نور حياتي

1

انا سيليا في عمري 24 سنة الصغيرة في دارنا لي نطلبها تحضر المفشة تع بابا كملت قرايتي وقعدت في الدار علاش حتى نخدم بابا واحد من اكبر رجال الاعمال في البلاد التحواس كل يوم و شوبينغ كل يوم حاجة ما تخصني خيرت نربح راحتي ماشي كيما البهلولة تع ختي راحت تخدم مع بابا نهار طول تجري كي المهبولة انا رابحة راحة البال ونسنا في عريس الغفلة يا خاوتي نهار طول مع المسلسلات نتخايل كاش نهار نتزوج ونعيش الرومانسية لي عايشينها ماعنديش صحابات بنات عندي حسام برك عمرو نفس عمري كان يقرا معايا وولينا صحاب ونديرو كلشي كيفكيف حتى بعدما كملنا القراية يخدم في الشركة تع بابا اااه المعرفة هذي هي بصح والله شاطر في خدمتو ويحب يخدم ايه نسيت ماحكتلكمش على ختي نور في عمرها 29 سنة ايه علابالي راهي شارفة وماشي مزوجة هي حبت تبقا بايرة مي انا مانسنهاش نزوج ونخليها هي بغات 😂😂

سيليا

نور

حسام
.
.
.
(في الليل عائلة سيليا مجتمعة تتعشا )
اب سيليا: غدوة انشاء الله راح يجي يتعشا عندنا صحبي لي كان عايش في ايطاليا هو وولادو وجدو روحكم تستقبلوهم وتقومو بيهم
ام سيليا: هذو سنين ماجاش كيفاه حتى جا وزيد مع ولادو
اب سيليا: ياك ماتت مرتو العام لي فات مالا قرر يولي لهنا يعيش في دزاير وحتى ولادو جابهم معاه ماحبش يخليهم هناك
سيليا: بوه وعلاه ولادو هاذو شحال في عمرهم يجيبهم ويديهم كيما يحب
نور: ونتي واش دخلك يا لالة لوكان ماتهدريش مانعرف واش يصرالك
سيليا: ياه راني نسقسي برك مانسقسوش ثاني
اب سيليا: هههه لالا سقسي سقسي بنتي عندو 2 ولاد الكبير فيهم مزوج والثاني مازال يكون عندو 26 سنة هكاك
سيليا: مالا هذاك المزوج عندو ولاد صغار ياااا شحال نحب الولاد الصغار
اب سيليا: ااااه هذيك مانعرف كي يجو تعرفي
ام سيليا: خلاص مالا غدوة انشاء الله يكون كلش واجد ونتي نور ارواحي بكري ماشي كيما كل مرة يجونا ضياف نتي مكاش
نور: انا وخدمتي ماما اذا كملت راني نجي
ام سيليا: لالا ارواحي ياك شركة تع باباك خلي نهار ماتخدميش
اب سيليا: واش من شركة باباها راهي قريب تولي تعها حتى انا كي نحب نخرج ماتخلينيش تشدني بالخدمة
سيليا: احم احم انا غدوة راني خارجة نروح نشري شوي حوايج نستقبل بيهم ضيافنا العزاز وماكاش معامن نروح مالا نور يسموك جي معايا مكاش خدمة غدوة
ام سيليا: بوووه نوور ماتروحش تخدم وتروح دير شوبينغ معاك راكي تنومي
سيليا: لالا جي معايا ماتخليش ختها الصغيرة وحدها ☺️
نور: لا مانروحش روحي وحدك .انا شبعت بابا راني طالعة الفوق كي تكمل نسحقك في وحد الخدمة
.
.
.
(في مكتب اب سيليا)
نور: بابا ماقتليش شكون هذا صاحبك تع ايطاليا لي راه جاي،راك على عمو فؤاد؟
اب سيليا: ايه هو تشفاي كي كان يجي مع ولادو في الصيف سيليا كانت صغيرة ماتشفاش
نور: ايه شفيت شفيت هيا مالا انا نروح نرقد غدوة نوض بكري تصبح على خير بابا💋
.
.
.
"طق طق طق"
ادخل
سيليا: اه مزية مازالك نايضة نور يعيش ختي ارواحي معايا غدوة ياك علابالك مانحبش نروح وحدي
نور: روحي مع حسام
سيليا: حسام يخدم ياك علابالك بلييييز ارواحي معايا
نور: اوك خلاص نجي
سيليا: 😶😶 وات واش صرا ياااه قاتلي نجي ياااه اول مرة في الحياة قاتلي نجي 💋💋💋💋
نور: دك نبطل
سيليا: لالا لالا خلاص اني رايحة بونوييي نحبك بااااي