تكملة باقي حلقات الجزء الرابع من أنت قلبي

الجزء الرابع /الحلقة ٩٦

فلاش بااااك.
آسر : أنا آسف.
سهر : خلاص محصلش حاجة أنا اللي آسفة.
آسر : على إيه؟
سهر : يعني إني فهمت غلط فكرتك أنت اللي كنت بتعاكس.
آسر : معلش حسام ابن عمي متهور شوية بس هجيبه يعتذرلك.
سهر : لا ملوش لازمه خلاص بعد إذنك.
آسر : طب ممكن لو احتاجتي حاجة تكلميني.. أنا موجود في الجامعة تقريبًا كل يوم.
سهر : معلش هو أنا لو احتاجت حاجة أكلمك ليه.. هو أنت قريبي؟
آسر وهو محرج : أنا آسف بعد إذنك.

ابتسم آسر وهو بيفتكر أول لقاء بينه وبين سهر بعد معاكسة حسام ليها هي وسلمى.

فلاش بااااك.
آسر : موصلنيش رد منك لحد دلوقت.
سهر : رد على ايه حضرتك؟
آسر : أنا مسميش حضرتك.. سهر أنا طلبت ايدك وادتك فرصة تفكري فات شهر وأكتر وانتي بتتهربي مني. عاوز رد حالًا.
سهر : حضرتك مش هينفع..
آسر : قولتلك أنا مسميش حضرتي وهو إيه اللي مش هينفع؟
سهر : مينفعش موظفة ترتبط بـ ابن صاحب الشركة اللي شغاله فيها.
آسر : ليه؟
سهر : علشان هيتقال كلام وحش كتير وأنا في غنى عن كل الكلام ده بعد اذنك.
آسر : استني..
سهر : نعم.
آسر : هاجي بالليل اقابل مامتك واشرب القهوة مع الأستاذ سراج.
سهر : لأ.. سراج لأ.
آسر : ليه؟
سهر : تعالى عند خالتي.
آسر : خالتك!
سهر : اه.
آسر : خالتك خالتك المهم إنك وافقتي.
سهر : وافقت على إيه؟
آسر : هههههههههههه

آسر بابتسامة : طول عمرك مطلعه عيني يا سهر.

فلاش بااااك.
يوم الفرح..
سهر ايدها على عينها : أنت بتعمل إيه؟
آسر : بغير هدومي.
سهر : هنا؟!
آسر : امال اغير هدومي فين..
سهر : بره أو هنا جوه.
آسر : هههههههه هناك فين انتي مخبيه وشك ليه؟
سهر : لأ ابعد متقربش مني.
آسر : هفُك لك الفستان.
سهر : أنا كبيرة وبعرف أغير لوحدي.
آسر : هههههههههههه هساعدك.
سهر : لأ ابعد... أنا بقولك ابعد بتقرب ليه؟
آسر : هههههههههههه
سهر : أنت مش سامعني؟
آسر : سامعك.. بس لو سمعت كلامك هفضل ندمان العمر كله هههههههه
سهر : لو صوت هيحصل إيه؟
آسر : هههههههههههه ولا حاجة.. صوتي.
سهر : طب أخرج دلوقت يا آسر علشان خاطري.
آسر : طب علشان خاطري أنا اسمعي كلامي.
سهر : لأ..
آسر : هههههههههههه

ابتسم آسر وهو بيسترجع الماضي..
آسر بابتسامة : كنا شباب بقى..
__________
في الصباح.. أمام قسم الشرطة.
خارج هشام مع ابنه مراد من جوه.
هشام : كان لازم دا يحصل من زمان إنما الشغل بتاعك ده وتقعد تراقبه وتجري وراه علشان تمسكه مش هينفع.. قولي أنت بتجري وراه ليه يعني لما تمسكه هتعمل معاه إيه؟
مراد : هسلمه للشرطة.
هشام : طب ما تبلغ عنه زي ما عملنا دلوقت كدا وهما يقبضوا عليه ولا عاوز تاخد حقك بدراعك؟
مراد : عاوز اقتله إنما البوليس هيسجنه ويأكله ويشربه جوه.
هشام : تقتله وتروح في داهيه مش كدا؟!
مراد : وقتها هكون بدافع عن نفسي.
هشام : بقولك إيه يا مراد سيبك من الموضوع ده وسيب الشرطة تشوف شغلها.
مراد : تمام موافق بس هو في الفترة دي هيسيبني في حالي؟
دا أنا بقيت خايف على مريم تخرج من البيت علشان اخرج امبارح اعزي ولان محدش من اخواتي ولا مرتاتهم في البيت قفلت البوابة بالقفل ومريم جوه خوفت الواد يكون مراقبنا ويستغل عدم وجود حد في البيت ويطلع يعمل فيها حاجة قولي بقى حضرتك مين يأكدلي إن الواد ده مش  هيأذيني قبل ما يتقبض عليه؟
هشام : هو اللي كان بيهرب منك هيأذيك ازاي وهو اللي خايف منك؟
مراد : سهله قوي وبسيطة هو مش هيتعامل مع راجل زيه علشان هيخاف لكن ممكن يأذي مريم ولا حد من الولاد.
هشام : خلاص خُد بالك اليومين دول لحد ما يتقبض عليه..
مراد : ما أنا حابس مريم في البيت هعمل إيه أكتر من كدا ومنبه على اخواتي اللي يدخل أو يخرج يقفل البوابة كويس.
هشام : لو عاوز تيجي تقعد اليومين دول معانا مفيش مانع هات مريم والولاد وتعالى.
مراد : لأ هحاول اخد بالي واحرص على قد ما أقدر حضرتك مش رايح الشركة؟
هشام : لأ هوصل مشوار كدا وبعدين هروح الشركة مع السلامة أنت وخُد بالك من نفسك.
مراد : اوك مع السلامة.
_______
في شقة محمد.
محمد : صباح الخير يا حبيبتي.
ميرا بابتسامة : صباح النور يا حبيبي.
محمد : إيه الخبط والهبد اللي شغال بره ده؟
ميرا : دي أم نجيب.
محمد : أم نجيب مين؟
ميرا : أم نجيب يا حبيبي اللي شغاله عندنا في البيت..
محمد : اه... وبتعمل ايه ام نجيب هنا؟
ميرا : مامي جابتها علشان تروق الشقة وتنضفها.
محمد نظر في الساعة : وهي جايه في وقت زي دا ليه ومحبكش التنضيف غير وأنا في البيت؟!
ميرا : معلش يا محمد كلها ساعة وتخلص.
محمد : هي الشقة فيها ايه لكل ده أنا سامع العفش بره بيتجر.
ميرا : دي مامي هتغير ديكور الشقة السفرة هتتحط مكان الصالون والصالون هندخله جوه في الليفنج.
محمد : ومامي تغير ديكور الشقة ليه هي اللي عايشه فيها ولا احنا؟!
ميرا : احنا يا حبيبي بس إيه المشكلة يعني التغيير مطلوب برضو علشان يغير مود الواد ويخليه مقبل على الحياه.
محمد : بجد مكنتش أعرف المعلومة المهمه دي بقى تغيير مكان السفرة والصالون هيخلوكي مقبله على الحياه ولا مقدرتيش ترفضي إنك تغيري ديكور شقتك اللي احنا منظمين كل حاجة فيها مع بعض؟!
ميرا : لو معجبناش يبقى نرجع كل حاجة زي ما هي.
محمد وهو مقرب من الدولاب علشان ياخد لبس ويغير وينزل : لا أنا مفياش صحة لنقل حاجة تاني خلي بقى كل حاجة زي ما هي الغريب إن أم نجيب دي ست كبيرة ومامتك هتهد حيلها على الفاضي.
ميرا : مش هتفطر؟
محمد : ياريت بس حاجة تكون سريعة كدا علشان عندي ميعاد مهم بعد نص ساعة.
ميرا : حاضر يا حبيبي ثواني الأكل يكون جاهز معلش بقى هتفطر هنا علشان بره الشقة تضرب تقلب.
محمد بتنهيدة : أوك موافق هعمل إيه مضطر أخاك لا بطل.
ميرا : هههههههههههه أنت بتقول إيه؟
محمد : بقول تخلصي الفطار علشان مستعجل.
ميرا : حاضر.
________
في شقة سلمى.
سهر : صباح الخير يا منة.
منة : صباح النور يا سهر.
سهر : صاحيه من امتى؟
منة : يعني من نص ساعة كدا.
سهر : انتي خارجة ولا ايه؟
منة : اه رايحه اغير هدومي واجيب لبس بالمرة.
سهر : فطرتي؟
منة : شربت نسكافيه.
وفاء بتجهز السفرة : طب اقعدي افطري يا منة الأول عمار وإياد زمانهم على وصول قولي لجوزك يجيب لك لبس معاه.
منة : إياد مش في الشقة اصلا هروح أنا.. سلام عليكم.
يرددوا : وعليكم السلام.
وفاء : سلمى نايمه؟
سهر : اه نايمه.
وفاء : نامت على طول امبارح ولا سهرتوا مع بعض؟
سهر : نمنا بس متأخر.. خليكي هفتح.
وفاء : لأ خليكي انتي أنا اللي هفتح.
كان عمار وإياد اللي على الباب..
______
في فيلا كريم.
فريدة : وفين العيد ميلاد ده؟
جميلة : في بيت صاحبتي يا مامي.
فريدة : وايه المطلوب مني دلوقت؟
جميلة : المطلوب إن حضرتك توافقي.
فريدة : قولي لباباكي.
جميلة : ما حضرتك اللي هتقوليله.
كريم بابتسامة : صباح الخير.
يرددوا : صباح النور.
كريم : خير فيه حاجة ولا ايه؟
جميلة : مفيش.
فريدة :  لأ فيه.
كريم : ما أنا سامع وأنا جاي عليكم مامتك بتقولك قولي لباباكي.. عاوزه تقوليلي ايه بقى؟
نظرت جميلة لوالدتها.
فريدة : مش قايله حاجة اتكلمي انتي أنا داخله اعمل القهوة.
كريم : اتكلمي يا جميلة خايفه من ايه؟
جميلة : مش خايفه بس أنا كنت عاوزه اروح عيد ميلاد واحدة صاحبتي.
كريم : عيد ميلا صاحبتك!
جميلة : اه.
كريم : ومن امتى يا حبيبتي بتحضري أعياد ميلاد.
جميلة : يعني يا بابي قولت اغير جو وكمان صاحبتي عزمتني وأنا اتحرجت أقول لها مش جايه.
كريم : خلاص تشتري هدية على ذوقك وتروحي تقدميها لصاحبتك.
جميلة بفرحه : يا حبيبي يا بابي..ميرسي قوي.
كريم : مامتك هتروح معاكي.
فريدة : اروح فين يا كريم؟!
كريم : هتروحي مع جميلة عيد ميلاد صاحبتها.
فريدة : ما أنا سمعت يا حبيبي بس أنا مليش مزاج احضر أعياد ميلاد.
غمز لها كريم..
فريدة بتنهيدة ونظرت لجميلة : حاضر.
زين نازل من فوق :  صباح الخير.
يرددوا : صباح النور.
يقوم كريم علشان يخرج.
فريدة : على فين يا كريم أنت مشربتش القهوة.
كريم : هاخدها اشربها بره.
واخد فنجان القهوة معاه.
زين : ايه مالك بتبصيلي كدا ليه؟
جميلة : أبدًا ولا حاجة.
زين : طيب افطري وخليكي في حالك.
جميلة : حالي ايه هو أنا كلمتك؟!
فريدة : وبعدين معاكم كل واحد يخليه في حاله افطر يا زين علشان تشوف  رايح فين.
زين : حاضر.
______
في شقة مجدي.
جرس الباب يرن تقوم زينة تفتح باب الشقة.
زينة : بابي!
هشام بابتسامة : سلام عليكم.
زينة : وعليكم السلام.
هشام : ممكن ادخل؟
زينة : اتفضل حضرتك.
هشام بيدخل وبيفُك زراير الجاكت : مجدي خرج ولا موجود جوه؟
زينة : لأ خرج حضرتك كنت عاوزه؟
هشام : لأ أنا عاوزك انتي.
زينة بارتباك : أوك ثواني بس هعمل لحضرتك حاجة تشربها واجي على طول.
هشام مسك ايدها : حضرتي مش عاوز يشرب حاجة اقعدي عاوز اتكلم معاكي.
زينة : مش هينفع يا بابي نقعد كدا من غير ما نشرب حاجة.
هشام : يا بنتي بقولك اقعدي.
زينة : حاضر.. بس هو مجدي قال لحضرتك حاجة؟
هشام : لأ أنا جاي اسمع منك انتي.
______
في شقة مراد.
مريم خارجة من جوه تتفاجئ بمراد قاعد بره في الريسبشن.
مريم : مراد!
التفت ليها ومتكلمش.
جات قعدت جنبه : مراد أنت مروحتش الشغل زي ما قولتلي؟
مراد : لأ.
مريم : ليه؟
مراد : مليش مزاج.
مريم : امال نزلت روحت فين؟
مراد وهو منفعل : روحت مكان ما روحت يا مريم.
مريم : هو حصل إيه مش فاهمه!
جات مريم الصغيرة بتلعب بعربيتها وعامله دوشه.
مراد : دخلي مريم تلعب جوه مصدع ومش عاوز دوشة.
مريم : حاضر يلا يا مريم نلعب جوه.
واخدت مريم بنتها ودخلت جوه.
_________
في شقة مجدي.
هشام : برضو مش عاوزه تقوليلي مالك؟
زينة وهي بتمسح دموعها وبتبعد عن والدها اللي كان اخدها في حضنه بعد مانهارت وقعدت تبكي : مفيش يا بابي.
هشام : طب يعني هي حاجة خاصة محرجه تقوليهالي؟
زينة سكتت.
هشام : خلاص براحتك انتي ادرى باللي ينفع يتقال.
زينة : بابي هو ممكن يكون في حد بيحب حد وفي نفس الوقت يجرحه ويوجع قلبه؟
هشام : ازاي ده.. متمشيش طبعاً مفيش حد بيحب حد ممكن يجرحه وهو قاصد.
زينة : يعني ممكن يجرحه وهو ميقصدش؟
هشام : ممكن.. بس هو مين اللي جرحك ووجع قلبك يا بنتي؟
زينة : أنا؟
هشام : امال بتتكلمي عن مين؟
سكتت زينة.
هشام وهو قايم بتنهيدة : طيب أنا قايم ماشي عاوزه حاجة؟
هزت زينة رأسها بصمت.
هشام : طيب.. سلام عليكم.
زينة : وعليكم السلام.
وقامت مع والدها توصله.
هشام عند الباب : متأكدة إنك كويسه؟
زينة هزت رأسها.
هشام وهو مضايق : مش باين يا زينة على العموم براحتك يا بنتي وقت ما تحبي تتكلمي أنا موجود.
وقبل رأسها : خلي بالك من نفسك.
زينة : حاضر..
هشام : سلام.
زينة : مع السلامة.
وبيركب هشام الاسانسير وتقفل زينة الباب وتجري على البلكونة اللي بتطل على الشارع.. وقفت منتظرة لغاية ما والدها ركب العربية ومشي..
وهي منهاره وبتبكي.