تألمت ثم عشقت آلامي في حبها

34

.تألمت ثم عشقت آلامي في حبها >> الحلقه 34

#_منقول
.
.
محمود راقد و يسمع في حركة في الفيلا .. هلبا دوشه و هلبا حركة .. ناض فادد .. خدا دوش .. و نزل كالعادته متأنق وبرفانه يوصل قبله.. ..😍..
.. نازل من دروج. عاقد وجهه ومطرم فمه .. و في نفس الوقت يقلب في عيونه في كل مكان يفتش عليها .. يبي يشوفها ... لكن ستغرب ما في حد في الفيلا ...
دخل للكوجينة وقف في لباب.. يلقا فاطمه و خديجة لابسين و متشيكين على غير العادة .. و قاعدين يوتوتو بالشويه..
ههههههه .. و سحر .. اااااععععععع .. سحر غاطسة في فازو النوتيلا .🍫
.. شفايفها كلهم شكولا .. خشمها ..ويديها .. وخدودها الموردين ...كلهم ..كلهم نوتيلا ..هههه تاكل و تبعد في شعراها من علا و جها ...مغمضة عيونها ومستمتعه بيها ...و كل شويه تقول "مممممم"...و ما نحكيلكم على حالة مودي و هوا يشوف فيها ..دار عليها جو علأخر.. و مركز معاها عالاخير كيف تاكل ...
....هي مالحضتش وجوده لكن هوا مركز معاها.. سكتت شويه هههههه .. تطعمت النوتيلا مليح مليييييح ... عوجت راسها و بعدين تكلمت ..
سحر - امي خديجة .. توا النوتيلا لما دير فيها شوية ملح تجي حلوه !! ...
هههههه .. محمود تصدم .. فتح عيونه على وسعهم ...و فاطمه طووول عوجت فمها مش عاجبها الكلام ... 😂
.فاطمه - أهو بدينا في الموال كل يوم !! ... بدينا في موال سحر
.سحر فتحت عيونها .. مش عاجبها الكلام .. حطت يدها في حزامها و تكلمت ...
سحر - خالتي فاطمه .. مش اني لي شتهيت ..
"فوتت يدها على بطنها ... مودي الصغير هو لي أشتها مش اني😌
.
ااااااععععع ... ومحمود ..هبل من تأثير الكلمة لي قالتها سحر ... قلبه خض في صدره بالقوي .. و تبسم من غير ما يشعر .. " مودي الصغرون 😍..
..
..فاطمه - مادام مودي الصغيرون هوا لي أشتها .. ناديله مودي الكبيرون يحققله رغباته☹ حت الشفور قالي كرهت الوحم حت مرتي بعتها لي حوش بوها تتوحم غادي 😒وحني 24 مطلعينه في نص ليل.

." خديجة طرشقت بالضحك 😂.وفاطمه و سحر يشوفو لبعضهم ..."
.. اما محمود مسكين قلبه وجعه من الكلمة .. هوا موجود .. ومرته تتوحم .. ومايعلمش. و الشفور هو لي يجيبلها في شهواتها .. تقول ولده يتيم !! .. ما عنداش بو .. كيف يغلطو و يتصرفو هكي معاه !! ...كيف يحرموه من ابسط حقوقه..محمود توا وين حسها .. توا وين عرف ان الموضوع يوجع عالاخير ... كبس روحه و دخل ... عاقد حواجبه .. حاطط يديه في جيوبه .. و يتكلم وهو متعصب عالاخير .. 🚫
.محمود - والله عنده الحق الراجل يفد .. يقولك اني شن دخلي ... بوه مهمله و مش متولي بيه تجي في راسي اني !! .. محمود المطيري مهمل صغاره.. مش هكي سحر ؟؟ ..
و تلفت لي سحر يا ميمتي .. عيونه تقدح بالنار .نظرته تحرق .. كل شي يقدر يسامح فيه .. حتى بعد ما هيه هجرانه .. لكن صغاره لا .. خط احمر بالنسبة ليه .. مافي حد يقدر يحرمه من حقوقه فيهم .. محمود راجل كان طول عمره مسؤول على صغاره .. بو بأتم معنى الكلمة .. نعرش كيف نفسرلكم احساسه. لكن .. هوا بجد توجع .. هوا تحرق من سنين .. و من سنين يستنا في عيل يداويله جروحه .. يرجع يحس معاه الاحساس الحلوو ..يرجع معاه يحس انه عنده سبب عايش على خاطره ...سحر جمدت في مكانها من نضرته ... ملامحه تخوف .. ما عرفتش شن تقول .. هههه .. غطست راسها في فازو النوتيلا .. و رجعت تاكل من سكات ..
خديجة حبت تلطف الموقف .. تبسمتله تبسيمة عسل .. مسحت على شعره و تكلمت ..
خديجة - صباح النور.. ..رقدت مليح !! .شن تبي تفطر قولي توا اني نجهز لولدي الغالي .. ☺
محمود ديريلي قهوء رسي بيطربق 😡...
.
قال الكلمتين و وقف بجنب خديجة يستنا في قهوته ... و كل شويه يشوف لفاطمه و سحر بنظرا ترعب في نفس الوقت هههه ... و فاطمه قالت خليني نتسهوك عليه شويه .. 😂
.
فاطمه - سحر شن رايك في النومة بجنبي السرير مريح وله ؟؟ ..
.
هههه .. و سحر تبسمت .. فهمتها تبي تتسهوك على محمود ... غرست راسها في النوتيلا و جاوبت ..
سحر - عالاخير خالتي ... والله مش عادي .. كل ليلة بنرقد بجنبك .. اصلآ انتي لا تتحركي و لا تقلقني ..
.فاطمه شدت السبحة و شدت الضحكة بالسيف ..
فاطمه- ملا .. متفاهمين .. من اليوم جنبي على جنبك☺ .
هما يضحكو و محمود ياكل في روحه .. لكن حس في حاجة غريبة .. كلهم لابسين و متشيكين .. تي حتى من فاطمه لي مش من عوايدها .. جا بيسألهم و بعدين بطل .. لكن قعد مركز مع سحر عالاخير .. يستنا فيها امت توقف هي قاعدة توا عالطاولة و مش قادر يشوف شي ..😂 يترشف في القهوة و كل شويه يسرق في النضر منها .. يسمع في كلامهم و ساكت .. لكن مركز معاها هلباا ..
بعد شوية وقت سحر كملت فطورها و ناضت .. و يا ريتها ما ناضت .. اااااععععععع 😍😍..
...محمود.. ضيق عيونه.. من غير ما يشعر قرب منها .. جمالها استفزه.. فوت يدبه بحنية على شعرها لي يوصل لاخر ضهرها و تكلم بحنية ..
.
محمود - خيرك لابسه هكي !! ..
سحر - طالعه
" .. جاوبته بكلمة وحدة .. زادت هبلته بيها😂 .. "
.
محمود - شن طالعه..!! كيف...!! وين ماشيه ..!
.
سحر - طالعه .. 😏
.
" طريقة اجابتها هالمرة خلت محمود يبدا يجن .لكن قاعد شادد روحه ... حاجة فيها مخليتها تسيطر عليه كله .. مايبيش يزعلها ..ا .. "
محمود - وين طالعة .. 😡
سحر- والله موضوع ما يهمكش ... هزت كتفها و جاوبت بستهزاء .. انا حرة ...
محمود - مافهمتش !! ..ليا اني الجملة لي قلتيها توا !! ...
سحر - ايه ليك انت .. انا طالعه .. رجعت قصتها ورا ودنها بدلع و تكلمت .. عندي موعد شخصي شويه..😌
..
" وهني محمود جن ..فوت عيونه عليها بسرعه.. جمالها لي ستفزه طلع مش ليه هوا ؟؟ .. هدا كله لغيره ؟؟ ..في لحضة معالم وجها تعقدو من جديد .. و صوته تغير .."
.
محمود - نعم !! موعد شخصي شويه !! ... بالك تشوفي فيا ..🔞.... هني !! .. مش راجل !! .. كيف كيف . مرتي تطلع وتخش من غير ادن !! .. اه نسيت .اصلآ عندك شهر تدخلي و وتطلعي على كيفك ... و منضمه جوك ..😡..
.
كلمة قالها محمود من قلبه .. لكن وجعت سحر عالاخير .. كلمة مرتي فكرتها باليلة المشؤمة لي مشت فيها للقصر المطيري عريس و عروسة .. كلمة سحر ماتحملتهش بكل.. هي اصلآ بدت حساسة عالاخير المدة هدي كلمة مرتي فكرتها بعدابها و كيف خلاها ملوحة بلفيلو ومشي ..وقعدت يومين في المصحة تستنا فيه توا تفكر انها مرته !! .. ولا يخليها امت مايبي .. و يرجع يتفكر انها مرته امت مايعجبه !!
.. و في لحظة تفكرت كل كلمة قالهالها زياد ... كل كلمة جرحها بيها و ذلها بيها رجعت دارت في راسها من جديد .. قاللها محمود ما يحبكش .. هوا فقط يحب يسيطر على الناس كلها و يملك كل شي .. انتي زي أي مرا طاغية الجمال استفزت رجولته .ولازم يملكها لا اكثر و لا اقل .و. يرميك امت مايعجبه و يرجعلك لما يحس انك لغيره ..قلبها وجعهاا مسكينة ... تبسمت بوجع كبيرة ... 💔"
.
سحر- كلمة مرتي رد بالك مازل تنطقها على لسانك ما يشرفنيش نكون مرت واحد زيك 😏
.
" ستب لي حد حني.. توا هيا تجاوزت جميع الحدود مع راجل عصبي لابعد لحدود .. جن . ..قرب منها بسرعة .. ضغط على يدها و تكلم .."
.
محمود - خيرك تتصرفي هكي. خيرك هبلتي !!... سكتت البارح صح .. لكن مش ناسي لي درتيه.. و حسابك عليه كبير .. 👌
.
نطرتله يده و تكلمت بعصبيه....
سحر - حاسب روحك قبل ما تحاسب الناس يا ولد المطيري ..ماعندك ليش تحاسب فيا وين نمشي وين نجي .. كلامك خليه محدود معايا ... و وجهك اني مانبيش نشوفه ... اني كرهتك .. و كان دير خير ترجع وين ما كنت ... اطلع من هني
." محمود تكبس كله من كلامها .. عرق رقبته برز من الأعصاب .. عيونه نار .. وصلت تهين فيه قدام امه و فاطمه !! .. عاش عمره كله بي كرامته وقدره.. مش تجي فرخة توا تطيحله قدره ولا تنقص من هيبته.. و توا نقدر نقوللكم ان صراع الكرامة نفتحو ابوابه ما بين سحر و محمود .. و هذا أبشع و اصعب صراع ما بين زوز .. صراع قادر يهدم كل شي .. صراع يتجرد فيه من كل احساس حلو بينهم .و العقل فقط هوا لي يسير العلاقة .. علاقة مرا كرامتها مجروحة صغيرة متجردة من التجارب و..راجل ناضج .. عنده هيبته و قدره خط احمر ... 😣.." ..بجد عيونه ضلامت من كثر الاعصاب... زاد قرب منها اكثر ..ضغط على يدها اكثر .. حط عيونه في وسط عيونها .. و تكلم بصوت ثابت .. فيه بحة جامدة تخوف .. "
...
محمود - الحوش هدا لي واقفة توا تطردي فيا منه حوش محمود المطيري .. المزرعة هدي لي انتي فيها ملك محمود المطيري .. الاراضي لي في المنطقة هدي كلها ترجع لمحمود المطيري .. الطريق لي انتي بتمشي منه لموعدك الشخصي مديره محمود المطيري .. كل حاجة هني ترجع ليا اني.. اعرفي حدودك مليح مليح .. و اعرفي من لي واقف توا قدامك .. و لو ما تعرفنيش مني الف واحد قادر يعرفك بيا ... كرامتي خط احمر .. ما نسمح لحد يفوته او يقلل منه.. و لي يفكر يديرها مانبيش نقولك شني ممكن ندير فيه..نرجع نقولك اعرفي انتي من تكوني لي واقف قدامك من يكون .. 🚫
. كلمات قالهم محمود و هوا راشق عيونه في وسط عيونها .. كلمات نزلو كيف السم عليها .. كل كلمة كان يقولها كانت تتغرس في قلبها كيف الخنجر .. مع كل كلمة قالها دمعة نزلت من عيونها .. لدرجة انها حست النفس بينقطع عليها .. توا رجعها لحجمها الحقيقي .. توا خلاها تعرف بجد هيه شن في نضره و هي شن تسوا ... جملة " أعرفي انتي من تكوني والي قدامك من يكون " قعدت ترن في وذنها ..
بطنها وجعتها ...وتبي تحبس دموعها وجعها قدامه لكن ما قدرتش .. بالعكس ... دموعها قوو و صوت شهقها نسمع ... 💔
توا سحر عرفت بي وضوح كبييير هي شن بالنسبة ليه . محمود المطيري رجل اعمال من العيار الثقيل .. و هي وحدة يتيمة .. جت عنده و تحت ضله. عاشت هيه و صلاح من خيره .. و توا عايشة في خيره. رسالة محمود وصلتها بكل وضوح .. مأبشعه هالاحساس حسسها بالذل بكلامة حسسها بالنقص ... 💔..!!
خديجة و فاطمه ولا وحدة فيهم تجرأت انها تنطق كلمة .. يعرفوه كيف يتعصب .. ما يفهم شي .. تقدرو تقولو انه .. تكبر .. جباروت .. قوة .. اي هذا هوا محمود المطيري .. مستحيل يقبل حد يطيحله كرامته ...
و سحر قلبها تحرق حرق من كلامه
.
".. دموعها ماكفو علي خدها ..و الصمت ملا المكان .. شهقتها تنسمع .. تبلع في غصتها بالسيف ... و من غير ما تشعر رفعت يدها .. دفاته باقواى جهدها .. و تكلمت بصوت مقطع من البكاء يوجع القلب ... 💔
.سحر - ما.. ما ..ما غلطش زياد لما قال عليك اناني .. قال عليك اناني ... وتحب روحك .. و تحب تملك الناس .. نعرف روحي مليح شنيي ...مجرد وحدة كانت و مازالت عايشة في خيرك .. تبكي و تمسح في دموعها بكف يدها .. تو نخليهالك الفيلا متاعك و أرضك. .. و كل شي ... ✋
.
." .صح محمود جرحها و مسلها كرامتها .. الفقر عمره ما كان عيب .. و ضروفها مش هيا لي ختارتهم ... و الغريبة في الامر ان محمود عمره ما كان طبقي او يفكر بالطريقة هدي !! ..لكن يمكن غيرته و حبه و وشوقه ليها خلاه يتسرع و يقول هكي .. 💔"
.
سحر .. تلفتت لخديجة ... ترعش كلها و تحكي بصوت كله وجع ...
سحر - يا ريتني خديت راي زياد .. يا ريتني هربت من المصحه و لا ندليت من جديد
... دفاته بالقويه من صدره مرة تانيه .. و طلعت نجري بسرعة أتجاه الباب ...
. و محمود زاد هبل و جن جنونه.. من كلامها.. كانت بتهرب !! .. و تتحصر علي زياد من فوق ؟؟ ...
.
" سحر فتحت باب الفيلا المرش و هوا يخطفها من يدها .. يضرب الباب برجله يصكره بالقوي .. جابه كله مدشدش في الارض .. شاددها من يدها قريب يكسرهالها .. كان ينطلق عليها ياكلها ماكلة ..لكن هو قاعد متحكم في روحه شويه. يتكلم و يسأل فيها بعيونه .."
محمود - وين ماشيه !! وين ماشيه نتكلم معاك جاوبي .. 🔞 .....
سحر -طالعه و مخليتلك املاكك أشبع بيهم ...
محمود - دخول الحمام مش كيف طلوعه .. اكيد مش حنخلي ولدي ليك تربيه .. ولا يربيه صاحبك لي تتحسري عليه ..
.
سحر مسكينة حست روحها تخنقت ومعاش قادره تتنفس من كلامه. مش قادرة تتحمل وجع اكثر من هكي ... تحاول تتنفس بصعوبة .نطقت بالسيف ..
سحر - ش .. ش .. شن تقصد...
..."محمود ركز شويه فعيونها لي يوجعو القلب ... في دموعها.. في نضرت القهرة لي في وسطهم .. للحضة وجععه قلبه ..حسها أنها صغيرة و ضعيفة و الكلام لي قاله قاسي عليها .. لكن كل شي ولا كرامته .. لصقها في الحيط ... و زاد لصق فيها ..فوت يديه على بطنها .. و للحضة رعش ... هدي اول مرة يحس فيها بوجوده ..❤ وسحر بطنها وجعتها من لمسته.. و قلبها وجعها من كلامه .. حست ان البيبي لي في بطنها حس بلمست بوه و فرح بيها محمود.. قلبه رعش اول ما حط يده علي بطنها .. حس باحساس غريييب وحلووو .. حس بولده و بوجوده في الدنيا هدي .. احساس قوي عالاخير خلا عيونه يتعبو بالدموع ...💔
سحر غمضت عيونها من قوة الاحساس ...القطعة لي بينهم خلا احساس غرييييب يتملكهم ... احساس قوي خلا دموعهم هي لي تحكي .. قلوبهم تضرب بنفس القوة .. و الاثنين حاسين بوجود القطعة الصغيره لي تربطهم ... ❤
محمود فوت يديه بحنيه على بطنها .. غمض عيونه من غير ما يشعر ... صوته هرب عليه في اللحضة هدي .. حاول يتكلم .. لكن صوته خانه..ضغط بيده بشويه على بطنها و تكلم بصوت كله بحة .. بحة مخلطة برجولة تقهر .. ...
.
محمود - هدا متاعي يا سحر .. متاعي اني.. وين اني وين هوا ..ما حد ما يقدر يبعده عليا .. تبي تبعدي ابعدي .. لكن هدا متاعي اني .. و طول ما هوا مزروع فيك .. انتي تحت سلطي .. 🚫
...
سحر من قوة كلامه حست بدوخه وعيونها تصكرو.. كأنهم يرفضو في هالواقع الصعب وترعش من الخوف ... كبست يديها علي يديه باش تعتمد عليه .. جسمها ضعيف و تاعب .. و بكلامه توا هوا زاد هده ..دموعها سايلين . نطقت بصوت موجوع و مجرح بطريقة غرييييبة 💔 ..
سحر - ش ..ش... شن تقصد ..بتخدلي ولدي محمود 😣 ..
" ومحمد .مسكين قلبه تحرق .من جيهة منها .. من جيها عليها .. و من جيهة على ولده .. خايف... خايف و هي مش فاهمة خوفه ... خايف تهرب من جديد و تخليه .. خايف تمشي لي زياد و تحرقله قلبه بفراق جديد ... حاسس بيها ... حاسس بوجعها و بضعفها .. فتح عيونه شويه يركز فيها .. برغم من انوثتها و درجة فتنتها لكن اول مرة يحس انها صغيرونة .. و لاول مرة يجي في باله عمرها .. 19 سنة صغيرة و مش حمل الكلام لي قاله.. لكن الله غالب .. و كلمته مستحيل يتراجع فيها لو على قطع رقبته .."
.. قوى روحه.. قرب منها اكثر .. حط جبينه على كتفها .. زاد ضغط على بطنها اكثر .. تنهد بوجععع و تنهيدته حرقتلها رقبتها ..عفس على قلبه و تكلم .💔
..
محمود - هدا ليا يا سحر .. تبي تمشي لزياد امشي مش حنمنعك .. لكن هدا ليا .. و طول ما هدا مغروس في وسطك حت انتي ليا .. لمدة 7 شهور انتي متاعي .. "قرب منها أكثر و وشوشها ".. لمدة 7 شهرور انتي ملكي الخاصة على اسم محمود المطيري .. ترقدي جنبي ... تفيقي قدام عيوني .. تتنفس من هواي.. تاكلي من صحني ... وتتصرفي حسب كلامي. وبعد 7 شهور هادم .. ربي معاك .. خليلي ولدي و بري لصاحبك لي نادمة على فراقه.. ✋
.
محمود قال لكلمتين هدم بروح صفره وطلع البرة يرجع في نفسه ...عمره ماكان قاسي بالشكل هدا مع حد ...
و سحر مسكينة طاحت فوق الأرض ترعش .. شن لي شن بيصرلك تاني ياسحر .. تيتمتي .. وبوك يكرهك ولوحك .. خديتي راجل عمره 60 سنه تفنن في عدابك .. جعتي .. تدليتي .. تعريتي .. طمعو فيك الكلاب .. تقهرتي .. تضلمتي .. تحرمتي من كل شي ..لكن صبرتي... و توا !!... توا بيحرموك من ولدك !! .. ااااااه يا دنيا .. شن بديري فيها تاني ... 💔
.
وقفت تكركر في رجليها تكركير .. هالفيلا الطويلة العريضة غامه على نفسها .. خانقتها .. مش متحمله تقعد فيها بكل ... لكن وين بتمشي .. ماعندك غير الشارع .. و حتى الشارع محرم عليك .. .. كيف ما قالك هوا .. انتي توا ملك لمحمود لمدة 7 شهور ..ولما ياخد ولده بيطردك لي اقرب كناسة ..ههههع .. اااااه يا دنيا اااه .. .سحر. رقدت فوق السرير .. جسمها تحس فيه رزييين عالاخير .. للحضة الدنيا دارت بيها ..
.
في الوقت هذا خديجة قررت انها لأول مرة تواجه محمود من سنين ... لاول مرة من 3 سنين بتوقف قدامه و تناقشه... .لاول مرة بتسترجع حقوقها كأم وتواجه ... و لأول مره قررت بتعطيه كلمتين تحبسه بيهم عن الطريق لي ماشي فيه ... 👌
.
طلعت لقاته تحت شجرة كبيييييرة في الجنينة ... يمشي و يجي بعصبيه وفي عيونه باين كمية النار و والزعل لي فيهم
.. اي حد يقدر يفهم انه متعصب لكن مش اي حد يقدر يفهم أنه تاعب من داخل ...ونادم علي لي داره ...ماعدا الام .. الام لي مهما كان قلب ولدها غامض ومصكر تقدر و بسهولة تامة تقرا شن لي فيه .. و تشوف شن في وسطه 💔 "
.... قربت منه بعيون كلهم دفاء و حنان .. و بصوت فيه بحة غرييييبة خلاته يرتاح ..
خديجة - محمود المطيري عمره ما غلط في الناس .. و عمره ما عفس في غيره ... محمود ولدي عمره ما حسس حد بفقره و بضعفه ...
.
محمود رفع راسه مستغرب .. ضيق عيونه و جا بيولع فيها .. لكن هالمرة لا ..هي كانت اقوى منه .. منعته بجملة ما كانش متوقع أن يسمعها بكل ... و معاها بسمة ثابتة ..
قربت منه .. حطت عيونها في وسط عيونه. و تكلمت بصوت ضعيف لكن قوي في نفس الوقت ..
خديجة - أنت لما حبيتها لهدرجة حاول تتنازل شويه.. لو انت مش طايق بعدها و فراقها .. حاول تكسبها ...لي قدامك مش مريم .. لي قدامك سحر .. بنت صغيرة و ضعيفة .. لي قدامك انسانة الحياة خلتها قابلة للكسر من أبسط الاشياء .. لي قدامك حاملة قطعة منك في وسطها .. و لي قدامك هي مالكة لقلب محمود المطيري .. ما تكابرش يا محمود .. انت ما جربتش و ماحبيتش... لكن هالمرة انت عشقت ... ما تكابرش و تخليها تهرب منك ... سحر لو مشت لزياد صدقني مش حتمشي بروحها ...✋لو مشت يا محمود بترفع معاها قلب محمود في يدها و تحطلك في مكانه كومت نار مستحيل يجي يوم و تطفا ..
.
"محمود.. يسمع فيها و مش مصدق صراحتها ... و مش عارف شن يجاوب .. يمكن يكون خبير في كل شي و الدنيا علمته كل شي ...لكن هوا مازال سنة اولى بتدئي في مدرسة الغرام .... و خديجة .. جت راجعة للفيلا .. مش محتاجة تسمع اجابته .. من نضرت عيونه فهمت كل شي .. لكن لازم تكمل هالجملة قبل ما تمشي ... 👌
.
خديجة - الموعد الشخصي شويه لي كانت مشيتله سحر و مجهزتله روحها كان مع الدكتور .. كلنا متشيكين و متشوقين ..اليوم للبيبي عندها صورة إيكو .... 💔
.
" هههععع ... و توا ما نحكيلكمش على احساس محمود هههههه ... قلبه قريب يطلع من صدره ... هالراجل صح عصبي لكن زي موجة البحر .. في لحضة ينقلب حاله هههه .. اول ما سمع الكلمة عيونه لمعت بالفرحة ..❤
.
ههههه .. نسي كل شي .. نسي لي صار كله ... نسي انه جرحها ... قرب بسرعة من خديجة .. يتبسم زي المهبول هههه .. قلبه بيطير ....❤
محمود - كيف.. كيف اليوم بنشوف البيبي !! ... تحكي بجديات امي .. اليوم بنشوف ولدي ...😍
.
خديجة - هدا لو وافقت امه .. بعد الكلام لي قلتهولها .. قال ملك بئسم محمود لمدة 7 شهور !! .. ما شبعتش من الملك يا ولد المطيري ؟؟ ... 😒
.
محمود ضحك ..و قرب منها .. وطا صوته شويه.. وتكلم ..
مجمود - و العسل مني يشبع منه... سحر متاعي اني.. و اني عمري ما نشع منها ..❤
.
مشي خطوتين ورجعلها ... وشوشها في ودنها ..
محمود - متاعي على طووووووول لعمر كله مش لمدة 7 شهور .بس.. ملك على اسم محمود طول لعمر .. مدام سحر المطيري 😍😍
.
مشي خطوتين ورجعلها ... وشوشها في ودنها ..
محمود - متاعي على طووووووول لعمر كله مش لمدة 7 شهور .بس.. ملك على اسم محمود طول لعمر .. مدام سحر المطيري 😍😍 ...
.
طبع بوسة مرصوصة على راسها.. و كمل كلامه ..
محمود - جهزي روحك ... و جيبي امي فاطمه معاك .. اليوم بتشوفو ولد المطيري😌 ..
.ههههه .. طلع يجري زي المهبول .. 😂... وقف قدام باب غرفتها .. هههههه .. وقف شويه .. عدل روحه ... ورجع محمود الصعب ... فتح الباب و خش عليها ..""
.
سحر ..زي القطوسة .. ملفوفه على روحها .. ..شعرها مفرود فوق سرير .. .. مشهد مغري لي أبعد الحدود قدامه ... مرا فاتنة بأتم معنا الكلمة راقدة قدامه .. .. جذابة .. حتى في اتعس حالتها جدابة .. قرب منها من غير ما يشعر ... مد يده و فوتها بحنية على شعرها بحنية ... لمسته فيها سحر يهبل عالاخير ...
سحر... نطرتله يده من عليها .. و في لحضة جت واقفة قدامه .. تتكلم و ترعش ..
سحر - شن تبي مني انت توا ! .. شن لي ناقص و ما قلتاش ... 😢
.
تبسم وتكلم محمود - مش تفاهمنا و قتلك انتي ملك متاعي .. شن لي رقدك هني .. النوم من توا على سريري .. معايا .. بجنبي ... غمزها و كمل كلامه ... و كان لزم تحتي .. 😉
.ههههههه😂 .. و سحر واقفة مش فاهمة شي .. خيرا هذا مجنون ... من شويه مسح بيها الارض و توا يقوللها ترقدي تحتي !! .. جت بتولع فيه .. لكن فات الوقت .. هههههه 😂
محمود.. قرب منها بسرعة .. طبس .و. لف يديه على رجليها و تاتيه على ضهرها ..رفعها بين يديه بشويه 😍.. يضحك و وميت بضحك 😂.. و توجه بيها للباب ... وسحر تعيط وتحرك في رجليها الحفيانين بسرعة ..
سحر - سيبني .. سيبني .. شني جنيت .. يأامي خديجة .. يا خاااااالتي ...
هي تعيط و هوا يطغط عليها بين يديه .. و نازل يجري بيها ... حطها في سيارة من تالي و هي حفيانة هههه ... حطلها حزام الامان .. بعدلها شعرها لي قدام وجها .. باسها من خشمها الصغيرووووون ... و ركب هوا من قدام يضحك 😂 ..
و سحر مسكينة مش فاهمة شي ... تلفتت تلقا بجنبها خديجة و فاطمه راكبة من قدام ..
.
.
#_يتبع

بهاء الحطاب