توالفت قلوبنا في عز المزوح وفي عز رعشه خوفي استأمنك

البارت العاشر

في بيت الجده
فهده : بنات ب اسوي لكم قهوه تركيه في المخخ بس من الحين اخلي مسوؤليتي اللي تبي تسهر تشرب
هناي ضربت ظهرها بتشجيع : جيتي في وقتس اول من بيشرب انا
فهده : من عنيااا الحين تجيكم القهوه ، بس بتقومين معي تجهزين الأكواب وتسولفين علي
هناي : اها قولي تبيني اساعدتس بدون اللف والدوران
فهده : لا يالوصخه والله اني ابي اسوي لكم صدق بس ابي حد يسليني
ضحكت هناي وقامت مع فهده متوجهين للمطبخ وبعدها بربع ساعه اقبلت فهده وهي ماسكه الأكواب وهناي ماسكه كوبها وترتشف من القهوه : الله تسلم يدينتس احبتس على هالقهوه اللذيذه
فهده بضحكه : فيه العافيه بنوتات كل وحده تاخذ لها كوب اشوف
ضحكوا البنات على هناي اللي عبرت بفرحتها في القهوه لما مسكت طرف ثوبها وتمايل جسدها وشعرها اللي تمايل مع كل حركه بسيطه ومبسمها اللي اخذ من اللون الوردي وتضاحيكها القادره على وقوع كل شخص يناظرها في غرامها
نورة : الله الله قهوتس كذا تسوي ؟ بشرب واذا ماصرت نفس جمالها ياويلتس
هناي قربت منها وحضنتها : من اللي يتكلم عن الجمال ؟ بنت حاتم اللي تقول للقمر قوم واجلس مكانك ؟؟
نورة نزلت فنجال القهوه وغطت يدينها وصرخت صرخه مكتومه : توبه امدحتس ثاني مره حرام عليتس جتني كتمه من السحى
_____________________
في مجلس الرجال
تجمعوا الرجال وامتلى المجلس شد انتباه احفاد عقاب دخول رجال غريب ورحبوا به وضيفوه وصب له حمد من القهوه
: بس يا ولد حاتم ما تقصر
حمد ما اعطى الموضوع اهميه بحكم انهم معروفين بين العرب بسمعتهم الطيبه وتجاوزه ، فز الرجال وبصوت عالي: السلام عليكم يا ال عقاب
فزوا معه عيال عقاب واحفاده وارتكى الجد على عصاته ووقف بين عياله : وعليكم السلام يالأجنبي ( الأجنبي تقال للغريب )
: والله اني جيتكم وانا متعني من اهل الخير وعرفت عنكم كل علمٍ طيب والكفو يشمل كبيركم وصغيركم انتوا مزبن الضعيف وعون المحتاج
احفاد عقاب بصوت واحد : ابشر بسعدك
: مالكم في الطويله انا مديون وما اطلب منكم صدقه ابي منكم عون وارجعها لكم ووالله ان موقفي وكلامي بين الرجال انه يوجعني لكن وراي اهل وواقف في ذا المجلس عشان خاطرهم
الجد عقاب : ان شاء الله خير انت ضيفنا وحق علينا نضيفك ونكرمك ومالك الا اللي يسر خاطرك ويطيبه
: ما تقصر ياعقاب ولاهي غريبه عليكم
الجد عقاب بهمس لحاتم: اخذ الرجال وتفاهم معه ومهما كان المبلغ يوصله اليوم
حاتم وهو يحرك يدينه بمعنى ( امش قدامي ) : حياك معي برا المجلس
____________________________
عند البنات
ديم وهي جالسه بجانب الشباك الصغير : وااههه منظر القمر والغيوم مقدر اقاوم اكثر بمشي برا
قمرا شاركتها النظر بجنب الشباك : الله صدق شرايكم نسوي جلسه برا ؟
محد رد والكل كان مندمج بالسوالف والضحك وعهد كانت واقفه بالنص وتقلد بعض الاشخاص مع ذكر المواقف
قمرا : شفيهم ما يسمعوني !
ديم : وين يسمعونتس على ذا الازعاج شوفي انا مقدر انتظركم ب اطلع امشي واذا قررتوا تطلعون وتحطون السجاده نادوني
مشت بعد كلمتها وناظرت القمر والغيوم وقفت وطلعت جوالها اخذت لهم كم صوره وابتسمت بفرحه على الصور اللي وضح فيها القمر خطت بخطاوتها وهي سرحانه والهوى يضرب على وجها وشعرها دارت حوالين البيت ونطقت وهي ترفع راسها للسما: والله الجو ما يتطوف ب اكون انانيه لو تأملت القمر والنجوم لحالي بروح اسحب البنات
كان مجلس الحريم قدامها بس ما انتبهت ورجعت بخطواتها لورا وركضت لمجلس الرجال ولخبطت بدون ما تحس بسبب تشابه الابواب بين المجلسين وصرخت قريب منهم : يابناتتت تعالوا شوفوا الجو
طاحت عيون الرجال عليها بصدمه وفز جارالله وسعود ومسعود اللي وقف بوسط المجلس وبحده : صدوا بإنظاركم انت وياه !
مساعد ( ابو فهد وفهده ) : بدال ما تحاسب الرجال والضيوف حاسب اختك وش جابها لمجلس مليان رجال ؟
سعد ( ابو مسعود ) : اعقببب واخس تتكلم في بنتي قدامي !
ركض سعود ولحقه جارالله بفروته ،  وتوسعت عيون ديم لما شافت اللي قدامها مجلس رجال عكس ظنها ونزلت راسها وتثاقلت اقدامها الخطوة
سعود : وجع كبد وش جابتس هنا ؟؟
جارالله وقف بجنب سعود وعطاهم ظهره ومد يده بالفروه : تغطي يا ديم الرجال يناظرونتس
سعود تقدم بحده : وش اسوي بتس انتي بتحديني امد يدي عليتس !
ديم بصوت مرتجف اخذت الفروه وتغطت: سعود تكفى والله ماقصدت لخبطت احسبه مجلس الحريم
جارالله غار على حبيبه روحه ويحلف ان قلبه احترق غيره اكثر من اخوانها نزل راسه بضيق من سمع صوتها واعتذارها: يا سعود والله ما تمد يدك عليها خلاص البنت ماقصدت تعال شوف اعمامي بتقبع بينهم
سعود : جارالله بيض الله وجهك ادخل المجلس ب اوصل اختي وارجع لكم وانتبه لأبوي لا يتعب
جارالله هز راسه بتفهم وقبل يروح مسك ذراع سعود وهمس : تكفى ياولد عمي لا تضربها تراك اخوها وان ما دافعت عنها من بيدافع وسط كلام عمي مساعد والرجال
ركض بعد كلامه للمجلس وكانت المشاده الكلاميه مستمره ونطق الجد بهدوء عكس العصبيه اللي بداخله : اسكتوا واللي بيتكلم بعد كلمتي ذي ما يحصل له طيب وانت يا مساعد تراك تتكلم مو عن بنت سعد بس تتكلم عن حفيدتي! والحين المجلس يتع...
فز حمد : استهدوا بالله وانا طالبك ياجد ما تكملها الامور بسيطه
الجد كان يقدر حمد ويحشمه ويسمع له لانه بإختصار ذراعه اليمنى استغفر ربه ومسح لحيته وجلس ورجع نظره لمساعد اللي كان يناظر بحده ويضحك بإستهزاء وبقهر اما مسعود صدره يرتفع وينزل وانفاسه تضاربت حمد مسك كتف خلف وهمس: انتبه لمسعود وللعيال انا بروح لنوير
خلف وهو يحس برده روحه من طاري اسمها : ولا يهمك
________________
مجلس الحريم
سعود وهو يمسك وجه اخته وشد عليها : لا تفكرين بشي ولا تتكدرين
ديم والعبره لزمتها: ومسعود ؟ وابوي وجدي ؟
سعود : مارح يجيتس اصلاً اسمعي معي هدوء مافي حد يصارخ لا تخافين وانا عارف انتس ما ودتس بذي الغلطه بس حصلت وراحت خلاص
تقدم وحضنها رغم عصبيته وطلع وقابل حمد : علوم اللي في المجلس ؟
حمد : لا تسأل بس هدا الوضع ماعليك
هز راسه وانصرف وارتفع صوت حمد وصدا صوته في المكان بعصبيه : يا نويرر
طلعت نورة بتوتر من شافت عرق جبينه البارز: لبيه شفيك ؟
حمد : انتي وراتس ما تنتبهين للبنات ؟ وديم كانت خطوه وتدخل مجلس الرجال وين عيونتس عنها ؟
شهقت نورة : وش تقول انت كيف جتكم اصلاً ؟
حمد : وش يدري حمد بن حاتم الظاهر انها لخبطت لانها نادتكم عندنا
نورة : ياروحي واشوفها ماهي على طبيعتها وخايفه
حمد : خليها تخاف عشان تفرق مره ثانيه بين مجلسنا ومجلسكم
نورة : خلاص بروح اشوفها
انصرف حمد للمجلس ورجعت نوره داخل وانتبهت لديم اللي جلست ب اقرب كرسي بعيد عن البنات
نوره : ديم عيوني صار لتس شي ؟
ديم وهي تحاول تستوعب : اسكتي يع يالفشله خبيني في حضنتس تكفين
ضحكت نوره وحضنتها وقالت بمزح عشان تغير مودها : يلا بيجونتس خطاطيب الحين بعد شوفتهم لتس
رفعت راسها ديم بصدمه وانفجرت نورة ضحك : ياويلي انتي اليوم يبي لتس عصفر امزح معتس والله

_
قرائه ممتعه 🤍
ما يمنع تشاركوني تشبيهاتكم يا احباني في الروايه
حسابي انستا : wrii74