ماطلبت عذرك أنا نفسي عزيزة

Part : 33

( بالحوش )
جالسين العائلة كلها يتقهوون ويتحلون
الجد عبدالله : الهنوف وانا جدش غيري القهوة ابردت
الهنوف ببتسامة: ابشر
الجد عبدالله ببتسامة: الله يرضى عليش يابنيتي
وديان : وانا ؟
الجد عبدالله بضحكه : ويرضى لي عليش يعد
ابو سعود : وديان وانا ابوش مايصير تغارين من اختش
الجد عبدالله : لا تكبرها يا حسن شافتني ادعي لا اختها وحبت ادعي لها وين المشكله مافي لا غيره ولا يحزنون
ابو سعود: اسف يبه
الجد عبدالله : الا وين تنوف وهتان ما اشوفهم اليوم ؟
ام هتان : والله قالت انها رايحه لعند تنوف تساعدها بترتيب
ام تنوف : اي صدق جت هتان وطلعت لغرفه تنوف وكانت متواجده معهم اعتام قلت لهم يخلصون ترتيب ويلحقونا
الجد عبدالله : لمهم انهم بخير
ابو سعود : غريبه سياف ومتعب مآلهم متواجدين ماقالو لكم حاجه طالعين من صباح هم الاثنين
خالد : لا والله يا اخوي ماقالو حاجه صحينا مالقيناهم
ابو سعود : غريب والله
سعود نزل نظره لجواله من شافه يدق وقام من مكانه وهو يرد على المكالمه بخوف : ممكن اعرف وينك ؟ طلعت اليوم بعد بدون لا تخبرني وش جالس تسوي انت ودي اعرف بس
سياف : ياحبيبي بشويش كليتني بقشوري خلني اتكلم  طيب ؟
سعود بعتاب : تفضل تكلم اسمعك
سياف : جب مفتايح سيارتي واطلعو لنا انت وخالد ورائد بنروح كوفي نتقهوه
سعود : لا والله؟ حلو تبون تتقهون بعد مالعبتم بعصابنا انتم الاثنين ؟
سياف : سعود حبيبي بنقول لكم كل حاجه بالكوفي
سعود : زين يلا جاينلكم ،
قفل سعود لخط وناظر لخالد ورائد وهو ياشر لهم يجون
رائد وخالد ناظرو بعضهم بستغراب وراحو لسعود ،
خالد : من اللي اتصل ؟ وشفيك كان صوتك عالي؟
سعود : بتنهيده ذا سياف يقول جيبو مفتايح سيارتي وتعالو
رائد : ماقال لك وين كانو اثنينهم ؟
سعود : يقول بيقولون لنا كل حاجه من نروح الكوفي
رائد : اجل بروح اجيب مفاتيحه وجايلكم
سعود : تمام يلا خالد
خالد : يلا
راح رائد يجيب المفاتيح وطلع سعود وخالد لبرا بعد ماودعو الاهل وشافو سياف متكي عالسياره  ومغمض عيونه وقربه متعب يفرفر بجواله ،
سعود : سلام
سياف فتح عيونه من سمع صوت سعود وابتسم: هلا بقلبي
سعود : لحين صرت قلبك ؟ بعد ماسفهتني اليوم وامس ؟
سياف رفع حاجبه بستغراب من زعل سعود عليه اللي اول مره يشوفه :
بنفهمك كلشي وبتعذرني بس طلبتك لا تشيل بخاطرك علي
خالد تدخل وهو خايف يصير زعل بين سياف وسعود : سعود شفيك ؟ قال لك بيفهمك السالفه ماتعودنا عليكم بيوم تزعلون من بعض من متى أساسا وانتم الاثنين تشيلون على بعض وتزعلون ؟
سعود عقد حاجبه بضيق  من كلام خالد وقلبه عورهه من قال سياف لا تشيل بخاطرك علي وصد وجهه عنهم وتكلم يضيق : ما قد شلت عليه بيوم حتى اشيل عليه اليوم  بس ماتعودت يخبى عني حاجه
تكلم متعب وهو يحاول يلطف جو بينهم : معليش خالد تدري الام دايم حساسه يوم يتعلق شي بعيالها
ضحك خالد وضحك معه سياف ، سعود حاول يثقل نفسه ويكتم ضحكته بس انفجر ضحك معهم بوصف متعب له بالام وسياف الابن ،
جا رائد وبيده المفتاح وهو مستغرب  من ضحكهم بس ضحك معهم بدون لا يفهم السالفه ،
خذ سياف مفتايح السياره وركب يسوق وجنبه سعود وورا خالد ورائد ومتعب ، شويات ووصلو للكوفي ونزلو وهم يدورون طاوله من حصلو
جلسو عالطول وتكلم سعود : ادخلو بالموضوع عطول
سياف: خل نطلب اول طيب ؟
سعود: تمام اطلب
سياف اشر للنادل وناظر لهم : وش طلبكم ؟
خالد : نفس طلب الامس
سياف : تمام بزيد عليهم حلا تبون ؟
رائد : ايه
سياف طلب الطلب وجلسو متعب وسياف يقولون لهم اللي صار ابتدا من يوم زارو عبدالمحسن وراحو بيت الشيخ ابو عمر والاتفاق عالعزيمه وكيف مسكو اللي تهاوش مع عبدالمحسن ،
رائد: اما كل ذا صار ونحن ماندري ؟
خالد : طلعت العزيمه تخطيط منكم كلنا انصدمنا أصلا ليه العم ابو عمر يسوي العزيمه قبل طلوع عبدالمحسن من المستشفى
متعب : عاد ذا اللي صار
سياف ناظر بسعود اللي كان يناظر له نظرات عتاب وما علق عالموضوع وفهم انه شال بخاطره لانه ماقاله من البدايه تنهد بضيق وقلبه عوره ،
النادل جا وحط الطلب عالطاوله وبدو يتقهوون ،