💐 زواج تقليدي 💐

💕الحلقة 10...💕

☘️🌾☘️

🍂 يا امرأة أحبها..

تفجر الشعر إذا داست على أي حجر..

يا امرأة تحمل في شحوبها

جميع أحزان الشجر..

ما أجمل المنفى إذا كنا معاً..

يا امرأة توجز تاريخي..🍂
.......
طلعت لغرفتي ،،، فرحانه ،،، بقى يومين على عرسي ،،، وموضوع لخدمة نحل ،،،احسن شي عملته وقت خليت كل شي بيد ربي وهذا لي صار ،،،، حطيت راسي على لمخدة ،،، نراجع في نهار ليوم ،،، احداث بزاف صراولي ،،، اما ماجا يكمل نهار كلشي نحل وهذا لي فرحني ،،، بقيت نشوف مع تليفوني طالعة نازلة فلفيسبوك ،،، من بعد قلت خلي ندخل نشوف اذا حط شي جديد ممكن بيه نقدر نقرا شخصيته ،،، لي متخبية ورا هذا صمت المربك ،،، ويا ريتني مادخلت ،،، لقيته مع بنت متعنكشة فيه ومتصورين ،،، صورة هذي نحطت من عشر دقايق وهي ايدونتيفياته معاها ،،،، وزيد راه بلبست ليوم ،،، تسما راه معاها في هذا لوقت ،،، حسيت روحي مشي مليحة خلاص ،،، مش غيرة خاطر مابينا شي ،،، اما حسيته مسلي كرامتي ،،، يومين وينكتب صداقنا مع بعض ،،، وهو فلحفلات ،،، ويجي يقولي انا مشي نتاع حب ،،، وشكون هذي لي معاه ،،، وجها مألوف ليا ،،، رجعت دخلت عندها ،،، ايه هذي هي ،،، لي تخدم فلشركة وكانت طلبت مني نجيب لقهوة وقت مشيت للشركة ،،،، من وين يعرفها ،،،، وهذي واش تقربه حبيته ولا واش ،،، اما هو قالي ماكانتش كاينة وحده قبلك ،،، يعني انا اول مرة في حياته ،،، اما اذا عاش فلغربة اكيد تكون كانت عنده علاقات عابرة ،،،، بقيت ليلة كاملة على اعصابي نستنى في كاش جديد يحطه هو ولا هي حتى داني نوم ،،،،

بعدما تعشى هو وياها ،،، كانت جهزت روحها ،، ركبو فلطوموبيل ومشاو ،،، طول طريق وهي عاملة جو ،،، وفرحانه مشي مصدقة انو حب حياتها قاعد حداها ،،، فرحانه بقربه ووجوده ،،، فرحانه انو ليلة فرصتها تحكي كامل واش في قلبها ،،، متأكدة انو آدم ماعندهش علاقات جدية ،،، وراح يتقبل فكرة حبها ويصارحها بحبه ،،، وصلو قدام قاعة كبيرة يعملو فيها حفلات للسهرة ،،، تشبه شوي للبار اما يجوها ناس كبار فلبلاد ومافيهاش مشاكل ،،، شدتله يده وكملت تمشي بيه للداخل ،،،، شربو وحكاو ،،، وعملو تصاور مع بعض ،،، حكالها على لغربة ،،، وفرنسا ،،، وكيفاش كان عايش ،،، وحتى هي حكاتله واش علمت في لمدة لاخيرة ،،، وامور شركة وغيرها ،،، ووقت سمعت غنايتها لمفضلة كبشت فيه ينوضو يرقصو ،،، فلبداية مانع اما من بعد ستسلم قدام تلحليحها عليه ،،،، حط يديه ورا خصرها ،،، ودورت هي يديها على رقبته وباقي تتمايل ،،، لغنية كانت هادية ،،، وهي تشوف فيه عينيها يلمعو عشق وهيام فيه ،،،، كلشي فيه يجذبها ويخليها تفقد توازنها ،،، وعلاش لا وهي ماعرفت في حياتها غيره ،، واول ماحلت عينيها حلتهم فيه ،،،