أسيرة هوس السادي 18+(كتاب تابع تكملة القصة هنا)

الفصل الثالث: قلوب محترقة (ح191)

★★★★★★

سمرة سارة ورانيا جالسين حذا بعض زادتهم منمن متنهدة براحة
أمنية: أونفان ترحمت مالتجمع هذاك
رانيا: علاه شبيه؟! وش قالولك؟!
أمنية: وش ماقالوش وجهي وفمي غلبو وهم ماغلبوش مالهدرة
سمرة: وماراحش يغلبو ماصدقو لقاوك هههه
سارة: بيانسير فرصة وطاحتلهم قعدو مع مرة الآغا.. لازم يجبدولك مخ راسك هههه
رانيا: مايروحو حتى يحفظتو كبيرة وصغيرة عليك هههه
سمرة: سير.. والنوع لمخطر لي يبقى ساكت هذاك زي لكاميرا يسجل صوت وصورة هههه
طرشقو بالضحك.. لقفتهم لكاميرا تع مليكة ميلت راسها لسلوى يمنشرو
مليكة: بنتك شحال نية شوفي زيماه تضحك مالقلب ا خلايا كون جيت فبلاصتها نغضب حتى لعيد لعايد مانقابلكمش
سلوى: تفف من فمك.. علاه ماتعيدش عليا بنتي؟! عوينة وحدة لي عندي
مليكة: عوينة وحدة وتعمات.. فعوض ماتدلل فدار بوها سبقو لخير للكنة.. وين صرات هذي ا خلايا
سلوى: غزلت: اسكت ماتفكرينيش.. كنا فعيد صبحنا قالو عقيقة.. قبيل تفقصت صباح ربي
مليكة: تتجلطي مش تتفقصي برك.. بنتك لولى ولأولى تفرح بيها لعيلة حتى من ولادتها سبقت تاع أمنية.. شطحت فمها محرحرة: ناري بنت رحمة ماطايلة.. جات ملتالي وقالت مالي.. ماتعيي تمشيكم كامل زي لخاتم فصبعها.. تربية رحمة لفرررس ماتغركش كي تضحك وتلعبها نية راه مصييبة فوق لرض
خرج رمضان من شطحو الشواطن من وهاهو شيطان مليكة خدم خدمتو وسلوى غلا دمها خممت تنوض تلوح أمنية وولادها ملبالكون.. تخرجهم من حياتها ويرتاح قلبها لعامر جهتها

مع كل كيلومتر يقطعوه بلوطو قلبها يتقبض ودقاتو يزيدو.. بدنها تكبس مالتوتر والترقب لنهاية طريقهم.. عينيها يدورو يتمعنو فكلشي داير بيهم.. الطريق الأراضي الغرس الناس رايحة جاية.. لولاد يلعبو غادي وجاي لفرحة العيد.. والفرحة تعها اضعاف مضاعفة.. ساكتة تتفرج متلهفة فوق لقياس.. لكارو محلول نسمة دافية وحنينة تدخل تلاطف وجهها ردتلها الروح.. يسوق وحاضيها بلاما تحس مجمد ملامحو وداخلو عايش صراع بين لمخ ولقلب.. مايكونش غلط ؟! واش كون يتراجع درك ومن تم يقلب الدورة ويزيد يهرب بيها يغبرها ورا الشمس ؟! أفكار وأفكار خلاتو يتعصب ويكبس زير لفولون ودعس بنزين لا شعوريا مافاق حتى كان فمدخل حدود لقصر نقص سرعة.. شاف لغاشي داخل خارج على غير لعادة.. عارف عيد وعقيقة بصح لجو هذا تاع عرررس كبير ! توسوس عفط بقوة داخل مالباب لكبير بانتلو الجنينة عامرة حبسو ڨارد هدر معاه مالكارو
ڨارد: ماتقدرش تزيد لقدام ا سيدي قاري هنا خير
أمير: وش كاين؟ علاه لغاشي ملموم؟!
ڨارد: باروك ولاد الآغا ا سيدي
أمير: قيمو عررس مش بارووك.. يموتو على لمان الغاشي افففف.. خزرلها عينيها يبرقو مالدموع حذرها: طيحي دمعة مانتفكش معاك
روزا: علاه جيني هنا؟
أمير: بويسك عيلتك وعباد ربي كل تلمو هنا.. ماكلاه نشقى لداركم نلقاو الريييح.. انزززلي
ماضيعتش ثانية نزلت محمولة.. زرب نزل مد لمفتاح للڨارد يتصرف.. وقرب منها متذمر
أمير: نص نهار مشيبتني ودرك كلمة وحدة نفذتي ؟! سبحان الله
روزا: مش وقت نتشاحن معاك.. نزرب ندخل باااي.. مع خطات حكمها
أمير: تررصي ماتتحركي إلا رجلي على رجلك
تأففت بضجر من تحكماتو لمرضية جبدها ليه تنفض نافرة.. خزرلها وبعناد حط كفو فكفها وجرها داخلين لي يشوفهم يحلاو فعينيه ككوپل هايل.. وفالصح هم متناقرين الكلمة بالكلمة ماخصهمش يتضاربو !!
مُعز لكاميرا مان اول مالمحهم فيها هزر راسو يثبت شافهم قاصدينو.. طلقها برغية
معز: أميييير جااا
جواد: كان يبوزي مع تلفت تصدم: مام رووزاا جااااات