درب العشق سلطاني

البارت ١٢

"اللهم صلِ على محمد وال محمد"

درب العشق سلطاني ..
البارت١٢ ..

يمن لچمك تسابيحي
ونزيز إجروحي إبثارة
يالترهم على ايامي ، ضحك وشموع تسيارة

،

ايناس؛:
ثاني يوم الطلع بي جدي من المستشفى .. گعدت من الصبح علمود اسويلة ريوگ .. سويتلة بيض سلگ وخبز شعير وگلاص حليب .. كلة صحي بدون دهن .. اني من غير كلشي جنت اخاف علي وما اخلي ياكل دسم .. مو عاد هسة وهو مريض ..

عزيز اليوم يلتحق .. هم حضرتلة ريوگ وسويتلة عصير ..
افتر واحس تعب ايام الفاتحة بعدة لحد الان بية وبلاعيمي مطبگة .. بس محد غيري هنا يشتغل .. حبوبتي مرة جبيرة وتتعب بسرعة ..

وهذا السبب الاساسي الي مخليني لحد الان ارفض الزواج .. ما ينطيني گلبي اعوفهم ومن افكر بيهة منو الهم اذا رحت اني ..

اخذت الريوگ ورحت لغرفة جدو لگيت حبوبتي تعزل بغراضهة وتستغفر بصوت عالي ..

طلع جدو من الحمام متوجي على عوجية لان مشيتة ثگلت بطيحتة هاي .. وين جان قبل يمشي بطولة وظهرة قوي ..

ايناس : صباح الخير ..

ردو ثنينهم : صباح العافية ..

-ها تتريگون .. حتى تاخذ دواك جدو ..

-اي بوية عاشت ايدج .. اخوج اجة ؟

-لا بعدة .. هسة على جية ايجوز ..

-على خير ان شاء الله..

تميمة : ايناس صبيلي استكان چاي حبوبة ..

-اي صار ..

صبيتلهة واخذتة ورجعت للمطبخ ..
باوعت من الشباك شفت عزيز اجة ووراه حيدر ..
ثنيناتهم مزينين شعرهم واللحية نفس زيانهم القديم ..

لبست حجابي عدل .. اني افتح باب المطبخ اول ما اگعد واشغل الصوندة بالحديقة .. ومن ارجع بس اطبگة ..

فتح الباب عزيز ومد راسة مثل العادة يتأكد اذا لابسة حجابي لو لا ..

ابتسم من شافني وفتح الباب كلة : صباح الخير ..

-صباح النور .. شلونك حيدر ..

-هلو ايناس .. شلونة الحجي ؟

-الحمدالله .. گاعد يتريگ روحلة ..

راح الهم وعزيز اجة يباوع للطاولة : هاي شمسوية ؟