Mga Tula ni Makata O.

Nakakatawa sa Pilipinas

Gusto kong tumawa nang malakas na malakas

Mga namumuno kasi nitong bansang Pilipinas

Ang mga utak ay katulad ng mga taong ungas.

Una..

Mga guro raw ay bayani, ngunit hinu-Hudas.

Mga benipisyo at suweldo, ginigipit, dinudugas.

Mga karapatan, sinisikil ng kanilang mga batas.

Child Protection Policy, ayos na sana at patas

Ngunit bagong batas, ginagawang panghimagas

Mga gurong sawimpalad, dapat na bang umatras?

Pangalawa..

Kapag madla ay nagkasala, siya ay malas.

Parusa ay agad-agad nating mamamalas.

Baligtad na flag sa damit ng atletang malakas,

Hahatulan, parurusahan.. gaya ni Barrabas.

Ngunit sa mga kurakot, paglilitis ay magastos.

Pag may sala si Pol Itiko, andami pang alingasgas.

Pag may sala si Common Tao, diretso na sa rehas.

Pangatlo..

Kamaliang 'di maamin-amin, kaya walang nalulutas

Mga K-12 na libro, maraming nasilip na butas.

Naganap ang denial sa departamentong pantas

Hindi nila alam, Pilipino'y sa kanila na'y nababanas

Ang pera ng bayan ay kinukurakot, winawaldas.

Tuloy, pondo ng gobyerno, nasasayang lang, alas!

Kung patuloy ang mga ganitong pang-aahas,

Malamang ang Pilipinas, sa mapa ay mapilas,

Magkakawatak-watak, mga Pinoy magsisilayas

At ang bawat isa ay mag-iisip na mag-aklas.

Di ba nakakatawa naman talaga ang Pilipinas?

Sariling bansa at kapwa Pilipino ay hinuhudas.