تكملة باقي حلقات الجزء الرابع من أنت قلبي

الجزء الرابع /الحلقة ١٠١

دخلت ريتاج لياسمين اللي كانت نايمه.
ريتاج : مامي.. مامي.
ياسمين بصوت ناعس : ايوه.. يا ريتاج عاوزه حاجة؟
ريتاج : بابي بيقولك اجهزي علشان رايحين عند جدو.
ياسمين : لا يا حبيبتي قوليله مش قادرة.
هشام واقف عند الباب : ليه مالك تعبانه؟
ياسمين : لأ بس هقعد مش قادرة أخرج.
هشام : خلاص براحتك يلا يا ريتاج.. يلا يا يمان بتعمل إيه عندك؟
يمان : حاضر يا بابي جاي أهو.
بعد شوية خرجوا وتركوا ياسمين لوحدها.
في التليفون.. 📞
ياسمين : لأ مش نايمه.
إياد : اخبارك إيه؟
ياسمين : الحمد لله.
إياد : ماما كلمتك؟
ياسمين : لأ.
إياد : طب متكلمهاش ومتتصرفيش في حاجة يا ياسمين.
ياسمين : امال اعمل إيه.. أعمل إيه يا إياد وهي ممكن تنفذ تتهديدها وتلبس هشام مصيبة وساعتها هيتخرب بيتي دا أنا مبقتش عارفه أروح عندهم البيت ولا قادرة احط عيني في عين حد فيهم بسبب اللي عملته ماما مع هشام دي شتمت حتى طنط أمل وأنا مش عارفه ازاي هقدر اتعامل معاها أكيد محدش طايقني فيهم ولا حتى هشام.
إياد : ليه هشام قالك حاجة؟
ياسمين : لأ هما كلمتين اللي قالهم يومها ومن بعدها سكت خالص مبيكلمنيش.
إياد : شوية كدا يا ياسمين وهيهدا وهتبقوا زي الفل المهم متبعيش حاجة من دهبك ومتديش ماما حاجة لإنها هتتعود على كدا أنا بعتلها ومش مخليها عاوزه حاجة رغم إنها اتجوزت بس قولت مقطعش برضو بس هي عاوزه أكتر وأنا عندي بيت والتزامات كتير كل شهر مش هقدر أنا على كدا ولما قولتلها حلو المبلغ اللي ببعته يا ماما ودي مقدرتي مقدرش ازود عن كدا زعلت بقى وقعدت تزعق كالعادة.. أنا نازل قريب علشان اشوف صرفه في الموضوع ده لكن متدهاش حاجة يا ياسمين اديني بقولك أهو علشان مترجعيش تشتكي.
ياسمين : ماشي يا إياد مع السلامة دلوقت.
إياد : مالك يا ياسمين؟
ياسمين : زهقانه وهطق من حياتها كلها اقفل بقى.
وقفلت مع إياد وهي بتبكي.
____
في فيلا كريم..
زين : صباح الخير.
جميلة : صباح النور.
زين : بتعملي إيه؟
جميلة : بجهز الفطار.
زين : ليه مامي فين؟
جميلة : نايمه.
زين : وبابي؟
جميلة : أكيد نايم يعني.
زين : أصل كل جمعة بيصحى يسقي الزرع اللي في الجنينة مشوفتوش.
جميلة : طب ما تسقيه أنت.
زين بيتثائب : لما أفطر اعمليلي حاجة أكلها.
جميلة : لف وتعال.
زين : اخلصي بقى يا جميلة دا ساندوتش مش شغلانه يعني.
فريدة بصوت ناعس : صباح الخير.
يرددوا : صباح النور.
زين : ايه يا مامي مالك؟
فريدة : هاتيلي مياه يا جميلة علشان أخد الدوا.
زين لجميلة : خليكي وخلصي اللي بتعمليه.. مامي اتفضلي.
فريدة : ماشي...شكرًا.
جميلة : أنا جهزت الفطار باقي الكل يجمع بقى علشان نفطر مع بعض.
فريدة : اطلعي يا جميلة قولي لبابي الفطار جهز.
جميلة : حاضر.
فريدة : اعملي ساندوتش جبنه صغير يا زين.
زين : حاضر بس مش هتفطري معانا ولا إيه؟
فريدة : لأ هاكل حاجة بسيطة كدا علشان الدوا اللي اخدته.
كريم : صباح الخير.
يرددوا : صباح النور.
جميلة : أنا اللي عامله كل الأكل ومحدش ساعدني.
كريم : شاطرة يا حبيبتي تسلم ايدك ايه يا فريدة مش هتيجي تفطري؟
فريدة : ما أنا بفطر أهو.
كريم : لوحدك!
فريدة : اه لوحدي.
نظر للولاد وسكت.
_________
في فيلا آسر.
سهر : شوفي دا كمان.
ملك : يجنن يا مامي دا اللي هتسافري بيه؟
سهر : لأ.. دا اللي هسافر بيه.
ملك : وااو يجنن تعرفي يا مامي أنا نفسي أشوف مليكة قوي واحضر ولادتها.
علي : ما انتي هتحضري رُقية كفاية عليكي.
ملك : هههههههههههه عندك حق هي فين؟
علي : جوه دخلت ترتاح شوية.
ملك : هتعملها ولا إيه؟
علي : ادينا مستنيين.
سهر : هو انكل حسام لسه مع باباك تحت؟
علي : اه لسه تحت.
سهر : اممم طيب.
ملك : انكل حسام كل أما يشوفني يهزر معايا وعمار بيضايق من كدا.
سهر : حبيبتي معلش ابقي قوليله بذوق كدا بلاش يا عمو علشان أنا كبرت.
ملك : أنا قولت له كتير بس مفيش فايدة كويس إن مليكة سافرت هههههه كان دايمًا يناديها بعروستي حقه لو كان سمعه سيف كان مسك في خناقه هههههههه
علي : وحشتنا قوي ياريتها كانت نزلت ولدت هنا حتى مكنتيش سافرتي.
سهر : معلش يا حبيبي أنا عارفه إنكم عاوزيني معاكم بس أختك لوحدها هناك ومحتاجاني.
علي : لا يا مامي مقصدش طبعا لازم تسافري لمليكة أنا أقصد يعني كان في حل تاني أهو حتى كنا نبقى جنبها هنا.
ملك : أهو اللي حصل بقى بقولك إيه يا علي متكلم مجدي يجي هو لسه نايم ولا إيه؟
علي : معرفش هكلمه أشوف.