عن قبل..
بعد ماخدوا الطلبه اماكنهم هو ضم ايديه لبعض وقال..
/مافيش داعي نعرف بنفسي ليا 4سنين معاكم وليتوا تعرفوني اكثر مني..
ضحكوا..
ابتسم ونظره مركز ع الشباب بس بعدين قال..
/هادي اخرسنه لاغلبكم صح!؟
المعنيين بالأمر ردوا عليه..
"ايه..صح"
قاللهم:موفقين ان شاء الله..هي خل نخشوا في المهم..
☘وبدي يتكلم عن الماده بشكل عام ويعطي في رؤوس العناوين واريج تحاول ع قد ماتقدر تضبط مشاعرها وتبان عاديه زي ماهو داير..
لكن مهما اتقنوا في تظاهرهم بعكس اللي يحسوا بيه قلوبهم كانت ترعش بلهفه ع بعضها يبوا يولوا لبعض بأي طريقه..
...مافي اليد حيله والامر متروك لله من قبل ومن بعد...
🍃🍃🍃🍃
مسكرة ع روحها الدار وهي تجري في مكالمه هاتفيه مهمه..
سدرة بقلق..
/شن صار معاك ياخالي!؟
"للأسف عمك وقع ضحيه عمليه نصب واحتيال الراجل اللي شاركه طلع مشارك زوز تانيين بالاحتيال طبعا وخدي فلوسهم وهرب"
سدرة بصدمه:باهي عمي وينه توا وين شن صاير فيه!؟
"قاعد في***** لكن شن يدير غادي مش عارف.."
بلعت سدرة ريقها وقالت..
/باهي ماقدرتش تعرف كان باع الحوش ولالا؟
"حاولت لكن ماوصلت لشي ع العموم حركة ان يسكر الحوش ومايعطي مفاتيحه لحد منكم حتى ولده تأكد انه فعلا كان ناوي يبيعه"
مسحت سدره ع شعرها بعصبيه وقالت بقهر..
/قول باعه ياخالي باعه وقلبي يقولي انه باعه لمختار..
"لو هذا اللي صار فعلا في اقرب وقت حيجيكم مختار بش يخبركم بروحه"
نزلوا دموعها وهي تقول بحده..
/واني نراجي فيه...
🍀🍀🍀🍀
وفعلا في اليوم التالي جاهم مختار بمرته وولده بعد العصر
استقبلتهم فردوس ودخلتهم للصاله..
🍃وفي دار البنات...
سدرة وهي واقفه في نصها قالت..
/ردي بالك تطلعي بيهم كان للحمام وشن ماسمعتي اقعدي في مطراحك يااريج..
اريج بقلق..
/ حاضر..
سدرة:تعالي غرفه..
ومشت طلعت من الدار وغرفه لحقتها وسكرت الباب...
🍃🍃🍃🍃
في الصاله..
مختار:خيره الحوش هادي هكي شكله مافي حد!؟
فردوس:لاكلهم قاعدين حتى سدرة عندنا..
رفع حواجبه وقال.
/امم..وطوبى!؟
فردوس:برا طرابلس..
ابتسم وقال:عارف وين..
ع خشة سدرة اللي سمعت اخر حاجه قالها وقالتله..
/وعارف وين عمي وشن صاير فيه!؟
عقدت فاتن حواجبها بإستنكار ومختار قال بإبتسامه واسعه..
/وعليكم السلام ورحمة الله وبركاته..
سدرة بغضب..
/تحية الاسلام تنقال للبنادم مش لشيطان الرجيم..
اختفت ابتسامه وحواجبه قعدوا مرفوعات..
سدرة؛بطل طروح البراءة والاستغباء متاعك مشيته عليا مرة مش حتمشيه مرة تانيه..
قاللها:قعمزي قعمزي هدي روحك وقعمزي واعطيني فرصه نتكلم..
سدرة:الفرصه عطيتهالك قبل وانت زي عادتك تستغل في الفرص احقر استغلال..تخلي الناس تصدق كلامك و تأمنلك وتوقف معاك وبعدين تطعنهم في الظهر..
شاف مختار لفردوس وقال..
/خيرها اختك هادي!؟
فردوس قعدت تشوفله بضيق وعدم تقبل وفاتن لاحظتها بعدين غيرت نظرها لغرفه لقتها واقفه فم الصاله مربعه ايديها وتشوفله بكره..
سدرة:اشبحلي هني وقولي انت اللي دبرت هالدبارة السودا لعمي بش تخليه غصب عنه يبيع الحوش لما قالك لا خديته منه بالذل يامريض ياحقير..
ناض وقف وقال بغضب..
/تحشمي ع وجهك ياتافهه وتكلمي كويس.
ناضوا فاتن وفردوس وهما في قمة الخوف
ردت عليه سدرة وهي تقول..
/كلمناك كويس ياما كلمناك كويس ومانفعش فيك..عمرك ماحتتغير حتقعد انت نفسك الاناني الانتهازي الاصولي اللي ماعنداش قلب..
فاتن كانت تشوف لمختار بألم كان واجعها بقوة..
سدرة:الحاجه الوحيده اللي مش قادرة نفهمها كيف واحد زيك انت جي ولد وردة ولطفي بس كيف..
قاللها بتهديد واضح..
/والله العظيم كان ماسكتي تشوفي مني اللي عمرك ماشفتيه..
غرفه:وشن بديرلها بتحبس راجلها وتشوه سمعته..ولابتخطف ولدها!؟ ولابتخربلها حوشها!!؟ ولا اللي في عقلك مازال احرف من هكي..!
فردوس ودموعها ينزلوا قالت..
/علاش هكي يامختار علاش هالحقد هدا كله علاش بس!؟ انت اللي ضريتنا مافي حد فينا ضرك حتى بوي اللي كنت ناقم عليه..ماريت منا شي يوجعك وانت مش بس وجعتنا انت قهرتنا قهر..اشرت القدام وهي تقول..تتفكر في هديكا الليله اللي شديناك فيها فالجنان كنا نترجوا فيك ماتخليناش نقولولك اقعد يامختار اقعد..لكن انت شن درت سكرت راسك وقلت بنمشي ومشيت وخلتيلنا فضيحة قعدنا سنين بش قدرنا نلموها ونخلوا الناس تنساها وياريت في الاخير استفدت حاجه..
سدرة بألم وكره..
/بوي لما قالك ماتمشيش كان عارف انك مش قد الغربه وانت وقفت ع كلامه وتعرف كويس شن صار فيك بعدين..
🍃هما يتكلموا وفاتن تشوفله لون وجهه اللي ملامحه كلها غضب كان مخطوف ويده ترجف معاش قدرت تسكت اكثر من هكي شافت لخواته وقالت بإنفعال..
/ياسركم ياسر اسكتوا..
سكتوا وهما يشوفولها ودموعهم تنزل زي السيل..
فاتن بألم؛لعند امتى بتقعدوا حابسينه في الماضي وتحاسبوا فيه عليه..لعند امتى بتقعدوا ظالمينه هكي!! غلط امنا وسلمنا لكن مايقعدش عمره كله وهو يتحاسب ع الغلط!
غرفه:مالا منو اللي جتنا قبل وقعدت تحذر فينا منه ومن فعايله من هي يافردوس!؟.
فردوس:بوي الله يرحمه متفكره شن قالك يافاتن ومتفكرة شن رديتي عليه!!
سدرة:هي اكثر وحدة تعرفه وتعرف الشر اللي فيه لكن الحب عاميها..ننصحك نصيحه لو فيك ذرة عقل وتحبي ولدك حق خوديه وابعدي بيه عن المخلوق هذا اللي زيه هو
"حرام فيه الصغار حرام يكون اب"
الجمله الاخيره اللي قالتها سدره قسمت قلبه لأجزاء وفي نفس الوقت وصلاته لأقصى مراحل الغضب قدم مندفع لسدرة وهو يقول بغضب شديد..
/اسكتي ياحقيره اسكتي..
صدح في ارجاء المكان صوت الصفعه اللي نزل بيها ع خد سدرة مع صراخ خواته وفاتن اللي جاته بسرعه وقفت بينه وبين سدرة..
سدرة اللي خدتها غرفه في حضنها وقعدت تقوله بكره شديد..
/ضربه ع كبدك ياحقير..
هو اللي كانت شداته فاتن بالسيف قال بغضب واستفزاز..
/ايه اني شريته الحوش اللي جنبكم وحتى هدا حناخده تحبوا ولاتكرهوا حناخده هذاحقي اللي حرمتوني منه حقي وحناخده من وسط عيونكم ياسافلات..دف فاتن عنه وقال..جيبي ولدك واطلعي..
ومشي بسرعه وطلع الصاله من وفاتن خدت شنطة ولدها وطلعت بسرعه وراه وسدرة لحقتهم وهي تدعي عليه وتبكي بالعبرة...
"الله يقهرك كيف ماقهرتنا الله ياخدك ويريحنا منك...الله ياخدك."
#ذكريات_لاتموت
#طوبى
.....يتبع....
