درب العشق سلطاني

البارت ١٠

"صلوا على محمد وال محمد"

درب العشق سلطاني..
البارت ١٠ ..

.

مامش طعم بالروح من شالو بعيد ..
راحو علية اعزاز يسوون الف عيد ..

.

نادية؛: فتحت عيوني ما لگيتة بصفي .. فزيت وكمت بسرعة ادور علي .. وين راح ؟

يمتة بدل شلون ما حسيت علي واني نومي خفيف ..
ماكو لا السويج ولا المحفظة .. طلعت برة مدري شدور ..

شفت ملابسة الي نام بيهن البارحة مشمورات عالقنفة بالصالة ..
دخلت للحمام مال الهول شفت البخار بعدة بي وبطل الشامبو بالگاع .. سبح هنا مو بحمامنا حتى لا احس بي واگعد ..

رجعت للغرفة اخذت تليفوني وطلعت ..
نزلت نرجس من فوگ لابسة تراك والنوم بعيونها وحواجبها طابگتهن ..

نرجس : يمة وين راح ابوي .. الشمس هستوها طلعت ..

-شفتي ؟؟ شفتي وين راح ؟ يمتة طلع ..

-هسة صار ربع ساعة .. فزيت على حلم يخوف واني اصلاً غفيت عالكتاب .. وسمعت صوت سيارتة اشتغلت .. باوعتلة طلعها من الحوش ليبرة ونزل سد الباب الخارجي .. حتى جان مبدل لابسة بنطرون وسترة .. مو دشداشة ..

كعدت كمت اكل بروحي .. گلبي هيج يرجف خوف علي ..
دكيت على تليفونة ونرجس كعدت بصفي ..

-يمة شبيج ؟ جاي ترجفين ..

ما رديت عليها .. اريدة بس يجاوبني ..
فتح خط وسمعت صوتة ردت روحي ..

-ها نادية ..

-ويييين انت وييين ؟ وين رحت ..

-طلعت لبغداد .. رايح لابني ..

-شلون طلعت ؟ مو عمي گالك انتظر حيدر وروحو سوة .. ليش رحت ؟؟؟

-ماكدر .. ما عندي صبر .. رايح اشوفة ..

-ليش ما اخذت وياك واحد من الولد .. خابر بسام يروح وياك هو يسوق .. الطريق طويل وانت تعبان ..

-مابية شي والله .. ما احتاج احد مو جاهل اني اكدر اسوق وحدي ..

-فدووة ارجع مادام بعدك قريب .. فدوة اغديلك ..