#السجين_777
#الحلقة_21
دارين غيرت دبشها وطلعت ..تسمع فيه يدوش ...مشت نزلت للبدروم ..لاقاته حاط شنطته لوطى وصندوق فيه باقي حاجاته ..شافت للمكان شافت شنطة صغيرة فوق دولاب الخزين ..رقت بالشويا الدروج وشافت نوح مازال ماطلع ..خذت كرسي وردت للدولاب ..ركبت عليه ونزلت الشنطة ...حاولت تفتحها ..بس ماقدرتش ..ردتها للمكانها ..تبي تنزل وباب البدروم انفتح ..خش نوح وهيا من الفجعة الكرسي اهتز وطاحت على الارض 😰😰💔😭
نوح نزل لاقى دارين طايحة على الارض ..بسرعة جاءها وطبس عليها ..دارين رفعت وجهها منحرجة من نوح ..بس اعيونها مدمعات من قوة الخبطة ...لانها لما طاحت كتفها جت على حافة الكنبة اللي وراءها 💔
نوح بخوف : خيرك شن صارلك ؟؟
دارين ماتبيش اتبين انها اتألم قدام نوح .تحملت وحاولت اتصبي : مافيا شي ...حول من عليا 😒
نوح ماردش عليها وقامها من الارض وحطها على الكرسي : شن كنتي اديري اهني ...كيف طحتي ؟؟
دارين تضغط على كتفها من الالم : مادخلكش بيا ..قاعدة في شقتي انخش وين مانبي واندير شن نبي 😑
نوح ايشوفلها ..وبعدين رفع وجهه وشاف فوق الدولاب ..عرفها كانت اتشوف في الشنطة ابتسم ورفع يده نزل الشنطة ..فتحها وحطها بين ايدين دارين : لو طلبتي مني وقلتيلي تبي اتشوفيها كنت نزلتها وفتحتها من غير ماتأذي نفسك 😏
دارين منحرجة واتشوف للشنطة في حجرها : من قالك نبي انشوف حاجة اتخصك ..كنت نبي انزل حوايج الصيف 😒
نوح : اي شي ايخصني معناها ايخصك ومن حقك اتشوفيه وتعرفيه ..لاني زوجك
دارين : ماتحاولش توهم نفسك واتحسسني أنك مهتم بنوع العلاقة اللي بينا ...لاني زوجتك من قبل تختفي هاديك الليلة ..بس أنتا عاملتني كأي انسان غريب في حياتك 😡
نوح رفع شعره المبلول بيده فوق وتنهد : مش حتنسي بالساهل صاح ؟؟
دارين : مش حننسى أصلا شن درت فيا 😡
نوح طبس قرب وجهه منها ويحكي بصوت هادي : وأني مش مخليك ألا لما تنسي كل شي وترجعي أتحبيني زي قبل وأكتر ..مش حنتعب ولا انمل الا لما ترجعيلي دارين
دارين اتشوف لعيونه ..للحظة نسيت روحها ...ريحة نوح ..شعره المبلول ..قطرات لامية على كتافه وصدره ..نظرته اللي ترفع في الادريالين ..وتسرع في نبضات قلبها ..مجرد مايقرب منها ..دارين شافت لفمه🔥لكن نوح رد أستقام ..وتلفت للشنطته الكبيرة ..مشى لعندها رفعها وفتحها ..وقعد ايطلع في لابسه
دارين ايديها يرجفوا ..واتشوف لظهره ..حاولت تضبط نفسها ..قبل ايشوفها نوح 😣 ..طبست على الارواق اللي في الشنطة ...طلعتهم اتشوفلهم
بس نوح أصلا كان زابطها ..وحس عليها كيف اتأثر لما يقرب منها ..كان عارف ضعفها ..لان هوا بنفسه يضعف قدامها ..يتغير لنوح ثاني ..بس نوح قادر يتحكم بنفسه أكثر من دارين ..وفي نفس الوقت مايبيش يستغل النقطة هادي لصالحه ...يبي دارين تقتنع بحبه من غير اي ضغوط منه ❤
