نور حياتي

13

حبس معاذ عند شط البحر سيليا ماحبتش تنزل راح نزلها بسيف وهي غير تبكي
سيليا: بعد عليا ماتمسنيش
معاذ: شوفي راني صابر عليك وحاكم روحي فوق الحد
سيليا: واش تسحق عندي علاش جبتني هنا
معاذ: جبتك هنا باش نهدر معاك باش نتكالما ونهدر معاك بالعقل ،لكان نهدر معاك وانا مقلق....
سيليا: تضربني ،لكان تهدر معايا ونتا مقلق تضربني واقيل
معاذ: مانضربش البنات انا
سيليا: حڨار كيما نتا يقدر يدير كلش واطلقني يدي راهي وجعتني راك توجع فيا
معاذ: انا حڨار؟! غاضك هذاك الكلب واقيلا
سيليا: ماشي كلب هذاك اسمو حسام وحسام خير منك بالف مرة دايمن لاقياتو في جنبي وكي ماتكونش نتا هو دايمن يكون معايا هو لي ينسيني في الهم تاعك
معاذ: الهم تاعي؟ خير مني بالف مرة؟ دايمن في جنبك؟
(معاذ قلقاتو هدرتها وحكمها من وجهها بيد وحدة وزير عليها وهي تتوجع)
معاذ: مالا عجبك الحال كنتي راضية كي باسك نتي خليتيه يبوسك
(سيليا قاعدة غير تبكي وتترجا فيه ينحي يدو وجعها بزاااف معاذ فاق مع روحو وطلقها بصح سيليا بقات ساكتة ماقالت والو)
معاذ: راني نهدر معاااك جااوبيييي عجبك الحاااال
سيليا: ياك قتلي ماتحبنيش علاش راك تحاسب فيا واش دخلك ياك قتلي مادخلينيش في حياتك
معاذ: تاعييي نتيييي تاعييي مرتي صوالحي رزقي نحبك ولا مانحبكش حتى واحد ماعندو الحق يمسك ،شعرة منك مايتوشيهاش ماشي حتى يلحق يبوسك فهمتيييي ،ودك نعاود نسقسيك اخر مرة وبالاكي برك تكذبي عليا، نتي خليتيه يبوسك ؟
سيليا: ماشي انا خليتو بردت دك؟ باسني على غفلة ونزيد نقلك حاجة انا مانيش شيء باش تقولي نتي تاعي انا ماني تع حتى واحد نهار تولي تحبني نهار تعطيني قلبك ثما قولي نتي تاعي ،وحاجة وحدخرا مادامك نتا خاطبني مانخلي حتى واحد يمسني ومايعجبني الحال مع حتى واحد الحمدلله دارنا رباوني احسن تربية ماشي حتى جي نتا تزڨي عليا ولا تحسب تخوفني بالضبيح والزڨا تاعك تربيني  وزعما مانديرش هذيك الحاجة
معاذ: كي ماعجبكش الحال علاه قاعدة تبكي علاجالو
سيليا: نبكي علاخاطر هذاك الانسان عزيز عليا وعندو قيمة عندي وماعندكش الحق تضربو هكاك ماشفتش روحك كفاه وليت داير وليت وحش
معاذ: خفتي عليه، يزيد يعاود يدنا ليك يدير في بالو هذاك هو نهارو التالي، ونتي مانزيدش نصيبك دوري معاه
سيليا: علاه شكون نتا باش تقولي مادوريش معاه
معاذ: نتي مخطوبة ودوري مع واحد طايح فيك ولحق حتى باسك ؟ راهي جايتك نورمال؟ هاذي هي دارنا رباوني وماشي حتى نتا تقولي؟
سيليا: ماعنديش انسان وحداخر ندور معاه هذاك هو صديقي الوحيد وانا مانحبش نخرج وحدي
معاذ: كي تحبي تخرجي قولي لختك تخرج معاك
سيليا: نور دايمن مشغولة قليل وين تحب جي معايا
معاذ: الله يسهل عليك المهم انا هذاك البنادم مانزيدش نسمع اسمو ولا نزيد نشوف وجهو ولا نسمع بيك هدرتي معاه ،امشي قدامي دك نوصلك للدار ، روحي اركبي دك نجي
وهما في الطريق انتبهت سيليا ليدو مافيهاش الخاتم
سيليا: خاتمك وينو علاش ماكش لابسو
معاذ: كي غسلت يدي نحيتو
دار يدو في جيبو باش يجبد الخاتم جبد معاه المفتاح وعاود ردو سيليا كي شافت المفتاح فرحت الپورتكلي لي عطاتهولو مازال دايرو في المفتاح

.
.
.
وصلو للدار
سيليا: ماقتليش علاش حوست عليا اليوم
معاذ: علاه نتي خلتيلي العقل باش نتفكر، كنت راح نقولك العشية راح نجي مع دارنا نتعشاو عندكم باباك عرضنا
سيليا: جيت ليا علاجالي هاذي؟ كنت قادر تقولهالي في التيليفون
معاذ: لالا مزية جيت ربي بعثني لكان ماجيتش لكان ماشفتش واش شفت ،وكيما وصيتك بالاكي تهدري معاه خلاص هذاك الانسان فاصيه من حياتك
سيليا نزلت من الطونوبيل جات راح تغلق الباب
معاذ: سيليا...كي ماتلقايش معامن تخرجي عيطيلي انا نجي معاك
سيليا: باي العشية انشاء الله