#طوبى "جنة طوبى"
#جمان_فريد
#الجزء_123"ياربيع أيامي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#ذكر_الله
«إن ذكر اللّه عز وجل يُذهب عن القلب مَخاوِفه كلّها، وله تاثير عجيب في حصول الأمن، فليس للخائف الذي قد اشتد خوفه أنفع من ذكر اللّه عز وجل، إذا بحسب ذكره يجد الأمن ويزول خوفه..
ابن القيم رحمه الله..
🌿🌿🌿🌿🌿🌿🌿🌿🌿🌿🌿🌿🌿🌿
🍃المحبوب مهما عظم ذنبه فإنه مغفور لدى عاشقه، ولا يلام على الخطأ، ومعذور في كل أحواله، وهذه علامات تمكّن العشق من القلب.🍃
_______________________________________
خشت لدارها وهي رافعه في حضنها ولدها اللي كان غارق في النوم..
حطاته ع السرير وهي تقول..
/وليت رزين هلبه ياوليدي سلامتك..
بعد ماحطاته غطاته ورقدت جنبه..
اول ماحطت راسها ع المخده تفكرت اجواء حفلة ذكرى الميلاد..اكثر شي كانت تتفكر فيه وقتها علاقة خوها بمرته كانت حلوة هلبه باين في عيونهم الحب والراحة ابتسمت بفرح لخوها..بس سرعان ماتبدلت هالإبتسامه لملامح الحزن وين خطرت عليها ايامها مع ربيع..
حست وقتها بحنين رهيب ليه ولأيامه..
شافت للكامدينو جنبها كان عليه هاتفها خداته وقعدت تشوفله وهي تفكر بتردد بعدين خدت نفس وحسمت امرها وخشت ع الفيس بوك..دارت بحث ع حسابه لقاته..خشتله طول وتشوف مايصدمها بقوة ويكسر قلبها...
هي الفترة اللي فاتت حاولت تتناساه وتعودت ع للحياة من غيره زي ماتعود ولدها اللي كان يقوله"بابا"..
بس اللي مرت بيه اليوم واللي شافاته توا ردها لنقطة الصفر..
طيحت التليفون اللي جي ع صدرها وحطت ايديها ع وجهها وبدت تبكي بحرقه وألم وكتمان...
🍃🍃🍃🍃
موجهه نظرها للفراغ وهي تفكر في اللي سمعاته منه..
ماكانتش مصدومه متوقعة من نجاة كل شي بس اللي قعدت تفكر فيه حاليا هو ان عبد القيوم كان شاهد ع كل شي صار من البدايه..
"طوبى كنك ساكته"
شافتله وقالت..
/اكيد شفت حاجات تانيه غير هكي
تنهد بضيق ونزل عيونه وهو يقول..
/من البدايه من قبل مانعرفك ومن بعد ماعرفتك وانا مقهور عليك وع الحاج لطفي الله يرحمه قهرني عجزي اللي خلاني مش قادر نديرلك شي كم تمنيت لو قتلته بإيديا وخلصتك منهم..تنهد بحرقه بعدين قال..لكن جتني فرصه بعدين ودرت شي وللأسف بدل ماينفعك زادك ع مابيك..
هي ودموعها تنزل قالت..
/شن درت!؟
قال:اللي فتح عيونك ع علاقتهم..
قاطعاته وهي تقول بدهشه..
/انت اللي كنت تبعت في الرسايل!!؟
حرك راسه بالنفي وقال..
/لا..بس نعرف من..
بإستغراب شديد قالت..
/مني!؟
شافلها وقال..
/الحلاق التونسي تذكريه!؟
هي بصدمه قالت..
/فراس!!!؟
🍁هز راسه بإيجاب وبدي يحكيلها اللي عرفه من فراس وحكالها كيف فضح العلاقه الحقيقه بين نجاة والجالي قدام محمد شنيبه...
عبد القيوم:كنت نبي باته يجبره يطلقك..
نزلت عيونها وهي تقول بضيق شديد..
/ياااه..قريب الناس كلها كانت تعرف واني غارقه في غفلتي..
نظرة عيونه ليها بان فيها خوف واضح شعور الخوف هدا خلاه نلقائيا يضمها بقوة وهو يقول بلهفة..
/نحبك ونموت فيك ونعشقك عشق ماعندي شي اغلى منك في حياتي انتي اغلى من روحي عندي..
هي كانت مستغربه فيه لكن فسرت هالشي ع ان خاف تاخد منه موقف لأنه كان عارف من البدايه وسكت..
لفت ايديها عليه وقال..
/خلاص مش مهم كل شي مر وفات وتوا نحمد في ربي عليه لولاه ماكنتش حسيت بقيمة الايام الحلوة اللي نعيش فيها معاك ماكنتش عرفت ان في قلب يهبل زي قلبك يحبني حب ماريتش زيه..
زاد ضمها وهو يقول..
/ومش حتلقى حد يحبك كيفي راني من غيرك نموت ياطوبى..
ضحكت بإستغراب وهي تقول..
/غير ليش هدا كله! مش لايماتك ع شي انت كنت في موقف صعب..معذور حبيبي معذور..
باس راسها وهو ملتزم الصمت ومازال يضم فيها بنفس القوة..
هي قالت بضحكه...
/كسرتني!
قاللها:ااه لو نقدر ندخلك لقلبي..
بضحكه قالت..
/شن هالحب اللي نزل في المرة!
بعدها شويه وشد وجهها بإيديه وهو يقول بصدمه..
/كيف!؟
ضحكت وقالت..
/قلت هكي بش ترخيني..
ضرب جبهته بجبهتها وهو يقول..
/مريشة..
🌼وعدت عليهم هديكا الليله كلها غزل وحب وهدرزة حلوة لكن برغم هدا كله قلوبهم كانت داسه خوف كبير من قادم الأيام...🍃
🍃وفي من هديكا الليله عدت عليه وهو مش قادر يرقد اول مرة يحس بنفسه ملخبط وتايه لهالدرجة..
تفكيره في ردة فعل طوبى ع اللي داره مخليه مش عارف شن يدير وكيف يتصرف..هي اصلا اليوم لخبطت فيه كل شي مش غير بردة فعلها حتى بكلامها عن بنغازي بقديمها وجديدها..وقف هلبه عند نقطة الصلة اللي تربط كاريمان والصابر بطوبى..كاريمان والصابر بالذات جزء مهم جدا من ماضيه المؤلم..
هالماضي اللي رجع غاص في ذكرياته للغرق..وهو يتفكر فيه حس نفسه بينقطع..ناض من مكانه ومشي طلع من مكتبه هارب..قعد يمشي بدون هدف لأنه هارب..لكن فجأه وقف لما سمع صوت يقرا في القرآن..
رجع كم خطوة للخلف لعند ماوصل في باب غرفة المعيشه وقف قدامه وشاف فاتن مقعمزة ع صلايه وهي لابسه ملايه صلاة وشاده مصحف وتقرا فيه..
بدت ع وجهه ملامح التجهم وفي عيونه نظرة عدم رضا قعد واقف يشوفلها للحظات بعدين مشي بدون ماتحس بيه...
🍃🍃🍃🍃
تاني يوم..
الساعة 7:45صباحا..
في طريقهم للمدرسة هو كان يسوق وع وجهه ابتسامه حلوة سببها احلا الناس واحبهم ع قلبه اللي كانوا يغنوا بأصوات مختلفه..
"ياخواتي..ياخواتي..
ياخواتي بحبها..دي حبيبة امها"
تسكت طوبى وجنه تغني..
"خواتي..احبها..حبيبة امها"
طوبى بضحكه:وروح امها وعيون امها..
جنة:ماما حبيني!؟
التفتت طوبى وهي تقول من كل قلبها..
/نحبك ونموت فيك موت..
غيرت جنة نظرها لعبد القيوم وقالت..
/حوباده حبني!؟
ضحكت طوبى من قلبها وهو رد بضحكه..
/ارهيقم هولانات ع قولة امك العسل..
بملامح تساؤل كلها براءة قالت..
/شني!؟
قعدوا يضحكوا عليها..
🌼واستمروا يهدرزوا مع جنة اللي خلتهم طول الطريق يضحكوا لعند ماوصلوا للمدرسه..
ع جية سيارة نسرين..شافتهم.. قعدت واقفه وهي تشوف في عبد القيوم لما نزل ونزل جنه والشنطه متاعها بعدين مشي لطوبى نزل قدامها جنه وساعدها تلبس الشنطه..قال كلام لطوبى خلاها تضحك وبعدين هي قالت شي خلاته يضحك وتوجه بعدها السياره ركب وقعد فيها يشوف فيهم لعند ماخشوا بعدين تحرك..
نسرين كانت تشوف في هدا كله وهي تذرف في الدموع وتقول في نفسها بحسرة..
"الله يسامحك ياخوي درتها في روحك وفينا"..
مسحت دموعها بعدين تحركت بسيارتها وخشت بيها للمدرسة...
🍃🍃🍃🍃🍃
الساعه 10:30صباحا.
في كليه العلوم ع الكراسي تحت المظلات كانت غرفه مقعمزة مع صاحباتها،كلهم لاهيات بالفيس وفي نفس الوقت يسمعوا فيها كيف تكلم في بنت عمة زوجها السابق..
غرفه بمجامله:ع حسابكم المحل وصحابه يالميس..
"بارك الله فيك ياغرفه..هي مالا مانعطلش عليك بالسلامه"
غرفة؛بالسلامه..نزلت الهاتف ورجعت خشت ع الفيس..
وحده من صاحباتها قالت..
/مش عارفه كيف متحملتيها..
تنهدت وقالت..
/لعيون عبد الرؤوف الله يرحمه..
كلهم قالوا بأصوات متقطعه..
/الله يرحمه..
التزموا الصمت وكل وحده لاهيه مع هاتفها شويه قالت غرفه بإزدراء..
/مثقل دمك..
شافولها وقالوا مع بعض..
"مني!؟"
غرفه؛واحد دراه كبد مسمي روحه الصقر الوحيد لاحقني في التعليقات وين مانعلق يديرلي في لايكات وتوا لقيته راد عليا في كل تعليق بنقط..
ضحكوا وقالت وحده منهم..
/شكله مشاكس..
غرفه:من صورة بروفايله مراد علمدار..
قعدوا يضحكوا..
شويه جتها رساله ع الماسنجر لقتها منه قالت بنرفزة..
/بعتلي رساله هالمستفز..
قالتلها وحده فيهم..
/ترا افتحيها..
قالت؛فتحتها..مقطع فيديو متاع اغنيه شوره..
فتحتها وتسمع صوت المغني القديم..
"بوعبعاب" وهو يغني..
"ياعيني صبرتي ع المرهون"
هي تسمع وع وجهها باديه ملامح الاشمئزاز وصاحباتها يضحكوا ع ردة فعلها..
معاش قدرت تتحمل طول دارتله حظر وهي تقول..
/ماتبي الا الحظر..
=حظرتيه!..
غرفه:من الاول مفروض حظرته..شافت لساعة هاتفها وقالت..هي خلاص وقت ع المحاضرة يابنات..
ناضوا كلهم خدوا حاجاتهم وتوجهوا لمكان المحاضرة..
🍃🍃🍃🍃
الساعه11:30صباحا..
في احدى محلات "BK80 "كان موجود حسين ومعاه المحامي عدي وفي بينهم صاير نقاش عن..
🍃حسين وهو يحاول يضبط اعصابه ويتمالك نفسه قال..
/تمام مش مشكله لكن بنقعد ندير طلة بين فترة والتانيه وشن مايصير ياريت تبلغني..
عدي بإبتسامه جانبيه قال..
/ان شاء الله..رفع حواجبه وقال..امم..شن جو نسيبكم الجديد!؟
مرر حسين نظره ع المكان وهو يقول..
/مليح..
ضحك ضحكه متهكمه بعدين قال وهو يمرر في نظره ع المكان..
/لتوا مش قادر نستوعب..
حسين وهو يشوفله قال..
/شني!؟
شافله وقال بجديه وشي من الحرقه..
/علاش فضلتوه عليا علاش عطيتوه وهو مش مناسب ليها ولافي بينه وبينها تكافؤ اجتماعي مش ليه بكل والله ماهي ليه وهلبه عليه..
حسين عقد حواجبه وهو يقول..
/عدي عدي عدي..حبيبي اني نقدرك ونحترمك ونعزك ومانبيش نغلط فيك..الدوة اللي تقول فيها هادي مايجيش منها وغير هكي عبد القيوم راجل حقاني يستاهل بنتنا..
رفع حواجبه وسأل بتعجب..
/معناها اني مش راجل ومانستاهلهاش!.
حسين بنرفزة:ماتعوجش في الدلاع ياعدي..هدا نفسه شويه بعدين قال..حبيبي عدي المسألة كلها نصيب ياغالي..
عقد حواجبه وقال بإبتسامه..
/نصيب تمام..لكن بنقولك لو رديتوني ع خاطر عركتي مع هذاكا المريض لازم تفهموا ان الخطر ع التارقي مازال اكبر،عندي خلفيه ع العدواة اللي بيناتهم يعني كان يندري عليه واخدها احتمال كبير يقتله..
حسين:بعد الفضيحه اللي صارتله مايفكرش حتى مجرد التفكير يروح..
عدي:مش لازم يروح بش يدير مايبي وانت عارف الحاجه هادي كويس..اني قبل كنت ناوي نسفرها برا نساعدها تتعالج من السحر وبعدين نمشوا ل****** كنت ناوي نحضر الدكتوراة وهي معاي وغادي والله مايقدر يوصل فيها ولافيا..لكن للأسف انتم اخترتوا غلط وحطيتوهم في مخاطرة كبيره..
🍃كلام عدي خلا شي من الخوف يتسلل لقلب حسين وفي نفس الوقت زاده غضب ع غضبه لأنهم ماحضروشي ولاعطوه علم بزواج طوبى كان ممكن لو حطوه في الصورة خلاهم يعطوها لعدي لأنه في نظره حتى هو مازال مناسب اكثر من عبد القيوم..عدي في بينه وبين طوبى توافق من ناحية الحالة الاجتماعيه غير هكي أهله راغبينها🍃
رشف ورد ع عدي يقول..
/توا صار اللي صار ياريت تسكره الموضوع هدا ومعاش تدوي فيه بكل..
ابتسم بأسف وهز راسه بالموافقه بعدين قال..
/تمام..نستأذن..السلام عليكم..ومشي بيطلع..
وحسين قعد معاه بعيونه وهو يرد عليه في السلام بعد ماطلع غير نظره ع الباب وسرح بتفكيره في كلام عدي..
في هاللحظه ينفتح باب المحل وتخش لميس مع اختها
دورت بعيونها في المحل ويطيحوا ع حسين وكادت طير من الفرحه..
شدت يد اختها بقوة وقالت..
/زي ماتوقعت ياوخيتي سلمه..
ضحكت اختها وقالت..
/هي تعالي..
☘وخشوا مع بعض وقعدوا يدوروا في المحل ولميس مانزلتش عيونها عن حسين..
اختها قالت:بريله بري..
لميس:شوفي مكياجي تمام وشاحي مساوي!
=تهبلي غير بري قبل مايطلع..
ضحكت ومشت بسرعة وصلت في الكاصه اللي واقف عليها حسين يهدرز مع الراجل اللي ماسك ادارة المحل..
وصلت فيهم وقالت..
/السلام عليكم..
شافولها وردوا عليها السلام..
بإبتسامة عريضه قالت..
/حسين الواعر!..
عقد حواجبه وقال..
/تفضلي..
بنفس الابتسامة قالت..
/اني لميس بنت عمة عبد الرؤوف الله يرحمه..
رخي حواجبه وقال..
/الله يرحمه..تفضلي بشن نقدر نخدمك..
قالتله:قبل لنجي كلمت غرفه خبرتها بجيتنا هني وقلتلها نبوك تراعينا وهكي وهي قالت المحل ع حسابكم..
غير نظرها عنه وقال..
/مادام هي قالت هكي خلاص..
ضحكت وقالت..
/بارك الله فيكم..حمحمت وقالت..طلعت معرفه انت وراجل اختي..
الراجل اللي ماسك المحل قعد مركز معاها ولاحظ انها تبي تفتح موضوع مع حسين وحسين فهم هالشي وقال..
/مش هو واحد يعرفه..
بضحكه قالت:ايه ايوه..ع العموم فرصة سعيده..
هز راسه وقال..
/مشكورة..
برقة وشي من المياعه قالت..
/المهم راكم تنسوا توصوا بينا..ضحكت وقالت..عن اذنك..ومشت وهي تتمخطر..
بدت ع وجه حسين ملامح الازدراء غير نظره للراجل لقاه يضحك..
شد ضحكته وقعد يحرك في راسه يمين ويسار بعدين قال..
/هي السلام عليكم..
رد الراجل وهو يضحك..
/وعليكم السلام..
ومشي حسين طلع من المحل ومازال عيون لميس معاه..
🍃🍃🍃🍃
بعد العصر..
كانوا فرح وسدرة حامد في زيارة لحوش جدهم شنيبه واول مرة يجوا يومين ورا بعض لهذا حست نسرين ان لجيتهم هادي سبب..
🍃فرح بحزن:بكت اليوم في الاستراحه لين رجعت من البكي وداخت ياماما..
نسرين بخوف:خيرها!؟
فرح:ع قد ماحاولت نعرف منها مابتش تقول واني متأكده ان في حد تعاركت معاه هني امس هذا علاش روحت بالدرقه..
نسرين بتفكير:باهي مع منو؟!
عقدت فرح حواجبها وقالت..
/نحس فيه محمد ولد خالي المهدي..
🍃ومن حوش شنيبه لحوش طوبى الواعر اللي كان لام فيه الاحباب كعادتهم كل خميس..
حتى صفاء شاركتهم هاللمه وكان ليها دافع خلاها تلح ع اشرف لعند ماخدت موافقته.
☘في دار البنات..
كانت موجوده هي وخواتها ومعاهم طوبى..
صفاء بشي من الغضب..
/غلط تصرفات سدرة هادي غلط..
تاله بإنزعاج؛لامش غلط هي خايفه ع خوها..
صفاء:لامدوراته ولاحايرة فيه البنيه ماشيه الحيط الحيط بعد اللي صار فيها معاش تبي المشاكل مع حد..
تاله:انتي طيبه هلبه لين درهي الكبد نسيتي شن دارت لمروة..
مروة اللي كانت ملتزمه الصمت بدت ع وجهها ملامح الضيق وطوبى تشوفلها..
صفاء بحده:تكلمي كويس احسنلك..
طوبى:هدي شويه صفاء..
صفاء بحزن:ياريتك شفتي حالتها امس قطعت قلبي تبكي بالعبرة وترعش مع بعضها..
تاله بتهكم:طروح..
طوبى:تاله اسكتي شويه حبيبتي
سكتت تاله وهي معصبه..
طوبى:غلط منها سدرة تدخل في الحاجات هادي سوا كبيرة ولاصغيره الموضوع مايعنيهاش خوها كبير وبعقله وبعدين كان راما حرشت نسرين مش مرات تصير مشكله كبيره وتجي ع راسها!! مش المرة اللي فاتت قاطعوها بوها وخوها المرة هادي حتكون ردة فعلهم اشد..
تاله بضيق:هي مش قادرة تنسى اللي داراته راما لمحمد لما تبلت عليه وحتى تشوف في راما وحده ماتنفعش..شافت لصفاء وقالت..لو عندنا خو تخليه ياخدها!؟
سكتت صفاء وغيرت عيونها عن اختها وهي مضايقه..
تاله:ها ريتي معناها عندها حق..وراهو حكتلي ع حاجه تخوف سمعت بوها يحكي فيها لعمها نضال قاله محمد خوها كان خانب وهو اللي خنب المحل متاع الذهب..
بدت ع وجوههم ملامح الصدمة..
تاله:والله العظيم وقالت سمعته يقوله هو يبان متعدل لكن رد بالك منه مرات يديرها معاك..
طوبى؛علاش هو ولى يخدم مع نضال!؟
تاله:قالتلي سدرة كل مرة يشد عنه واحد مرة يزن ومرة محمد ولد خالتي نسرين ومره محمد خو راما..
رفعت طوبى حواجبها ونزلتهم وهي مستاءة..
صفاء:وسدرة كانت تتصنت بش سمعت هدا كله!؟
تاله بشي من الحده..
/اكيد لا قالت سمعتهم بالصدفه بعدين خيرك انتي كارهتيها هكي!؟
طوبى:باهي خلاص يابنات..تاله حبيبتي معاش تحرضي سدرة وين تدوي عليهم حذريها من المشاكل اللي بتصيرلها بسببهم..
تاله؛سدرة ماتراجيش فيا نقوللها شي..
مروة:سدرة واعره هلبه وتشد في قلبها ياطوبى..
طوبى:كان جت بعدين تو ندوي معاها..
صفاء:وياريت تقوليلها راما مش معدله ع خوها بكل خوها هو اللي بيجيبلها المشاكل حق هالمرة بتصرفاته..
هزت طوبى راسها بصمت وهي تفكر..
🍃ومن الدار للصاله..
اللي كيف خشولها سدرة بولدها وربيبتها ومعاهم سميرة
بعد السلام قعمزوا والسدرتين سألوا عن طوبى وتاله..
ويخشوا عليهم وطوبى تقول..
/جينا..
ابتمسوا وطوبى مشت سلمت ع سميره بحرارة بعدين سلمت ع اختها وسدرة المهدي قعمزت جنبهم وخدت علي تلاعب فيه..
اما تاله خدت سدره ومشوا لدار المعيشه وعيون صفاء وطوبى معاهم...
☘"شن صار امس"
شافت طوبى لسدرة المنتهى وقالت..
/بعدين نحكيلك..
ويخشوا اريج وغرفه بسفر الحلو والمعجنات اللي بيعدوا بيهم شاهي العاله متاع مطيره..
بعد حطوهم بدت غرفه تصور وهي تقول..
/وهذا ترند العاله متاع عيلة الواعر..
مطيره:شوقكم هالتريندات..
ضحكوا وسميره قالت..
/حني امس درنا عيد الميلاد..
ابتسمت سدرة..
طوبى:اشيه اشيه..لمن درتوه..
سميره:ياحنه عمر وفرح بنت نسرين تعاونوا عليه نفيسه ونسرين..
غرفه:ياأيامك ياعمر..
فردوس بضحكه:ماكان يحلم بيها حتى الحلم لولا سمورة..
طوبى:سميرة ماتعرف دير وتجيب كان الباهي..
سميرة بضحكه:نجيها ياربي..
سدرة شافت لفردوس لاحظت ان ضحكتها خفت..
وغرفه كملت تصوير وبدت تنزل في الصور ع الستوري واللي حواليها يهدرزوا..
قعدت تستنى يتحملوا ومشت كسدت ع الاشعارات وتلقى واحد مسمي روحه..
"جيفارا العرب"راد ع تعليقها لإحدى الصفحات..
خشت ع الرد لقاته مقطع فيديو فتحاته ويصدح صوت "بوعبعاب"في الصاله يسكتهم كلهم وهو يغني ع المرهون..
هي بنرفزة:تي شني هدا!!؟
اريج بضحكه:راك تقولي الصقر الوحيد!
كلهم قعدوا يشوفولها بإستغراب وفضول..
وهي تقول:بعتلي الاغنيه هادي بكري حظرته لقيته توا مداير حساب تاني مسمي روحه جيفارا العرب وراد عليا بالأغنيه هادي في تعليق..
مطيره بضحكه:بوعبعاب..
سميرة:ذوقه خطير..
سدرة:ماتعدليش عليه ومعاش تعلقي..
غرفه وهي متنرفزة:هدا اللي بيصير..
سكتوا شويه وبدت مطيره تغني في الأغنيه..
شافتلها غرفه وع وجهها باديه ملامح الازدراء واللي حواليها يضحكوا..
في هاللحظه خشت صفيه وهي تقول..
/السلام عليكم..
ناضت غرفه سلمت عليها بحرارة ليها مدة ماجتهمش وبعدين ناضوا باقي الموجودات..
وهي تسلم ع سدرة قالت..
/حسين يبي يشوف الصغار..
ع مضض قالت غرفه..
/بالله اريج طلعيهم..
ناضت اريج ومشت طلعت من الصاله وعيون سميرة عليها..
🍃🍃🍃🍃
"ماما جوها مليح؟"
اواب:لالا ديما كشخ ودير شبحات مسمومه..
حسين بضحكه:انتم ديروا في الشطانه..
مهاب:لالا ماما ديما هكي مسمومه..
حسين بإبتسامه:عيب مهاب الزعيم مايقولش ع امه كلام زي هدا..
اواب:باهي قوللها معاش تطربني"تضربني"
حسين ضحك بعدين تنهد وقال..
/غير تخليني نشوفها المسمومه هادي..
ويستاقظ لروحه شن قال مرر نظره عليهم لقاهم يشوفوله وحواجبهم معقودة بغضب رفع حواجبه تعجبا وقال..
/خيركم!
اواب اشر علي نفسه وقال..
/حني نقولوا..اشرله وقال..انت لا..
ضمهم الزوز بقوة وهو يضحك من قلبه..
🌼اما جنة ومئاب فكانوا حدا سدرة وتاله في دار المعيشه يلعبوا بالألعاب اللي جابهم عبد القيوم قبل عرس اميمه..
تاله:ابله طوبى قالت بتكلمك..
سدرة برفعة حاجب:تو نعرف نهرب منها..
☘☘☘
واخر من يحضر هاللمة نبيله جابها المحجوب مع المغرب بعدين طلع هو حسين والنسابه "عبد القيوم والمهدي" للجامع...
☘بعد صلاة المغرب كانوا سدرة وطوبى مع فردوس في دار البنات مسكرات عليهم..
🍃طوبى:قلتلكم قبل هدا هو حوش العيله وحوش اللمه مستحيل نفرط فيه مش حيقدر ياخد حتى بعد نموت..
سدرة بفزع:اعوذ بالله من الشيطان الرجيم تكلمي باهي..
طوبى بضحكه:ياودي تعبير مجازي..ابتسمت وقالت..المهم توا تحملوه نهار العزومه وفاتن اعذروها في النهايه هو بو ولدها مش حيهون عليها..
فردوس بقلق:يستر الله..
وسدرة التزمت الصمت وفي داخلها خوف كبير..
تنهدت طوبى وخبطت كفوفها ع بعض وقالت..
/وتوا خل نخشوا في موضوعنا سديرة..
شافت سدرة لفردوس وقالت..
/اسمعينا للآخر وماتقاطيعناش لين نكملوا كلامنا..
☘وحتى اريج في الجنان كانت تسمع من سميره كلام عن نفس الموضوع..
سميرة:هو مداير شويه من حكايه ايديته ياروحي خايف ترفضيه ع خاطرها..
اريج ودموعها ينزلوا قالت..
/هو يتعالج عليها ومع الوقت تولي كويسه..
سميرة بإيتسامه..
/حتى كان ماتتعالجش انتي راضيه بيه شن ماكان وضعه..
اريج كانت محرجه جدا من سميرة مهما كان يوما ما كانت مرت خوها..
حطت سميره يدها ع كتف اريج وقالت..
/يعلم الله قداش نعزكم ومن قلبي نبي نشوفكم متهنيين مع بعض ربي يهدي امك وتقول باهي..
اريج قالت في نفسها..
"يارب"
🍃ومايشبه هالموضوع فتحاته نبيله مع غرفه وهما يتعاونوا ع تجهيز العشي..
غرفه بضيق..
/اني ماعنديش رغبه يانبيله نبي نعيش لصغاري وبس..
نبيله:باهي مافكرتيش في بعدين!؟ طوبى وسدرة متزوجات وكل وحده عندها حياتها اريج حتى هي سيورها تمشي فردوس مكانها مع بنتها آلاء محفوظ واكيد مش حتقعد ديما بعيده عن ولدها الصغير يعني في النهايه بتقعدي بروحك!
غرفه بضيق شديد..
/وخيرها فايزة ظروفها اصعب من ظروفي قعدت ع بناتها لين كبرتهم وعطتهم..
نبيله:فايزة تبهدلت هلبه في الدنيا وانجبرت تعطي بناتها في سن صغيره من خوفها عليهم نقولهالك اني ماكنتش محبذة فكرة زواجك فكرت بأنانيه شويه بس بعدين لما سمعت لعقلي لقيت ان من العدل نشجعك ترتبطي بالراجل المناسب اللي يقبل ياخدك بصغارك..
غرفه كانت حاسه برغبة شديده في البكاء لكن شدت دمعتها بكل قوة..
شدت نبيله يدها وقالت..
/من لما عرفت ان خوي الله يرحمه وصى حسين ع صغاره واني حاسه ان ربي مقدر شي معين ولازم يصير..مش حتلقي راجل يناسبك زيه ياغرفه..
غرفه وهي متفاجئة قالت..
/من قالك عليه!؟
ابتسمت وعيونها تعبوا دموع وهي تقول..
/جانا الحوش غادي وتكلم معاي قدام خالك وطلب مني نكون واسطه بيناتكم..
حركت غرفه راسها بالرفض وقالت...
/لالا يانبيله مانبيش سامحيني..وجبدت يدها منها ومشت طلعت من حداها هاربه بدموعها ونبيله تشوفلها بحزن..
🍃🍃🍃🍃
"الاء حكتلي شن قاللها ودار معاها عايرها وهانها وقلل منها"
سدرة:هداكا قبل يافردوس قبل نضال توا ولى واحد تاني راجل عاقل ملتزم محترم راجل بمعنى الكلمه..انتي تعرفيني كويس يافردوس لو شفت ع حد شي ماينفعش مانعرفش نجامل يابال في موضوع مصيري زي هدا جي لبنت اختي اللي هي بنتي..
طوبى:اني نقولهالك يافردوس اريج مش حتكون سعيدة ومرتاحه غير معاه هو مش حترضى بغيره لو من يجيها..
سدرة:بنتك توا ثيب ماتقدريش تجبريها ع شي وفي نفس الوقت ماتخليهاش تقول امي ظلمتني ودارتها فيا..
فردوس ودموعها في عيونها قالت..
/لو كانه بصحته ومافيشي عيب مادورهاش بكل ياسدرة..
طوبى:قصدك ع خاطر كانت متزوجه قبل ولت عايبه!
سدرة شافت لطوبى بألم..
فردوس بشي من الفزع..
/لامش هكي ياطوبى والله ماقصدي مستحيل نفكر هكي اني عليه هو ع تفكيره هو وتفكير ماليه..
طوبى:قلنالك هو تغير والوضع في حوش ماليه تغير معاش زي قبل..
سدرة:شوفي لحالي وانتي عارفه اللي مريت بيه مع المهدي قسما بالله توا حاطني ع راسه ومددلني اخر دلال ومحصله الاحترام من صغاره وشيبانيا وسلافي،صح مغليه واخده مني موقف لكن اريج هي اللي قالت نبيهاله،بروحها قالت لسميرة نضال مش حيتهنى كان مع التاجوريه..
نزلوا دموع فردوس مسحتهم وقالت..
/عطوني فرصه ندوي معاها وبعدين يصير خير..
تبادلوا سدرة وطوبى النظرات بعدين سدرة شافت لفردوس وقالت..
/ربي يقدم اللي فيه الخير..
🍃🍃🍃🍃
فهالوقت..
بعتت نسرين ولدها يحيى يشوف محمد المهدي كان روح من الجامع يناديه..
وطلع الولد من باب الحوش الدخلاني شاف ولد خالت خاش قاله..
/حمودي ماما تبيك..
بإبتسامة قال..
/وينها؟
قاله:في الكوجينه..
☘ومشي محمد جهة جنان الكوجينة وقف في الباب ونادى ع عمته اللي طلعتله بعد مانادى مباشرة وبدون مقدمات خشت في الموضوع..
🍃محمد:اني ولد خالها ومن حقي نخاف عليها ونكون حريص ع تصرفاتها..
نسرين بضيق:باهي علاش تقوللها في هالكلام اللي يقهر البنت روحت من هني وصارت فيها حاله فرح قالت بكت لين داخت في المدرسة..
حس محمد بشي وجعه من داخل وجي بين عيونه الحلم اللي شاف فيه امه كلماته عن راما تنهد بأسف بعدين قال..
/باهي عطيني نكلمها نتأسف منها..
نسرين:بش تزيد طبلها عليها عمها اشرف شايفك تلحق فيها وناويك راهو..
هو بعصبيه قال..
/يمشي يقلب وجهه..غير هيا اتصلي بيها وعطيني نكلمها..
شافتله نسرين شويه بعدين طلعت هاتفها من جيب التنورة متاعها..حطت ع رقم راما واتصلت بيها..
☘وراما في الوقت راقده في سريرها ومتغطيه وشاده هاتفها تتفرج علي شي فيه ودموعها تنزل..
ماكانتش تشوف لافي صورة امها ولابوها بل تتفرج ع صوره هو صور محمد ولد خالها اللي صار فيها هدا كله بسبب المشاعر اللي زادت كبرت في قلبها اتجاهه لهذا لما عرفت بشكل نظرته ليها انجرحت بقوة وزادها كلام سدره اللي قهرها برغم انها مش طامعة بشي منه ومقررة تحتفظ بمشاعرها لنفسها..🍃
ويرن هاتفها شافت المتصل خالتها قالت بإستياء..
/اكيده فرح خبرتها..خدت نفس..بعدين فتحت الخط وردت بصوت مبحوح..ايوه خالتي..
"راما"
من الفجعه ناضت قعمزت..
"ايوه راما كلميني"
بلعت ريقها وقالت بصوت طالع..
/الو..
"راما..شن حالك"
ردت بصوت مخنوق..
/كويسه..
"راما..اني اسف..اللي قلته امس مش قاصد نجرحك بيه ولانهينك صدقيني اني خايف عليك وحازر ع بنت عمتي مانبيش من يوصل فيها"
نزلوا دموعها وقعدت محتفظه بصمتها..
"راما اني مرة حلمت بأمي توصي فيا عليك "
بدهشة قالت..
/حقه!
ضحك وقال..
"والله العظيم..هدا علاش ع قد ماصار ماقدرتش ناخد منك موقف..سامحيني كان تسببتلك في مشاكل في حوشكم وصدقيني حنحلها"
معاش قدرت تتكلم كانت تذرف في الدموع بصمت..
"المهم نرجع نقولك اسف مرة تانيه..خودي عمتي معاك"
تنهدت بألم وقعدت تمسح في دموعها..
"ايوه رموشة حبيبتي"
☘وقعدت نسرين تحاول تشرح موقف ولد خوها وتواسيها ع قد ماتقدر ماتندريش ان الكلام اللي قاله محمد نساها كل شي زعلها ووجعها تحديدا اللي قاله عن حلمه بأمه عائشة..
🍃🍃🍃🍃
وتعدي ساعات اللمه في حوش الواعر كلها ضحك وبهجة ولحظات حلوة برغم الخوف الحيره اللي سكنوا بعض القلوب..
ومع الساعه 11 روحوا نبيله وصفيه بعدهم فايزة وبناتهم واخر من جي دور مرواحه نساوين عيلة شنيبه وطوبى..
☘طوبى:رد بالك عليها وخليك وراها ماتتعامليش معاها بقوة لأنها حارة زيك..
سدرة بقلق:باهي قوليلي شن صاير؟
طوبى بضحكه:ماتخافيش مافي شي خطير تو غدوة الصبح ان شاء الله نتصل بيك ونحكيلك..خدت نفس وقالت بضيق ودمعه في عيونها..مانوصيكش ع جنونه...
ضمتها سدرة اللي كانوا في عيونها الدموع حتى هي وقالت..
/في عيوني ياعيوني..
🍁🍁🍁🍁
وفي طريق مرواح عبد القيوم وطوبى كانت تبكي بصمت من شوقها لبنتها وهو حاول يخفف عنها ويغير جوها وهي خلاته ينجح في المحاوله..
🌼طوبى:يعني مش داير عرس!؟
عبد القيوم؛ايه نهار واحد يوم العقد قال بيديروا حفله بسيطه وخلاص قالي جيب معاك المدام قتله مانجيبها كان مااتصلتوا بيها وعزمتوها..
طوبى ضحكت بعدين بدت تغني..
"ياربي نجيه عشيري
اللي معلي شاني علي غيري"
..ضحك وهو يسمع فيها..هي تحمست وبدت دربك ع شنطتها وتغني..
"ياسلملي مولى بيتي
ع العدوان فرض شخصيتي"
