عشگ الاربعين (هديه فصل)

البارت الثامن عشر

شفتك بالحلم فزيت ادور عليك
نسيت انة صحيت وبالحلم عفتك
اعاين بالوجوه وانت ما موجود
ما معقولة يمي وإني ما شفتك
شلتك بالكلب يوم الجنت موجود
ودمعة بالجفن يوم الرحت شلتك

************************************
رزق : كلحنه فزينه من صرخ باسم جواد وكله
علاء : انت شتحجي جواد شنو مفقود شنو ماموجود شنو هجوم هسه جيبلي معلومات عنه
جواد : سيدي فدوه اروحلك اي اثر الحسن ماكو لان الدمار منتشر بالمكان كله الله يصبركم انشالله
علاء : لك حسسسسسسسن وين رحت شمرت التلفون وكتلهم حسن خلاص مات نفقد بالحرب كعدت على القنفه ودنكت راسي مانعا احد يشوفني ابجي
علي : بويه شتحجي شنو مفقود شنو ماموجود شنو مات بويه اذا مالاكينه بلكي نهرم بويه الله يخليك كلشي ولاتكول حسن مانشوفه بعد اخوي حزام ضهري
علاء : انا لله وانا اليه راجعون
رزق : كلحنه ضلينه نصرخ ونبجي وهند طاحت علينه وضلت تصرخ بهستريا وتلطم على وجهه وانه والشيخه ضلت تلطم على وجهه
غيده : يمه يبو طول الحلو هيج وياخذك التراب فدوه اروح الك هيج ويطمك التراب
رزق : وضلت تبجي وتنعى وسماح موتت روحها من البجي
سماح : لا علاء لاااا حسن مايموت ويعوفنه لا
سحر : الله يرحمه لا تسوون هيج
سماح : انتي سدي حلكج ماريد اسمع صوتج
رزق : الكل عله صوته بالبجي والنوح والشيخ كال
علاء : لاتضنون اسوي عزاء الا لمن اشوفه بعيني
غيده : بس يمه شلون يبقى هيج ولك هذا شهيد هذا فخر
علاء : ما اخذ عزاءه اذا ماالكه جثته خليت وكمت وانه مثل الاسد الجريح طلعت للديوان الوب مادري وين اروح مانمت ولا اجاني النوم ماضل واحد ماتصلت بيه خابرت جواد
جواد : سيدي انه باب بيتكم داخلك
علاء : سديت الباب ودخل يمي كبل كال
جواد : احترامي سيدي
علاء : جواد ابني ماميت انه ادري بالموضوع
جواد : سيدي حسب المعلومات الي وصلتنه مابقى احد عايش يعني رغم خليتهم يبحثون اكثر من مرا في سبيل نشوفه وين حتى بالمناطق الي مجاوره للمقر مالتهم
علاء : يعني شنوً جوووواد
علي : شنو بويه اكو خبر
جواد : سيدي الافضل تسووون العزا والله يرحمه ويصبركم احترامي سيدي انه طالع
علاء : كال هيج وطلع وانه احس روحي نكسر ضهري ولك بويه حسن وين رحت وعفت مرتك وجهالك ولك اخوك راح علي اخوك راح نتشر خبر موت حسن والكل اجه يعزيني وانه احد هسه مامستوعب فكره موته احس البيه انه حلم مو حقيقه ضطرينه نسوي فاتحه وجثه ابني ماهيه مالكيناها ولا شفناها ولا ودعته وعلي حالته يرثى لها اهل رزق اجو عزونه الفاتحه كلها ويانه ماعوفونه والولد ولدهم هم محمد وساجد والباقين خلصت الفاتحه وانه البيت ماطاب اله ولا شايفه اصلا ولا ادري بيه حتى انام بالديوان احس عمري كبرت عشر سنين فوك عمري خلص العزاء وبيومها دخلت للبيت وشفت امي كاعده ويمها سماح ورزق وسحر والبنات زوجات اولادي
غيده : ولك يمه ورم افادي (كلبي ) ولك يمه راح اموت
علاء : اسم الله عليج بالغاليه
غيده : اخ يمه ياحسيون يايمه يابعد حيلي يايمه سوده عليه كون يومي ولا يومك يا صغيرون اروح فدوه الك ياربي ليش ماخذيتني وعفته
سماح : يمه اسم الله عليج لاتحجين هيج
رزق : يمه اسم الله عليج والله يرحمه برحمته الواسعه باوعت للشيخ حيل تعبانه حتى مابيه حيل يحجي خل اسولفلكم شنو صار ايام الفاتحه ثاني يوم بدت الناس تجي وهواي نسوان اجتي للعزاء لان هوه ابن الشيخ والكل يبجي ويصرخ بهالايام الي فاتت الشيخ ماشفته ولا حتى سمعت صوته ذبو عليه الشغل كله وسماح ملتهيه وهاي سحر ستلمتني عود هيه ام البيت دقيقه وحده ما اكعد واكفه بالمطبخ دخلت عليه
سحر : بدال ما واكفه حركي روحج لو بس بيج تحجين على الناس
رزق : عليمن حاجيه مافتهمت
سحر : تعرفين كلش زين عيب عليج وكضي لسانج
رزق : شو هايه عافتني وراحت ضليت ملتهيه بالغسل والتنضيف والكل نفسيته تعبانه والشيخه كلساع طيح علينه ويرتفع سكرها وخطيه ام كاظم وياي وياي وصلنه ليوم ثالث الفاتحه بطلاع الروح واسمع كل ثنين بسالفه وينذكر اسمي ضليت بحيره انه وشنو اسوي ميه فكره اجت براسي وماجاي اعرف شنو هيه امي اجت بس باليوم الاول بس خواني حسب ماسمعت يوميه هنا المهم خلصنه ماعين وتنضيف صعدت ارتاح جاي تمدد ونفتح الباب ولن سحر وامها
سحر : كومي كومي ادبسز نايمه
رزق : تحترمين نفسج لو شلون
سحر : شسوين بعد اكثر من السويته
رزق : شمسويه
سحر : وحده بلاشرف وساقطه
رزق : احترمي نفسج وخلي عندج شوي كرامه على الاقل جان حترمتي العزا ويلا طلعي برا
سحر : تكليلي هيج مو
ام سحر : شنو انتي محد مربيج حسبي الله ونعم الوكيل بيج فضحتي بنيتي
رزق : بدون سابق انذار اجتني من شعري جرتني وكالت حسابج موياي حسابج وي الشيخ هوه الي راح يطيح حضج ونشوف شيسوي بلكي نخلص منج طايحه الحظ دفعتني وراحت كعدت ابجي لان بعد ماعندي طاقه للتحمل ابد بقيت هيج كاعده لليل خليت ونزلت جوه ودخل الشيخ بس شفته حيل تعبان وصار الحجي الي عرفتوه سابقا رغم نضرات سحر الي كلها حقد واحس لازمه عليه شي بس ماهتميت لان ادري بروحي كلشي مامسويه بجينه شويه صحيح البيت شبه فارغ من دون حسن الله يرحمه رغم لحد هسه فكره موته مامقتنعين بيها مرته نتهت من البجي اخير شي اخذوها اهلها لبيتهم من خلصت الفاتحه وتقى حالتها تعبت بسبب الحمل جاي تكبر بطنها وراح جيب مابقى شي خليت وصعدت فوك سديت الباب ودخلت للحمام سبحت ولبست برموده سوده وفتحت شعري يرتاح شويه صارلي ثلاث ايام بالحجاب احسه راح يتكطع كاعده على جامه مال ميز التواليت وجان ينفتح الباب
علاء : كاعد واباوع عليها حيل مشتاق الها ولوجهه مادري شي يدفعني بداخلي الها ودي اضمها بكلبي ماريد اخسر بعد ناس احبها الله يرحمك يا ابني وراهم وراهم الا اخذ بثارك كلها صعدت نامت وانه بقيت افتر احس روحي تايه مادري وين اروح اي محتاج حضنها محتاج اكون يمها خذيت روحي وصعدت فوك فتحت باب الغرفه ودخلت عليها كتلها انه محتاجج ماكدر اتحمل بعد احس ضهري نكسر ردت عليه وكالت
رزق : نفتح الباب وشفت حالته شكد تعبانه كتله انه وياك  ماعوفك واطلب من الله انو ينطيك الصبر تقرب عليه وحضني حيل احس رعشه نتشرت بكل جسمي وكلي
علاء : ماكدر بعد ماكدر حضنتها ونزلت دمعتي بحضنها حجت بصوت خافت وكالت الي
رزق : حجيت بصوت على كيف يم اذنه وكتله انا وياك للموت ماعوفك شيخ
علاء: بعد مااكدر اتحمل رزق ضهري نكسر وبعد ماكدر اصبر اكثر رزق انه محتاجج اريدج وياي ابني راح وخسرته ماريد اخسر الباقين
رزق : لاتكول هيج شيخ كلحنه وياك وانشالله ماتخسر احد والله يصبر كلبك
علاء : اخ رزق كلبي ياذيني يا بنيتي
رزق : اول مرا اشوف الشيخ بهالحاله احسه مكسور ومهموم ومتاذي راد يروح جريته من ايده وكتله شيخ لاتروح خليك يمي
علاء : متاكده من كلامج
رزق : اي متاكده
علاء : جا اريد اطلب منج طلب بويه
رزق : كول شيخ
علاء: انام بحضنج اريد
رزق : حيل خجلت من كلامه بس ماكدر اكسر بخاطره كتله تمام شيخ خله ونزع عكاله وغترته ونام على الجربايه بدال ما ينام بحظني جرني عليه وباس راسي وخلاني انام على صدره بهاي اللحضه بالذات حسيت بحبي اله حسيت هوه سندي واماني وكلشي نمت وجان هذا اليوم الوحيد الانام بيه مرتاح كعدت ثاني يوم الصبح لا شخص يلعب بشعري فتحت عيني واجت عيني بعينه وكال
علاء : نيمتها بحضني وبقيت طول الليل سهران وانه اشوفها نايمه اول مرا من تزوجنه لليوم اصير هيج قريب عليها رغم المشاكل الي صارت ورغم تجاوزها عليه بس احسها بنتي الصغيره اخاف عليها من الهوى بقيت صافن عليها لحد ماصار الصبح بديت ازعجها لعبت بشعرها حست عليه فتحت عيونها وياويلي على عيونها احسها رممت الكسر الي صار بكلبي وبده يطيب كتلها صباح الخير بنيتي
رزق : صباح النور شيخ
علاء : تبقين هيج نايمه
رزق : ها لا شيخ خليت وكمت كتله اسفه خاف اذيتك
علاء : تقربت عليها وكتلها احلا اذيه اجتني لحد هسه بستها براسها وكمت طلعت رحت لغرفتي ستقبلتي ست سحر
سحر : اي عايفني ونايم يم ام السحوره هذيج
علاء : سحر لسانج
سحر : لساني شنو لساني شيخ عايفني ونايم يمها وانت ماتريدها انت لشي اخذتني اذا ماتريدني
علاء : سحر كتلج لسانج
سحر : ياريت تستاهل هالادبسز الصلفه
علاء : ماتحملت حجيها كمت وضربتها راشدي اذا جبتي سيرتها اكص لسانج لان هيه ماجايبه سيرتج بشي رغم ادري بيج جاي تاذينها موعبالج ماعرف سوالفج
سحر : دافع عنها وهيه تحجي عليك
علاء : تحجي عليه شنو
سحر : دشوفها كاعده وتشهر بيك بين الناس ماتستحي ولاتخجل وحده ادبسز صلفه
علاء : ليش شسوت
سحر : بعد ما اكدر اضم عليك اكو خطيه بنيه صغيرونه واذا ماتصدك اخابر امي وسالها صرت هاكدوتني كبالها
علاء : غير تحجين سحر لاتخليني ابدي بيج
سحر :كاعده بين الناس وتكول الشيخ مابيه خير لوبيه خير جان تقرب من مرته ما عافها بدون مايلمسها
علاء : شلون تحجين انتي يعني هالحجي ماتستحن تحجنه واحنه كاعدين بعزا صدك ماعدجن تربيه
سحر : انه ماعندي لوهيه ومن حاجيتها تكلي هوه الشيخ اصلا مايكلبج واخذج حتى يغثني ويقهرني وبس
علاء : هيج حجت
سحر : اي شيخ هيج حجت
علاء : خوش لعد انه بعدين اشوف شنو الموضوع واعرف شلون اتصرف طلعت من الغرفه وانه متاكد انو تريد تبلي البنيه حتى اعاقبها بس ماراح اطيح بشباك مرا خليت ونزلت للديوان وكالعاده الناس كاعدين يعازوني بابني كل شعوري بهالحظات احس كلبي نشلع منه قطعه كاعدين والناس هوسه والجايجي يصب جاي جاني صلاح وكعد يمي وجان يكول
صلاح : صارت فاتحه حسن صراحه حيل تاذيت عليه لان لا قبر اله ولا لكينه اي شي يخصه خلصت الفاتحه وانه بالي يم هاي البنيه الحلوه بعدها ماطلعت من بالي وفوك هذا كله شفتها اول يوم الفاتحه وجانت طالعه مثل الكمر خره بيها من بنيه كاعد صافن على المرايه الصبح وخابرت عليه سحر
سحر : صباح الخير
صلاح : هلا كولي شرايده
سحر : اسمعني صلاح لازم تساعدني
صلاح : اساعدج بشنو
سحر : اسمعني اريدك تجي وتكعد يم الشيخ وتكله شنو هذا الحجي المنشتر عليك
صلاح : وشنو منتشر عليه
سحر : كله هيج طالع من بيتك حجي على اساس هوه مالامسني ومابيه خير والي حاجي هالحجي هيه رزق
صلاح : ها عفيه عليج تردين تلعبينها
سحر : لاتتنسه انت هم تريد تاخذ ثارك
صلاح : ثاريش هذا
سحر : ادري بيك تريد تاذي الشيخ وادري بيك تضوج منه لان اخذ علياء منك
صلاح : شكاعد تحجين انتي
سحر : لاتكول لا لان انه اكثر شخص اعرفك بهالدنيا
صلاح : خوش عرفتيها يلا ولي بعدين اشوفه
سحر : اوكي
صلاح : سديت الخط بوجهه وكلت هاي شكد شيطانه منين تدري بهالسوالف كلها صدك شيطانه خليت بدلت وطلعت وانه افكر شلون اذيه بالكلام وازيد من يمي وصلت يمه وسلمت عليه وكتله شد حيلك مايصير هيج انت سندنه وقوتنه وهنا الناس بدت تروح ضليت كاعد يمهم للمغرب خلصو الناس وبده يحجي علاء
علاء : يعني بس اريد افتهم جثته وين راحت ماجاي افتهم شي
صلاح : هدي خويه هدي اصلا المنطقه البيها هوه جانت حيل خطره ومؤذيه
علاء : بيدي وديته للموت بيدي
علي : اخ ياخويه مكانك فارغ
صلاح : انت هم علي مايصير هيج حبوبتك تعبانه وابوك هم
علاء : اخ يا ابني وضربت على رجلي عليك الوسفه يابويه
صلاح : علاء اريد اكلك شي ثاني وضروري تحله
علاء : شنو صاير بعد
صلاح : سمعت حجي طالع من بيتك على اساس انت مالامس المره مالتك وانو ماخذها هيج حرشه بمرتك الاولى وايضا كايلين عليك مابيك خير وكبرت ومن هالسوالف
علاء : وكفت على حيلي وصحت شنو هالحجي صلاح منين سمعته
صلاح : بس اهدأ الناس كلها تحجي وصلي الحجي لبيتي
علاء : وسفه عليك يا بو علي ومنو مطلع هالحجي
صلاح : يكولون وحده من بيتك بس ماعرفتها منو
علاء: تذكرت كلام سحر الي الصبح احس دمي صار يفور عفت الديوان وركضت للبيت وصحت ررررررزق
صعدت فوك ودفرت الباب دخلت عليها وجريتها من شعرها كتلها انتي تحجين عليه وتكولين مابيه خير لج انتي كلج حشره ادبسز صلفه
رزق : كعدت وانه فرحانه لان جان احلا يوم بحياتي هذا من اجيت لليوم فعلا هسه اكدر اكله انه احبك واريدك واريد ابقى وياك وماعوفك طول عمري حتى وان كنت متزوج سحر خلصت ونزلت جوا وسحر تباوع عليه بنضرات كلها توعد احسها ضامتلي شي جاي اغسل ماعين اجت وكفت يمي وكالت
سحر : راح اندمج وراح شوفين من هسه بلشت وياج رزق : مارديت عليه ما خليت اي اهميه كلامها خلص اليوم والشيخ ماشفته حيل شتاقيت اله وجنت مقرره اذا اشوفه اليوم اكله بشعوري تجاهه توضيت وصليت ودعيت الله يخليه الي وحياتنه تصير احلا واحسن لليل كاعده تقريبا المغرب ساعه 6 ونص هيج ورا الصلا يعني نفتح الباب بطريقه خوفتني حيل اجه عليه وجرني وكلي الكلام هذا ضليت صانه كتله اخ عوفني اني ماسويت شي والله اخخ عوف شعري
علاء : هسه اعلمج منو المابيه خير تقربت عليها وشكيت ملابسها وضليت اضرب بيها اخير شي دفعتها على الجربايه وبديت ابوس بيها بهمجيه وعنف اخير شي صرخت صوت وكالت
رزق : تهجم عليه وشكك ملابسي وضل يبوس بيه بهمجيه راد يغتصبني اي يغتصبني ماتحملت الاذيه الي سواها الي صرخت باعلا صوت الباب فلشو برا بالدك وكتله برووووح حسن عوفني مامسويه شي الله يخليك علللليييييي
علاء : كالت بروح حسن وخرت عنها وطلعت من الغرفه وانه ثاير احس روحي اريد انفجر عيوني ماشوف بيهن بعد دخلت لغرفتي لكيت سحر كاعده هناك تقربت عليها وجان تصير زوجتي رسميا بس حتى اسكت حلوك الناس وراها نمت وضليت للصبح نايم بمكاني ماتحركت طلعت من الغرفه وصارت بوجهي لحد هسه بدي اكضها اموتها من الكتل حسيت على روحي من تقربت من سحر احس روحي مريض جسديا ونفسيا بايام صارت هاي الاحداث كلها صارت بوجهي خليت ونزلت رحت للديوان وكاعد على اعصابي مادري شسوي وين اروح ميه فكره براسي الى ان اجاني علي وكال
علي : بويه الحك حبوبتي رتفع سكرها وطاحت علينه 
علاء : ركضت عليهم وكبل خابرت دكتورها اجه عليها الحمدالله تعدت سلامات ضربها ابره وصارت احسن فتحت عيونها
غيده : يمه فدوه اروحلك دير بالك على روحك لاتعصب على مود احد
علاء : يمه شبيج ليش هيج تحجين
غيده : يمه اريد اوصيك وصيه لاتصدك باي حجي ينكال حكم عقلك 
علاء : شنو قصدج يمه
غيده : يجي يوم وتعرف
علاء : كولي شصاير وياج يابعد روحيً
غيده : ماكو شي يمه عوفوني نايمه هسه وطلعو
علاء: خلينه وطلعنه وماشفتها اكيد خامده بغرفتها خليت وطلعت ...
رزق : كسرني وكسر روحي خلاني اكرهه كل حب بداخلي نمحه يحكم عليه وياذيني وانه مالي ذنب باي شي اتخذت العزله ملاذ الي صارت اوقاتي بس بجي وحزن انتهت حياتي وبعد ماعندي اي شي حتى اخواني خسرتهم بسببه اخ ياكلبي ياذيني يارب انه شسويت بحياتي حتى هيج اتعاقب رجعت من صفنتي لمن نفتح الباب وجان تدخل عليه سحر
سحر : كومي ادبسز صلفه
رزق : شتردين مني
سحر : كومي شنو خدم عندج كلج كلج خدامه هنا عندي
رزق : حرام عليج بشنو اذيتج وسوين هيج بيه
سحر : اخذتي اعز شي على كلبي
رزق : بس موانه الاخذته انه ضحيه اهلي الي شمروني ومافكرو بنهايتي
سحر : شايفه هاي الخريطه الي بوجهج هسه ساعدتني اوصل لاهم خطوه
رزق : مافهمت
سحر : صرت مرت الشيخ رسميا وبالشرع وهسه انتضر يوم يوم حتى يطردج برا البيت
رزق : يجي يوم والله ياخذ حقي منج وانه مضلومه
سحر : مارد عليج هسه لان مرتاحه ويلا نزلي كبالي هسه حيجون ناس النه بسرعه على العشه
رزق : خلتني وراحت وانه اتذكر شلون شفته صبح وشلون يباوع عليه لو امس شنو سوه بيه هواي اشياء اذاني بيها وماحجيت بيهن ونسيتهن واكثر شي اذاني البارحه من راد ياخذ شرفي غصب عليه اخ يا محمد كله منك انت الخليتني ارجع على مودك رجعت خليت ونزلت بوجهي للمطبخ ضليت واكفه واذكر الموقف الي جابني بيه هنا من كلي
علاء : باعي ياتجين وياي يا اخوج ينسجن
رزق : تهددني باخوي شيخ تريد تلوي ذراعي بيه
علاء : كتلج العندي تعانديني هسه اخليهم يجون يجرجرونه واكدر بكل بساطه اغير القضيه عليه ولاتنسين انه منو
رزق : انه راح ترجع بس لاتضن بيوم اسامحك تذكرت هالجمله وبده الحساب يثكل عليك شيخ ماراح اسامحك علىً كل شي صار وياي خصوصا بعدني اجهل شنو مسويه انه وشنو سويت وشسامع عني من حجي
سماح : حبيبتي ليش صافنه ميخالف عذريه هوه هم ضغوطات عليه
رزق : سماح الي مخبلني مامسويه شي
سماح : حبيبتي ترا طالع عليج حجي هواي
رزق : شنو هوه سماح بدت تسولف الي انه شنو حاجبه رديت عليها بقهر كتلها مامسويه شي والله ما حاجيه هذا الحجي الله يخليج سماح صدكيني انه مايطلع مني هذا الحجي
سماح : ادري بيج يابعد روحي بس الحجي طالع برا وصل للشيخ ولذلك اجه معصب عليج
رزق : جان سالني سماح جان سالني يعني والله بعد ماتحمل سماح مااتحمل خلاص وصلت حدي خليت وصعدت بعد ماتحمل ضليت بغرفتي مرت خمسه ايام على هاي الحاله انزل اشتغل واصعد لو اكل باليوم لكمه لو مااخلي بحلكي شي وسحر وراي وراي شغلتني خدامه عدها لحد ما اجه يوم وكالت
سحر : يلا لج امشي كبالي نضفي غرفتي
رزق : شتحجين انتي شنو انه خدامه عندج
سحر : بلا حجي زايد خاتون ووياج الحمام هم نضفيه
رزق : جاي ارد عليها واجه الشيخ وهاي اول مرا اشوفه بعد هذاك اليوم
علاء : مرت خمس ايام عليه بالويل مادري حتى اشغالي عفتهم ضهري نكسر على وليدي الي لحد هسه ماجاي نلكاله اثر بمكان الحادث وصلت لمرحله كتلهم انه اطلع بنفسي ادور عليه بس جواد منعني كال المكان خطر سيدي ومايصير تروحله كتله يعني ابني مات بهذاك المكان وراح وماخفت عليه انه اخاف اروحله نهيت الحديث ويا فعلا ورحت اصعد فوك احس روحي فاصل عن الدنيا ومشكله رزق لحد هسه براسي ومادري شسوي امي حالتها مدهوره منا بس متابعينها بالعلاجات صعدت الدرج وصلت نهايته وسمعت حجي سحر لرزق كبل حجيت كتلها مثل ماكلتلج سوي يلا بسرعه ولادوخينه
رزق: ضليت صافنه عليه مادري شرد بس من لا جاره سكتت وماحجيت اي حرف ردت اتحرك صاح عليه وكال
علاء : وسمعي منا ورايح حالج حال سحر يمج يوم ويمها يوم
رزق : هم مارديت لان ادري بيه ماراح يدنه الي ولا راح يسوي شي خليت ودخلت للغرفه وانه احس بذله واهانه ومابيدي شي اسويه كل خوفي على اخوي كملت وطلعت ورجعت لغرفتي اتخذت زاويه من زاويات الغرفه وخليت راسي بين رجليه ودموعي صب نفتح الباب بهدوء رفعت عيني شفته هوه كعدت على كرسي الي كبال مرايتي وكلي
علاء : اريد اهينها مثل ما طلعت عليه حجي وقيل وقال خلصت وطلعت
سحر : على اي اساس تنام يمها يوم ويمي يوم
علاء : اسمعي سحر من تقربتلج بس حتى اسد حلوك الناس واهم شي القرار الي اخذه مابيه اي رجعه وكافي صرعتي الي راسي واليوم انام هناك خليك وطلعت بقت دردم فتحت الباب بهدوء شفتها كاعده وشكلها حيل ياذي مشيت على كيف وكعدت بقيت ساكت لحد ماحجيت كتلها ليش سويتي هيج
رزق : ماسويت شي والله
علاء: والحجي رزق ليش خليتيني ااذيج
رزق : والله مضلومه شيخ مالي ذنب بشي ضليت صافنه عليه ذب حسره وانه هم مادري شنو اجاني بهاي اللحضه كمت امشي شوي شوي وصلت يمه تقربت عليه وخليت ايدي على لحيته كتله ليش سوي بيه هيج والله ما استاهل هذا كله اي شي صار مالي علاقه بيه صدكني انه مضلومه ليش ماتصدكني
علاء : لج حبيتج هيج تجازيني
رزق : يعني انت تحبني شي
علاء : رزق انتي اول يوم شفتج بيه دخلتي كلبي وصرتي اعز شي عليه بس الاسائه الي سويتها الي هيه الي كسرتني تالي عمري انه ينكال عليه مابيه خير وامشي براي مرا
رزق : صفنت نوب رديت عليه عمري مافكرت اسيء الك بأي شي انت ضلمتني وتسرعت كسرتني واذيتني بحياتي ماراح اسامحك
علاء : انه المفروض اسامحج مو انتي
رزق : اسمعني واتمنى تاخذ بكلامي لان خلص تعبت بعد ما اكدر انه اريد اطلك اريد ارجع الاهلي تعبت بعد ماكدر
علاء : اسمعي طلاك ماكو وتبقين هنا اوتعرفين شسويً
رزق : رجعن تهددني مو
علاء : ماهدد انه افعل رزق ولاتخلين اعصابي تطلع عليج هسه
رزق : ابتعدت عنه ومشيت درت وجهي وكتله انه راح ابقى بس ماراح اسامحك بحياتي وحتى الحب الي بداخلي تجاهك مات
علاء : وحبج بكلبي خلص انتهى من يوم الي حجيتي عليه بيه
رزق : خلاني وطلع رجعت ابجي وانوح وحدي
علاء : طلعت من يمها نزلت جوه  كلامها اذاني فوك اذيتي يعني اكلها احبج تكلي ماسامحك ولاتسامحين انه هم حبج راح اطلعه من كلبي واشمره دخلت للهول شفت علي كاعد
علي : الله يساعدك بويه
علاء: شو كاعد بويه خيرك
علي : وضع حبوبتي ماعاجبني
علاء : شبيدي عليها ماتكلي
علي : واصلا من مات اخوي وراح مااجاني نوم بعد
علاء : هنه 12 بوم بس عبالك سنين
علي : شنسوي هذا امر الله
علاء : كمت وكفت اريد اوكف بالحديقه اشتم هوه وسمعت صوت الباب يندك كل قوته كلت خير شصاير
علي : خليني اطلع بويه
علاء : لا انت انتضر هنا انه طالع اشتم هوه واشوف ياحيوان هيج فلش الباب
سماح : خير خويه شصاير شنو هالدكه مال الباب
علاء : مادري ياحيوان هذا خليت وطلعت برا اصيح جايك جايك على كيفك الباب يمعود وصلت للباب فتحته وجان اشوف .....

حبايبي لا تنسون التصويت على البارت فدوه  الكم بخصوص صور التشبيه الي طلبتو مني صوره سحر و صلاح لكيت اقرب شي الهم

صلاح ☝️

سحر ☝️بس سحر عيونها موخضر بس هاي تشبهه كملامح

________**
حابيب كلبي لاتنسون تضيفوني على حسابي بالفيسبوك
روايات زينب عقيل الموسوي
وايضا قناتي على التيليجرام
@zainabakeel9
ورابط الواتباد مالتي

https://www.wattpad.com/user/zainabakeel_almusawi?

________****
الى هنا انتهى البارت اتمنى ينال اعجابكم

الكاتبه زينب عقيل الموسوي