عشگ الاربعين (هديه فصل)

البارت التاسع والعشرون

رزق : حصرتها يلا كعدت تحجيلي وهيه تبجي ضليت مصدومه من كلامها كتلها مستحيل حسن هيج يسوي مستحيل انتي شتحجين
هجن : صدكيني رزق هذا الي صار
رزق : وشراح نسوي كلي شنسوي
هجن : موبس اخذ شرفي رزق انه صار وياي شي ثاني
رزق : شنو صار
هجن : رزق انه انه حامل
رزق : شنو شتحجين هجن شتحجين انتي تحجين صدك لو تشاقين وياي هجن شنو حامل يمته وشلون
هجن : بديت احس باعراض الحمل قبل فترا لا بئس بها وقبل يومين رحت جبت اختبار حمل ضهر لان الكل ماموجود حللت وتاكدت من هالشي
رزق : وحسن يدري
هجن : ماريد يدري وماريد اشوف وجهه ولا اسمع صوته حتى انه قررت اشرد ارجع للموصل
رزق : شالفايده ترجعين للموصل والاوضاع زفت
هجن : لعد شنو اسوي ابقى هنا وانفضح تقبلينها
رزق : خلينه نفكر بعقل وخلي حسن يدري بالموضوع يجوز يتصرف
هجن : كتلج حسنً ماريد اشوف وجهه بحياتي بعد الله يخليج لا تكليله شي خلاص انه قررت ارجع للموصل واذا مو الموصل ف اطلع الاربيل كبل فلوس وعندي وجواز وعندي كبل احجز لاربيل واروح هناك
رزق : وهيج بكل بساطه تردين ترحين مو
هجن : اي بكل بساطه ماريد ابقى هنا بعد ماريد
رزق : جاي احجي وندك الباب كتلها اوكفي خليني اشوف منو بالباب
هجن : خليني انزل وياج لا يصير شي
رزق : امشي نزلنه نريد نفتح الباب اول ماوصلت فتحته  وهجن واكفه باب المطبخ جان يندفع كل قوته ويدخل الكلب  جعفر كال واخيرا طحتي بيدي وحدج بده يتهجم عليه دفعته ودخلت اركض مالحكت اسد الباب عليه هجن بقت تصرخ اجت عليه رادت تدافع عني بس دفعتي ونضربت بالكاونتر وطاحت فقدت الوعي بقيت اصرخ واتوسل بيه الله يخليك عوفني انه شنو سويت الك الله يخليك والله ما اذيتكً بشي عوفني ضليت اصرخ بده يجرء بلمساته وانه اصرخ اخير شي صرخت علاااااااااء وينك الحكني ماشوف غير علاء جره من ياخته وشبعه ضرب وكله
علاء: دخلت وجان اشوفه شلون يتهجم عليها يعني لو ما شفته بعيني جان كلت هيه موديه عليه وهيه قابله الوضع جريته من ياخته وشبعته ضرب وكتلهً كلب ساقط تتهجم على حرمه بيتي لك حيوان ساقط ونزلت عليه ضرب ضرب ضرب اجه علي وصلاح يفكونه مني باوعت لرزق ملابسها مشككه عفته وركضت عليها وحضنتها وشلت من الارض غترتي ولبستها الها وهيه تبجي من كل كلبها
علي : لك كلب شسوي هنا ماستبعد سحر هيه الي موديتك
جعفر : اجه الشيخ وبده يضرب بيه ضرب كلش قوي وانه كتلهم مثل ماتفقت وي سحر كتله وخر عني هيه الي ودت عليه وكلتلي تعال وهسه تلعب عليه دور الشرف
علاء : سمعت حجيه وطفرت عليه لك انت شتكول
جعفر : هذا الصح وشوف رسايلها وياي كلها وهيه الي بدت تحاجيني موانه
علاء : لك لو تحلف منا الباجر ماصدكك لك كلب
جعفر: ههههههه تضحك عليك بكم دمعه هاك تلفوني وشوف بعينك
علاء: اخذت التلفون وبديت اقرا الرسايل الي بينهم وانه لحد هسه مامستوعب الي جاي اقراه صحيح هذا رقم رزق وهاي صورتها بقيت اقرا اقرا اقرا بس الي شدني بالكلام هذا مو اسلوب رزق بالمراسله يعني ماتحجي هيج حجي درت عليها وكتلها روحي جيبي تلفونج بسرعه
رزق : ماجاي اصدك اتهام جعفر الي انه اصلا يمته مشتهيه اباوع بوجهه حتى هسه انطيه رقمي واكعد اتراسل ويا كمت جبت تلفوني ونطيته للشيخ اشوفه يكلب بالتلفون لحد ما رفع حاجبه وكال
علاء : جابت تلفونها وفعلا طلعت المحادثات موجوده بتلفونها حيل نقهرت دنكت راسي وكلت ماجنت متوقعها منج يارزق كلشي ولا تخونيني انتي
سماح : شتحجي انت شيخ شنو تخونك مستحيل رزق ماتسوي هيج لو تدري شكد تحبك ماتصدك لو بنسبه واحد بالميه هيه تخونك
علاء : تعالي شوفي بعينج
رزق : شيخ والله ماسويت شي والله ماعرف شي عن هاي المحادثات
علاء : سدي حلكج احسن الج حسابج مو وياي اهلج همه الي راح يتصرفون
رزق : ولله مامسويه شي
علاء : ياريت بس محادثات طلعت تلفوني وراويتها الصور
رزق : صدكني شيخ هاي الصور مالي ذنب بيهن باوعت عليه الله يخليك جعفر احجي الحقيقه ابوس ايدك لاتسوي هيج ليش تريد تخرب بيتي انه شنو مسويه الك بشنو اذيتك علاء صدكني علي صدكني الله يخليكم بديت اسولف الهم شلون يتعرضلي وقصه هاي الصور بوقتها ضربته بس هوه جاي ينكر
جعفر : يعني هسه تنكرين حبنه ولج رزق انه احبج وانتي تحبيني ماتحجين ماتكولين
رزق : لاتحجي هيج لا تحجي بديت ابجي واشهك كل قوتي تقربت على الشيخ وكتله شيخ صدكني انه مسويت شي تتذكر شنو كتلك كتلك مستحيل اسمح الرجال ثاني يلمسني ولو صدك بينه شي ماتشوفني هنا اصرخ واريد واحد يدافع عني جان تلكاني بغرفتي ويا انه حجيت هيج وهوه ضربني راشدي وكلي
علاء : هسه تاخذين هدومج وترحين من بيتي وبعد مالج دخله هنا علي اخذ هذا الكلب وشمره بالسجن والا  اعلمه الادب من جديد الحيوان سماح شفتي هجن
سماح : خويه لاتستعجل الله يخليك ترا السالفه بيها ان وهجن مابيها شي كعدتها على الكرسيً
هجن : صحيت وانه ماكدر اتحرك احس الم بطني قوي بس ماتحملت اخير شي اتهامهم الجذاب لرزق رحت امشي شوي شوي كتله شيخ صدكني انه عوف رزق وهذا الحيوان البنيه 24 ساعه وياي وتلفون ماجيسه بس من تخابر اهلها وحتى من اجه قبل شوي هوه تهجم على البيت وهوه دفعني وطيحني وكلها واخيرا طحتي بيدي والبيت فارغ وهيه ضلت تصرخ بس للاسف مالحكت تقفل باب المطبخ وهسه جاي يتهمها بشرفها خلي اكلك شي ثاني انه سمعته قبل كم يوم من خطوبه عمي صلاح  بس ماصارت فرصه ابلغك بالموضوع
علاء : هيه تحجي وانه اباوع عليها واباوع على رزق كالت خلي احجيلك شنو سمعت كتلها احجي شنو سمعتي وانه احس روحي غركان ولكيت قشايه اتعلك بيها كتلها يلا احجي بدت تحجي
علي : حجت وانه مصدوم من كلامها كله الي حجته يعني معقوله البشر من يغار هيج يسوي معقوله
هجن : جنت تعبانه وردت اروح اغسل وجهي واشرب ماي فتحت باب حمامنه بس للاسف ماجان بيه ماي طلعت برا امشي وسمعت سحر تحجي بالتلفون
سحر : كتلك هاي الخطه امشي عليها واذا لزموك كول هيه الي ودت عليه وهيه الي بدت تحاجيني
هجن : بقيت واكفه وانه استمع الها بس ماحجيت ردت اشوف وين توصل بقيت افكر بالموضوع هواي وانه اردد معقوله البشر من يحقد بسوي هيج معقوله واليوم من سمعتها ماتروح وياكم انه هم سويت روحي مريضه ومارحت على مود اكون شاهد على الشي الي راح يصير وياها وهاي كل القصه شيخ واحلفلك هيه بريئه وعمري ماشفت وحده تحب شخص هيج بهالقوه تقربت عليه رزق وحضنتني وضلت تبجي بكل كلبها
علاء: هيه تحجي وانه مامصدك الي اسمعه يعني لو ماهجن جان ضلمتها مرا ثانيه وبحياتي ماراح تسامحني باوعت عليه وكالت
رزق : اكثر من مرا تضلمني بس هالمرا ماسمح بهالشي وماريد ابقى ثانيه مثل ماطلبت وصدكني شيخ هذا اكبر اتهام توجه الي ومستحيل ابقى على ذمتك لان اكتشفت انو ماعندك ثقه بيه ولا بحبي الك
هجن : وبعد اكو موضوع حجته هسه تذكرته شيخ حجت وي اخوها على مود صور مصورتها وكالتله الصور الي عندي كفيله انو تخلي الشيخ يذبحها
علاء : كمت عليه وحطيت حركه كلبي بيه وضليت اضرب اضرب اضرب الى ان علي جرني
علي : كافي بويه عوفه هذا الكلب لو بيه خير مايمشي ورا النسوان
جعفر : بس انه صدك حبيت رزق من كل كلبي وهيه ماتستاهلك وصدكني لو تدفني مايطلع هالحب من كلبي
علاء : عصبني اكثر ورجعت اضرب بيه اضرب عليييييي ذبه بالسجون وهاي سحر انه علمها بقيت بمكاني اللهث وعلي اخذه وراح ورزق كاعده يم هجن وبس تبجي كعدت بركن من اركان القنفات ودنكت راسي
سماح : موكتلك شيخ لا تستعجل وتضلمها البنيه تحبك ماصدكتني
علاء : اي رجال بمكاني يشوف هيج يصدك سماح اي شخص ثاني يصير ويا هيج يصدكه قابل شتردين اكلها عاشت ايدج لان جاي تخونيني بقيت مدنك مارفعت راسي وهيه كاعده كبالي وتبجي وحجت
رزق : ضيعت عمري وضيعت مستقبلي وشهادتي وجامعتي كله على مود اخوي الي هددني بيه الشيخ بقيت متحمله وساكته لخاطر اخواني بس اخير مرا رجعت مو على مود اخوي لا رجعت لان احبك ولان ماكدر اشيلك من راسي هاي انه عمري 20 سنه وشفت الضيم لعد لو اصير 30 ششوف الله يخليك شيخ اذا تحبني صدك تطلكني وارجع الاهلي ماريد ابقى دقيقه هنا
صلاح : على كيفج بويه موهيج تنحل لازم تفكرين انتي مرته هسه وهوه يحبج لو مايحبج مايسوي هيج وانه اشهد على كلام هجن كله صح لان هيه خابرتني وهددتني وكالت اذا ماتسوي الاريده ابليك وي الشيخ وانه كتلها الي ماتلوحينه بيديج لوحيه برجليج وبوقتها سديت الخط بوجها بس ماجنت متصور منها هيج دناءه وهيج حقد توصل بيها مواصيل تتهم بنيه بشرفها وين تروح من الله
علاء : ليش ماكتلي هالحجي حتى اعرف اتصرف صلاح
صلاح : شيخ انت من طلعت من بيت ابو رزق جنت معصب ولو كايلي جان سولفت الك وانتي خيتي لاتخربين بيتج وتنطين هذيج الحيه مرادها ويطلكج الشيخ انتم بيناتكم حب
سماح : حجي صلاح صح رزق لاتستعجلين بهالشي
علاء : مادري شحجي مادري شكول طول هاي الفترا جنت مربي حيه لا والله ثعبان سام وقاتل ومادري وانه الشيخ الي اكتشف كلشي بلمحه تضحك عليه وحده مثل سحر وتريد طيحني بشباكها ولو هيه رادت طيحني بس لو ماكو شهود جان ضلمت مرتي وحبيبتي للمره الثانيه بقيت على كعدتي ورزق كسرت كلبي من البجي بحركه تبجي بحركه
صلاح : شيخ صلي على النبي وكوم غسل وجهك وانتي هجن اخذي رزق خليها تبدل وترتاح
رزق : ماريد ابقى هنا بعد ماريد يصير بيه شي زياده ماريد اخير شي ينتهي بيه الطريق اموت ماريد طلكني علاء طلكني خليني ارتاح طلكني
علاء : بقت تحجي وتحجي وانه مارد عليه ولا فكيت حلكي وسماح تحاول سكت بيها وهجن هم اخير شي جرتها هجن مادري شكالت الها وهيه سكتت ودك تلفوني جان تلفون حسن رديت عليه كتله ها وين صرت حسن ليش تاخرت رد عليه وكال .......

حبايب كلبي الغالين لاتزعلون مني لان البارت قصير بس صدكوني شغل وماكدر اكتب اكثر من هيج وارجع واكلكم انه اكتب لخاطر عيونكم الحلوه ماريد منكم تضوجون وانتضروني بالبارت القادم
تحياتي الكم

_______****

لاتنسون تابعوني على الفيسبوك روايات زينب عقيل الموسوي

https://www.facebook.com/profile.php?id=100087899666498&mibextid=LQQJ4d

وايضا قناتي على التيليجرام
@zainabakeel9

ورابط الواتباد للي ماضايفني يضيفني

https://www.wattpad.com/user/zainabakeel_almusawi

________*****

الى هنا انتهى البارت اتمنى ينال اعجابكم

الكاتبه زينب عقيل الموسوي