"နဂါးမျက်ရှင်က နဂါးတစ်ကောင်ရဲ့အသက်ပဲဟာကို၊ သူ့ကိုပေးခဲ့တယ်ပေါ့။ ခင်ဗျားပြောတော့ မင်းကြီးမဟီနဲ့က ချစ်သူမဟုတ်ဘူးဆို"
" မဟုတ်ဘူးလေ။ အကြောင်းရှိလို့ သူ့ကိုပေးခဲ့တာ"
" ဘယ်လိုအကြောင်းလဲ"
အဏ္ဏ ချက်ချင်းပြန်မဖြေသေးဘဲ ဆွဲကြိုးအလွတ်ကြီးကို ယုဂန်ဘက်သို့ ပြန်ပစ်ပေးလိုက်သည်။ ထို့နောက် လက်ထဲကိုင်ထားသော နဂါးမျက်ရှင်ကို စိုက်ကြည့်ရင်း မပွင့်တပွင့်ဆိုသည်။
" ပြန်ဝင်စားတဲ့ သူ့ကို ပြန်ရှာတွေ့အောင်လို့ ငါ့နဂါးမျက်ရှင်က ဘဝဆက်တိုင်း သူ့ဆီပဲရောက်ပါစေဆိုပြီး မန္တာန်မှုတ်ထားခဲ့တာ။ သူသေခါနီးအချိန်မှာ ငါသူ့ကို အဲ့ဆွဲကြိုး ဆွဲပေးခဲ့တယ်"
" ဒါမှ ခင်ဗျားက ပြန်ဝင်စားတဲ့သူ့ကို ရှာတွေ့မှာပေါ့။ အဲ့လိုလား"
အဏ္ဏ ခေါင်းညိတ်သည်။
ယုဂန်မှာ သူ့ရှေ့ရှိ ခန့်မှန်းရခက်သောနဂါးကိုကြည့်ရင်း သနားရမည်လား၊ ကရုဏာဒေါသဖြင့် မာန်မဲရမည်လား မသိတော့ချေ။
ဒီနဂါးဟာ သူ့စွမ်းအားနှင့်အသက်ကိုရင်းပြီး အလောင်းကစားကြီးကြီးတစ်ခု ပြုလုပ်ခဲ့သည်။ ဤသည်က မိုက်မဲခြင်းလား၊ ရူးသွပ်ခြင်းလား ဝေခွဲ၍ မရနိုင်အောင်ပေ။
ယုဂန်: " အန္တရာယ်မများဘူးလား။ ခင်ဗျားက မန္တာန်မှုတ်ထားတာတော့ ဟုတ်ပေမဲ့ ဒီဆွဲကြိုး သူ့ဆီပြန်ရောက်နိုင်ချေက အရမ်းနည်းတယ်လေ။ ဒီကြားထဲ ခင်ဗျားမျက်ရှင်ကို တခြားလူ ရသွားတာတို့၊ ဖျက်ဆီးခံလိုက်ရတာတို့လည်း ဖြစ်နိုင်တယ်။ အဲ့အခါ ခင်ဗျားသေမှာ"
"အဲ့ကျတော့ရော ဘာဖြစ်လဲ။ ငါက နေမထူး သေမထူးပဲဟာ။ မဟီနဲ့မတွေ့ခင် သေရမယ်ဆိုရင်တောင် ငါအေးအေးဆေးဆေးသေနိုင်တယ်"
ပခုံးတွန့်ကာ အေးဆေးပြောလာသည့် အဏ္ဏ၏ဟန်ပန်ကြောင့် ယုဂန်မှာ မည်သည့်စကားဆက်ရမည်မသိ နှုတ်ဆိတ်သွားမိသည်။
အဏ္ဏက ဝမ်းနည်းနေပုံမပေါ်၊ ဒေါသထွက်နေသည်လည်း မရှိ၊ စိတ်ဓာတ်ကျနေခြင်းလည်းမဟုတ်၊ မိမိကိုယ်ကို အဆုံးစီရင်လိုသော အပြုအမူလည်းမပြပေ။
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...
Chapter : 134
Start from the beginning
