#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🍃 بعض الذكريات كفيلة بأن تحرقك من الداخل! 🍃
___________________________________________
في صباح تاني يوم...
طلعت سدرة المنتهى بولدها من المصحة وراجلها حطها في حوش طوبى..
لما جت خاشه بعلي للحوش تعالت زغاريد نساوين العيله اللي صدحت في الشارع كله..
سدرة وهي تضحك والدموع معبيات عيونها مررت نظرها عليهم بالوحده لعند ماثبتتهم عند سدرة المهدي..شافت نظراتها اللي كلها فرحة ولهفه أشرتلها تجي والبنت قدمتلها بسرعه وضمتها..
***********
سدرة المهدي وهي تشوف لخوها بحب وشوق..
/ياروحي صغيرون هلبه..
فايزة بإبتسامه..
/انتي لما جيتي كنتي اصغر منه..
شافت لفايزة بدهشه وقالت..
/اصغر من هكي!؟
ضحكت سدرة المنتهى وفايزة قالت بضحكه..
/ايه..
تاله وهي تشوف لعلي قالت /نحس بيجي يشبه لخالتي سدرة..
سدرة المنتهى قالت بضحكه..
/مازال مايبانش توا..
سدرة المهدي وهي تشوف لخوها قالت..
/نجيه عسول العسولين..
☘ومن بعيد شويه كانوا جنة ومهاب وأواب ومعاهم مئاب يشوفولهم بفضول..
شويه قدمت جنة بخطوات مترددة لعند ماوقفت جنب فايزة حطت يدها ع كتفها وقالت..
"بيبي"
فايزة خدت يدها وباستها بعدين قالت..
/ايه بيبي..
سدرة المنتهى قالت..
/تبي تشوفيه؟
هزت جنه راسها بإيجاب..
شدتها فايزة وحطتها قدامها وهي تقول..
/هي شوفي..
طبست جنه ع علي وهي تشوفله بفضول بعدين قالت..
"بيبي.."
ابتسموا اللي حواليها..
هذا كله تحت عيون باقي الصغار اللي قدموا وحتى هما طلبوا يشوفوا..عطوهم فرصة يشوفوه شويه وشكله علي شنيبه قلق من الزحمة عليه بدي يعيط..خداته امه بش ترضعه والصغار طلعوا من الدار بش يلعبوا في الصاله اللي كانت تبخر فيها مطيرة لما شافتهم قالت..
/تمسوا المنادير نحك ع شواربكم الفلفل..
شافولها بخوف وهي بعد ماشافت نظراتهم قالت..اهو قتلكم..وطلعت من الصاله وهي شادة ضحكتها توجهت للكوجينه وخشتلها...
لقت فردوس وهاديه يتعاونوا ع تجهيز الغدي وطوبى دير في طبيخة الجغوم لسدرة...
حطت البخارة ع الطاوله وقعدت تشوف لهاديه بتفكير بعدين قالت..
/هويديه خيره عبد المطلب؟
شافوا طوبى وفردوس لهاديه..وهاديه حطت اللي في يدها وقالت..
/ياحنة يخمم..
مطيره:في شني!؟
تنهدت وقالت..
/خاش مشروع كبير حط فيه ماعنده من فلوس واني ساعدته برغم اني مش متريحة هلبه وقتله..قتله ياعبد المطلب المشروع كبير هلبه والخشة فيه لواحد زيك يعني ماعنداش ع شني يولي مجازفه كبيره سكر راسه ياوخيتي وخش فيه وتوا تحسيه زي اللي نادم..
مطيره:اشبح من لاعب بدماغه..
هاديه؛ايه واحد عندنا غادي متعرف عليه من قبل لياخدني خش معاه في خدمه قبل وربح من وراها ولما عرض عليه المشروع هذا وقعد يحكيله شن بيجيه منه خش راسه هلبه وقال نبي نتشارك معاه فيه..
فردوس بقلق..
/مش مريح الموضوع..
طوبى:مجازفة كبيره زي ماقلتي..
مطيرة بضيق..
/ان شاء الله يربح فيه كان لاقدر الله خسر يخش في عقله ويطلع..
هاديه بضيق..
/ربي يستر..
ع خشة صفيه عليهم وهي تقول..
/احسبوا حسين في الغدي بيروح العشية..
فردوس وهي تشوفلها قالت..
/دايرين بزايد..
مطيره ابتسمت وقالت..
/الفال ليه نفرحوا بيه وبصغاره..
كلهم قالوا باصوات متقطعه..
"ان شاء الله..آمين"
🍃🍃🍃🍃
"طلعت من المصحة وروحت لحوشنا"
غرفه قالت هالجمله لصاحباتها وهما مقعمزات في قاعة المحاضرات..
وحده منهم سألتها..
/وامتى بدير لمتها؟
غرفه:بعد يسكر ولدها سبوع اهو يابنات نعزمكم مرة تانيه حاولوا ماتغيبوش..
=إن شاء الله..
ع جية وحده وقفت عليهم وقالت..
/السلام عليكم..
كلهم ردوا عليها السلام ووحده منهم قالت..
/يابنات هادي لوصي بنت اختي..
البنت قالت بعدم تقبل..
/غير كان تفكينا من لوصي هادي..
ضحكوا..
..سلمت عليهم كلهم وقعمزت جنب خالتها اللي وجهت كلامها لغرفه..
/راهو اكبر سبب لجيتها اليوم السيارة ياروفي..
غرفه قالت بإبتسامه..
/فاضيه توا؟
قالتلها:ايه قصدك نمشوا توا؟
غرفه؛ياريت لأني الايام الجايه مش حنكون فاضيه..
شافت البنت لخالتها وخالتها قالت..
/خلاص نمشوا توا...
☘سلموا ع زميلاتهم وطلعوا مع بعض ركبوا مع غرفه في سيارتها وتوجهت بيهم للمعرض..
🍃🍃🍃🍃
"تشوف فيها قدام هادي مشيت بروحي ل****** وحجزتها يعني حديد اصلي مش دوة زايده"
الزبون وهي يتفحص في السيارة قال..
/باين عليها..رد نظره لعدنان وقال..خلاص بنتم فيها..
ابتسم وقال..
/تعالى هي..
وكيف جي بيمشي هو والزبون لمكتبه سمع باب المعرض انفتح شاف غرفه خاشه ومعاها زوز تانيات..
بانت في عيونه الفرحه..ابتسم ومشي وهو يكلم في الزبون..
☘غرفه:ادهوري وشوفي..
البنت قالت بإنبهار..
/الله يبارك..ياودي مانظني نقدر عليهم هادم..
غرفه بضحكه..
/انتي غير شوفي قبل تلقي سيارة ع داب فلوسك..
صاحبة غرفه قالت..
/الله يبارك ماتوقعتاش هكي بكل..
غرفه: اللهم بارك..تعالوا معاي...
مشت وهما لحقوها وحتى عيون عدنان لحقتها معاهم كان يراجي امتى يكمل شغله مع الزبون ويصرفه بش يمشيلها..
☘وهي بعد مادارت جوله باللي معاها ع المعرض وقع اختيار البنت ع وحده من السيارات وبعد مافتحتها وشافتها من داخل قالت..
/خلاص اعتمدت..لكن زعمه بقداش!؟
"30"
وجهوا انظارهم لعدنان اللي كان حاط ايديه ورا ظهره وهو يشوفلهم بإبتسامه..
البنت فتحت عيونها ع وسعهم وهي تقول بصدمه..
/بكم!؟
خالتها قالت وهي تشوف لغرفه..
/مافيهاش كيف تراعونا شويه!؟
سبق غرفه وقال..
/مانقدرش نزل سعرها دينار واحد..
البنت شافت لخالتها بصدمه ووجهها احمر من الإحراج وخالتها ابتسمت بأسف..
غرفه شافتلهم بعدين شافت لعدنان وقال بجديه..
/ترا شويه استاذ عدنان..
فاتت من جنبه هو لحقها وكان شاد ابتسامته..
اول ماوقفت غرفه هو قال..
/سامحيني مش حنزل في سعرها نهائي..اني لو المرة اللي فاتت راعيت لأن السيارة هديكا مش زي هادي وبعدين ياابلة غرفه حني فاتحين المعرض هذا بش نسترزقوا و ونربحوا مش بش نخسروا ونغرقوا في الديون!
كان يتكلم وهو مبتسم ابتسامه فيها شي من الإستهزاء فحوى كلامه نفسه بان فيه السخريه وغرفه حاليا ممكن تفوت كل شي ولا الهزوة عليها والانتقاص منها لكن برغم حالة الغضب اللي كانت فيها سيطرت ع نفسها وجاوبت عدنان بأسلوب جدي جدا..
/كلامك مافيشي غلط بس تمنيت لو سمعت مني بعدين قلت اللي عندك..المهم اني نعرف سعر السيارة كويس لكن مانعرفش بالزبط اذا كانت تقدر عليه ولالا قعدت ساكته لعند ماسألت عن السعر وكنت حنقوللها عليه ونشوف شن تقول..في حالة قالت غاليه ومانقدرش عليها حنخليها تشوف وحده بالسعر اللي يناسبها ونخليها تقتنع بيها وتاخدها المهم ماتطلعش من المعرض بدون ماتشري..
غير نظره عنها وهو يضحك ضحكته كانت خفيفه بس ماكانتش ضحكة سخريه بل اعجاب..
☘هو كان قاصد يدير الموقف اللي داره يبي يشوف شن يطلع منها وردة فعلها كانت مفاجئة بالنسبة ليه وزادت اعجابه بيها☘
هدا ضحك وشافلها لقاها تشوفله وهي رافعة حواجبها..
ابتسم وقال..
/مزبوط عندك حق..خل نرجعولها ومانخلوهاش تطلع من هني الا وهي راضية..
ومشي سبقها وهي مشت وراه وفي نفسها تقول..
"مثقل دمه"
☘ووصلوا فيهم وخدي عدنان صديقة غرفة وبنت اختها جولة تانيه في المعرض وقدر يقنع البنت بسيارة تانية ارخص سعرا واتفقت معاهم تاخدها بالتقسيط...
عدنان بابتسامة:ان شاء الله راضية؟
ردت البنت وهي تقول بإبتسامة..
/راضية..
خالتها شافت للساعة وقالت..
/هي غرفه وقت ع المحاضرة..
شاف لغرفه وهو مضيق عيونه لقاها تشوف لهاتفها وتقول..
/ايه خلاص قريب تبدا هيا..يدوب شافتله وقالت..السلام عليكم..
واللي معاها حتى هما القوا السلام وطلعوا وراها وهو بعد مارد عليهم وقف قدام مكتبه وقعد بعيونه مع غرفه لين طلعت من المعرض..رجع تفكر الحوار اللي صار بينه ضحك بعدين خش لمكتبه...
🍃🍃🍃🍃
الساعه 3:00بعد الظهر..
كان مختار راقد ع السرير ومرقد ولده ع صدره وحاط يده عليه..
ع خشة فاتن اللي كانت في الحمام دير في "دوش" لما شافت وضعهم ابتسمت بحب..
ومشت بسرعه خدت هاتفها من ع الزيانه وتوجهت للسرير..
قعمزت جنب مختار بهدوء وبدت تاخد معاهم صورة"سيلفي"
استاقظ مختار وقال بصوت ناعس وهامس..
/شن ديري تو تفيقيه!
شدت ضحكتها وهي لاهيه بهاتفها الصورة اللي صورتها نزلتها ع قروب ليها ع الواتساب فيه صديقاتها الانجليزيات..
وبدت تهل عليها رسائل الاعجاب بهالمشهد اللطيف وفي منهم تغزلت بمختار وهي كانت ترد عليهم بغيرة مصطنعه ومشت المحادثه كلها مزح وضحك..
مختار بهمس:كان مش راقده اطلعي برا..
ضحكت وقالت بهمس..
/باهي خلاص سكتت..
غمض عيونه ومسح بيده ع ظهر ولده..
اما فاتن خشت ع الفيس بتشوف اخر الاخبار..
ويطلع قدامها منشور تهنئه اشارت بيه آلاء لخالتها سدرة ابتسمت بعد ماقراته وقالت..
/سدرة جابت..
مختار وهو مغمض عيونه قال..
/شن جابت؟
فاتن قالت وهي مبتسمه بمفاجأة..
/قتلك قبل حامل بولد سماته علي..
فتح عيونه وقال..
/تموت كان ماقلدتنيش..
حطت فاتن يدها ع فهما وهي تضحك بكتمان..
رجع غمض عيونه وقال..
/لكن اكيد ولدي احلى..
فاتن بضحكه..
/مدام ولدك اكيد احلى..
قاللها:بدون شك..
ضحكت فاتن بعدين لهت بهاتفها وخشت ع المنشور وعلقت عليه..
🍃🍃🍃🍃
الساعه 4:15عصرا..
كان حسين واصل لحوشه عن طريق سيارة اجرة..
بعد ماخشله..خدي "دوش" وبعد طلع من الحمام قعد ربع ساعه وهو يختار شن بيلبس لعند مارسي اختياره ع حاجه عجباته..
ماليه صوف لونها ابيض كريمي رقبتها طويله ع سروال جينز اسود وبالطو بني طوله للركبه ازراه كبيره ولونها ذهبي..
..لبس وتأنق وتحمم مرة تانيه بالعطر متاعه بعدين خدي هاتفه ونظراته وطلع من الحوش..
🍃🍃
الساعه 4:45عصرا..
روحت غرفة من الجامعه..درست سيارتها في الجنان وهي تكلم في خالها المحجوب هاتفيا ع شي يخص محلات الملابس..
☘في نفس الوقت..
طلعت طوبى للجنان بش دخل الحوايج"الملابس" من ع المنشر..
لما وصلت في المنشر سمعت باب الحوش يدق شافتله شويه بانت عليها غرفه ماشية ناحيته قالت بإستغراب..
/روحت! ماسمعتش صوت الباب!..
قعدت تشوفلها وهي واقفه ع الباب للحظات بعدين فتحاته..
☘غرفه:اهلا..
خش حسين وسكر الباب وهو يقول..
/لما تفتحي الباب خليك وراه..
غرفه بمسايرة..
/ياودي حاضر..حمد لله ع السلامه..
حول نظاراته وقعد يشوف لعيونه وهو عاقد حواجبه ومبتسم..
/الله يسلمك..
غرفه لما شافت لعيونه حست نظرتهم غريبه وهالإحساس خلاها تضايق غيرت نظرها عنها وقالت..
/تفضل خش..
ومشت بتخش وهو لحقها وكان يضحك في ضحكه خفيفه بدون صامت..
☘وطوبى تشوفله وهي مبتسمه لعند مادرق عنها بعدين ضحكت وقال..
/سبحان الله..
تنهدت وشافت للمنشرة وبدت تحول في الحوايج...
🍃🍃🍃
وخش حسين للصاله وقعمز مع امه ومرت بوه وعمته مطيره يهدرزوا شويه خشت فردوس وقعمزت وجت بعدها اميمه..
اما اريج وفايزة وبناتها وسدرة المهدي قعدوا في دار المعيشه مع الصغار جنب سدرة وولدها..
خشت عليهم طوبى وهي شاده الحوايج قالت..
/رقدوا جنة ومئاب؟
اريج:قعدوا هالجنون يفنصوا..
ضحكوا وطوبى قالت بضحكه..
/حرام عليك..شافت للولاد وقالت..بروا للصاله سونا جي..
اواب ومهاب مع بعض صاحوا بإسمه وطلعوا يجروا.
سدرة:ياحليلي هييه فيقوه هالنقراز..
فايزة:راك مازلتي في اول يوم ياما جايك..
سدرة خدت ولدها في حضنها وهي مبتسمه بعصبيه..
طلعت طوبى من جنبهم وهي مبتسمه براحه وفرح شوفتها لسدرة مع عيلها في كل لحظه يكبر في شعور الفرح في قلبها..
خشت لدارهم لقت غرفه تعلق في حوايجها..
مشت حطت الحوايج ع السرير وقالت..
/جعانه؟
غرفه:مش هلبه كليت في الكليه..
قعمزت طوبى ع السرير وبدت تطوي في الحوايج..
وغرفه مشت طلعت من الدار بإتجاه الحمام..
☘توضت وصلت العصر وخشت سريرها وتغطت بالبطانيه وراحت في نوم عميق..
وحسين كل شويه يراجي فيها تخش عليهم حتى الغدي اللي جابتهوله امه يدوب كلي منه..
🍃صفيه:خيرك ماكليتش!؟
حسين وهو عاقد حواجبه..
/ماعنديش نيه توا..
ناض وقال:بنمشي نرقد في حوش جدي..
ومشي طلع من الصاله وهما معاه بعيونهم..
صفيه بتعجب:تو مش هو قال جعان!؟
مطيره:اشبح خيره جوه انقلب فجأة..
صفيه:تبي الحق قداش ليه جوه متغير ومش عاجبني..
هاديه:بالك يبي يتزوج..
مطيره:حتى اني حسيته من بعد ماشاف خوه زي اللي ولى خاطره يتزوج حتى هو..
صفيه:غير يقول هو بس من غدوة نبدا ندورله..
فردوس:بالك في باله وحده..
صفيه:ياريت يافردوس ياخد وحده هو يبيها مانبيشي يعاود نفس الغلطه متاع حسنا..
مطيره:نقولك خليه عليا اني تو نقصقصه..
صفيه هزت راسها بصمت وبنتها اميمه تشوفلها وتفكر لو عرفت امها ان حسين حاط عينه ع غرفه كيف حيكون موقفها!!؟
🍃🍃🍃🍃
"والله اني خاطري نمشي لكن مانقدرش نخلي امي بروحها"
سميرة سكتت وهي تفكر بعدين قالت..
/علاش ماتجربيش تكلمي راما تجي نقعد حداها!؟
نسرين:مظني تقول باهي ومرات ماليها مايرضولهاش..
سميرة:انتي جربي كلميها وشوفي..
سكتت نسرين شويه وهي تفكر بعدين قالت..
/تو نشوف..
**********
راما وهي تكلم في خالتها هاتفيا..
/ماعنديش مشكله لكن خل ناخد شور حناي..
"باهي شوفي توا وردي عليا بسرعه"
راما:باهي..
..ونهت المكالمه مع خالتها وطلعت من دارها ومشت لدار المعيشه وين ماتقعد جداها وخدت شورها...
☘نجمه:بري بنتي حتى هي ليها عليك حق..
ابتسمت راما وقالت..
/خل نمشي نوتي روحي..
..ومشت طول لدارها كلمت خالتها نسرين..بعدين طلعت ماليه طويله وسروال جينز عليهم بالطوا طويل لتحت الركبه ووشاح لبستهم ومشت طلعت من الحوش...
🍃🍃🍃🍃
"نجيه ياربي نجيه عسول عميمته"
فايزة:باين حمش من توا..
نسرين بضحكه:صح ملامحه واعره..
ضحكت سدرة..
شافتلها نسرين وقالت..
/محمد ويزن يبوا يشوفوه..
سدرة:تو نكلمهم يجوا وانتي دخليهم للمربوعة الدخلانيه..
نسرين:تمام...
☘وكلمت سدرة محمد وطلبت منه يجي هو وخوه للحوش في البدايه تردد يوافق وبعد ماكلي هزايب من سدرة وافق وهو يضحك..
🍃🍃🍃
"تي هيا طق"
محمد المهدي بشي من الاحراج
/طق انت..
يزن شافله بطرف عينه امتعاضا بعدين دق الباب..
🍃سمعاته تاله اللي كانت تحط في الأحذيه في المدخل سيبتهم وطلعت للباب بدون ماتعرف من وراه..
وصلت فيه وقالت..
/مني!؟
☘يزن ارتبك ووجهه ولى احمر شاف لخوه بطرف عينه لقاه يأشرله بحواجبه ع الباب وكأنه يقوله..
"رد عليها"
عقد حواجبه وغير نظره عن خوه..
"مني"
محمد المهدي وهو مبتسم..
/افتحي..
شويه وانفتح الباب..
ويشوفوها ماشيه تجري بش تخش..
ضحك محمد المهدي ويزن كان يسرقلها في النظر وهو يسكر في الباب ومازال لون وجهه احمر..
لحظات وطلعت نسرين وهي تقول بإبتسامه..
/هي تعالوا...
🍃🍃🍃
"جيتوا يامتحشمين"
خشت عليهم سدرة وهي شاده شنطة فيها ولدها وتقول فهالجمله .
ناضت نسرين خدت منها الشنطه ومشت بعلي لخوته
قعمزت في وسطهم وهما يشوفوا لخوهم بلهفه..
ضحك يزن وقال..
/دعبول الله يبارك..
محمد المهدي بإبتسامه..
/الله يبارك..
سدرة المهدي:تبيله بش يكبر..
قالتله مرت بوها..
/بنخليك تربيه معاي وتولي حتى انتي امه..
ضحكت سدرة المهدي بحماس وخوتها يشوفولها بإبتسامه..
نسرين:ربي يحفظكم ويخليكم عزوة وسند لبعض..
كلهم قالوا ورا دعائها..
"آمين"
🍃🍃🍃🍃
الساعه 6:30مساءا..
في دار المعيشه..
كانت راما مقعمزه جنب حناها ع كرسي وتتفرج معاها ع مسلسل بدوي..
راما وهي تتفرج ع مشهد ق.تل قالت..
/اعوذ بالله منه..
يدوب ضحكت مغليه..
"امي مامي ماميشكو"
ضحكت راما وهي تسمع في خالها نضال ينادي ع امه..
شويه وخش عليهم لكن ماكانش بروحه كان معاه محمد..
اول ماشافاته غطت شعرها بالوشاح وركزت بنظرها ع التلفزيون..
وهو اللي كان يضحك ع عمه لما شافها خفتت ضحكته وغير نظره عنها ..
نضال:شن جو راما؟
شافتله وقالت بإبتسامه مجامله..
/تمام الحمد لله..كيف حالك انت...
قاللها:الحمد لله..النتيجه قريب..
راما:ايه تقريبا الاسبوع الجاي..
نضال:بالتوفيق ان شاء الله..
راما:ان شاء الله..
مغليه وهي تشوف لمحمد قالت بصعوبه..
"شفت..خوك؟"
ابتسم وقال..
/مش عادي ياحناي الله يبارك عليه مكعبر تكعبير..
نضال بإبتسامه:الله يبارك..قالت..
"ان شاء..الله.. يشبهكم"
ضحكوا ومحمد هز راسه وهو يقول..
/نسخة مني..
مغليه بإبتسامه..
"مخلا..ربي ماعطاه"
ضحك وطبس ع راس حناه وباسه وراما تسرقله في النظر..
لما وخر عن حناه شافلها لقاها تشبحله بسرعه غيرت نظرها للتلفزيون وهو شاف لحناه وعمه ولهي معاهم في الهدرزة..
☘هادي اول مرة من فترة طويله تقعد معاه راما في مكان واحد..
وهي تسمع في كلامه ماقدرتش تمنع نفسها من سرقة النظر ليه هو كان مرة مرة طيح عينه عليها بالغلط يشدها تشوفله قبل لتحول نظرها عنه وكان يحس بشي من الارتباك..
🍃🍃🍃🍃
"قتلها تمشي للعرس وماتعدلش"
مروة قالت هالكلام للموجودات عن امها..
نسرين:ايه فايزة مدام البنت شدت فيك بري وهكي وصليلهم انك محوليتهم من حساباتك مهما ومعاش يحاولوا معاك..
فايزة بضيق..
/صعب ندير حاجه زي هادي يقولوا ياجاري عاركيني وخلي وجه باش تقابليني زي مااحتجتهم يوم فاتحة صفاء اكيد بنحتاجهم بعدين لنفس السبب..
بدت ع وجه مروة ملامح الضيق وطوبى تشوفلها..
سدرة المنتهى:عندها حق..خلاص اعتذري من البنت وفوتيهم الزوز..
فايزة؛هذا اللي بنديره..
خشت عليهم غرفه وهي لافه عليها الشال قالت..
/السلام ياعيله..
ناضتلها نسرين مشتلها غرفه سلمت عليها بعدين مشت قعمزت جنب طوبى..
فهاللحظه جي لطوبى اتصال شافولها كلهم وهي تشوف لهاتفها بعدين ناضت وطلعت من حداهم ونسرين مركزة معاها...
☘☘☘
خشت للدار وسكرت الباب بعدين ردت..
/السلام عليكم..
"وعليكم السلام.."
بإبتسامه قالت..
/كيف الحال..
"تعبان وقلبي واجعني"
ضحكت وقالت..
/لاباس عليك..
"لايوريك باس ياحنه"
قعدت تضحك هو قاللها..
"قصدك بتقعدي بعيدة عني اسبوع !!؟"
هي قالت..
/الله غالب..اختي هادي وقاعده في حوشي مانقدرش نخليها قبل لتروح لحوشها..
"باهي ونا شني!؟"
قعدت ساكته وهي مبتسمه بخجل وقلبها يدق بقوة..
" قصدك انتي تفكري فيها!!'
بضحكه قالت..
/لا مش هكي..باهي قولي وين بتتعشا..
"مش متعشي ولاواكل حاجه لعند مانسمع جواب سؤالي"
هي بخجل شديد..
/عبد القيوم..
"هيا جاوبي بلاجعونه"
بضحكه قالت..
/ياودي باهي..انت حبيبي..تريحت توا!؟
"نا توا بس عرفت انتي ليش تكرهي الشتا"
قعدت تضحك..
"معاش تضحكي وقولي خديتي دواك؟"
ابتسمت وقالت..
/ايه..
"ماكليتيش دهانات ولا"
طوبى:لا والله نهائي ماشيه ع تعليمات الدكتورة..
"كويس..حبيبي توا نا مشغول شويه ردي بالك ترقدي في الليل ترقدي تشوفي"
بضحكه قالت:باهي نستنى في اتصالك..
"ارهيقم"
بإبتسامه قالت..
/ارهيقي..
"هي سكري هي"
ضحكت وقالت..
/باهي..ونهت المكالمه بعدين حضنت الهاتف وغمضت عيونها وهي تتنهد بحب..
🍃🍃🍃🍃
ومرت باقي ساعات هاليوم مع دفي هاللمة الحلوة بس حال القلوب كان متباين..
في اللي قلبه مرتاح..وفي اللي قلبه فرحان..
وفي قلوب خالطت فرحتهم خوف..وفي قلوب مشغوله واللي شاغلها ولى اكبر من انه يتخبى..
🍃مطيره:امورك كلها تمام خدمتك ماشيه!؟
حسين وهو شاد طاسة الشاهي قال..
/الحمد لله كله تمام التمام..
مطيره:باهي خيرني حسيتك ليك فتره جوك ملخبط ومش ع بعضك في حاجه شاغلاتك؟
شاف لطاسه الشاهي وهو عاقد حواجبه بضيق..
مطيره:قولي من يومنا وحني صحاب ولا..
تنهد وشافلها وهو يقول..
/اللي بنحكيلهولك مانبيه يطلع لحد ياعمتي..
مطيره بقلق..
/سرك في بير غريق ولدي..احكي قول اللي عندك..
مسح بيده ع لحيته بعدين قال..
/مش عارف من وين نبدا ياعمتي..غمض عيونه بعدين فتحهم وقال..حاجه صارت معاي غصب عني قسما بالله ماعارف كيف صارت وامتى صارت شي عمري ماحسيته ومش قادر نتحكم فيه بكل..
مطيره وهي تفكر:في وحده في حياتك؟
غمض عيونه وتأفف بعدين رفع حواجبه ونزلهم ردا منه ع سؤالها..
مطيره بشك..
/نعرفها!؟
فتح عيونه وهز راسه بإيجاب..
"غرفه!؟"
لما قالت اسمها تسارعت دقات قلبه ووجهه تغير لونه للأحمر..
مطيره ضحكت بصدمه وهي تقول..
/معقوله!
بضيق واحراج قال..
/مش عارف كيف ياعمتي غصب عني قسما بالله..هي تغيرت هلبه هلبه ياعمتي تقول عمري ماعرفتها ماتقولش نفسها بنت عمي بكل..غصب عني خلتني نفكر فيها في كل وقت وين نكون بعيد نراجي امتى نروح باش نشوفها مش متحمل سلامها ولاكلامها مع حد غيري..ووين نشوف شن دير لعبد الرؤوف الله يرحمه كيف تصدق عليه وتراعي في ماليه نضايق هلبه لكن تزيد تكبر في عيني..افف..مش عارف كيف بنشرحلك لكن هكي من الاخير اني نبيها..
مطيره وهي مندهشه قالت..
/غير اهدا سلم ولدي الموضوع مش ساهل هكي..اول شي انت مازال عزري وهي ارمله وعندها تلاته صغار مرات امك ماترضالكش بيها..تاني شي وع اللي نشوف فيه غرفه ماسحة موضوع الزواج من بالها مسح همها كله صغارها ومسؤوليتهم وبس..
حسين:صغارها صغاري تي يحبوني اكثر منها هي وعندي زي عيوني وربي شاهد..وبعدين حكايه ارمله واني عزري والدوة الفاضيه هادي ماندورش فيها..اني مالقيتش اللي نبيه كان فيها هي بس..اقسملك بالله خلتني نهزا ع اللي كنت نحس بيه ناحية طوبى اللي حسيته معاها خلاني نتأكد اني عمري ماحبيت طوبى الا كيف مانحب اميمه بس..
مطيره بحيره...شن بنقولك ياحسونه..الحكايه صعبه هلبه ياودي اني من رأيي زيد فكر..
شرب الشاهي في مرة بعدين قال..
/معاش فيها تفكير ياعمتي نشهد بالله ان عقلي معاها واقف توا واني نكلم فيك نبي نطلع نشوفها..
ضحكت مطيره..
هو تنهد وقال..
/زي ماقتلك دسي سري ياعمتي وخليني مني ليها امتى نحس روحي كاسب رضاها تو نفتح موضوعها اللي عجبه وقال باهي..باهي..اللي مش عاجبه يسامحني اني غرفه والله ماني فايتها..
مطيره بضحكه..
/سبحانك ياربي..
ابتسم بإمتعاض وجي بيشرب من الطاسه لقاها فاضيه..
مطيره بضحكه:لارسمي هالغرفه ماخلت فيك عقل..
نزل نظره لطاسه هو عاقد حواجبه ومبتسم بإحراج..
🍃🍃🍃🍃
"بنعزمهم ع خاطر بلبله"
سدرة:مش مشكله اعزميهم عادي..
طوبى:بنعزم صاحبتي عبير..
سدرة:اللي تبيه يجي اعزميه..
غرفه:عندي صاحباتي عزمتهم واليوم عزمت بنت اخت وحده منهم..
سدرة:مش مشكله..حني بنديروها لمة كبيرة..
اريج:نعزم صاحبتي اماني!؟
سدرة:ياودي معاش تشاوروا اعزموا غواليكم كلهم..
صفيه:حتى اني من توا بنبدا نعزم ع عرس اميمه..
طوبى:بتعزمي خالتي سالمين؟
ابتسمت سدرة..
صفيه:اكيد هي ع راس القايمه..
طوبى بإبتسامه:باهي كان فيها كيف نبيك تعزمي معاها بنت خالتها كاريمان..
بدت ع وجه سدرة ملامح الضيق..
مطيره:كاريمان! مش كانت برا البلاد هي وراجلها!؟
طوبى:روحوا نص العام هذا..
مطيره:قصدك شفتيها منين مشيتي غادي!؟
طوبى:ايه..محلاها قاعده زي ماهي قنينه وروحها حلوة..
مطيره:معاش دارت صغار بكل!؟
طوبى بأسف..
/لالا..قالت خالتي سالمين صارتلها مشاكل في الرحم معاش قدرت تجيب..
قالت طوبى هالكلام وهي حاسه بقبضة في قلبها..
صفيه:كان في بينكم معرفه نعزمها عادي..
طوبى بإبتسامه:تسلمي يارب..
تنهدت سدرة بضيق وغيرت نظرها لولدها..
مطيره:لكن فيه الخير راجلها اللي ماخداش عليها..
طوبى:قالتلي خالتي سالمين عمي الصابر يموت فيها تحمل يقعد من غير صغار وديما يقول هذا ماقسملي ربي في الدنيا المهم لايفارقها ولايدير حاجه توجعها..
هاديه:كثر الله من امثاله اللي زيه عمله نادرة..نعرف وحده عندنا في البلاد راجلها واخدها عن حب وماخداها لين قريب هبل وبعد عشرة سنين زواج جاها فشل كلوي طلقها طول..
صفيه:وكان هو راهي صبرت عليه وقعدت تعاني فيه عمرها كله..
هاديه:هذا حال اغلب الرجاله يبوك صحيحه لاتمرضي ولاطيحي وكان جاك يوم وطحتي يلوحوك ولايقولوا عشرة ولادياولي..
طوبى وهي تسمع في كلامهم كانت مضايقه لأبعد حد قعدت تفكر في حالها مع عبد القيوم وتتسائل لو تحمل عبد القيوم مافيها من مرض هل لو صار فيها اللي خايفه منه مازال يرضى يكمل معاها!؟
هي اصلا مستحيل ترضى تكون انانيه وتخليه بسببها ينحرم من كل شي حلو في الحياة ولو صار واللي في بالها تحقق لايمكن تقعد معاه..
تفكيرها فهالشي حسسها بالخنقه ناضت بدون ماينتبهوا عليها وطلعت من حداهم الوحيده اللي شافتها سدرة..
🍃🍃
خشت للدار وسكرت عليها..
ومشت خدت هاتفها وقعمزت ع السرير وحطت ع تطبيق القرآن وبدت تقرا من وين ماوصلت في وردها..
كانت تقرا ودموعها ينزلوا وهي تمسح فيهم ومع استمرارها في القرايه تبددت وساوس الشيطان والهواجس وارتاحت نفسها..كملت قرايه بعدين خدت نفس ومشت طلعت من الدار..
🍀🍀🍀🍀
وتمر الأيام والكل مشغول بالتجهيز لحفلة اسبوع علي..
وكعادتها طوبى واللي حواليها من غير مايحسوا يخلوا فيها هي المشرفه ع كل شي..
وهي مع انشغالها بالتجهيزات للحفله حست بمعنوياتها زادت ارتفعت وثقتها بنفسها زادت..كل مادير شي فيه اعتماد عليها وتنجزه ع اكمل وجه تحس بوجودها..تحس ان لوجودها فائدة ونفع لغيرها..مش ديما مصدر حزن وعبأ ثقيل..
وياريتهم فعلا كانوا يشوفوا في زي ماهي ظن كل اللي حواليها يحبوها حب كبير ووجودها معاهم وهي حال كويس زايدهم بهجه ع بهجتهم...
🍃🍃🍃🍃
21ديسمبر...سنة 2020..
الساعه 3:00ليلا..
كيف كملت صلاة القيام في الصاله وماشيه للدار بترقد ضوت شاشة هاتفها اللي كانت شاداته..
كان اتصال من عبد القيوم ابتسمت وولت للصاله بعدبن ردت عليه..
/السلام عليكم..
"وعليكم السلام..واعيه ولافيقتك؟"
طوبى بإبتسامه:لاواعيه..
"باهي البسي حاجه ثقيله واطلعي افتحيلي الباب"
طوبى بصدمه..
/شنو!؟
"عارف مافي حد بابت عندكم حسين بايت في حوش جدك..
وهي مصدومه..
/حي نهاري كيف ندخلك فهالوقت!؟
"اللي يسمعك مايقولش تكلم في راجلها..تي حلي الباب يامراة جمدت"
سكتت طوبى وهي مصدومه لأبعد حد .
"مش متحرك من قدام الباب لين تحليلي"
ونهي المكالمه...
نزلت الهاتف وهي تشوفله بعدين ضحكت ومشت بسرعة للدار..
☘وعبد القيوم في سيارته قدام الباب يراجي فيها لحظات وانفتح الباب..
ابتسم من قلبه ونزل من السيارة وسكرها بعدين مشي للباب وخش شافها كيف لابسه بالطو شتوي ومغطيه شعرها بوشاح شتوي وهي مربعه ايديها وتشوفله بإبتسامه حلوة..
سكر الباب بهدوء وبدون مقدمات قدملها خطوة وضمها بقوة .
طوبى بصدمه وهمس .
/مش هني ياهمي يشوفنا حد..
تباعد عنها وهو شاده ويقول بضحكه..
/مالا وين..
خدت يده وقالت بإبتسامه /تعالى..
ومشت بيه للمربوعه الخارجيه خشولها وهي سكرت الباب..
طوبى بضحكه وهمس قالت..
/شن جاك!؟
خداها لقلبه وقال..
/شوق ماله حد..قسما بالله مافي ليله رقدت فيها كيف العالم والناس معاش نقدر نعيش من غيرك ياطوبى والله معاد نقدر..
ضماته بقوة بعدين قالت..
/خلاص هانت مازال يومين..
تنهد ومشي بيها لواحد من فراشات الجلسه وقعمزوا مع بعض وهي مازال مجاورة لقلبه..
عبد القيوم:امورك تمام خير من قبل!؟
قالتله:الحمد لله كله تحت السيطره..
ابتسم بعدين قال..
/ايه حقه ماتبيش تشري دبش للمة؟
ضحكت وقالت..
/بناخد لجنة بس اني عندي..
عبد القيوم:لالا ماتلبسي شي قديم اطلعي معاي بكرا وخودي ليك ولجنة .
طوبى:قديم شني نسيت اللي خديته للعرس في بنغازي!؟
عبد القيوم:لبس خفيف نبيك تاخدي حاجه تقي عنك الصقع..
ابتسمت وقالت..
/باهي..
وشدت يده اللي فيها الخاتم حولاته وقالت..
/تخليه عندي..
قاللها:خوديه بصاحبه بروحه لا..
قعدت تضحك..
بعدها شويه وهو شادها وقال..
/وريني عيونك..
لاقت عيونها بعيونه كانت باينه نظرات الشوق مع الحب في عيونها وهو يقرا في كلامهم..قاللها بنبرة حلوة..
/توحشتهم موت.
طوبى بهويام..
/حتى هما استاحشوا يشوفوك..
في هديكا اللحظه حس عبد القيوم انه مش قادر يتحكم في نفسه اكثر من هكي..قلبه سيطر عليه تماما وطلع عقله خارج نطاق التغطيه...
☘ويحدث أنَّ شوقًا كبِيرًا كالبحر، يتدفَّق
من وعاءٍ صغيرٍ كقلبِي!☘
- الرّافعي.
🌼🌼🌼🌼🌼
طلعت من الدار وهي تتسحب وخشت للمربوعه..
سكرت الباب ومشت قعمزت تحت الروشن وهي تتكلم بالهاتف..
اميمه:آلو..
"ياأحلى آلو ياقلبي اني غير امتى يفوت هالشهر بس."
اميمه بضحكه..
/غمض عين وافتح عين تلقاه تم..
"ياريتها ساهله هكي ياقلبي ياريتها"
قعدت تضحك اميمه..
فجأه سمعت باب المربوعه الخارجيه ناضت وقفت ع الروشن بش تتأكد وتبدا ع وجهها ملامح المفاجأة لما شافت عبد القيوم طالع هو ضام طوبى لحضنه..
"قلبي خيرك ساكته"
ضحكت اميمه وهي تقول..
/كان نقولك في شن نشوف توا .
☘"كيف بتروح فهالوقت بس"
عبد القيوم:المهدي عطاني مفتاح الشقه المقابله..
طوبى بصدمه..
/قصدك المهدي عنده علم بجيتك!؟
عبد القيوم بضحكة..
/وعيته من النوم لكن تعرفي شن قالي..يابختك..
ضحكت طوبى وهي تخبط في وجهها خبطات خفيفه بإحراج..
هو غمزلها..
زاد خجلها ومعاش قدرت تقيم عيونها فيه..
قرب منها باس راسها بعدين قال..
/راك تنسيها هالليله اكتبي عنها في مذكراتك..
طوبى بخجل شديد..
/باهي خلاص اطلع..
رفع حواجبه وقال..
/افطني راك قاعده تلزي!
ضحكت وقالت..
/خلاص يابارد اطلع قبل ليفيق بينا حد..
ضحك وحرك راسه يمين ويسار بعدين قال..
/خشي قبل بعدين نطلع..
هي بخجل قالت..
/باهي..تصبح ع خير..
قاللها بنبرة حلوة..
/وانتي بخير ياروح روحي..
لفت ومشت وهي تضحك بخجل لما وصلت في الباب الدخلاني التفتت شافتله..ابتسملها بغمزه بعدين فتح الباب و اشرلها تخش ...
ضحكت و مشت خشت و هو تنهد من قلبه اللي يرقص من الفرح بعدين طلع سكر الباب بهدوء...
☘☘
اميمه بضحكه وهمس قالت..
/توا كيف طلع..
" خلاص راجيني شويه وجاي "
فنصت وقالت..
/هني جمالك ..
" تي باهي باهي بااهي.."
و هي تسمع فيه و تضحك...
#ذكريات_لاتموت
....يتبع....
