اووووفه برمت يمين ..برمت يسار ..النوم طار ..نسمع في خطوات أمي في المطبخ ...ريحة الشاهي وصلت للخشمي ..ياااالله تخيلت امعاه خبزة سخونة ..ودحي مقلي وهرسية عربية ....وووووه والله ما عاد فيها ..حولت البطانية وقمعزت انتكسل في مكاني ...بس كأنه الجو مصقع اشويا اليوم ...هزيت رأسي عشان ننشط اشويا ...خذيت فوني وصبيت ..خشيت على أمي المطبخ اطيب في خبزة 😋
دارين : صباح الخير
صباح رفعت رأسها : اهلين ...نضتي يا ماما ..صباح الخيرات ☺️
قربت وقمعزت على الكرسي : اوووفه كنت ناعسة ..بس ريحة الخبزة والفطور جوعوني زيادة
صباح : نوضي اغسلي وصلي ..تلقي الفطور واتي
دراين : باللهي خليني نفطر قبل ...وبعدها انصبي بالمرة
صباح هزت رأسها : مش حنتعب معاك في الكلام ..لاني عارفة مش حتنوضي ...وردت فتحت الكوشة اتشوف للخبزة
ابتسمت وفتحت فوني شن فيه جديد ..قلبت الفيس والوتس بسرعة ..لفتتني صورة أوس ..وخبر محاولة هروب فاشلة للمجموعة من المساجين ..وتقرير بالحادثة ..قريت اشويا ومليت نزلت الفون على الطاولة ...وشفت أمي طلعت الخبزة من الكوشة ..صبيت جبت سفرة الشاهي ..وطاجين الدحي اللي مطيبته ...فتحت الثلاجة خذيت شيشة الهريسة ..وقمعزت أنا وهيا نفطور
ونفس القصة كل يوم ...من كلمة لكلمة لاقيتها فتحت سيرة مرات بوي ..عزيزة ...شن دارت فيها وكيف خلت بوي يطلقها وكلام واجد أنا خلاص حفظته ..حفظ ..كنت عايشته ..وسمعته كل يوم تقريبا
دراين صبت : الحمدالله ..سلم دياتك يا الغالية ..ربي مايحرمني منك 😘
صباح : سلمك ...تبي تمشي للعيادة
غسلت ايديا وبرمت شفتلها : إن شالله ..ليش تبي شي قبل نمشي
صباح : لا سلامتك
كنت حاسة اعيونها فيهم كلام ..بس سكتت ...طلعت ومشيت جهزت دبشي على السرير ..خشيت الحمام ..وقفت على المراية ...زعما ندوش والا بلاش ...شن بلاش دراين ..شوفي شعرك ..تبي تمشي للعمل هك
نكشت شعري : اوووفه ..ليش مانبلس وشاح وخلاص ..شن هالهم كل صبح دوش وتجفيف ..وشاااح 🤔 عمري مالبسته ..شن خطر عليا بعد العمر هذا كله نلبسه ...هيا دراين بلا كلام فاضي ..شن تخرطي أنتي
ادوشت وطلعت بسرعة ..لابست ..وجففت شعري ..حطيت مكياجي المعتاد ..بودرة ..قلم كحل في عيني ..مسكرة ..لمعة ومرطب على فمي ...تعطرت ..خذيت البالطوا لابيض ...وشنطتي ..خشيت على أمي : طالعة ..ماتبي شي ؟؟
صباح تذكر 🤔 : على شنو بنوصيك ياربي ...شنو ...اااها ..جيبي امعاك خميرة حلويات بنطيب باسطي للعشية
ابتسمت : حاضر ..حاجة اخرى ......وطلعت
صباح تمشي وراءها مرتبكة : لا سلامتك ...شن نبي انقولك ..تبي اتشوفي أوس اليوم
الحلقة 1
Start from the beginning
