نور حياتي

7

(هذي البارتي فيها انحراف متبرية من ذنوبكم😁)
بالنسبة لكاترينا ماحكيتش عليها بعدما سليم راح عند نور وخلاها على الرغم من انها عندها عقلية تع لهيه وماعندها حاجة بصح طبعا حاجة كيما هذي ماراحش جيها عادية وهي اصلا لاحظت بلي سليم تبدل بعدما جاو لدزاير ولاحظت بلي كاينة حاجة بينو وبين نور ولكن ماعندها مادير هي من الاول علابالها سليم مايحبهاش وزواجهم كان مجرد زواج مصلحة

سيليا رجعت لدارهم قعدت مع باباها وماماها شوية حكاو على معاذ وقاتلهم بلي عجبها وراهي قابلة بيه حوست على نور لقاتها راقدة مالا راحت ترقد هي ثاني وقاعدة غير تخمم في معاذ ولكن مع الاسف هو ملي حطها في دارهم وراح مازادتش جات في بالو كامل السيد صح ماراهوش قاع معمر راسو بيها

الخطبة قررو يديروها بعد اسبوع وماعرضوش بزاف ناس غير القراب وفي هذاك الاسبوع فؤاد ومحمد كملو الاجراءات ووحدو شركاتهم نور ماراحتش قاع للخدمة خايفة غير لا تتلاقا بسليم اما بالنسبة لسيليا كانت فرحانة بزاف وهي توجد لخطبتها مع معاذ وهو صابر ومتحمل على الرغم من انو بارد معاها بصح هي دايمن تضحك وتحكي معاه حتى انها بدات تحبو

علابالي راكم تقولو وحسام كي صرالو حسام من هذاك النهار مازادش عيطلها باقي يسنا فيها هي تجاوبو سيليا عيطتلو عرضاتو لخطبتها وماجبدتلوش قاع على الموضوع لاخر

.

.

.

سيليا:نووور راهم قريب يوصلو ونتي مازال ماوجدتيش روحك

نور: خلاص دك نلبس كاش حاجة وخلاص علاش راكي لاتية بيا نتي العروسة ماشي انا

سيليا:كفاش حاجة وخلاص سليم راهو جاي لازم تهبليه

نور:واش من سليم روحي خطيني

سيليا: شوفي واش جبتلك معايا

نور: نتي مهبولة وشنو هذي عريانة بزاااف

سيليا: البسي وسكتي لكان نديرو عليك تبقاي هكاك ومخليا كاترينا تتمتع براجلك

نور: راجلها هذاك ماشي راجلي

سيليا: ايه تبعيني يولي راجلك ايا نوضي نوضي راهم جايين

.

.

.

وصلو المعازيم وكانت نور وماماها وباباها عند الباب يستقبلو فيهم حتى وصل معاذ وعائلتو سليم عينيه نحلو كي شاف نور ماحبش ينحي عينيه منها