مذكرات جندي مجهول

١٨ _ واقع مؤلم و أمنيات جميلة

#مذكرات جندي مجهول
#للكاتب عبد الله محمود

* طلعت وية سلطان هاشم مشينة مسافة جان يضحك و يكلي :

انتة عبالك اني أخرت إجازتك لان ردت تقتل أسير ؟ لا اني كلت كدام الضباط و الجنود هيج حتى يخافون و محد يحاول يكررهة

" سيدي الي سوو مو قليل مثلو بجثة العقيد و المعاون مالتة و قتلو هواية أسرى

سلطان : الشجاع ما يتقاوة على شخص ضعيف او مستسلم و انتة سبع ماريدك تنسى الأسس العسكرية و الدينية أبد و اذا همة ما ملتزمين بيهة فأحنة عيب نصير مثلهم .

" تمام سيدي بس اني الي ردت اقتلة خائن مو عدو

سلطان : يفيد المخابرات يطلعون منة هواية معلومات

" تمام سيدي ،، بس ما كتلي  ليش راح تتأخر إجازتي ؟

سلطان : لان عجبتني و ذكي و سبع ،، راح تشارك بالحماية الجوية و راح ندمج رعيلك وية الثاني لان انتة فقدت اكثر من نص الرعيل و ذاك فقد نص الرعيل مالتة

" صار سيدي الي تشوفة

سلطان : اعرف اجازتك بعد ٣ ايام بس هسة أخرلي إجازتك يومين بينما ابني الدفاعات و نأمن المكان زين و بعدين ارجع لبيتكم

_ سكتت بس جنت ضايج كلت ( يربي هسة انوب راح اتأخر يومين زيادة !! )

* سلطان قرر ان القوات تتقدم اكثر و متكتفي بهذا الجبل لان اكو جبل كدامة على بعد كيلو تقريبا كال :

" احنة ليش نخلي الهم افضلية بالسيطرة على جبل !؟ ليش ما نتقدم و ناخذ اخر جبل بما ان همة انسحبو و فلتو و المنطقة الي ورة اخر جبل كلهة ارض منبسطة و قرى يعني الافضلية النة راح تصير من يجوك من منطقة منخفضة و انتة بمكان عالي "

فقرر ان القوة تتقدم و تخلي تمركزهة هناك و نبني الدفاعات هناك احسن

_ بلش بناء الدفاعات و جانت الدفاعات هاي المرة مثل ما نكول اشتغلوهة على البارد يعني محصنة ضد الهاونات كلهة و سوو دفاعات قوية و اماكن الدوشكات محصنة بسواتر و كتيبة الدفاع الجوي صار مكانهة بين التلال  يعني صعب تضربهة طيارة و صعب يضربهة هاون

_ صعدت على الجبل و بديت اباوع على المناطق الايرانية و اباوع على الطريق السريع الي يوصلك لطهران بصراحة ما مصدك !! احنة بنص ايران !! هاي القرى مالتهم و اشوف القرويين مالتهم شلون يهربون بالدواب مالتهم و شفت بعض حقولهم و مزارعهم مضروبة بقذايف و حتى حيوانات ميتة ! احنة قريبين على اسلام آباد !! قضاء تابع لمحافضة كرمانشاه

بديت احسب من يمي ههه :

تاخذ كرمانشاه معناها لزمت طريق همدان !! تاخذ همدان وصلت طهران ، تاخذ طهران انتهت الحرب