#مذكرات جندي مجهول
#للكاتب عبد الله محمود
الاجواء متوترة كلش !!؟
جنة نعرف ان اكو شي حبير راح يصير بس شنو هو !؟ منعرف !؟ حرب لو شنو ؟
التوتر بين البلدين صعد بشكل جبير
* طلبو مواليدنة للتجنيد و سحبونا للتجنيد الإلزامي بالشهر الثامن بعد تخرجنا
_ بس المعاملة الي عاملونا بيهة خلت عدنة احساس ان الي ديصير وياك عكس كل دفعات الخدمة الالزامية الي قبلك ! شعور غريب كلش و همة يعاملوك على ان انتة فعلا بحرب و التدريب جان اقوى بمراحل من الي سمعنة عنة و تشدد بشكل كلش جبير و دائما يذكروك ان انتة بحرب و يعاملوك بحدية !! بس اغلب الملتحقين وياية جانو يكولون ترة هذا مجرد تشديد من نوع جديد لا اكثر ولا أقل بس اني مجنت مرتاح للي ديصير خاصة ان بمنتصف سنة ال ١٩٨٠ بلشت الخطابات الرئاسية تكون حدية اكثر اتجاه ايران فاني كلت والله ديجهزون لحرب مبينة بس مستحيل اكو حرب بعد كم شهر اكيد يقصدون يجهزون دفعاتنة من هسة حتى بعد كم سنة تكون عملية التعبئة و التدريب اسرع و بدل السنة تصير كم شهر و يذبوك بالجبهة لان عندك خبرة مسبقة .
* بقت الحياة طبيعية عدنة بأول شهر و اعتادينة ع النظام و التدريبات
بس اكو شعور غريب بالشارع و عدنة احنة !!
* اجة وقت اخر اجازاتي بفترة التجنيد و لكيت البيت كلش متوتر لكيت اخواني متعاركين وية زوجة ابوية الثانية و والدي عصبي و يرزل باخواني و بنفس الوقت والدتي ميتة قهر من جهة ع زواج ابوية و من جهة مشاكل البيت :
كلتلهة : يمة ادري بالحسرة و الخنكة الي بداخلج بس ميخالف اتحملي شتسوين لا تبجين و بست راسهة ( هي جانت تحبني كلش لان اني اكثر واحد يواسيهة و يداريهة و مارفع صوتي عليهة عكس الباقيين تماما ) .
كالتلي : ابني اكو حرب راح تصير خوما تريدني اشوفك انتة او اخوانك تموتون كدامي واحد ورة الثاني لازم ابوك يلكة حل عن طريق كل معارفة !! اني مابية حيل اشبع قهر اكثر من القهر الي شفتة بآخر اربع سنين .
كلتلهة بضحكة : قابل بس اني راح ياخذوني !! يمعودة استهدي بالله ماكو كلشي الله وكيلج هاي كلهة مناوشات سياسية و راح تفض ماكو حرب ( بس اني بداخلي متوتر و خايف و شبه متأكد اكو حرب ) .
* مرت الايام و اجة اليوم الي قبل الاخير باجازتي
رحت نمت و افكر بداخلي ( شراح يصير زين اذا بدت الحرب انتة تكدر تقاتل ؟ عندك هيجي جرأة لو بعدك مماخذ القوة الي تخليك تقتل و تترامة وية عدو !!؟ زين على اي صنف راح يوزعوك !!؟ ماتوقع مشاة لان انتة احتياط ميذبوك هيجي ذبة لان انتة مدني و ماعندك الخبرة الكافية بالقتال ! ) .
STAI LEGGENDO
مذكرات جندي مجهول
Narrativa Storicaقصة واقعية بكل تفاصيلها ،، كل احداثها و حواراتها واقعية ما عدا اسم بطل القصة و اسماء عائلته و كذلك ارقام الوحدات العسكرية ساتجنب ذكرها على حقيقتها حفاضا على خصوصية بطل القصة و تلبية لرغبته ، تركز القصة على ما مر به بطل القصة في الحرب العراقية الايرا...
