The Everlasting One (volume 2 + 3 )

Chapter : 118

Unicode

ရာဓဇတိုင်းနှင့်တွေ့ဆုံခြင်း

_________________________

ဒေါက်၊ ဒေါက်

တံခါးကို လက်ဆစ်ဖြင့် နှစ်ချက်ဆင့်၍ ခေါက်လိုက်ပြီးနောက် ရှေ့ဆက်မည်သို့ခေါ်ဝေါ်ရမည်ကို ပီယံမိတ်, စဉ်းစားယူလိုက်ရသည်။

ရေဝတီဟုခေါ်ဝေါ်ခြင်းသည် ရိုင်းသည်ဟုမဆိုနိုင်။ သို့ရာတွင် သူမ​၏သရုပ်မှန်ကိုသိပြီးဖြစ်သဖြင့် မိမိထက်ဂုဏ်နိမ့်သူနှယ် အမည်ကိုခေါ်ဝေါ်ခြင်းမှာ မသင့်တော်ကြောင်း ပီယံမိတ် ဆင်ခြင်မိသည်။ ထို့ကြောင့်

" အရှင့်သမီး အိပ်ရာကနိုးပါပြီလား"

ဟု ယဉ်ကျေးရိုသေစွာ အခေါ်တော်ရှိလိုက်​၏။

ထိုအခါ အရင်ဦးဆုံး အခန်းထဲမှ ဒုန်းဒုန်းဒိုင်းဒိုင်းအသံကြားလိုက်ရသည်။ နောက် အပြေးအလွှားလာသံ။ နောက်ဆုံးမှ အခန်းတံခါးပွင့်သွားသည်နှင့်အတူ ရေဝတီ​၏မျက်နှာထွက်ပေါ်လာသည်။

" နိုးပြီ"

ရေဝတီသည် မနေ့ကအတိုင်း ငါးရိုးကျစ်ဆံမြီးကို ပင်လယ်ပြာရောင်ကြိုးများနှင့် သွယ်ယှက်စည်းနှောင်ထားသည်။ သူမ​၏ ထူးခြားစွာလှပသောမျက်ဝန်းများမှာ အိပ်ရေးဝ၍ထင့်၊ ကြည်လင်ရွှန်းလဲ့နေသည်။ မျက်ဆန်တို့ကတော့ ပတ္တမြားရောင်နှယ် နီတီတီဖြစ်နေ​၏။ နဂါးအသွင်မှ လူအသွင်သို့ပြန်လည်ပြောင်းထားသည်မှာ မကြာသေးသဖြင့် မျက်ဆန်တို့ အနီရောင်ကျန်ရစ်နေခြင်းဖြစ်နိုင်သည်။ ထိုသို့တွေးတောနေခိုက်မှာပင် ရေဝတီ​​၏မျက်ဆန်မှာ အနီရောင်မှ ပကတိအညိုရင့်ရောင်သို့ ပြန်လည်ပြောင်းလဲသွားပြီဖြစ်သည်။

" အခု မင်းသားအရုဏနဲ့အမတ်ယုဂန်ဆီ သွားပြီး အကြောင်းစုံရှင်းပြရတော့မှာလား"

ရေဝတီက မေးသည်။ သူမ​၏လေယူလေသိမ်းမှာ အလွန်တရာပေါ့ပေါ့ပါးပါးရှိလှလေရော ပီယံသည်လည်း သူမကို တရိုတသေမပြောနေတော့ဘဲ သူငယ်ချင်းသဖွယ်ပြောရကောင်းလားဟု ဒွိဟဖြစ်မိသည်။

" အစကတော့ အဲ့သလိုအစီအစဉ်ပေမဲ့ အခုလုပ်လို့မရတော့ဘူး။ အစ်ကိုတော်နဲ့ အစ်ကိုယုဂန် မရှိတော့ဘူး"