توالفت قلوبنا في عز المزوح وفي عز رعشه خوفي استأمنك

البارت الثالث والثلاثين

في بيت الجده ( تحديداً غرفه الجدة منيره )
الجدة وهي تمسك يدين نورة : يابنتي اجلسي بعطيتس هديه بتعني لتس الكثير بس انا مو صاحبه الهديه انا اعتبريني رسول ارسل لتس إياها
نورة وهي رافعه نص ثوبها وبيدها الذهب الناعم جلست وعيونها على جدتها : ياجده خبصتي قلبي شفيتس ؟ صاير شي ؟ وترا بنطول على الناس تجمعوا برا وابتدت عزيمه اخوي لازم انا اللي اضيفهم ولا اغيب عنهم
الجده وهي تطلع صندوق من الكبت مع رساله ومعطيه نورة ظهرها : اعرف بس هو شي مهم ولا اقدر اطول عليه اكثر ولازم يجيتس وبعدين ارتاحي شوي البنات ماشاءالله يسدون مكانتس ابي اكلمتس شوي ولا راح اطول عليتس
نورة : تعرفين ياجدتي اني كلي لتس واسمعتس امريني ؟ خوفتيني عليتس
الجده وهي تلتفت وتتقدم لنورة وبيدها الهديه : مافيني شي لا تخافين علي ولا ابيتس تخافين على شي اقولتس هديه مفروض تفرحين شوي وبتفرحين اكثر اذا عرفتي هالهديه من من ، افتحيها انتي لاني ما فتحتها من عطتني الهديه وانا محتفظه فيها وانتظرتس تكبرين مثل ما امتس تبي ووصتني اعطيتس إياها الله يرحمها
نورة بصدمه : ام ... امي ؟ امي انا اعطتس إياها ووصتتس ؟
هزت راسها الجده بإبتسامه ومدت لها الصندوق واخذتهم نورة بيدين ترتجف من الشوق ولقت بوسط الصندوق سلسال قديم ب تفاصيل ناعمه وجوهره باللون الأحمر امتلت محاجرها بالدموع واخذت الورقه اللي كانت متآكله بسبب احتفاظها من سنين وقرت المكتوب بخط الحبر الأسود ، محتوى الرساله :
" أبنتي نورة ، أعلم بإنني رحلت بعد شقاء وتعب مرض السرطان وتركتك بيدين أمينه يدين والدك زوجي وحبيبي الأول اللذي أظهر لي حنيته بتلك الكفين ولم يقسو علي قط وبادلني المحبة وغمرني بالدفء احمل له امتنان الكون واموت بسلام وانا مطمئه بكم ما دام بجانبك ابيك ، لم استطع ان اقوم بإحتضانك إلي بصدري الحنون وانتي شابه ف لقد اهلكني المرض وانتي مازلتي طفله ترجوا عطف الام واهتمامها لذالك يا ابنتي الجميلة وضعت لك قلاده لا تنزعيها من عنقك ابداً ومهما حصل معك من احداث امسكي بتلك القلاده وتحدثي وكأنك تتحدثين إلي سأسمعك ، أسعي لأحلامك وأهدافك اجعليها واقع وليس وهم وخيال فقط ، عاشري من يكون لك الأهل جميعاً وأبتعدي عن من يخدش مشاعرك ويحزنك مراراً وتكراراً فالحياة لا تستحق العيش هكذا الحياه تتطلب إنسان يعيشها ويبحث عن سبب واحد ليبتسم ويكون ممتن ليومه ، كوني بخير دوماً ... أحبك ... أمك نجد "
أنتهت من القرائه ومسكت بالقلاده ( السلسال ) تأملتها لثواني ودموعها على خدها تسبق فرحتها بالهديه رفعت راسها للجده وابتسمت بوسط دموعها  وازدادت جمال فزت وحضنت الجده وبصوت باكي وفرح : شكراً كنت احتاجها من زمان وللحين هذي احلا هديه تجيني في حياتي كلها
الجدة ابتسمت وهي تبادلها الحضن وتمسح على شعرها  : افااا يابنتي ليه تبكين ؟ دموعتس غاليه على جدتس
نورة وهي تخفي وجها بكتف الجده وتغمض عيونها وهي تشم ريحه الحنية والأمان في جدتها وابتعدت وهي تمسح دموعها : لا ما ابكي بس فرحت وبكيت
وكملت كلامها بضحكة :  بنتس ماعد عرفت شعورها
وتقدمت وباست راس الجدة ويدها ، الجدة : يلا اساعدتس ؟ احط لتس سلسالتس ( القلاده ) ؟
ابتسمت نورة ومدت القلاده للجدة اخذتها بيدين يغطيها التجاعيد والكبر ومسكتها برجفه كبار السن رفعت نورة شعرها الاسود الطويل وابتدت الجدة تحطه على عنقها وابتسمت نورة من حست ببروده القلاده عليها التفت بفرح وهي تصفق وتدور: شرايتس ياجدة ؟ حلو صح ؟ مارح افصخه بيكون دايم على رقبتي
الجدة ضحكت من فرحة حفيدتها : تزهينه يا بنيتي يلا نطلع للحريم
مشت نورة للمرايا اللي تتوسط الغرفه وعدلت وجها وهي تطبطب عليه بخفه لسبب انها تخفي حزنها ودموعها على الناس ومشت وهي ماسكه بذراع الجدة تساندها على المسير
_____________________________
داخل مجلس الحريم
كان ضجيج العائله اللي يبعث الآمان ويزيح الهم عن الفرد يصدا في المكان وقمرا تحط بالصحن الحلا ، نورة كان موقعها بين البنات انتبهت ماجدة على سلسال نورة وقالت بحماس وبصرخه : يجنننن السلسال انتي محليته بس ضروري تعطيني اسم المحل
هناي : نوير يهبللل السلسال عليك والله ودي اقول ب اقلدك واخذ واحد مثله بس المشكله انتي الحلوة مو السلسال وش نسوي عاد
نورة بإبتسامه وهي تمسك السلسال ب اصابع يدها وردت بفرحه لإنتباه البنات : بنااااتتت احبككم ياخي بس تدرون هذي من امي الله يرحمها
اللبنات بهمس وبصوت واحد : الله يرحمها
سلطانه ( ام فهده ) لفت على البنات من سمعت كلام نورة وبنبره استفزاز : الله والسلسال اشوفه عادي وبعدين ما يجوز تاخذين اغراض الميت ولا ما علموتس ؟
نورة التفتت وارتفعت حواجبها بصدمة وقاطعتهم الجدة : سلطانه فكينا من شرتس واسكتي هذي حفيدتي تاخذ اللي تبيه وتسوي اللي تبيه محد له عليها كلمه ولا حد له دخل
نورة : اتركيها عنتس ياجده لا تتعبين معها وترا هذي امي معطيتني إياه هديه ما كانت تلبسه عشان تقولين اخذته ولما نجيب طاري امي ترحمي عليها بدال كلامتس اللي ماله داعي
سلطانة : ماقلت شي وهو هذا الصدق خلوا اغراض وهدايا الميت تتحلل معه
فهده بحده : يمااا وش هالحكي !
الجدة : سلطانه ! انتي زوجه مساعد زوجه ولدي ولا ودي ازعلتس بالكلام واطردتس اسكتي وسكري فمتس كلمه وحده زياده مارح اقول انتس زوجه ولدي وما تلومين الا نفستس!
قمرا وهي تبي تغير الجو : يلا يابنات لحقوا الحلا لذييذذذ عاد ترا من يد نورة حبيبة العايله
اجتمعوا البنات، عهد : نوير لازم تعطيني كورسات بالحلا والجمال ما نقدر عليتس بس نبي نجي ربعتس
نورة بضحكة : ياحلوتس حلواااهه ياجعله عافيه تتكلمين كذا وانتي تاخذين العقل
عهد ابتسمت بمجامله وقالت بداخلها ( ماظنتي والله بعد كلام جابر اني بذا الجمال )
قمرا وهي تعطي الحلا لنورة وركضت هناي وهي ماسكة الملعقه وتأكل نورة : انتي مسويه الحلا وتاكلين بيدك لا حبيبي انا أكلتس افتحي فمتس يلا
نورة وهي تضحك وتفتح فمها ودخلت هناي الملعقه وأكلتها ، قمرا : غرت غرت وانا من يأكلني
فهده ناظرت قمرا وبغمزه : تعرفين من يأكلتس
قمرا توسعت عيونها وابتسمت ومشت بجنب فهده وضربت راسها بخفه من فهمت مقصد فهده وهو ( حمد )  ورفعت راسها للعنود اللي كانت هاديه ومتضايقه ومنصدمه من اللي شافته من حمد وقمراه ، قمرا وهي تتقدم لها وبصحن الحلا وتبتسم : شفيتس زعلانه ؟ ياحياتي انتي يلا تتخطين وبعدين تعالي للبنات نورة تناظرتس من مده بتشك ان في احد ميت عندكم ولا شي ... ( كملت كلامها وهي تأشر بيدها على شكل العنود ) من حالتس هذي
كانت بتمشي بس مسكتها العنود بذراعها : لا تحاولين تدوسين لي على طرف لا تخليني اقوم واقولهم اللي شفته بينك انت وحمد !
قربت قمرا من اذن العنود وهمس : سويها وشوفي كيف اوريهم صورتس وانتي ماسكه يدينه وهو بالمستشفى وكلامتس لي
بلعت ريقها العنود ومشت قمرا بثقه وجلست بجنب فهده اللي نطقت : شفيتس بغيتي تاكلينها بعدين محلوة الحب يحلي الشخص كذا ؟؟ وش صار بينكم ؟ تكلمتوا ؟ كل شي بتعلميني إياه ترا
قمرا احمر وجها من تذكرت اخر التفاصيل مع حمد وبوستهم وناظرت فهده ومسكت شفتها وهي تبتسم ، فهده بإندهاش: لا تقوليينهااا
قمرا وهي تضرب فهده بخفه : اسكتي لا تفضحينا تكفين بعدين بقولتس كل شي
عهد كانت بين الثانيه والثانيه تسرح وتلاحظها هناي بكل مره وتسكت كان كلام جابر مأثر في عهد ومزعلها
________________________
في المطبخ
دخل مساعد مع حمد وهم يمسكون صحن الذبيحه ، حمد وهو يدق الباب ويصرخ : يانويرررر يانورة
بعد دقايق دخلت نورة بزينتها ورجعت شعرها لورا ومساعد وقف بذهول وهو يناظرها ، حمد : تأخرتي شفيتس ؟ سكري باب الحريم بندخله الغرفه الثانيه واكلوا فيها
هزت راسها نورة وطلعت وسكرت بابهم ورفع حمد ثوبه وعظه بإسنانه ونزل بطوله يمسك الصحن وانتظر عمه مساعد ينزل ويحمل الصحن معه وتأخر بسرحانه وبعد ثوبه وهو يقول : عمي مطول بسرحانك يلا خلنا ندخله بسرعه
مساعد ناظره بحده ومسك الطرف الثاني من الصحن ودخلوه الغرفه ، نورة وهي تتخصر: شكل اللحم يشهيي يلا اطلعوا بدون مطرود بنادي الحريم
مساعد : تطردين عمك ؟ ما تستحين ؟
نورة بصدمة : اء اسفه ما كنت اقصد
مساعد : امزح معتس لا تخافين
حمد وعيونه على عمه ومستغرب من تصرفاته اللي طلعت فجأه والتفت على نورة اللي قالت : اي خير حميد ما مدحت كشختي ولا شي !
حمد وهو يبتسم ويتقدم ويمسك وجه نورة ويبوس راسها وخدها : تطيرين عقل الصاحي من جمالتس الا صح قريتي اذكارتس ؟
هزت راسها وهي تبادلة الابتسامة ومشى حمد ومساعد ووقف مساعد خطوته : الا نورة بعد ما تدخلين الحريم تعالي شوي
نورة : ابشر بس افتح باب الحريم واجيكم خلوكم في المطبخ
عطتهم ظهرها وهي ترفع طرف ثوبها وبان خصرها اكثر ومساعد عيونه عليها وعلى جمالها اللي أسره ، حمد وهو مو مرتاح لعمه: عساه خير وش بغيت منها ؟
مساعد : ابي العصاير للرجال وزبادي ولبن للشيبان اصلاً ابوي موصيك انت بس الظاهر نسيت
حمد وهو يشهق : اوههه نسيتت من الحوسة
دخلت نورة ونطق مساعد بذي اللحظة : ماعليك انت روح للرجال وانا اجيبهم العزيمه ذي عشانك ومايصلح ما تكون موجود وسط الرجال
حمد : صادق ودي اني ما اخليك بس اذا تبي انادي لك حد من العيال يساعدك ؟
مساعد وهو يضرب كتف حمد بخفه : ماعليك الامور بسيطه انت روح وانا بلحقك
حمد ابتسم وكل ماله يزيد استغرابه من تغير عمه واحساسه يزيد ان وراه شي طلع وترك مساعد ونورة بالمطبخ لحالهم ، نورة : وش بغيت اساعدك فيه ؟
مساعد وهو يناظر زمام خشمها وعيونها الوسيعه وسواد شعرها اللي يوصل لظهرها وخصرها ومفاتنها ونطق وعيونه تنتقل لكل تفاصيل جسمها ووجها : ابي الزبادي و .... للرجال
نورة ماحست بنظراته والتفت وهي تعطيه الاشياء اللي طلبهم وتقرب منها وهو يمسح على وجها وراسها بخباثه ويتأملها ، نورة بتوتر : ع .. عمي شفيك ؟؟
مساعد مسك خصرها وشدها له : وش ذا الجمال كله خلصتي على بنات الديرة الجمال
اقترب من عنقها وتنفس انفاسه الحاره وباس نحرها وهو يحس بعطرها وريحتها في انفه ، نورة رمشت بثقل وارتجف جسمها بقرف وخوف دفته بكل قوتها : عمي ابعد ! وش قاعد تسوي !! انا بنت اخوك !
مساعد وهو يحس برغبته فيها : لا تلوميني لومي جمالتس اذا بنت اخوي كذا يامحلا بنت اخوي اجل
طلعت وهي تهمس وتتوجه للحمام: الله ياخذك ، الله ياخذك
قاطعها صوت طرق الباب ومن الطرف الآخر كانت ماجدة : نورة جدة تسأل عنتس تعالي العشاء لا تطولين ..... ماكان في رد من جهه نورة وكملت ماجدة : فيتس شي ؟
نورة وهي تفتح صنبور الماي وتغلس وجهًا وتتنفس وتهمس : مو وقت الانهيار مو وقته
مسكت السلسال ونشفت وجها وطلعت وبإبتسامه مجامله : مافيني شي يلا مشينا
جلست وأكلت وهي تحس بإنها بتستفرغ الاكل اللي تتغصب تاكله وتحسه يوقف في حلقها من صدمته بعمها مساعد ناظرت يدينها ورعشتها خبت يدينها بثوبها ومسكت يدينها بقوه
وبعد مده قصيره انتهوا من الأكل وغادر الكل ماعدا الأحفاد ونفس الوضع بمجلس الرجال ...
جلسوا بالصاله و نورة كان واضح عليها الضيقه والتعب وظنوا انه تعب الشغل والعزيمة ف محد علق ، هناي كانت جالسه بجانب عهد : تعالي شوي ابيتس
طلعت عهد معها للجهه الثانيه وبعيد من البنات : شفيتس فيتس شي ؟
هناي وهي تمسك يد عهد: مو انا اللي فيني انتي اللي فيتس تكلمي تقدرين تكذبين على الكل الا علي انا قولي لي
عهد وهي ما تقدر تخبي وتكذب على اختها : هناي انا تصرفاتي تصرفات بزر وتفشل ؟ انتوا تضحكون علي عشاني افشل صح ؟ حتى العيال يضحكون علي!
هناي احتدت ملامحها ومسكت وجه عهد : من قالتس كذا ؟ وانا اربيه لتس بعدين احنا ما نضحك عليتس واشوفتس انتس مو بزر اشوفتس وحده تعرف تتصرف وحنونه وتحب تضحك اللي حولها عشان ما يزعلون وهذي طريقتها بالمواساه واشوفتس وحده جميله وتهبل وتصرفاتها تميزها اكثر
عهد وهي تبعد يدين هناي : انتي تقولين كذا عشانتس اختي ليه ما تقولين مثل ما انقال لي من غيرتس ( وكملت كلامها وهي تتذكر كلام جابر لها ) " ترا العيال يضحكون عليتس ..صيري نفس البنات الباقين "
هناي : من هو اللي قاله ؟؟ عطيني اسم بس
عهد : مابي اعطيتس اسم وخليني بروح بيتنا لا تزعجيني واذا تحبيني لا تكذبين علي قولي لي اني افشل عادي واني بزر وكل شوي اطيح ما بزعل
مشت وانصدمت هناي من انفجار عهد ،طلعت عهد وهي تحس بدموعها ومسحتها وكملت مشيها وانتبهت لجابر اللي كان طالع مع فهد ويدخن شافها ونزل دخانه وهو ينفذ بالسما وتنهد من جمال وجها وطفوليتها اللي يحبها ومستحيل يعترف لها بهالشي استأذن من فهد ولحقها وهو يهمس : عهد .. عهد
رجع فهد للعيال داخل المجلس اما عهد كانت تسمعه وتدعس على مشاعر الحب له وتمشي مسك ذراعها ولفها له وضربت بجسمها على صدره من مسكته لها ، جابر بعصبيه : ليه ما تردين لما اناديتس ؟؟ زعلانه ؟
عهد وهي تناظر عيونه ودق قلبها اكثر من قربه لوجها : مالك دخل وكيفي مارح ارد عليك ليه ارد اصلاً ؟ مو انت نظرتك عني وش ؟ مو قلتها لي قبل كم يوم ؟ ما نسيت كلامك وصارت مثل العظمه بحلقي اتركني
كانت تحاول تبعد يدينها من مسكته وجسمها ملاصق لجسمه وصدرها على صدره وبلع ريقه وهو يتأمل وجها ويسمع عصبيتها عليه وحكيها اللي مبين زعلها عليه وانها شايله بخاطرها كثيييررر

-

انتهى ، قرائه ممتعه 🤍
علقوا ياحلوين عشان انزل البارت الجاي ب اقرب وقت ، صح شاركوني تشبيهاتكم بحسابي انستا : wrii74 ، عطو هالبارت حقه لا تزعلوني عليكم 🥹
عطوني تخميناتكم وما اشتقتوا لديم وجارالله وسعود ؟ وش تتوقعون يسوون بالرياض الحين ؟