အချစ်ဖြစ်ပေါ်ရန် (Ongoing) Unicode + Zawgyi

အပိုင်း ၁၂

Unicode

လင်းထက် အတွက် အမူးပြေလုပ်ပေးပြီး အခန်းထဲပြန်လာလိုက်သည်။ ကုတင်ဘေးက စားပွဲပေါ်အသာတင်လိုက်ရင်း ကုတင်ပေါ်ထိုင်ကာ လင်းထက်ကိုစောင့်ကာ တွေးတောနေမိသည်။ ဒီကိုရောက်တဲ့အထိ တစ်လျှောက်လုံးလည်း အတွေးတွေက ဖြန့်ကျက်နေခဲ့သည်။

နိုင်မင်း နဲ့က သိပ်ကိုရင်းနှီးပါသည်။ အင်း အချစ်ဆုံးသူငယ်ချင်း ဆိုမှတော့ ရင်းနှီးတာဟာ မဆန်းပါ။ ဆန်းနေတာက ကျွန်တော့်ရဲ့စိတ်သာဖြစ်သည်။ အခုလို လင်းထက်၏ ရင်းနှီးစွာပြောဆိုဆက်ဆံ ပြုမူ ပုံကို တွေ့ရသည်မှာ သိပ်ကိုရှားလွန်းပါသည်။ ကိုယ်နဲ့ဆိုရင်တောင် ရုပ်တည်ကြီးနဲ့၊ မျက်မှောင်ကျုံ့ပြီးနဲ့ သာနေတာများသည်။ အလိုမကျသော မျက်နှာအသွင်အပြင်နဲ့။ ဒီတစ်ချက်က ကျွန်တော့်ကို အတော်လေး ခံစားရစေသည်။ ဘာကြောင့် အခုလို ခံစားနေရသည်ကိုတော့ ဆက်၍အဖြေမရှာချင်ပါ။

ကိုယ်နဲ့ဆိုရင်တောင် မျက်နှာတည်နဲ့သာ နေတာများသည့်သူကို ပြုံးရွှင်နေသောမျက်နှာ၊ ပေါ့ပါးလွတ်လပ်ပျော်ရွှင်နေသောပုံနှင့်တွေ့ရသည်။ ဒီကောင်လေး ပျော်နေတာ မြင်လိုက်ရရင် ကျွန်တော့်ရဲ့စိတ်ကပါ အလိုလို ပျော်သွားမိသလိုပင်။ ဒါပေမယ့် ဒါက တစ်ဖက်မှာလည်း ကျွန်တော့်ကို ဝမ်းနည်းတယ်ဆိုတဲ့ ခံစားချက်ကိုပေးသည်။ ကျွန်‌တော့်ကိုဆိုရင်တော့အလိုမကျ သောမျက်ဝန်းများနှင့်ကြည့်တာများသည်။ သိပါသည် နှစ်ယောက်သားက ဒီတိုင်း တစ်ခြား အချစ်ဆုံး သူငယ်ချင်းတွေပုံစံအတိုင်းပါပဲဆိုတာ။ သူတို့ရဲ့ မျက်ဝန်းနဲ့ အပြုအမူတွေမှာပေါ်နေသည်။ ဒါပေမယ့် ဒီတိုင်း ကိုယ်နဲ့နေရတာတော့ အလိုမကျသလို ပုံစံလိုမျိုးတွေ့နေရတာက စိတ်ကိုအဆင်မပြေစေပေ။

အဲ့ဒါကို အခုလို ဝမ်းနည်းစိတ်ဖြစ်နေသည့် ကျွန်တော်ဟာ သိပ်ကို ကလေးဆန်နေမလား။

ရင့်ကျက်တဲ့လူတစ်ယောက်အဖြစ် ကိုယ့်ကိုယ်ကိုယ်ထင်ခဲ့ပေမယ့် မင်းနဲ့ကျမှ ကိုယ်ဟာ မရင့်ကျက်သေးတာတွေရှိမှန်းသိလိုက်ရသည်။ မနာလိုဖြစ်နေခဲ့သည်လား ဘာကြောင့်လဲ ဘာလို့ မင်းနဲ့ကျမှ အခုလိုအဖြစ်အပျက်ကို ဝမ်းနည်းနေမိတာလဲ ကိုယ်သေချာမသိဘူး ဒါပေမယ့် ကိုယ်သိတာရှိတယ် အဲ့ဒါက ကိုယ့်ကိုအလိုမကျသလိုကြည့်နေတာ မျက်ဝန်းတွေကို ကိုယ်မကြိုက်ဘူးဆိုတာပဲ သိရဲ့လား ကောင်ငယ်လေး။