صوت استغاثه

بعض الملاحضات عن احداث القصه

هلاو حبايبي طبعا حبيت ابين الكم كم شغله لان الروايه حقيقيه...

شوفو هيه القصه بلشت من 2019 ويه الشابه ريام واستمرت لحد 2022

يعني دامت المعانات ثلاث سنوات

مثل مدا تقرون اني كاتبه الاحداث بشكل متسلسل وهيه طبعا مو هيج

فأني قررت اخذ الاحداث المهمه الي صارت وياهم واكتبها لان بعض الايام تتكرر نفس الحالات يعني الصراخ والهروب بحيث اجتي ايام ابوها صار يفرش فراش وينام بالحوش خاف بنته تهرب

تقريبا هيه عاشت نص سنه قبل لا يعرفون ابو عمار وبعدها عرفو وصار يتردد عليهم بشكل متكررر بحيث حتى الجيران لاحضو هل شي فيعني تكدرون
تكولون انو بالبارت 9 هيه صارلها تعرفه سنتين تقريبااا بحيث تعودت علي وجان دوم يشوفها ويحجي وياها بس محد يعرف شنو يحجون لان جانو يتواصلون بالنضرات وهل شي عرفته من لسان ابوها طبعا يكول هواي يباوعون لبعض ويتمتمون واحنه منفهم شي وحتى من يسالوهم يكولون هل شي خاص بينه

حتى الاهل صارو يحسون انو بنتهم خلاص صارت ملك ل ابو عمار...

ومعلومه عن ابو عمار

طبعا هوه جانت تجي ايام يختفي بيها محد يعرف وين يروح ولا يعرفون بيته وين يعني تقريبا جان غامض محد يعرف عن حياته غير بس الي سولفه عن زوجته واطفاله بتركيا وعنده اكثر من بيت بكذا دوله،

فيعني جان يختفي ويرجع فجأه يدگ الباب عليهم او يتصل يكول اني جايكم اليوم..

جان صالح دوم يحجي ب ابو عمار لصاحبه ابو حيدر بحيث عرفه على ابو عمار وصار يتردد ابو عمار على بيت ابو حيدر وينطي احجار وخواتم لجلب الرزق ومن هل سوالف...

وطبعا ابو حيدر هوه عمي ابو زوجي واني الي جنت اسمع القصه واخاف

وبعد ثلاث سنوات قررت اكتبها الكم بعد ما اخذت الاذن من اهل البنيه

وللعلم الاسماء الي بالقصه خياليه

يعني ريام ومنار وصالح اسماء خياليه محبو اذكر اسمائهم الحقيقيه

بس مصطفى واحمد وابو حيدر وابو عمار لا هذي الاسماء الحقيقيه

وطبعا صالح عنده اربع خوان بس ميدخلون بي ابد يعني وجودهم وعدم وجودهم نفس الشي واصلا من سمعو بنته هيج صار بيها والولايه كلها تحجي بي قررو يغيرون الشيخ مالهم علمود السمعه عود يعني...

مصطفى بسبب الاحداث الي تصير ويه اخته رسب سنه بس رجع نجح بيها بعدين

ومنار فلا درجاتها عاليه مثل ماهيه لان همه شطار وكلها تعرفهم هيج...

صالح يشتغل سايق تكسي وعلم ابنه هم على السياقه نوبات يشتغل بيها بس مكانات قريبه مو محافضات وهيج لان ماعنده شهادة سواقه

الام طبعا صار عندها سكري وضعفت كلش بعد ماجان سمينه يعني تقريبا جان وزنها 100 كيلو وبهل سنتين ومن نصابت بالسكري بسبب الصدمات مال بنتها صار وزنها 50 كيلو تقريبا...

واحمد طبعا صار يعاني من اكتئاب حاد وميحب يطلع مثل قبل او يسولف وترك جماعته بس من يسمع بريام بيها فلان شي يطلع يروح الها وبس حتى امه طلبت منه يروح لدكتور بس مايقبل يروح لمكان....

وهذا الي حبيت اوضحه الكم لان الصراحه ماحبيت اكرر بالاحداث حتى القصه ماتصير ممله ومجرد تمتيط لا اختاريت الاحداث المهمه فقط وبدون لا احد يمل

حبيت اكون واضحه وياكم لان القصه حقيقيه ولازم اوضح الكم هل الامور وبس شكرا على القراءه

جنت اتمنه اقره تعليقاتكم وكذا حتى يصير عندي حماس وكذا وياكم بس ماكو للاسف 🥲

بنات الي تقره بالروايه وتعجبها خلي تصمم عليها وتنشرها حتى يكثر الدعم والمشاهدات والتصويتات لان حرامات قصه حقيقيه ومايكون بيها دعم وهاي غير التعب الي ابذله لخاطر اوصلها الكم بطريقه تعجبكم...

انتضرو البارت الي بعده 💜✨
باي احبكم 💜✨