#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 🍃🍃
🍃🍃🍃🍃
وبعيد عن مدينة الزاويه بمسافه ستة كيلو متر تقريبا..
منطقة جود دائم..وتحديدا الغابه متاعها...
كان نضال طالع رحلة تخييم مع ولاد خوته وخواته..
ناصبين خيمه...ومولعين نار بش بيديروا عليها المكرونه اللي
نضال ومحمد المهدي ناوويين يطيبوها..
اما باقي الشباب كانوا يلعبوا في كرة القدم..
☘نضال وهو يشوف لمحمد محي الدين قال..
/اللي يعجبني فيه انه ميتأثرش هلبه يتخطى بسرعه..
محمد المهدي..
/مانحسش فيه هكي..نحسه من النوعيه اللي يدسوا داخلهم هلبه..
نضال وهو يفكر في كلام محمد قال..
/قصدك مايحبش يبين مشاعره..
محمد المهدي..
/مزبوط..السبوع اللي فات كنا في الملعب ندرب فيهم هو وواحد تاني في فريق الكورة متاع شارعنا..المهم حط جهده كله في التدريب كل مانقوله تريح شويه يقولي لا نقدر نكمل اني تعبت وهو مازال يدرب..
نضال؛يفش غله يعني..
محمد؛ومرات تخطر عليه ايام الادمان يقاوم بش مايوليش..
نضال؛نقول الحمد لله اللي لحقنا عليه بكري كانهدا راهو خش في دغاريق تانيه..
هز محمد راسه وعيونه ع ولد عمته خديجه..
نضال شاف لحمزة وقال..
/اني توا مركز مع حمزة الولد ولى يحب العزله هلبه خايف يخش في حالة نفسيه..
محمد المهدي بأسف..
/الولد فاهم وعارف كل شي ياعم ومتحشم منه..
نضال بعصبيه؛والله غير الواحد مايبيش يحط ذنب تاني ع كتافه راهو ماخليت ماقلت عليها امه هادي..
محمد المهدي بإزدراء..
/في ستين ودرة حني علينا بصغارنا بس..
نضال شاف للنار وقال..
/هو هدا..اني نبي جوري تقعد ديما مع اختك..قام عيونه في محمد وقال..الله يبارك عليها محافظه ع اخلاقها وماشيه بالدين يومها نسمع فيها تنصح في سدرة بنت نسرين ع الصلاة..
محمد المهدي قال بإبتسامه..
/اني فرحان بيها هلبه لكن في نفس الوقت عندها خصايل ماتعجبش فيا حقوده ولسانها طويل..
نضال؛مزبوط هادم عيوب مش هينات ان شاء الله مايكبروش معاها..
محمد المهدي؛مانخليهمش يكبروا معاها..
ابتسم نضال..
"ووووه"
شافوا جهة الولاد لقوا محمد حامد يحتفل بهدف سجله..
نضال بضحكه؛مش عادي الولد هدا..
محمد المهدي بإبتسامه..
/روحه مرحة وبسيط وقلبه طيب طيب طيب لين خلاص..
نضال بضحكه:صح لكن بارد شويه..
محمد المهدي:هلبه هلبه مش شويه نحسد فيه عليه بروده هدا..
نضال؛والله يحسد عليه..
محمد المهدي؛سمعت الاغنيه الجديده اللي منزلها..منزلها بموسيقى ومن غير موسيقى..
نضال شافله:عندك؟
محمد طلع هاتفه وحط الاغنيه بدون موسيقى وعطي الهاتف لعمه..
فتح نضال الاغنيه وقرب الهاتف لوذنه وبدي يسمع..
🍃نفسها كلمات حمزة اللي كان يعبر فيهم عن مشاعره وعن اللي شافه في حياته..نضال تأثر بيها ع الآخر ولما عرف انها كلمات حمزة زاد تأثر فوق دهشته ان كلمات معبرة كلها ألم زي هادي تطلع من ولد عمره مايقارب 11عام!
☘هو الهم يقولوا يشيب الطفل الرضيع..واللي شافه حمزة في حياته اللي تنعد سنواتها ع اصابع اليد الوحده من لما وعي ع الدنيا يكبره اضعاف عمره بثلاثه مرات..ومثل حمزة مثايل☘
🍃🍃🍃🍃
جي ضيف ورشة تعليم الخط العربي..
كان احد اهم الخطاطين في البلاد رحبوا بيه سلافه وعبد القيوم وخلوه يقعمز ع الكرسي متاعه..
بعدين وقفوا مع بعض قدام الحضور رحبوا بيهم وبالضيف ومن بعد الترحيب عطوا نبده عن موضوع الورشه..
"تعليم الخط الثلث"
طوبى وهي تشوف لعبد القيوم وسلافه كيف يقدموا في النبده كانت نارة الغيره والعه في قلبها والحزن مالي صدرها لكن حاولت ع قد ماتقدر ماتبين شي من مشاعرها..
وعبد القيوم وهو يتكلم وهو ساكت كان يسرقلها في النظر مرة مرة ولما تجي عينه في عينها يبتسملها وهي ترد في الابتسامه..وعيون ميار عليهم..
اما سلافه فكانت تحاول وبكل قوة تسيطر ع مشاعرها وتخفيها وتظاهر بالعكس قدام عبد القيوم بالذات..
عبد القيوم اللي لما تشوف منه نظره عابرة ولالما يكون قريب عليها ترجف بكل مافيها ودمعتها تكون ع حفة جفونها..
☘وبعد المقدمه اللي عطوها تقدم الضيف..
شكر سلافه وعبد القيوم والجمعيه بعدين بدي يتكلم عن موضوع الورشه..
الكلام اللي يقول فيه كان جميل واسلوبه سلس خلا طوبى مركزه معاه بكل حواسها..
اول مابدي يكتب ع السبورة ركزت ع طريقه رسم الخط والدقه والحرص الشديد عند الخطاط وهو يكتب في حرف او كلمه وكأنه يدير في شي قيمته جدا عاليه وابسط غلطه تفسده..
🌸وهني قلب طوبى بدي يدق لحب جديد..حب الخط العربي اللي كان ليه سحر خاص وتأثير يوصل للقلب.. حست انه مازال اعظم واهم من قيمة فن الرسم🌸
بدت تكتب في الكراسه الموجوده قدامها واللي كل الحضور عندهم منها تسمع في توجيهات الخطاط وتنفذ بكل اهتمام..
🍁وفي هاللحظات اللي نست فيهم همومها واوجاعها نست حتى عبد القيوم ومايجي منه..وهو عيونه عليها وغيران لأبعد حد..وسلافه تشوفله كيف يشوف لطوبى وصاير فيها اضعاف اللي صاير فيه...
☘الخطاط:في حد فيكم كتبها هكي او نقولوا حاول يقرب..
طوبى بثقة:اني قربت هلبه..
مشالها وهو يقول
/ ترا ورينا يا..
قالتله؛طوبى..وخدت الكراسه ومدتهاله..
هو خداها وقال..
/طوبى اسم جدا جميل ومميز..ان الذين ءامنوا وعملوا الصالحات طوبى لهم وحسن مئاب..شاف للكراسه وقال..من مسميك ياطوبى؟
طوبى:والدي الله يرحمه..
هز راسه وقال:الله يرحمه..فعلا طوبى قربتي هلبه..
حطلها الكراسه ومشي ولى لمكانه وكمل شرح وطوبى كانت ملامح الفرحه ع وجهها مخليتها زي طالبة الابتدائي لما تشكرها الابله في الفصل قدام زملائها..
ومستمرة في نسيان وجود عبد القيوم ومايجي منه..
وعبد القيوم من الغيرة معاش ركز مع الخطاط نهائي وكان يراجي امتى ينتهي الوقت المحدد للورشة..
🍁🍁🍁
وتعدي ساعه من وقت الورشه عطاهم بعدها الخطاط كلمة يكتبوها ومشي قعمز في كرسيه..
طوبى وهي منغمسة في كتابه الكلمة اخترق انفها ريحة عطره..شويه حط ايديه ع الطاوله متاع كرسيها وسمعاته قال..
"الله يبارك تتعلمي بسرعه"
رفعت عيونها لقت عيونه قدامها مباشرة..
☘راحت في نظراتهم اللي ديما تهرب من تفسير معناهم..
اما هو غرق في محيط هالعيون اللي مش قادر يحددلهم لون يتسموا بيه.
🍁مافي حد كان مركز معاهم غير ميار وسلافه..
سلافه اللي كانت مغصوصه بتنهيدات الحزن وقلبها قاعد يوجع فيها بقوة..
ميار شافتلها لقتها تشوفلهم بغيرة وألم وعيونها مليانات دموع..
☘نزلت طوبى عيونها للكراسه وهي مرتبكه وخدودها محمرات من الخجل..
هو قعمز قدامها ع رووس اصابعه وقال بإبتسامه..
/ليش ماتسمعيش في الكلام!؟
طوبى بصدمه واحراج وصوت منخفض.
