#طوبى "جنة طوبى"
#جمان_فريد
#الجزء_118"معركة ضد القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
قالﷺ:
من قال: لا إله إلا الله وحده لاشريك له،له الملك وله الحمد وهو على كل شيء قدير في يوم مائة مرة كانت له عدل عشر رقاب وكتبت له مائة حسنة ومحيت عنه مائة سيئة وكانت له حرزا من الشيطان يومه ذلك حتى يمسي ولم يأت أحد بأفضل مما جاء به إلا رجل عمل أكثر منه. او كماقال .صلى الله عليه وسلم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ۞ وَأَيُّوبَ إِذْ نَادَىٰ رَبَّهُ أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ ۞
لم يتعلق سيدنا أيوب بشيء من عمله أو صبره لكن تعلق بإيمانه العميق أن ربه أرحم الراحمين 🍃
________________________________________
هاليوم كان اخر ايام موجة الحر اللي بيودع بيها الصيف عام 2020..
ولأنها موجة حر..الكهرباء انقطعت بالساعات والناس قعدت تعاني حتى اللي عنده مولد ماقدرش يشغله ياما قبل شغلوا مولداتهم في موجات الحر وانفجرت ودارت كوارث...
ومن اكثر اللي عانوا من هالموجه مرضى الجيوب الأنفية زي اريج..
بس يقعد كل شي اهون من ان الانسان يعاني من مرض اعراض مش معروفه ولامحدده ولاواضحه..
تعب مايشبهش اي تعب...العدو فيه مش ميكروب ولاجرثومه بل مخلوق لاتراه العين وهو يشوف فيك من داخل وقاعد يحارب فيك بأبشع طرق التعذيب النفسي...
🍁المعاناة هادي عاشوها هلبه ناس صابتهم مصيبة السحر..زي طوبى اللي قاعدة في هاليوم الحار تقاوم بكل قوتها..قوتها الإيمانيه الكامنه في قلب عامر بحب الله سبحانه وتعالى..
هالأيام عصيبة هلبه حتى ع عبد القيوم اللي يشوف في وجعها وألمها وتعبها وقاعد يتعذب لعذاب ومع هذا يرغم في ناس يبان قدامها قوي بش يقويها...
☘هي توا مقعمزة في الصاله شاده المصحف تقرا في سورة البقرة وهو مقعمز في الكوجينه يراقب فيها...
كان حاطه قدامها مروحه تخدم بالشحن وجنب المروحه شيشة مية مصقعه..
طوبى وهي تقرا بصوت عالي..كانت تسمع في اصوات صراخ وتحس في شي كاتم ع انفاسها..
هالشي بدي يصير معاها الأيام الاخيره هلبه..
اول مرة خافت منه وكانت حتبطل قرايه بس عبد القيوم خلاتها ترجع تقاوم وتكمل...
حطت يدها ع صدرها لما وصلت في الآيتين 163 و164..
بدي صوتها يرجف وهي تقرا وتزيد تعلي في صوتها..
(وإلهكم إله واحد لا إله إلا هو الرحمن الرحيم)
حست برغبه شديده في البكاء وبدت تبكي لكن مع استمرارها في القرايه..وعبد القيوم يشوفلها بنظرات وجع وهو شاد ع يده بقوة وقلبه مفطور ألم عليها..
وهي تبكي شويه وترجع تكمل لعند ماكملت الآيتين..
حطت المصحف ع جهة وخدت نفس عميق..بعدين مدت يدها للشيشه خدتها فتحها صبت منها في يدها وغسلت وجهها ورقبتها...سكرت الشيشه
