صدى صمتي اشعل جَوفي

الجزء العشرون

آخر لمستها كانت من عطرها المفضل و المفضل عنده من قبلها واستغرق عليه شهر يصنعه خصيصا لها ولا له مثـيل
طلـع ينشف شعره وقـعت عيـنه عليها توترت كثيير من نظراتـه نحوها بـ هـالشكل
تقدمت لـه واخذت المنشفه منـه تضغط على شعره بخـفيف بدون لا ينـطق شـي بـلعت ريقها من سكـوته ولا أعطى اي ردة فعل لكن مـا تعرف خلف السكوت ذهـول منها ولا كلمة ممكن تعبـر عنـها بـ هـاللحظه حاوطها بهدوء وعيـنه عليها : بتـاخذين عقلي زود علـيه مَـا انتي ماخذتـه ابتسمت له بهدوء وابعدت المنشفه : مع الاسف ايـه وزود عليـه اخذت قلبك
رفـع حاجبه بذهول : كـلام جديد حـركات
ضحكت بخفوت انـحنى يقبّـلها بهدوء وهمس : كـلامك المعسول هذا ابيـه كل يوم ، بدون شعور منها نطقت : عشان تقـطع شفايفي لا شكرأ
ضحك بتـعجب منها كيـف صارت : حبـي شاربـه شي اليوم على هـالصباح ؟
غطت فمها وضحكت ورفعت نفسها تـقبّل خده ورجعت للخلف : مـافيني شـي يـا حب وطلعت
حجاجه مـا نزل ومذهول منها وانذهل اكثر من التفت وشاف ظهرها مسح على وجهه بهدوء : الله يـكون بعوني ، التفت يدور ملابسه نـسى مكان غرفة الملابس عضّ شفته بخفه : ماسوّت فيني خير ضحك توجـه لـ غرفة الملابس
غطت وجهها بـ احراج : وش سويتي وش وسـويـتي !
خجلانه من نفسها ومن الشخصيه يلي تقمصتها من لبست جريئ حاولت تصير جريئه معه وتكسر شخصيتها لو شوي فقط لكن الآن تأكل نفسها من الخجل قامت ناويـه تغيير لبسها : لازم أغيّـره
ابتسم لها وسمعها : لا خلّيك فيـه معجبني كثيير
كتم ضحكته من تورد ملامحها وكيف منحرجة منـه لامس أطرافه خصرها الظاهر لـه بهدوء رفعت ناظرها لـه توردت ملامحها اكثر من انحنى يـقبّل خصرها وقربّها منه اكثر واندفع نحوها يقبّلها بـكل شـعوره لها ويـبيّن مقدار حبـه لها من تعـمقه بـ قـبّلته شدّت على كتفـه وبادلتـه لأول مره ابتسم بخـفه وسط قبّلته لها راضي أشدّ الرضى من التطور الملحوظ من عدم خجلها مثل اول وصارت تبادله بالكلام بدون حواجز او مسافات تفضفض لـه عن كل شـيء ممكن يحزّ بـ خاطرها ويـمنع فرحتها ابتعد عنها بهدوء وابتسم : خلّينا نفطر اول ، ودّك مكان نروح له ؟
عدلت شعرها بـتوتر بسيط : ا ايـه نفطر
ثـواني افتكّـرت : البنات ودّهم بهدايا لازم نجيب لهم
ضحك وشابك كفها بكـفه : اهم وحده ريتال لا يطلع لها قرن ضحكت بعلو صوتها : اهم وحده عاد
ناولّها العصير وابتسم من ضحكتها : تمام نفطر ونشوف أسواقهم ..
-
« بـالرياض , عنـد نـرجس »
طـول الوقت كانت بحاله تـوتر عقد حاجبه فارس : نرجس ؟ استوعبت على حالها  : هـلا
: وش فيك أناديك من اليوم
حكت حاجبها : مافيني شي بس شلت همّ الزواج
: إذا شايله همّي معاليّ ماني ورع
زفرت بخفوت من تذكرت امّـره وكـيف يدبّر نفسه : ميـن يطبخ لك ومين يغسل ملابسك ومين ي..
قطع كلامها : وش فيك ماني ورع اقدر أسويهم كلهم !
هزت راسها : ماعندي مشكله تجي كل يوم تاكل عندي وهذا اللازم يلي يصير
ضحك بتعجب : لا فكـيني ، اجيك عادي اشوفك واروح اما اكل عندكم كل يوم سلامات يـا نـرجس ، لا تشيلين همي بصـور لك كل يوم ايش آكل عشان تتطمنين
ضحكت بهدوء : تمام يـا يـروحي
-
« بيـت خلف , العـصر »
زفرت بخفوت : يـمه شلت همّ يعني بعد شهر عرس يزيد وبعد أسبوعين عرس باسل ! 
حصه : طيب وش تبين هـالحين ؟
ضحكت بـربكه : احس صعبه يعني عرسهم تقريبا ورا بعض ما نـلحق عليهم
: وانتي وش دخلك انتي جايه ترقصين وتصورين مفروض نـرجس و ترف هم يلي مـا يلحقون وهذا أنا أشوف شهر كثيير بعد ، أنـا تزوجت ابوك بـ اسبوع من بعد الخطبه ولا انتي وش عليك
ضحكت : مشكوره يـا الغاليه صح جايه اصور وارقص وبعدين هذا زمانكم قبل مو زيي هـالحين
ضربت على فخذها حصه بهدوء : يـازينها من ايام مو هـالحين تنخطب وبعد سنه سنتين العرس 
ابتسمت أميره بهدوء : ودّك ترجع هذيك الايام يـمه ؟
حصه بـحزن : ايـه والله ودّي فيها لكن نتماشى مع هـالجيل
-
رجعـو من السفر وكانت الوجهة الاولى لـبيت جدهم وكان الكل حاضر دخلـت بهدوء : السلام عليكم
التفتو من سمعو الصوت انذهلو ولا توقعو ممكن يجوون بـاللحظه نطت ريتال اول وحده تضمها بقوه : نغم نغـم ! ضحكت بهدوء من أبعدت عنها وسلّمت على الكل وانصدمت من تواجد منيره من وقفت أمامه وسلّمت عليها وتضمها : الحمدلله على سلامتكم تـو مانورت الرياض
أبتسمت بـتوتر : الله يسلمك
جلست بجنب حصه وضمتها لها : وين سهاج  مـا جاء ؟
هزت راسها بـالنفـي : موجود عند عمامي سلمت على جدي وعمامي وجيت ، اكيد اشوي يجي
هزت راسها بهدوء وابتسمت من ضمتها اكثر : اشتقت لك كثيير
حصه : يـا امـي حتى أنـا اشتقت لك مكانك كان خالي والجلسه مالها طعم بدونك ، كيـف السفره ان شاء الله انبسطتي فيها ؟
ابتسمت : كثيير انبسطت فيها دقيقه اوريك اصور
فتحت جوالها توريها الصور ضحكت بـخفه : شوفي كيف طاح سهاج يحسب نفسه سكّـر الحزام زين
ضحكت حصه بهدوء : امي بسم لله عليكم من كل شر يارب الحمدلله انـه جات على كذا هزت راسها نغم بـ ايه : ايـه الحمدلله
دقـايق وتـحنح سهاج ودّه يدخل يسلّم عليهم قامت أميره عليه تسلّم : ثواني يلبسون البنات وتقدمت له ومسّكت إيده ومشت معه : اخبارك وكـيف السفره ؟
ابتسم بهدوء : الحمدلله تمام ، انتي كيف حالك ؟
: طيّبه ولله الحمد
دخل سلّم عليهم وقـبّل راس نوره : لك وحشه يـا امي
ابتسم بهدوء : مـا يوحشك غالي يـا الغاليه ، اخبارك وعلومك ؟
نوره: الحمدلله الحال يسـرّك
هز راسه : الحمدلله تقدم وجلس بجنبها ابتسم لها بهدوء ، ردّت عليه الابتسامه بخفه
اخذ الفنجان من ريتال : ان شاء الله جبتو هدايا لنا 
ضحكت نغم والتفت لـ سهاج : شفت قلت لك
ابتسم بهدوء والتفت لـ ريتال : اهوه تحشون فيني ماهقيتها منك يـا نغم كسرتي قلبي خلاص
ضحكت بخفه : نقصد انك بتكوني اول وحده تسأل عن الهدايا
جلست ريتال بهدوء وابتسمت: اكيد ، وينهم ؟
سهاج : بالسياره شوي أجيبهم
هزت راسها وضحكت بخفوت : تمام
وسـع ناظرها من حسّت بـكفه على ظهرها من الخلف بحيث مايشوف احد همس بـ أذنها من انـحنى بهدوء : وش ودّك الحين ؟
بـلعت ريقها بـ ارتباك وعرفت مقصده : مـا ودّي بشـي ، ابعد يدك لو سمحت
ابتسم بهدوء لـ ريتال : ريتال تعالي صبـي لي قهوه
ابتسمت ريتال بعبط : عندك زوجتك خلّها تصب لك
ناظر لها بهدوء والكل صار يطالع لها ابتسمت بـتوتر لو قامت بتوضح إيد سهاج وتنحط موقف ما تتمناه بدون تفكير منها قدمت فنجانها له : خذ فنجالي مـابيه
ضحك بعلو صـوته هز راسه وأخذه منها ولامس أطراف إيدها بهدوء
ضحكـو من ضحكته ولا هم عارفين ايش السبب لكن من رنين ضحكته ضحكو ابتسمت أميره بخفه من فهمت توتر نغم و عباطة سهاج
تناظر لهم حصه بحـب وكل مره تشوف ضحكتهم تدعي لهم وتغيير حال نغم للأحسن بـ فضل سهاج غيّرها كثيير شوفها الدنيا يلي كانت قدامها غيمه سوداء ولا همّها شـي تعيش يومها فقط بدون إنجاز ، فرحانه تشوف التغير اللي تتمناه لها بـكل سجده لها أمام الخالق قاعده تشوف الحب واضـح وضـوح الشمس عليهم ابتسمت بحـب وهمست بخفوت : الله يخليكم لـبعض ويسعدكم يـارب
ابتسم بهدوء ابعدّ إيده بخـفه تنهدت بـراحه
سهاج : بجيب هداياكم نغم تعالي خذيهم ، رفعت ناظرها له بهدوء وقامت وطلعت معه : تقدر تجيبهم ودخلهم لحالك
مسّكت إيده بهدوء : تكفى لا تسوي الحركات ذي قدامهم لحالنا سوي يلي تبيـه لكن قدامهم لا ، ابتسم لامس خدّها بهدوء التفت يشوف إذا في احد انحنى بهدوء يقبّلها مـا قدر يتحمل تعابير مـلامحها شدّت ثوبة من حسّت فيه يفقد السيطره أبعدته بهدوء : سهاج ! تكفى
مسح على وجه وتنهدّ وطلع : خلّيك هنا بجيبهم
دقايق ورجع فيهم : تقدرين عليهم ؟
: عطني اجرب ، نفـى براسه : خلاص اتركيهم أحطهم بالمجلس هنا هم يجوون لا تلمسينهم
هزت راسها : تمام
-
ضربت كفها اميره بضحك : كفو بنت اخوي والله
ضحكت ريتال بغرور : كفوك الطيب يـا اخت ابوي
امل : مو معقوله متخلفات كل ذا عشان قفلتي على المسكينه ترف مع بهاج
ضحكت نغم : مدري وش ينّـوون عليه اخاف منهن إذا اجتمعو مع بعض
ضحكت ريتال : شدعوه والله مانخوف
هزت راسها اميره تأييد كلامها : بس انتو خوافات عاد وش نسوي فيكم
-
عند ترف المغدوره من عمتها و ريتال ضحك بهدوء وتقدم لها : لازم كذا تجين يـعني ؟
تكتفت بعصبيه والتفتت عنه : مو كذا عاد بالغصب هو ؟  قلت لك مابي اشوفك
عقد حجاجه بـ تعجب : ليـه ماتبين تشوفين ؟
تأففت بخفوت وشتمت اميره وريتال بهمس كيف تقول ماودّها يشوفها بسبب انها مالبست بالشكل اللائق اللي ممكن تكون قدامه ولا ودّها تكون قدامه منظر غير مرتب  : كذا بس
رفـع حـاجبه لثواني بذهول : تمام اجل ! وطلع
التفتت من شافته يخرج زفرت بحدّه : اوف مـا اقصد
طلعت لهم بعصبيه : لاعد اشوف ولا وحده منكن تساعدني اتركوني لحالي
قطبت حاجبها اميره بذهول : ليه ايش فيك ؟
اخذت جوالها والتفتت لهم قبل لا تطلع : تهاوشت معه ارتحتو وطلعت ، وطلعت خلّتهم مذهولين منها وصار العكس لكل توقعاتهم ناظرت نغم لهم : وش صار لهم !
زفرت امل : اكيد زعلت شفتو لبسها بجامه و اكيد ماتبي بهاج يشوفها كذا وانتو الله يهديكم مـا اخذتو رأيها رحتو من كيفكم ، قالت آخر كلامها وطلعت لـ ترف جالسه لوحدها مجلس معزول : ترف
صدّت عنها ماودّها بـ احد : امل مالي خلق لك اطلعي
جلست بجانبها : والله ماكنت ادري إلا متأخر لو دريت بدري كان منعتهم اعرف ماودّك يشوفك كذا توني قلت لهم
التفت لها : ايش قلتي لهم ؟
ابتسمت امل بهدوء : انك ماودّك يشوفك كذا ، أختك وأعرفك ايش صار لكم ؟
ضحكت ترف بخفوت : زين انك تعرفيني ، قلت له ماودي أشوفك وزعل وطلع
امل : معليك بهاج مايزعل عليك تلقينه الحين ناسي ويقول هرمونات
ضحكت ترف بسخريه : وش يعرفه عاد ، قامت بحزن : خلينا نمشي خلاص ماودّي بالقعده اكثر
هزت راسها امل وطلعت خلفها كان ودّها تقعد اكثر لكن لمًا تشوف ترف تسكت
رفعت حاجبها بذهول من شافتها تلبس عبايتها ريتال : وين وين ترف وانتي وهي وين !؟
امل : بنروح للبيت
قطبت حاجبها أميره وتقدمت لـ ترف : لا يكون صدق زعلانه منّا ؟ ماردت عليها لبست نقابها وطلعت
زفرت امل بخفوت : ايه زعلانه ولا ألومها وطلعت خلفها
نغم : لا تناظرون كذا حتى أنا معهم زعلانه عليكم
عضت شفتها ريتال : والله ماتروح وزعلانه عليّ
ركضت خلفها على أمل  تكون موجوده اختصرت المكان وطلعت من باب ثاني ..
غسل إيده وابتسم بهدوء من تذكر وعدّ منيره  " اليوم بخطبها لك يـا هتان " قطب حاجبه من يسمع صوت ركض وكلام غير مفهوم وسـع ناظره من شافها تحاول تفتح الباب تقدم لها بهدوء : ريتال !
شهقت بذهول والتفت له بسرعه : هتـان !
ابتسم بخفوت وتقدم لها :اخيرا مـا بغيت أشوفك
توتر كثير ماهي عارفه ايش تسوي وكيف لمحت الفرحه عليه وكأنه ينتظر اللحظه : ممكن تصدّ
نفـى براسه : شدعوه اصد وقريب بتكونين عندي
رفعت حاجبها بذهول : اقول صدّ بس ، بـ تخرج لكن مسك إيدها ورجعها : ماقلت اطلعي
خافت كثير من احد يمر : منو انت ابعد مصدق نفسك بتكون زوجي ابعد وراك
قطبت حاجبها بخوف من شافت ابتسامته : يـاحلو كلمة زوجي من ثغرك ، مافي طلعه من هنا لين تعطيني موافقتك الحين
تحاول تبعد إيدها عنه تأفف وناظرها كان على الباب لا يفتح : لا تحاولين مايهمني إذا أحد دخل أخطفك واهرب ، وسـع ناظرها بخوف : مستحيل ابعد عنّـي
: ودّك تجربين تمام ابشري انحنى يـبي يحملّها
صرخت بخوف : امزح امزح معك خلاص موافقه عليك بس ابعد الله يخليك
ضحك بعبط : تمام ارجعي ولا اشوفك هنا تجين
هزت راسها وركضت مسّكت قلبها بخوف : وشصار ! دخلت للمطبخ تشرب مويه شرقت بخوف من دخلت نغم : بسم لله عليك ، ضربتها على ظهرها بخـفيف
: ليش خفتي من شفتني ؟
ابتسمت بـتوتر : ولا شي بس دخلتك واو وكذا خوفتني
رفعت حاجبها نغم لثواني : تضحكين على مين يـ ريتال ؟ قولي ايش فيه مو على الأساس تشوفين ترف ؟ بلعت ريـقها بـتوتر : طلع بوجهي هتان
عقدت حجاجها نغم : ايــه
بـلعت ريقها بـ ارتباك : ولا رضى اطلع إلا لمًا أعطيه موافقتي له ، وأعطيته عاد
ضحكت نغم بعلو صوتها : طيب ليش التوتر هذ كلّه
أصلا توها عمتي منيره خطبتك له
وسع ناظرها : والله !
هزت راسها نغم : ايـه والله
توترت كثير من يلي تسمعه ابتسمت نغم : تبينه ؟
رفعت كتفها بعدم معرفة : مدري شي غريب لمًا أشوفه احسه مو غريب عليّ وكأنه لنا سنين مع بعض
أبتسمت نغم بهدوء : هذا الحب يـروحي تحسين بألـفه لمًا تشوفينه ولا كأنه غريب عنك لو جلستي معه ممكن تشوفين نفسك كل شي تـقولينه بدون شعور منك وحتى لو كان فـي خجل ضحكت لـثواني من تذكرت سهاج وكيف صارت تقول له كل شي بدون ادراك منها وتحس لازم تقول لـه كل شي يـمر بخاطرها ويـومها، زفرت بخفوت من تذكرت تغيير منيره رفعت ناظرها لـ ريتال : عمتي منيره وش فيها متغيره ؟
ابتسمت ريتال بخفوت : اهوو ماعرفتي وش صار جت عمتي منيره تعتذر على كل يلي سوته وحست بـ الذنب
كسرت خاطري لو تسمعين الكلام من اميره حزنت عليها لكن فرحانه لانها فهمت وعت على كل اللي تسويه وحركات مالها داعي هي وبناتها
هزت راسها نغم بهدوء ماتعرف ايش تقول بالضبط لكن سعيده من رجوع عمتها لـشي الصح : والبنات ؟
هزت راسها بالنفـي ريتال : لحد الحين راسهم يابس ولا اعتقد يرجعون أصلا من برد وجهها كيف تجي وكل المصايب من تحت راسها أنا اقول تبعد عنّا احسن
هزت راسها نغم بهدوء تسترجع كل شي صار من تحت عبير ماتعرف كيف قساوة القلب اللي عندها تفكر كثيير " ايش سويت لها " سؤال عجزت تلقى له جواب وهذا الشي ينطبق على خواتها والكارهيه والغبض اللي عندهم انتبهت لجوالها من يتصل رفعت راسها ريتال ميّلت شفايفها: وش فيك جوالك يدق من اليوم
ابتسمت بهدوء : سهت شوي ، ردت عليه بهدوء وطلعت من المطبخ : ليش ماتردين ؟
نغم : كنت مع ريتال ما انتبهت للجوال
هز راسه بهدوء : طيب اطلعي يلا أنـا عند الباب
قطبت حاجبها : تـو الوقت
سهاج : شوفي الساعه بعدين قولي تو الوقت يلا انتظرك عند الباب الثاني للحوش مو حق رجال
قفلت منه وانتبهت للوقت وكيف مشى بسرعه وصارت ١١
-
دخـل للمستشفى بسرعه : غيث غيث شصار ؟
غيث بـ ارتباك : ما ادري مـا ادري مافهمت عليهم يقولون ماتحمل الكيماوي ودخلو دكاتره كثير له وامي منهاره عنده
زفر يزيد بخوف : طيب يـا عمي خلّك هنا بشوف الوضع واجيك وخلّك عند امك لا تتركها
هز راسه ومشى يزيد يشوف الوضع قبل يومين يخبرونه يبدا بجلسات العلاج وكل اسبوع جلسه لـجلستين ...