صدى صمتي اشعل جَوفي

الجزء الثالث والعشرون

عضت شفتها بخوف تطالع فيـه : فارس
رفع راسه : اهمم
تنحنحت بخفوت : اقول فارس شرايك لو ما اسوي عرس
رفع راسه لها وعقد حجاجه : يعني اسمع شرايك شرايك مثلا ؟
: انتي ودك فيه ولا لا ؟
شابكة إيدها ببعض بإرتباك : مابي عرس وعطيت خبر يزيد متى ما فضى يمرني وانا موافقه
وسع ناظره بذهول : وش تقولين انتي صاحيه ؟
نرجس : كان قراري هذا وبما تأجل عرسنا ولو صار عرس بيكون بعد فتره طويله ممكن توصل سنه
وانا راضيه يـا فارس واذا عدت الفتره الصعبه بنسوي حفله بسيطه وخلاص مو لازم العرس
كتم غيضه مو عارف ايش يرد بخاطره يزفها بـإيده ويكون معها خطوه بخطوه عضت شفتها من عدم رده وقفت تجلس بجانبه مسّكت إيده وشدّت عليها : اعرف باللي يدور بالك واعرف والله لكن لازم أوقف معه هو يحتاجني الحين وان شاء الله بـتزفني لكن مو الحين بعد ما الأوضاع تهدأ ، فاهم عليّ ؟
تنهد بخفوت : فاهم فاهم ومتى بياخذك ؟
رفعت كتفها بعدم معرفه : لازم اجهز  أغراضي بأي وقت ممكن يقول يلا
هز راسه : الله يسرها ، شدّت على كفه : قلبي لا تزعل إلا زعلك والله مايهون عندي تعرف انه غصبًا عني
ابتسم بهدوء يحاوط راسها بعبط : خلاص والله فاهمك لا تعدين وتزيدين
ضحكت : خربت شعري فارس
حرك شعرها بحركات عشوائية اكثـر ضحكت بعلو صوتها : فارس تكفى خلاص
-
« شقة سهاج »
سهاج : ممنوع تنزلين تحت إلا وانا معك
هزت راسها وعقدت حواجبها لثواني : طيب واذا كنت ابي انزل وانت مو موجود ؟
: لا تجنيني نغم لا ، إلا وانا معك خطوتك ورا خطوتي
عضت شفتها : طيب ، طيب الحين يجي عمي يزيد بنزل تحت
تنهد بخفوت يخاف عليها وتحذيرات الدكتوره المكثفه لها يخاف يصير شي وترجع تتأثر نفسيتها اكثر ، الطفل اللي بداخلها شمعه نورت حياتها انتشلتها من ظلامها تعطيها امل وصـبر اكثر ، فـي روح داخلها لازم تكون واعيه وفاهمه هالشي لا يتأذى وطول الليل امس دار حكي بـينهم تحاول تخرج من دوامتها والحزن اللي يحاوطها من كل الجهات يضيع وقتها بالبكاء وصحتها والاهم ممكن تضيع ثمرتها الثانيه ماودّها تضيع مره ثانيه ضاعت مره ماتبي تضيع ثاني مره فهمت الحكي منه تحاول تستجيب منه ويخرجها من الحزن اللي فيها ودورها تساعده ، تساعد نفسها تطلع من اللي فيه وتعرف حياة فيها الزين والشين
رفع كفه لخدها : سرحانه اكيد فيني ؟
ابتسمت بهدوء : ايه فيك ، لبست شرشفها ومسّكت كفه : يلا ننزل
وقفها من انتبه لطول الشرشف : لحظه لحظه وقفي هذا طويل اخاف توقعين
نزلت ناظرها للأسفل : طيب البس عبايتي افضل ؟
هز راسه بـ ايه
جاب عبايتها لبسها بهدوء ابتسمت من اهتمامه النابع من قـلبه
وقف عند الدرج الخاص فيهم ناظرت له : وش فيك وقفت ؟
رفـع ثوبـه يربطه على خصره رفعت حاجبها بذهول من انحنى يحملّها : سهاج !
تمسّكت بـعنـقه : لا نـطيح سهاج
ضحك يشدّ عليها : بـين يـديني معليك
نزلها بهدوء : كل يوم اجل على ذا الحال حـاوط بطنها : عشان البطل هذا
ابتسمت : وش دراك انه ولد ممكن بنت
: عندي احساس بـكون ابو خلف لكن وان صار العكس كل شي من الله زين
هزت راسها بهدوء : راضيه بأي شي اهم شي يكون بصحه وسلامه
-
« بـيت باسل »
تشتغل بالمطبخ وقعت منها الملعقه حاولت تنحني تاخذها عقدت حاجبها بألم من كبر بطنها تعيقها
دخل باسل بهدوء رفـع حاجبه بخوف تقدم لها : اماني ؟
رفعت ناظرها له : مافيني شي بس كنت ابي اخذ الملعقة بس من بطني ماقدرت
ابتسم بهدوء ينحني ياخذها : إذا في شي طاح خلّـيه لين اجي وانا ارفعهم
ضحكت بتعجب : تمام اجل
حاوط بطنها مسّكت كفه بهدوء : اشك انه توأم من كبر بطني ؟
ضحك بـخفيف : اتمنى والله
رفعت حاجبها بذهول : لا ياربي مابي والله بيكون تعب عليّ
باسل : بكون معاك ما أخليك
هزت راسها بالنفـي : لا تكفى
ضحك يضمها : تمام في شي أسويه ولا خلصتي ؟
: مابقى شي بس احط الاكل
هز راسها : روحي اجلسي وانا أكمل الباقي
اماني : بس مابدلت ملابسك ؟
: لا تشيلين همّي روحي اجلسي
ضحكت : اوكيه عساك على القوه
ابتسم بهدوء لها
-
جلست بجانبه بعد ماسلّمت على يزيد وأميره
ابتسمت بهدوء من وضع وساده خلف ظهرها
يزيد : ايه ايش الأخبار ؟
ابتسمت ريتال : نحاول نصير بخير
هز راسه يزيد : بـنصير بخير نـصير
حاولت تعدل الجو أميره : ايه وش البيبي اللي بطنك نغم ؟
ابتسمت نوره تجاوب عنهم : وي تـو الوقت يـبين بالشهر الرابع واحيانن مايبن فيه ويكون بالشهر الخامس أوضح
ابتسمت أميره وهزت راسها : الله يـجيبه بخير وسالم
سهاج بهدوء : آمين
ريتال : متحمسه لبنوته اماني يالله ما اصدق بكون خاله
ابتسم محمد : بتكونين عمّه ان شاء الله
هزت راسها بـ ايه
وقفت ريتال تصب لهم قهوة وصلت لـ نغم
سهاج : لا تصبين لها خلاص يكفي
ناظرت له نغم : ليه ؟
: مو زينه كثرت القهوة لك خصتا بالشهور الاولى
ريتال : شدخل سهاج بالله ؟
نوره : إلا صادق سهاج مايصير كثرت القهوة لها حتى الشاي
هز راسه يزيد يأكد معلومتهم : كل شي فيه كافين يضر الجنين
عضت شفتها بخوف : اجل ماعداني اشرب قهوة وشاي
ضحك يزيد : يـا عـيني كثرتها تضر اشربي لك كاسة شاي او فنجانين قهوة بس كذا مايضرك ولا يضر الجنين
هزت راسها : طيب اشرب بس نعناع
ضحكت اميره : عاد هذا العشق عندك
رفعت صوتها نوره : لا ! مايصير النعناع لك يـا امي ابعدي عنه
قطب حاجبه سهاج يتذكر شربها لها قبل امس عشان يهديها : ليه
نوره : يجهض ما يـصير تشربه
خافت نغم تناظر لـ سهاج : شربته طول ماكانت نفسيتي تعبانه
مسّك إيدها يهديها : مافيه شي امس كنا بالمستشفى والدكتوره قالت بخير لكن بعد هـالحين ما تشربينه
نغم : بس احبـه
أميره : معليه يـا نغم حاولي تبعدين عنه من اليوم شوي شوي يصير عندك عادي
هزت راسها : ايه احاول
التفتت سهاج لها : غضبًا عنك يـا حبيبتي تحاولين
توردت ملامحها من نطق كلمه "حبيبتي " ضحكت ريتال بعبط تصيد اي فرصه ممكن تحرج فيها نغم : حركات حبيبتي بعد
توردت ملامحها اكثر ابتسم سهاج يطالع فيها وناظر ريتال يهددها بنظراته
ضحكت اميره تناظر لها : ريتال جيبي مويه بـارد تشربها
وقفت ريتال تجيب لها وتضحك عليها من بعيد احمرار وجهها وأذنها تلونت باللون الاحمر مسك نفسه لا يقبّلها أمامهم
تنهدت بخفوت اخذت المويه من ريتال : بشويش اشربي يروحـي
-
« بـيت شجاع »
جالسه بينهم وسرحانه ايش ممكن يصير لزواجها رغم الوقت مو مناسب تفكر فيه او تقول لأحد ممكن لو تكلمت ياخذون منها فكره سيئة مايهمها موت عمها او خواطر جدّانها وينقلب كل شي ضدها ماتحب تفكر بهذا الشكل لكن بدون شعور منها يجي لـبالها وكم المده على زواجها زفرت بهدوء ترفع ناظرها لـ إياد : أكلمك وين رحتي ؟
ابتسمت : موجوده ، التفت تطالع مكان غاليه ماهي موجوده
ترف : امي وينها ؟
إياد : طلعت مع هادي لـ جدتي
هزت راسها بهدوء تنحنح يطالع فيها بـتمعّن : فيك شي ؟
هزت راسها بالـنفي
: تضحكين على مين وجهك يحكي ايش مضايقك ، متضايقه على زواجك اللي تكنسل ؟
وسعت عيونها بذهول من فهمه لها ضحك بخفوت : على كذا اجل لا تشيلين همّ مايجي رمضان السنه الجايه وإلا انتي تطبخين بيت زوجك
شابكة إيدها : إياد لا تفهمني غلط ما اقصد شي بس شلت همّ أصلا ما ادري كيف يجي فكري رغم اني احاول ابعد افكاري ولا يصير افكر كذا وحنا بعزاء عمي
إياد : تفهميني فيك عارفك مثل نـفسي ما يحتاج تبررين لي أعرفك زين وافهم عليك 
ابتسم اخر جملته لها وقف : ودك ناخذ فرّه بالسياره ومنها اجيب لك قهوه ؟
ابتسمت وقفت بحماس : قدام
ركضت تجيب عبايتها لبستها بسرعه عدلت نقابها ونزلت له تفتح الباب : طولت ؟
ضحك بتعجب : هو أصلا كيف أمداك بخمس دقايق إنجاز والله
ضحكت تسكّر الباب : تجي مره بالسنه عاد
ضحك يحرك من البيت التفتت له : ماقلت لـ بهاج
: الحين اقول له يلحقنا
صرخت : لا تكفى مو حاطه شي
ضحك بتعجب : اكيد ماتحطين شي وعمي الله يرحمه وعارف هذا الشي وبعدين بكرا شايفك شايفك وانتي وجهك مـفقع
ترف : إياد خير !
ضحك بستعباط : بنروح لكان ماتقدرين تكشفين ارتحتي الحين ؟
زفرت براحه : ايه كذا كويس
ابتسم يتصل على بهاج : الو
بهاج : هلا والله
إياد : تخاوي معي ومع زوجتك نتقهوى نغير جو
رفع حاجبه بهاج لـثواني : والله تمام جايكم
-
« بـيت باسل »
اماني : أبعده عنك ابي أتمدد بحضنك
ابتسم يبعد للابتوب عنه : تعالي يـضي قـلبي
تمددت بهدوء بحضنه حاوطها اكثر ويقربها : ليش ماتبين تروحين لأهلك ؟
زفرت بتعب : مافيني طاقه للحزن والله تعبت والحمل متعبني اكثر وخايفه عليه تتذكر وش صار فيني من حادث سهاج مابي يرجع من جديد وعمي الله يرحمه ويغفرله ويسكنه فسيح جناته
قـبّل راسها : اللهم آمين
رفعت راسها بهدوء تغيير مود الجو : متى نجهز أغراضها ؟ ضحكت لثواني تستوعب ماطلعو لها اسم
: باسل ماطلعنا لها اسم !
انحنى لها يلامس انفها بـ انفه ضحكت بصوت عال
وابتعد : انتي عندك اسم معين ولا اهبد من عندي
اماني : امم ماعندي بس نفكر مع بعض ودي بأسم كيوت كذا
رفـع حاجبه : ليه هو في اسم كيوت ومـافي ؟
ضحكت تشدّ على كفه : ايـه فيه
تعدلت بجلستها : شرايك سحاب ؟
باسل : ودك غيمه بعد ؟
ضحكت : بلا عبط شرايك فيه ولا ادور اسم ثاني
باسل : إذا ودك بأسم سحاب تم اجل
ابتسمت تتمسّك بكفه : تمام ، تمام يـابو سحاب
ضحك بخفوت انحنى يقبّلها حاوطت عنقه ضحكت بتعجب من حاول يحملّها : لا لا انت انحني اكثر
ابتسم يـنحنى لها اكثر وحاوط بطنها بخـفيف قبّلها
بـتعمق يخالطهم وتغمرهم مشاعرهم "مشاعر الحب "
-
ابتسم من شافه يدخل وقف يسلّم عليه : علومك ؟
التفت لترف : قومي سلّمي على زوجك
وقفت بإرتباك : ايه صح نسيت
تقدم لها يسلّم عليها وضحك : اخبارك ؟
هزت راسه : بخير ، انت اخبارك ؟
هز راسه يسحب الكرسي يقعد عليه : طلبتو ولا تو
إياد : طلبت
بهاج : v60 ؟
هز راسه إياد بـ ايه التفت لهم وقام : بشوف الطلب
رفع ناظره لها شابكة إيدها ببعض : قدامك وأغراك منظر الكافي ؟
وقف يجلس بجانبها وسع ناظرها : بهاج لا يجي إياد ويشوفك بجنبي
عقد حجاجه : طيب ! مو زوجك أنـا ؟
ما نطقت شي مو عارفه ايش تقول وتعرف انه صادق
شابك كفه بكفها وعارف انها تخجل لكن مايمنع انه يشبك إيده بـإيدها : ماله داعي الخجل و إياد عارف وعارف تاركنا الحين عشان نكون مع بعض دقايق ولا احد يستلم طلب يطول كذا ؟
ابتسمت وهزت راسها تأكد له تأخير إياد قبّل كفها  بهدوء : تعسر علينا الزواج لكن معليه اهم شي اني اقدر أشوفك متى مابغيت
هزت راسها : متى مادوك فيني موجوده
رفـع حاجبه لـثواني : من اي جهه قصدك ؟
رفعت كتفها بعدم فهم : عادي اي جهه
ضحك بعلو صوته وعدم فهمها لمقصده قبّل جبينها ورجع لمقعده وسع ناظرها بعدم فهم وتقبيله لها أمام الناس : مافهمت وش قصدك ؟
يمسح وجهه بـخفيف من فرط ضحك : إذا تزوجنا اعلمك
قطبت حاجبها لحد هـاللحظه مو عارفه شي
ابتسم إياد : طولت عليكم
ترف : مره
أعطاها مشروبها : ولا يزعلك شي جبت لك هدية
ترف : الله وشو ؟
قدم لها كوكيز ابيض : لقيت متوفر عندهم اخيرا
ضحكت تاخذه منه : يالله من زمان عنه
ابتسم لها والتفت لـ إياد : تحبه ؟
هز راسه بـ ايه : تموت فيه
بهاج : يعني بجهز درج خاص كوكيز ابيض بـيتنا
شرقت بذهول تطالع فيه ضحك إياد : ان شاء الله
-
ضحكت بتعجب من وقفها : لحظه ارفع ثوبي
انحنى يحملّها تمسّكت بـعنقه : يعني خلاص دايم كذا ؟
هز راسه : دايم يـا عـيني دايـم
فتحت الباب ومشى فيها للغرفه : الحين عادي خلاص نزلني
نفـى براسه مددها على السريره انـحنى يقبّلها وبنفس الوقت يبعد العبايا عنها نزل لـعنقها يقبلها حاوطت شعره من الخلف تشدّه لها اكثـر ابتعد عنها تاخذ نفسها ابتسم من تورد ملامحها يمسح على خدها بهدوء رفع ناظره لها ابتسم من شاف ناظرها لـثغره
شدّت على كتفه تقدمت تقبّله غمض عيونه يستشعر ثغرها وطريقة تقبيلها له
سهاج : يـا مـذاق العافية لا ذاقها القلب طابّ   
ابتسمت بخجل تناظر كل شي ماعداه ابتسم من رجـع
لـثغرها
-
يطالع لـرقمها عض شفته من تقدمت له حصه تجلس أمامه تنحنح بهدوء
: يـمه بما ان كل شي جاهز لعرسي بجيب نرجس مو لازم عرس
عقدت حاجبه لـثواني : وش تقول انت استخفيت
يسند إيده على ركبته : يمه افهمني متفقين أنا وياها وبعدين نسوي حفله
حصه : ومن صاحب الفكره هذي ؟ كل هذا ماعندك صبر
يمسح على وجهه : يمه يـمه الله يخليك راضين حنا الاثنين ليش هالتصعيبه ؟
حصه : بكيفكم سو اللي تبيه وغرفتك جاهزه وكل شي جاهز
تقدم لها يجلس عند اقدامها : انتي راضيه اهم شـي عندي رضاك
مسّحت على شعره : راضيـه يـا امـي راضيـه
قبّل راسها : الله يطول بعمرك ، بنـام تبين شي ؟
هزت راسها بالنفـي : سـلامتك يـا امي
توجهه لـغرفته تمدد على سريره بدون مقدمات رفع الجوال يتصل عليها : نرجس
اخذت جوالها من داخل كركبتها لتجهيز أغراضها : هلا
ابتسم من سمع صـوتها بدون لا ينطق : يزيد ؟
: عيـونه وقلـبه
ضحكت بخفوت : المزاج متحسن الحمدلله
يزيد : جهزي نفسك بكرا مـا خذك ، مـا خذك لحـضني و لـبيتك
رغم انها عارفه ومتأكده خلال هذا الاسبوع ممكن يطلب منها تجي لكن ماتوقعت بذي السرعه
عض شفته بإرتباك : غيرتي رأيك ؟
نرجس : تصدق اني جالسه اجهز اغراضي ومستحيل اغير رأيي واكون بجانبك
بـلعت ريقها  : كم الساعه بتجـيني ؟
يزيد : متى ودك إذا بكرا المغرب يناسبك ؟
رفعت ناظرها باغراضها جهزت تقريبا كل شي ولا بقى غير القليل : ايه عادي
ابتسم بهدوء : تمام أخليك تجهزين ، تصبحين على خير
نرجس : وانت من اهل ، سكّـرت مـنه بدون شعور منها لقت نفسها تبـكي رفعت راسها من دخل فارس عقد حجاجه بخوف : وش فيك ؟
صوت بكاها وهي تشرح له : شلت همك مابي أتركك
زفر براحه من عرف موضوع بكاها : صلِ على النبي يا ختي موجود عندك وقريب حواليك أنا قلت لك بجيك كل يوم لدرجه يمكن يكرشني يزيد
ضحك يحاول يغير نفستيها ويعرف كيف متعلقه فيه وكأنها مو مصدقه البعد عنه
انحنى يضمها يمسح على شعرها من زاد بكاها : بس بس يـا عيوني والله موجود بس ارفعي الجوال واكون حاضر قدامك واطلع معك زيي قبل مافي شي تغيير
تنهدت بتعب : تجيني كل يوم ولا اسمح لك تعارض
هز راسه : ابشري كل يوم بس مابي اشوف هـالدموع
-
شدّت على إيده : متأكد عادي اروح له ؟
ضحك بهدوء يحرك الدركسون يلبّق لف لها : سألت الدكتوره مليون مره لدرجه اشك انها حذفتني
ضحكت : تمام اجل
مسّكت إيده بذهول من الشركه اللي أمامها وعلامة المبنى بخط كبير "خـيّال "
رمشت بعدم تصديق : سهاج !
ابتسم بهدوء يشدّ على إيدها : الانبهار داخل مو هنا