أسيرة هوس السادي 18+(كتاب تابع تكملة القصة هنا)

الفصل 3: قلوب محترقة (تتمة ح186)

مسافة الطريق وفظرف قياسي لحق للاڤييل ضيق دقايق فسيركلاصيون الغاشي بزاف والفرزة فالطرڨ ماكانش..بسيف فلت مالزحام دخل فطرق فرعية 5د وصل فرينا بالجهد قدام وحد الكافي.. رڨد لوطو وتلفت يشاورها
أمان: ننزلو ندخلو ولا نكومونديو نديو معانا
مهى: تقايد فالكافي: لي يناسبك هذاك هو
أمان: زعما شاورتك.. كون علابالي الراي ليا مانشقاش نسقسيك
مهى: احمم.. مانعرفش لبلاصة اسكو مليحة ولالا.. قصدي لا جايلها قبل وعجبتك ندخلو
أمان: كون ماجاتش مليحة مانجيبكش ليها أصلا.. يله انزلي
سبقها نزل يخنتب فتليفونو.. نزلت محمولة تسوست فالغوب وتقادي فحالتها.. غير وقفت حذاه خبى تليفون كوندانا لوطو شبك يدو فيدها وتمو داخلين بالعرض لبطيء عطالها لفرصة تثبت شوفة فتصميم الكافي والديكور تاعو.. دور عينيه بخفة لقى الحالة شبه معمرة بالغاشي والحس شي يتواتس شي يضحك.. الحالة شارجي والقعدة فجو كيف هذاك تدير صداع والمرض مش تهدن لأعصاب وتريح بنادم

★★★★★★

ساقها ديراكت للريسابسيون سقسى عالطابق دوزيام لقى نفس الشي..ولا حجز طاولة لفوق عالهواء لطلق فجهة بحال لبالكون مي متسعة عليه بزاف.. طلعو فدرج لولبي لدوزيام ايطاج وبتوجيهات سورفار وصلهم لطاولتهم رحب  بيهم وزاد يجيبلهم الموني.. قعدو متقابلين اول ما ركحت روحها تنفست بعمق منتعشة بنسمة عليلة
أمان: ها.. عجبتلك لحطة ولالا؟!
مهى: لافيغيتي.. بلاصة طووپ من كلش.. مانعرف السرفيس طوپ ولا ماكان ماكان
أمان: طووپ تهناي رح تعجبك كي لبلاصة بحد ذاتها
قاطعهم سورفار رجع بالموني خلالهم لمجال تفحصوها وخيرو وش حبو.. كتب دي نووط منبعد استأذن منهم ومشى يجيبلهم طلبهم
أمان: اييه عاوديلي وش درت ليوم؟ كيفاه فوتتي نهارك.. شافها استغربت تبسملها:نحكي من نيتي.. حاب نعرف وش فاتني عليك ليوم
مهى: وش تحب تسمع! وش متوقع نقولك اصلا.. فات نهار عادي كأي يوم روتين فالدار
أمان: تؤ.. جوابك ناقص.. حكيلي بتفصيل ومش كأي يوم كانت ختي وسارة عندنا سيير كاين الجديد.. سربي سربي بلاما تكلحيني

غدرتها ابتسامة فلتت لشفافها مع فاقت لمتها حمحم وطلقت راسها حكاتلو كيفاه فات يومها بلاما تفصل توانيسها مع لبنات ولاتجبد سيرة لحمل ماحمل او نقاش الصباح.. دا وجاب لهدرة معاها مستانس بمشاركتها لحوار وغير جابلهم السوفار طلبهم.. حلاتلهم لقعدة كثر بالمقبلات لعصاير والسناكس لي جابلهم.. تلهاو ياكلو لي قدرو عليه وذاقو شوي ملباقي عاد ترخاو يردو النفس مرة على مرة يترشفو مالعصير قدامهم.. خمم زمان منين وكيفاه يبدا السوجي منبعد تنهد بعمق ولوحلها لهدرة
أمان: مادامنا وحدنا ألييز.. نهدرو فسوجي تعنا
مهى: شمن سوجي؟!
أمان: لحمل.. شاف تكبست سبق اي رد فعل منها موضح: لمرة ذي بالذات مانحبكش تتهربي او تتهولي قبل ماتعطيني فرصة نهدر وش عندي
مهى: اوكي.. كمل اهدر نسمع وجهة نظر تاعك
أمان: مش وجهة نظر.. بويسك لحمل كيما قلتلك رزق من ربي.. وقت ماجا مرحبا بيه و
مهى: قاطعتو: علاه جهلت عليا مالا؟ فهممني
أمان: ماجهلتش وقتاه جهلت ا بنتي يخي من كلمة زوز نتسمى جهلت!!
مهى: تهدر هك بويسك ماكنتيش فايق مع روحك زيماه تعاملت معايا ومع لفكرة.. كانت مجرد فكرة تناقشو فيها.. ماعرفتش كيفاه تقلبت عليا مرة تضحك مرة تغوث مرة طيش تاست تأمرني ندييرو بسيف؟! هذا جهالة ولا وش تسمييه انت.. قوووللي
أمان: شوف صح ضڨت وتنارفيت بويسك جاتني الشووك ملخبر.. وانت زدتي عليا تقولي فكرة ناقشوها.. شغل حاجة تتناقش لا طفرت صرات تكون لمناقشة فيها روطااار
مهى: درك فهمني.. وش موقفك من فكرة لحمل.. حاب نجيبو بيبي درك ولا مازال لحال ولا ماتحبش تجيبهم رافض لفكرة مالأساس
أمان: وش تلبزي استغفر لله.. شكون يرفس النعمة ويقول لا لحاجة ربي.. الله يهديك كيفاه خممتي وقولتي الهدرة لعوجة ذي!
مهى: ماقريتش للنقص فيك.. قلتها من باب الصراحة.. حابة نصارحو بعضانا بويسك جامي هدرنا وتفاهمنا على وقتاه نجيبو بيبي !!