تألمت ثم عشقت آلامي في حبها

27

سحر -لكن تعلمت نحس روحي عايشة و اني معاك ... تعلمت نحس الدنيا و اني بين يديك (تنهدت)...محمود سحر تعلمت تتنفس من يوم لي شافتك فيه يابابا

." حس بزلزل تحرك تحته.. كلامها اثر فيه و وجعه.. وجعه لدرجة انه محمود و تسهويكه ما لقاش ما يرد و ما يجاوب .. للحظة الكلام هرب عليه و لسانه تعقد... و أكتفا فقط بإنه يغرق في عيونها و في كمية الوجع لي مخبية في وسطهم .. سبحان الخلاق .. كل ما يشوف جمالها يستغرب و يجي في باله سؤال واحد .. بنت بدرجة هالجمال هدا.. ليش عاشت العداب هدا كله ؟.. تي لي تو مازالت صغيرة !!! 19 سنة .. مازالت في مقتبل العمر .. تنهد و حاول يهرب من كلامها ... بطبعه حنين لكن مايبيش يبين.. اصلآ حتى في الكلام كلامه قليل .. و ما يعرفش يتكلم هلبا ..."
.
محمود - كيف مالا ؟ ..شن درنا توا !!!
سحر عقدت حواجبها... استغربت من السؤال ...!! - سحر - في شني.. ؟؟
محمود - شني في شني؟؟ .. مش قلتي اني مش دبدوبة .. اهو جاتك فرصة على طبق من ذهب ... مستعد نتراجع على رأيي بشرط .. (غمزها 😉 )خليني نركز على المباشر ههههه .😂😂
" آآآآآآآعععععع ...عيونهه لمعت بخبث كبير هههههه .. 😂وسحر حطت يديها الاثنين على صدره بدلع "
سحر - مممم مش قلت بدوش لعروستي 🙊
.محمود - سسسسحر ...اي صح قلت.. لكن غيرت رأيي بطلت 😂 ههههههه
سحر - شن بطلت .. بطلت من عروستك ؟ .. 😳
محمود - لا من التدويش لعروستي 😂.. علي خاطر عروستي دمااااار شامل هههه .😒💔
.
. " محمود .. دخل لدوش ... حضرلها ملازم الدوش ... عبا البانيو بالمياء الدافيه و تأكد من درجة حراره .. حطلها في وسطه ال bain moussant بنكهة الكرز .🍒.. باش يدرلها فقاقيع في وسط البانيو هههه ..😂 يعرفها تحب تلعب بيهم .😂 .. قربلها الكريمات لي بتستحقهم و الشامبو .. هرب عيونه من عليها و طلع هارب بسرعة وسحر دخلت لدوش ."
.
" .سحر... دوش وتفكيرها يرفع و يجيب في الف حاجة و حاجة ... الخوف كل شويه يتسلل لقلبها اكثر و اكثر . فرحانة و مش فرحانة .. خايفة و مش خايفة .. مرعوبة و مطمنه في نفس الوقت .. لكن خايفة و مرعوبة من لي جاي و من ردة فعل مريم.. لكن لي مطمنها ثيقتها فيه .. كملت دوشها ... لبست الكاب وطلعت باش تلبس و تمشي معاه للقصر .. كان جا في يدها توقف الوقت .. و تحبس الدقائق لي قاعدين يمرو بسرعة .وتبي تقوله لا لكن مش قادرة تعكسه في شي .. حاسة روحها داخلة بعضها و خايفة و الوجع لي تحس فيه في بطنها ومن التوتر زاد على ما بيها ..💔
.
" سحر طلعت . لقاته صافن اكمام السوريه و يستنا فيها هههههه..😂 . قعدها قدامه علي الكرسي و بدا يمشطلها في شعرها و يجففلها فيه ... و هي تتنقنق هههههه ..😂 وكل شويه تعيط و تقوله ." قتعتلي شعري "... 😒 و هو يقوللها " اسسس كلمة لا 😌" هههههههه .. ما سيبها غير لما جبدهولها 😂.. و ستر ربي شعرها ارطب كان هدت راه قلعه كله 😂"
.
.." كمل و جبد المكياج 💄 و حكم عليها دير على دوقه .. هيه توريله في حاجات المكياج وين ينحطو و هوا يحط على كيفه هههههههه ..😂 .. يمكيج و يقللها ما تشوفيش توا .. استنني لين نكمل .😌. ولما كمل كانت الصدمة... 😳 دارلها زي عوسة المولد 😂. عيونها تفتحو من الصدمة ...ههههه و هو قرب منها .. شفشفلها شعرها و عطاها بوسة من خدها .. وقاللها - لازم نخبي جمالك شويه ... هههههه 😂"
.
خلاها تحضر في روحها بعد ما لزاته 😂 و دخل يدوش ... ههههه ..ستر ربي السويت كبيره وفيها صالة .. لبس فيها و تانق كالعاده وقعد يستنا على احر من الجمر .. حاسس روحه بالحق عريس بيرفع عروسته و ماشي الصاله 😂
... لكن لما تفكر شن يستنا فيه .. تبسم بمرارة ... عيونه صح مرشوقة في باب الغرفه لي هيا فيها ... لكن عقله سارح و قلبه مش قايل خير ..💔 بعد شوية وقت و يسمع فيها تناديله . ههههه .. وصاها أنه يلبسها هوا .. و يا ويلها لو تلبس بروحها 😂.. هههه .. دخل ساعدها يلبس ف الفيلو و يديه ترعش . ما أبهاها و ما أبها طلتها .. " مش قادر يرفع عيونه عليها ولا لحضة .. كمل لبسها الفيلو .. و بعدها فتح صندوق الكسسورات💎 👑 ولبسها.
.باسها من جبينها بحب كبييييييير❤💋
... و للحظة فكر إنه يتراجع ..يتراجع و يهرب بيها من جديد... ❤حرام إنها تتمرمد💔 .. مش هاين عليه فرحتهم تفسد و ما تكملش ..💔 لكن لازم يواجهم .. ما عنده وين يهرب اكثر .. شدها من يدها و نزل بيها ...
تصدقو ان محمود يديه ترعش ؟.. اول مرة يتوتر هكي .. و اول مرة الخوف يعرف لقلبه طريق .. لي يشوفهم طالعين من الاوتيل يركز في جمالها و حسنها و يحسده عليها .. يقول زوز عرايس ومتهنين.. و مش عارفين شن يستنا فيهم 💔 ..
ركبها في سياره و طااااااار بيها .. بإتجاه نار جهنم لي تستنا فيهم 💔.. طريق كامل و هما ساكتين .. ولا واحد فيهم جاته جرأة يشوف لتاني .. هو عيونه مرشوقه في الطريق لي يرحي فيه رحيان .. و هي عيونها ضايعين .. حست سياره هدت في سرعتها .. بلعت ريقها بالسيف .. غمضت عيونها شويه.. و بعدها عاودت فتحتهم .. تشوف غير في الباب الحديد الكبيييير متع القصر تفتح بروحه .. و السياره بدات تدخل لوسط القصر .. و بدخولهم للقصر قلب محمود تكبس من جديد .. و شخصيته القوية بانت .. مش وقت ضعف توا .. فتح سياره يمشي بخطوات ثابتة تزلزل في الارض لي تحته .. و قمرة 14 في سماها .. نجمة لامعة في ضلام لياليها.. سلطانة تتمخطر و التاج لي فوق راسها محليها .👑. وعريسها مشبك يده في يديها .❤. واقفة ميتة بالرعب.. رجليها ترجف. خايفة و مرعوبة من لي جاي .. هي لا حول و لا قوة .. ضعيفة و نسمة الهوا قادرة تكسرها .💔. ماعندهاش قوة باش تواجه لي جاي .. ما عندهاش قوة باش توقف قدامهم .. مرعوبة .. مرعوبة .. مرعوبة ..و كلمة مرعوبة شويه عليها ... لي قدامها هذا قصر مختار المطيري .. و الأسم فقط .. قادر إنه يجمد الدم في العروق مش لعب .. 😪
واقفة و عيونها كلهم خوف وتوتر و دموع جامدين .. مش قادرين ينزلو على خدها .. و لاهم قادرين يكفو من على عيونها .💔💧
. بتموت من لي تحس فيه توا .. ولي مصبرها هو ثيقتها في الراجل لي ملك قلبها ختاره.. كبست يدها الصغيرونة في يده .. ضمت شفايفها .. و شافتله بنظرا .. تعبر على حالة الرعب لي هيا فيها .. أما هو لااا... هو عيونه الكحل .. كلهم قوة .. و نار .. عيون يدلو على قوة و جبروت شخصية مالكهم👌
.. عارف روحه قادم على حرب .. و هو قدها .لو كان هذا قصر مختار المطيري ... ف إلي واقف قدامه توا هو محمود المطيري و ماأدراك .. هههههه .. 😌
ذلك الشبل من ذاك الأسد... حرب و بتقيم توا .. زوز .. بنفس الشخصية .. و بنفس القوة .. و بنفس لمعة و حدة لعيون... بو و ولده.. ليهم سنين متكلموش .. ماتعتبوش من. سنين و عيونهم تتهرب من بعضهم .. واليوم .. الليلة... جي الوقت باش العيون تتقابل .. و القلوب تتواجه .. و عقاب لي بيدبره تومحمود كبييييرة .💔. بوه و يعرفه يا جبل ما يهزك ريح .. و محمود يعرف روحه. شخصيته شخصية بوه .. و مستحيل يسلم .. يكفي ما سكت ..و يكفي ما تهرب من المواجه.. الليلة نار جهنم وبيبانها بتنفتح ..لكن زلزال المرة هدي قوي أكثر من الازم .. تبسم بقوة و ثقه .. و لفت عيونه .. لسحر . قرب منها .. مسح على شعرها.. كأنه يقوللها متخافيش .. أني معاك .❤. مقدم بيها على إعصار و قاعد يطمن فيها .ههه هه😂
شدلها يدها .. و بدا يقدم .. قلبه يخض .لكن عيونه تشعل بالنار .. يمشي بكل فخر .. بصدر منفوخ.. و أكتاف مرفوعة .. و هي وراه تمشي رجل لقدام و عشرة لتالي.. فتح الباب و دخلو .. يد في اليد ..
وفي لوقت هدا العيله كلها متجمعين هالعشاء .. طاولة منصوبة و العيلة كلها ملمومه. خوته ..و نساوينهم.. صغارهم.. .. و الوضع زاد صعب أكثر .. محطش ف حسابه إنه يلقاهم كلهم .. حتى من زياد موجود 😳..
توتر و بدا يدخل بعضه .. لكن تو ما فيش تراجع .. هو عاش راجل .. و بيقعد راجل .. مش ح يهرب من حد .. و مش ح يخبي وجهه لأي سبب .. . عشقها .. و مش نادم من لي صار .. و في لحظة هدي الناس كلها تجمدت .. مش مصدقين عيونهم .. مصدومين .. لي هذا يشوف لتاني مش فاهم شي .. يشوف في . عروس و عروسة قدامهم .. .....
. محمود حس بيها ترعش بين يديه ... تبسم وتلفتلها بعيون حنينة .. هو توا يشوف فيها عروسة قدامه .. لابسة فيلو يهبل من الأخير ... كبييييييرة و مفوج .. تتجرجر فيه وراها و تضوي كلها .. هوا لي ختارهولها و لبسهولها بيده و طقم زمرد يلمع في رقبتها .. تاج كبيييبير و عالي محلي شعرها الأسود المطلوق على طوله .. كندره ترعب .. كيف كندرة السندرلا في رجليها الصغيرونين... مكياج خفيييف. عيون ذابلين و مغريين ...و شفايف بالروج الأحمر يذبح دبح... 💋💄
و هو .. بدلة رسميه لونها اسود وسوريه بيضة .. شعر بالجال .. لحية مقيومة .. وشخصيه تخطف الأنفاس .. 😍
الناس كلها مصدومين .. شويه في المنظر لي قدامهم .. و شويه في جمال سحر .. حقيقتا كانت اجمل و أحلا من أي وقت تاني ... عيونهم كلهم مرشوقه فيها .. و هايمين في درجة سحر و الجمال لي هي عليها .. ملكة .. سلطانة هاربة من قصص الخيال.. مستحيل يقدر حد يشوفها .. و يبعد عيونه عليها حتى شويه....❤
الصمت سيطر علي المكان .. النفس طالع نازل .. القلوب كلها تضرب في المية .. زياد عيونه تحرقو من منظر سحر .. يمكن هذا ابشع و أحلى منضر يشوفه في حياته.. أحلى عروسة ممكن يشوفها في الدنيا ..و أبشع غدرة كلاها في حياته المرا لي عشقها هيه توا عروسة بين يدين عشير عمره 💔 ..
... مريم دموعها نزلت في نفس الوقت .. مش فاهمة شي ..خيرا محمود لابس هكي . و علاش سحر عروسة ؟ شني لي قاعد يصير ؟ هدي افكار لي دور في راسها تو .. لفتت عيونها بنضرة مكسورة تحرق القلب عمها تستنجد فيه 💔
.. منير و مكرم .. فرحو علي خاطر بتخرب بين محمود و بوه .. هههههه.. خوت آخر زمن 😏.. اصلآ ليهم مدة يستنو في الضربة ... يستنو في صراع محمود و بوهم ... وهذا باين عالاخير من لمعت الخبث و بسمة الشر لي ترسمة على وجوهم
ومراد قلبه دم .. عارف السيناريو الجاي .💔. كبس عيونه بصوابعه عالأخير .. و تنهد من فسط قلبه .. وزوز عيون كانو يقدحو بالنار .. عيون محمود المطيري .. و عيون مختار المطيري .. زوز عيون متشابهين في كل شي.. كانهم نفس العيون .. من برة معبين بنار .. و من داخل معابين وجع 💔.
.و في هدا كله سحر كانت بتموت من اللخوف .. كانها دخلت لي حفرة الافاعي برجليهااا .. و كتبت نهايتها بيدها .. صح عندها ثقة في محمود.. لكن ماعندهاش ثقه في الدنيا.. غدرتها هلبا مرات .. و عطتها بضهر اكثر من الازم ..💔
و اليوم هيه معندهاش قوة باش تتحمل قسوتها اكثر .. و لا عندها استعداد باش تخسر اكثر .. يكفي .. والله تعبتها اكثر من الازم ..😔
لحظات الصمت فاتو عليها دهر .. و نظرات مختار و مريم قتلوها .. و بالاخص .. نضرات زياد لي تدبح بالوقت .. نظرت حب مخلطة بغل كبير .. قادرة تعرفهم و تفرقهم من الف نضرة و نضرة ... كبست بيديها الاثنين لي يرعشو في الفيلو و بلعت ريقها بالسيف ..💔.. عيونها الحلوين فيسع ما تعبو بالدموع من جديد ..و بدت تحس بدوخة خفيفة ... الدنيا بدت ترفع فيها و وتجيب .. و تحس في الارض تتحرك من تحتها.. حبت تقدم لمحمود .. و تتسند عليه .. لكن حتى رجليها خانوها .. و ستكثرو عليها خطوة وحدة توصلها ليه ... خطوة وحدة صغيرة توصلها لبر الامان .. 💔
.. وجع في بطنها قاعد يقوا ... و رجليها مش حاملينها أكثر من هكي...
" ما تستغربوش من كمية الخوف لي سيطرت على سحر .. كيف ما يقولو .. ما يحس بالجمرة ألا لي عافس عليها .. و ما يحس بالنعمة ألا لي طول عمره محروم منها ... و هي عاشت طول عمرها محرومة و الناس عافسة فيها .. يتيمة و ضعيفة و مقهورة و وحدانية ..قد ما حضرت روحها للمواجهه لكن ماتخيلتش انه الموقف يكون صعب لهدرجة . يا ريت تقدر تهرب .. ياريت تقدر تتراجع في الطريق لي مشت فيه .. هي في اللحظة هذي مستعدة تتخلا على كل شي .. حتى لو على محمود .. مش حمل ضربة تانيه و وجع جديدة .. اقل كلمة منهم قادرة تقحرقها في نفس لوقت ... بدت تلفت في عيونها المضببين عليهم كلهم
.
..و تشوف غير خيالات قدامها ..تشوف في زياد قرب بسرعه من محمود و وقف قدامه ند ل ند ... يحكي بيديه و يعيط .. وصوته يلعلع في قصر كامل ..لكن حتى الكلام مش مسموع بالنسبة ليها في الوقت هذا .. مش مفرزه منه ولا كلمة .. وجع بطنها يقوو و نفسها يضايق .... و في لحظة حست روحها داخت .وجسمها خانها واووووووووووووب ... فقدت الوعي .. كيف ريشة بيضة🌼. ضربته الارض ضربه قوويه فيلوه المنفوخ تفتح كلهه كيف جناح الفراشة ... و يديها الاثنين ترخفو من غير ما يشاوروها وعيونها تصكرو و برغم من هدا دموعها قاعده نازله ... شعرها لي كيف الليل تفرش على الارض وتاج لي يضوي تنطر من فوق راسها لبعييييييييييييد . ..و جا تحت رجلين مريم لي عفست عليه بغل ... وبسمة الشماتة على شفايفها..
.
ثواني قليلة .. و صارت فيهم كارثة كبيرة.. الناس كلهم يشوفولها و عيونهم مفتوحه على وسعها .. و بعدها شافو لمحمود لي تجمد في مكانه و حس اطرافه بردت .. قلبه طاح بين رجليه من المنضر لي قدامه... وجسمه بدا يرعش.. .. لا.. لا .. يكفي .. علاش كل مرة ينحط في نفس الموقف .. يكفي .. يكفي .. يكفي .. وخر خطوة لتالي.💔
.. عكس زياد لي قربلها يجري .. يحاول يفيق فيها ..
.
و محمود قلبه انقسم في أثنين .. شويه يركز فيها و شويا يشوف لي امه و بوه بنظرة مكسوووووورة و بعيون محروقين .. نضرة تحرق القلب ياناس .. منقدرش نوصفلكم حالته و لا كمية الوجع لي ترسمت في ثانيا على تفاصيل وجهه .. كان عريس و من لحظة كان ناوي يهد الدنيا على خاطرها.. لكن توا هوا لي تهد .. علاش هكي ؟ 💔.
ليش مكتوب عليه كل عيل يجيه يخسره؟
ليش مكتوب عليه يعيش طول عمروه بقلب بو محروق بموت صغاره ! مايكفيش ليث و امير ؟ ميكفيش حرقته عليهم لي لتو !! صغاره لي دفنهم بيده و دفن قلبه من سنين معاهم .. تي لتوا يشوف فيهم و يحس بيهم .. ا توا دور لبيبي مزال مش عارف حتى بوجوده بكل !! معاش عنده قدرة للوجع هدي كلها .. مش كأنها حاجة صعبه عليه ؟ ايه اكيد صعبه عليه .. .
مش ساهل يشوف عروسته و فيلوها الابيض لي لبسهولها بيده مكسي بالدم .. 💔 هو اضعف هلبا من الموقف هدا .. فوت يديه بقهره على وجهه لين بدا احمر .. ريقه يحس فيه . و من غير ما يشعر بدا يوخر بخطوات مسرعه .. خطوة ورا خطوة ورا خطوة ورا خطوة ... يوخر و هارب .. ايه هارب .. محمود هارب .. يهرب ولا قلبه ينحرق. يهرب و لا يحضر للمشهد لي سحر طيحت فيه بيبي منه .. 💔
.
.
#_يتبع

بهاء الحطاب