من أعظم تراتيب الله عز وجل، أن يفاجئ قلبك بشخص يكون وجوده في حياتك عوضا عن خسارة قبلها.. هدية النصيب... العوض الجميل.. أن تخرج منهزم المشاعر من علاقة أنفقت فيها كل آمالك، وتظن بأن أبواب قلبك قد أغلقت منافذها.. وأن الحب لن يزور قلبك بعد خيبتك.. فيأتيك العوض في صفة شخص.. شخص يكون ثمنا لكل الذكريات السيئة التي آذتك.. ثمنا للأيام التي ظننت من فرط وجعها أنها لن تمر.. ثمنا لكل شعور مؤلم انغرس بمرارة بداخل قلبك.. ثمنا للدموع التي انسابت بوجع كل ليلة في الوسادة بسبب قلة حيلة.. ثمنا لكل ساعة تمنيت فيها أن تعني أنت لأن الألم داخلك لا ينتهي.. وثمنا لمرارة العمر ولخسارة العمر ولمن ظننت وهما بأنه حب العمر.
أعظم عوض هو أن يأتيك قلب على مقاسك.. يعرف جيدآ
ما تستحق.. قلب يعوضك عن كل خساراتك.. قلب يعلمك بأن كل الخسارات من قبله مهما بلغ حجمها، ومهما بلغ وجعها، ومهما بلغت درجة تعلقك بها ورفضك لخسارتها، فهي رغم ذلك، خسارات قابلة للعوض..
أروع_عوض_على_الإطلاق"
🍃قرت طوبى منشورها وهي متكيه ع الفراش تحت روشن الصاله..
قراته ودموعها ينزلوا لين داروا اثر ع الفراش اللي حاطه راسها عليه...
تفاعلت مع المنشور وعلقت بدعاء لبنت عمها...وفي لحظه تهور دورت ع حساب صفيه وخشتله ودورت ع اخر منشور شاركاته مع ولد خالها..
بعد لقاته خشت ع صفحته وقلبها يدق بقوة حبا وخوفا..
شافت اخر منشور منزله كان ابيات شعر مقتبسه بالفصحى...
""ما غَابَ عنِّي وَكلُّ الناسِ غائبةٌ
منْ يَسكُنِ القلبَ يبقى دائمًا فيهِ
واللهِ واللهِ رغمَ البعدِ أذكرُهُ
في كُلِّ شَيءٍ وفي نَفسي أفدِّيهِ
وأسألُ اللهَ أن بالوصلِ يجمَعُنا
لا بالبعَاد نُجَازي ثمَّ أشكيهِ
ولستُ أشكِي بهِ عيبًا ومنقَصَةً
بَل أشتكي الشَّوقَ في صَدري أخبِيهِ"
بصبعها اللي كان يجرف زي مايجرف قلبها ..
خشت ع المتفاعلين اللي كانوا فوق مية حساب..
وللأسف خامس حساب شافاته متفاعل..
"سلافه كسابكجي"
قلبها وجعها وجع سري في جسدها كله..وكأن ماكفهاش هالوجع..خشت ع حسابها بتشوف شن اخر شي منزلاته..
لقتها منزله منشور فيه صورة ليها ولوحده من بنات الاسر النازحه والصورة كانت في نفس المكان اللي داره عبد القيوم للأطفال..
عقلها صورلها هلبه مشاهد صارت قبل هالصورة في نفس المكان..
طلعت طول من الفيس..وقلبت التليفون ع وجهه وبدت تبكي بصمت وهي تقول في نفسها..
"ياربي صعب هلبه صعب..مانحسباش صعب هكي زي المرض ياربي اللي درته كله مانفعش ماقدرتش ننساه ياربي..ياربي ساعدني واشفيني منه ومن كل وجع لتوا قاعده نحس بيه..ياربي ماتعلق قلبي بشي مش مكتوبلي ياربي..ياربي خليني قانعه بقسمي في هالدنيا يارب..وماتخلي في قلب ذرة حسد لحد من عبادك يارب.."
غمضت عيونها وبدت تستغفر من قلبها لين غلبها النوم..ودموعها مازال ينزلوا...
🍃🍃🍃🍃🍃🍃
ويطلع صباح يوم 28من نوفمبر..
مختار الليله سابقه بات في حوشه لأن عنده بعض الاشغال لازم يكملهم وفي صباح هاليوم طلع من طرابلس لمدينة تانيه عنده فيها شغل ضروري...
قضى شغله وقبل المغرب بربع ساعه كان قدام حوش اخته..
دخل السيارة وقعد فيها يدير في مكالمه هاتفيه..
🍃داخل..
طلعت طوبى من الدار بعد لبست وتزينت وتأنقت...
طلتها برغم بساطتها كانت حلوة..فستان سهره بسيط ضابط ع الجسم كم منفوخ واصل للمرفق وفيه حزام من النص لونه رمادي..ورافعه شعرها جزء من شعرها فوق كعكه وفارده الباقي كان نازل لأسفل ظهرها..ولبست اكسسوار تعليقه لولي مقلده لكن ناعمه وحلوة..
خشت لدارة المعيشه لقت اريج تاخد في لقطات بالكاميرا لجنة اللي طالعه كعادتها جميلة الجميلات..
اريج بضحكه:اللهم بارك بناكلها..
طوبى وهي تتكلم بلغة طفوليه ع انها جنه...
/كانك جعانه يافرخة بري افتحي التلاجه وكولي..
ضحكت اريج..
"طوبى"
شافوا الزوز لبعض..
طوبى:غريبه علاش مامشاش للمزين طول!؟
وتطلع جنه تجري قبلها لما سمعت صوته هي لحقتها وقالت..
/غير راجي..
🍃مختار فم الباب شافها جاياته تجري طبس وفتحلها ايديه وهو يقول..
/تعالي تعالي..وصلت فيها خداها ورفعها وهو يقول..شن هالجمال يادعوة انتي..كان كبرتي مش مخليهم يعطوك بكل مافي حد يستاهلك انتي..
ع جية طوبى وهي تقول..
/علاش جيت!؟
شافلها وقال..
/اول شي طالعه قمر..
طوبى:عارفه خش ع تاني شي..
ضحك بعدين قال..
/بعتتني سدره نجيب شيشة ميه رقيه قالت تعرفي مكانها..
طوبى:شويه بس..ومشت خشت داخل..
هو شاف لجنه وقال..
/عندك علم ان في زوز خطبوا مني امك!؟ زعما نعطوها ولانخلوها تقعدلك انتي بس!!؟
ع جية طوبى بالشيشه مدتهاله..
هو خداها وقال:خودي البطه متاعك..
قربت منه وخدت جنه اللي بدت تعيط..
بدت ع وجهه ملامح الوجع..
طوبى:برا برا..
وخشت وسكرت الباب..
وجعه قلبه هلبه وهو يسمع في صوت بكاها..بسرعه ركب سيارته..شغلها وطلع..
وهو طالع بيها شاف الجالي نازل من سيارته وعيونه جيهتهم..
شافه الجالي..ابتسم تهكما بعدين لف وخش للحوش..
ومختار اللي فهم قصده من ابتسامته شد بقوة ع دومان السيارة وتحرك وهو يحرق في العجل...
#بنت_السلطان
#طوبى
...يتبع....
الجزء 103 ( بنت السلطان 2 )
Comenzar desde el principio
