အရုဏလက်များ ပိုမိုတုန်ရီလာသည်။
သူ၏ကြောက်ရွံ့ခြင်းများပိုမို၍ ပြည့်ကျပ်လာကာ ရင်ဘတ်ထဲမှတစ်ဆင့် ခန္ဓာကိုယ်တစ်ခုလုံးတဆစ်ဆစ်နှင့်နာကျင်လာသည်။ နှလုံးသားရှိရာ နေရာတစ်ခုလုံး အလွန်အမင်းတင်းကျပ်လာသည်။
သူယုံကြည်သည်။
သူ့ ယုဂန် သေဆုံးမည် မဟုတ်ချေ။
သူ ယုဂန်၏ဘယ်ဘက်ရင်အုံအပေါ် လက်တင်ကာ အစွမ်းအချို့ကို အသုံးပြုလိုက်သည်။ ယုဂန်၏သွေးကြောထဲ စီးဝင်နေသော အဆိပ်တို့ကို ဖယ်ရှားပြီး ယုဂန်၏နှလုံးပြန်ခုန်လာအောင် သူအလျင်အမြန် လုပ်ဆောင်ရမည်။
ယုဂန်ကို ခေတ္တမျှအသက်ထိန်းပြီးသည်နှင့် သမားတော်ဆီ အမြန်ခေါ်ဆောင်သွားရမည်။
ယခုအချိန်တွင် သူ့အတွေးထဲ၌ စစ်ပွဲသော ဘာသော ရှိမနေတော့ချေ။
အဏ္ဏ၊ စုန်းထီးနှင့် မင်းယောဇာတို့အဖွဲ့တိုက်ခိုက်နေသော အသံများက သူ့အတွက်မရေးမပါတော့ပေ။ အချိန်တစ်ခုကြာပြီးသည့်နောက် မင်းယောဇာနှင့်တကွ မျက်တစ်လုံးရှင်တို့ လွတ်မြောက်ထွက်ပြေးသွားသည်ကိုလည်း သူဂရုမစိုက်နိုင်ပေ။
သူ၏မျက်လုံးထဲတွင် ယုဂန်သာရှိနေသည်။
သူ၏ယုဂန်ကလွဲပြီး မည်သည့်အရာကိုမျှ သူ,ဂရုစိုက်နိုင်မည်မဟုတ်ချေ။ စစ်ပွဲ၏ နိုင်ရေးရှုံးရေး မည်သို့ပင်ဖြစ်ဖြစ်၊ သူလျစ်လျူရှုလိုက်မည်ဖြစ်သည်။
ရုတ်တရက်....
ဝုန်း!
ကျယ်လောင်သော အသံတစ်ခုနှင့်အတူ မိမိတို့ခေါင်းပေါ်ရှိ မဟာမြေထုကြီးမှာ လေပေါ်သို့ မြောက်တက်သွားသည်။
အရုဏသည် ယုဂန်ကို ရင်ခွင်ထဲထွေးပွေ့လိုက်ရင်း အပေါ်သို့ မော့ကြည့်လိုက်သည်။
အပေါ်တွင် သူ၏ခေါင်းပေါ်ရှိ မြေထုကြီးမှာ အပေါက်ဖြစ်သွားပြီး အပေါက်မှတစ်ဆင့် ကောင်းကင်ထိတိုင်အောင် ရှင်းရှင်းလင်းလင်းမြင်နေရသည်။
မြေထက်တွင်မူ ထည်ဝါသော၊ လှပသော၊ ဆန်းပြားသော ဝတ်စားဆင်ယင်မှုများရှိသည့် နတ်သား သုံးဦးနှင့် မြေပေါ်တွင်မတ်တပ်ရပ်ကာ အပေါက်ထဲသို့ ငုံ့ကြည့်နေသော လူတစ်ဦးကို တွေ့မြင်ရလေသည်။
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...
Chapter : 138
Start from the beginning
