الألبوم القديم قفل مبيقبلش حلقات تانية فهنبدأ هنا من الحلقة ٨٩ إلى الحلقة الأخيرة.. الحلقات هتكون على حسب التفاعل
واللي عاوز ينضم لجروبنا على الفيسبوك يتفضل (حكاوي البنات بقلم بوسي مصطفى)
هتلاقوها هناك كاملة.. اتمنى قراءة ممتعه.
في شقة حامد. زوجة حامد : اني لا طالعه ولا نازله عاوزه تمشي تروح بيت أهلها براحتها. حامد : يعني ايه مش عاوزه تنزلي تهديها بكلمتين يمكن ترجع عن اللي في دماغها ده. زوجة حامد : لأ مش نازله يا حامد هما بقى يصطفلوا مع بعض مليش فيه هي استحملته كتير واني لو مكانها همشي واسيبهاله علشان يعمل ما بداله براحته بقى. حامد : يعمل ايه بقى هو قادر يتحرك. زوجة : ما هو كان زي الحصان عمل ايه يعني غير الشر اهو الناس ارتاحت منه. حامد : بس برضو صعبان عليه اني لما شوفته كدا افتكرت خالي طارق لما عمل حادثة بالعربية مكانش قادر يمشي بس ده بقى الدكاترة قالوا علاجه صعب. زوجة حامد : وده ميخلكش تقعد كدا مع نفسك وتفكر إن ابن عمك ظلم وافترا كتير على ولاد عمك طارق وخصوصا يعني بنته علشان يدور الزمن ويبقى في نفس الوضع اللي كان عليه عمك واهو عمك طارق كان طيب وشهم على كلامك لكن ده يا باي عليه حتى وهو في اللي فيه ده لسانه قد كدا. حامد : الواحد مبيحبش يشمت في حد وخصوصا لما يكون حد من أهله بس جوز عمتي صباح قالها هنا وسط الدار تحت إن ابن عمي طارق منعرفش إن كان ابنه ولا لأ علشان بعدها بكام يوم يوصله الخبر إن ابنه مات وأهل البلد كلهم يعرفوا اللي كان ناوي يعمله وهو زايد ومحمود في بنت خاله ومحمود اللي قعد يفكر ويخطط ازاي يفضح بنت عمه علشان يكسرها ويدمر حياتها هو كمان قاعد في داره مش قادر يخدم نفسه وبيتمنى الموت ولا إنه يطلب من حد يناوله كوباية المياه. زوجة حامد : ده جزاء كل واحد ظالم ومفتري علشان كدا متتعبش نفسك معاه ابنه تلاقيه هيقعد جنبه يخدمه. حامد : ابنه ايه ده مبيطقش يقعد في البيت ساعة على بعضها. زوجة حامد : خلاص اقعدله أنت علشان تخدمه. حامد : طب انزلي لحُسنه بس خليها تقعد في دارها. زوجة حامد تنظر من الشباك : حُسنه خدت عيالها ومشيت. حامد : بتتكلمي جد؟ زوجة حامد : ايوه.. اهي تعال شوف لو مش مصدقني. _______ في عيادة دكتور النسا. الدكتورة : هتعملي لي بس التحاليل دي الأول علشان على الأساس ده هنشوف هنعمل ايه؟ أمل : يعني كله تمام يا دكتور ولا في حاجة حضرتك شاكه فيها. الدكتورة : ما أنت قولتلك يا مدام أمل إن مش هيبان أي حاجة غير بعد التحاليل دي واه في كمان أشعة هتتعمل بس خلصيلي التحاليل دي بس النهاردا.
في المطعم. أمل : مش بتاكلي ليه يا زينة؟ زينة : قلقانه يا مامي. أمل : خير يا حبيبتي متقلقيش. زينة : مش متخيله إني من سنة بالظبط كنت زعلان علشان حامل ودلوقت عماله ألف على الدكاترة علشان احمل تاني. أمل : متقعديش بقى تلومي نفسك محدش عارف الخير فين وبعدين ما الدكتورة قالت لك قبل كدا إنك تمام ومفيش سبب طبي يخليكي تقلقي كُلي بقى. زينة : المشكلة إن رهف شابطه اليومين دول كل أما تشوف بيبي عاوزه تلعب معاها وأنا ببقى مكسوفه قوي دي بتجيبها من شعرها. أمل : هههههههههههه لا مش للدرجة دي متعلمهاش العنف علشان هتقطعلك شعرك بعد كدا. زينة : حضرتك بتقولي فيها ما هو دا اللي بيحصل فعلا. أمل : بكرة تجيبي عيال لما تزهقي. زينة : أنا عاوزه أخ أو أخت بس لرهف تلعب معاه علشان تحل عني شوية. أمل : كله بأوانه يا بنتي ادعي وخُدي بالأسباب واطمني خالص كله خير. ______ في مركز العلاج الطبيعي. علي بابتسامة : بس حلو الديكور الجديد ده. مجدي بابتسامة : تيجي نبدل؟ علي : هههههههههههه لا يا حبيبي مبروك عليك بعد اذنك. مجدي : استنى رايح فين؟ علي : رايح اشوف شغلي. مجدي : طيب نتقابل بالليل.. ألو. في التليفون... 📞 زينة : السلام عليكم. مجدي : وعليكم السلام.. انتي فين؟ زينة : أنا مع مامي بناكل. مجدي بابتسامة : من غيري؟ زينة : هعملك ايه بقى ما أنت بترجع متأخر هستنى كل ده؟! مجدي بابتسامة : طب اجهزي بالليل علشان هخرجك بمناسبة إننا انتهينا من التعديلات الجديدة اللي عملناها في المركز. زينة : ياااه اخيرا بس خلي الخروجة دي على حسابي. مجدي : حسابك اللي هو حسابي طبعا مش كدا هههههه زينة : معلش خليها عليك بقى ومشيها إنها على حسابي. مجدي : واهو كذلك همشيها حاضر علشان خاطرك. زينة : هههههههههههه طب سلام بقى علشان الحلو نزل. مجدي : من غيري برضو؟! زينة : هههههههه ما الحلو ده هتاكله في خروجة الليله متبقاش طماع بقى. مجدي : هههههههههههه كدا يبقى مليش حق ازعل بقى.. سلام. زينة : مع السلامة. _______ في فيلا كريم. فريدة : بتعملي ايه يا جميلة عندك؟ جميلة التفتت لوالدتها : بنضف الاوضة يا مامي زي ما حضرتك شايفه. فريدة : ليه؟ جميلة : شوفتها مش نضيفه قولت اروقها كدا علشان... فريدة : علشان ايه؟ جميلة : علشان تبقى نضيفه يا مامي. فريدة : كدا.. طيب خلصي واقفليها. جميلة : حاضر. _______ في شركة هشام.. هشام : مش عارف اقولك ايه بصراحة يا آسر بس طالما هو بقى مؤذي كدا سيبك منه متروحش غير للضرورة بس. آسر : أنا معرفش جرا له إيه مكانش كدا أبدًا وكله كوم وغلطه في سهر دا كوم تاني. هشام : بصراحة دي أكتر حاجة تضايق بجد يعني لو في حاجة بينكم أنتم أخوات أحرار مع بعض لكن يجيب سيرة سهر دا طبعا متتساهلش فيه ولا تعديه كدا. آسر : معدتوش بدليل اني بقالي أهو فوق الست شهور مبسألش عنه لاقيته باعت لي مع منة كلام صعب قوي وهي طبعا على قد ما قدرت حاولت تحسن من الكلام شوية لكن أنا عارف اللي بقى جواه من ناحيتي. هشام : طنشه وابعد عنه يا آسر. آسر : ورق المشروع الجديد اللي كلمتني فيه المهندسين خلصوا التصميم بتاعه ومن الاسبوع الجاي هيبدأ التنفيذ. هشام : طب كويس. آسر : أنا قولت اديك خبر علشان تكلم دكتور كريم وتقوله لإنه شكله مستعجل وعاوز يخلص المبنى دا في أسرع وقت. هشام : اه فعلا. آسر : بس قوله بقى كل حاجة بتحتاج وقت يا دكتور ولا نكروت بقى أي حاجة. هشام بابتسامة : لا طبعا على مهلهم خالص الميزانية مش مستحمله. آسر : خلاص خليها علينا هههههههه هشام : يا حبيبي تسلم ما أنت كدا مخليها عليك برضو. آسر : متقولش كدا يا هشام واعتبر دا تبرع بسيط يعني للمستشفى. هشام : طول عمرك فيك الخير يا صاحبي. آسر : متنساش اني نسيبك برضو ولا ايه ههههههه هشام : طب خلي ابنك بقى يبعت زينة عندنا يوم الجُمعة. آسر : ليه هو مبيخلهاش تيجي عندك ولا إيه؟! هشام : بتيجي بس بالليل أخواتها عاوزين يتجمعوا كلهم على الغدا يوم الجُمعة. آسر : يا سلام... بسيطة خالص هكلمه حاضر.. سلام عليكم. هشام : وعليكم السلام رايح فين؟ آسر : هروح بقى أنا من الصبح بره البيت وخلاص تبعت مش قادر هروح أنام على طول. هشام : كدا.. طيب مع السلامة. _________ في فيلا آسر. ملك : تعال بقولك اسمع الكلام يا يوسف. مليكة : فيه ايه بس يا ملك سيبي الولد. ملك : مين اللي عمل كدا؟ مليكة : يا خبر ايه الشخبطه دي؟! ملك : اسألي الأستاذ ابنك. مليكة : أنت اللي عملت كدا يا يوسف؟ يوسف : مش أنا دا سليم. ملك : لأ بتكدب تعال يا سليم أنت عملت كدا؟ سليم سكت مردش. ملك : أنا بسألك أنت عملت كدا؟! سليم : مكانش قصدي هو القلم اللي جه هنا وأنا مش شايفه. ملك : جه هنا وأنت مش شايفه! بتقول أي كلام وخلاص.. طيب بس لما نروح البيت. مليكة : خلاص يا ملك حصل خير يلا يا يوسف ساعد سليم ينضف الحيطه دي ويرجعها زي ما كانت. يوسف : حاضر يلا يا سليم. سهر : يلا يا ولاد الأكل خلص. ملك : سيبيهم يا مامي بيشتغلوا. سهر : بيشتغلوا في ايه؟! يا خبر.. مين اللي عمل كدا؟! مليكة : هتنضف دلوقت وترجع زي ما كانت يا مامي متقلقيش. سهر : كدا.. طيب اما اشوف. آسر جاي من بره وبابتسامة : سلام عليكم. يرددوا : وعليكم السلام. آسر : أهلا ببناتي الحلوين. ويسلم آسر على مليكة وملك.. آسر : ازيك يا حبيبتي؟ سهر بابتسامة : الحمد لله. آسر : ايه دا حماتي بتحبني ولا ايه؟ ملك : أكيد كانت بتحبك هههههههه آسر : حقيقي كانت بتحبني. سهر : طب اطلع غيري هدومك علشان نتعشا مع بعض. آسر : حاضر.. امال فين الولاد محدش سامع لهم صوت يعني. سهر بتتلفت حواليها : كانوا هنا راحوا فين؟ مليكة : تعالوا تعالوا متخافوش. آسر : أهلا ااا تعالوا واقفين عندكم بتعملوا ايه؟ يقرب يوسف يسلم.. آسر : سلام رجاله بقى. يوسف : اهو.. آسر : آي.. أنا مش قدك يا عم هههههههه ايدك جامده ايه يا سليم مش عاوز تقرب تسلم عليه ولا ايه؟ ملك : أصل عمل غلط وزعلان كمان. آسر : خلاص متزعلهوش بقى تعال يا سليم امال البنات فين؟ سهر : بيلعبوا فوق اطلع يا يوسف قولهم ينزلوا. يوسف : حاضر. آسر : اهلاااا بسليم باشا. يسلم عليه ويحضنه : مين مزعلك بقى؟ ________ سيف : سألتني ميت مرة وقولتلك الأرض كويسه وموقعها ممتاز وكل حاجة فيها جميلة خلاص بقى. حمزة : هههههههههههه مش بطمن. سيف : خلاص اطمنت قولي هتعمل إيه؟ حمزة : قصدك هنعمل ايه ما هو أنت رجلك على رجلي يا حبيبي متسبنيش أدبس لوحدي وتخلع. سيف : حلو قوي أنت ناوي تدبسني ولا ايه لا بقولك ايه أنا مش عاوز ادخل في مشروع بيخسر. حمزة : مفيش خسارة ولا حاجة اتفائل خير. سيف : طيب قولي بقى ايه هو المشروع اللي ناويين نعمله.. تمام كدا؟ _________ في فيلا كريم. كريم بابتسامة : اه ما أنا عرفت من مامتك إنك انتي اللي عامله كل الأكل ده تسلم ايدك يا جيجي. جميلة بابتسامة : بألف هنا وشفا. كريم : اه بس عاوزين كمان نركز ونذاكر كويس احنا في ثانوية عامة وعاوزين نفرح بقى. جميلة : حاضر يا بابي هفرحكم كلكم بس بالراحة عليه. كريم بابتسامة : حاضر يا حبيبتي.. ايه يا فريدة مبتاكليش ليه؟ فريدة : مش عارفه مليش نفس كدا وقلبي.. كريم : ايه ماله قلبك؟ فريدة : قلبي مقبوض. جميلة : مش يمكن يفرح ويزقطط دلوقت. فريدة : هيفرح بـ ايه.. ايه الدوشة اللي بره دي؟ كريم :معرفش هطلع اشوف. بيقوم كريم علشان يفتح الباب زين كان بيفتح الباب. كريم أول ما شافه نظر له بدهشه : زين! قامت فريدة وصرخت ووضعت ايدها على بوقها. جميلة جريت وحضنت زين وهي بتبكي سلم على والده اللي اخده كمان في حضنه. وتركهم زين وقرب من فريدة اللي كانت منهاره من البكاء أول ما ضمها ليه واخدها في حضنه. زين : طب بتعيطي ليه بس دلوقت؟! كريم : بتعيط من الفرحه بس أنت ليه جاي كدا فجأة من غير ما تقولنا؟ تركت فريدة زين ونظرت لجميلة : انتي كنتي عارفه مش كدا؟ جميلة : أنا! فريدة : متكذبيش أنا متأكدة دلوقت إنك عارفه علشان نضفتي اوضة اخوكي النهاردا ولما سألتك اتلجلجتي كدا معقول كل دا جه صدفه؟! جميلة : بصراحة زين هو اللي قال لي عاوزين نعملها مفاجأة لبابي ومامي. زين : صحيح أنا اللي قولت لها متقولش لحد. كريم : وجيت ازاي؟ زين بياخد الشنطة من على الباب : جيت في تاكس عادي. فريدة : طب اقعد يا حبيبي استريح. _______ نكمل الحلقة الجايه.
انتهينا من القصة على جروب الفيسبوك (حكاوي البنات بقلم بوسي مصطفى) اللي حابب ينظم لينا يبعتلنا طلب انضمام 👇
Oops! This image does not follow our content guidelines. To continue publishing, please remove it or upload a different image.
