أحفاد السياف (امواج قاتلة٣)

البارت ٢٣

#بسم الله الرحمن الرحيم

لا اله الا انت سبحانك اني كنت من الظالمين استغفرك اللهم واتوب اليك

البارت الثالث والعشرون من أحفاد السياف

نداء علي

💮💮💮💮💮💮💮💮💮💮💮💮💮💮

انتهت من تنظيف الشقة لتتنهد بتعب، تطلعت إلى الساعة المعلقة بترقب

ياااه، آثر اتأخر النهاردة جوي، هخلص الوكل وارن عليه، ابتسمت بسعادة غامرة وبصرها يحتضن المكان من حولها لتهمس

المكان اهنه حلو ونضيف جوي، ربنا يحرصك يا رحيم ويچبر بخاطرك.

علا صوت هاتفها بنغمة تحفظها دون سواها فمن لها إلا شقيقها

اسرعت تلبي نداءه قائلة

السلام عليكم يا خوي، اتأخرت ليه يا آثر

اجابها بحنو : اتغدي انتِ يا شام، أنا هتأخر في الشغل وهخلص واطلع عالچامعة أخذ الكتب.

ترددت قليلاً قبل أن تسأله

هو أنت متوكد من حكاية الچامعة دي، خايفة يعتروا فينا من هناك

ابتسم وكأنها أمامه يرغب في طمأنتها

اطمني يا شام، رحيم مچهز كل حاچة وعامل حسابه، متخافيش يا حبيبتي اللي ربنا مجدره هنشوفه، هيحصل ايه يعني، المهم دلوك تتغدي وتنامي ساعتين اكده وهتلاجيني جدامك وعاملك مفاچاة حلوة زيك تمام

شام بترقب

ها، مفاچاة إيه ديه

ابتسم قائلاً : بعدين يابت، روحي لحسن المدير يلمحني ويفكرني مجضيها تلفونات ومهمل الشغل

اطاعته بحب وتوجهت إلى المطبخ، أحضرت بعض الطعام وجلست بمواجهة التلفاز تستمع إلى مسلسل تركي مدبلج تبتسم بوله وتتمنى أن تصبح ذات يوم محل تلك البطلة.

🌼🌼🌼🌼🌼🌼🌼🌼🌼🌼🌼🌼🌼🌼

وما عاد القلب يتراقص مع ألحان الحياة، ولم تعد نغماته كما كانت، لقد باتت بلا روح كحالنا.

ادمعت عيناه، استمر في صمته يتمنى ألا يفضي إليها بما يؤرقه لكنها تصر على انتزاع ما تريد

همس بصوت خافت

انتِ يا سهيلة، معقول تتهميني اتهام زي ده، أنا مش مصدق

اولته ظهرها قائلة

أرجوك يا يزيد، فهمني ليه مصر على لؤي، رغم انك مش مصدقه، أنا وأنت عارفين ان لؤي ويسري كل همهم الفلوس وبس

تحدث بحزن

وأي واحد هيتقدم لديمه نضمن منين انه مش طمعان فيها يا سهيلة، هنفترض ان شاب كويس وحبها وكان سند في غيابي، تفتكري هيقدر يحميها من عيون أهله واصدقاءه، أنا خايف عليها، ديمه رغم قوتها الظاهرية ضعيفة جدا، عكس ميادة، يمكن لأن ميادة كانت عارفة هي مين، أصولها مقوياها في وش الريح لكن ديمه زي ورقة الشجر أي عاصفة خفيفة بتاخدها معاها، أنا حاولت بكل طاقتي أحافظ عليها لكن للأسف العالم من حوالينا قاسي وظالم.