مساء الفل وحشتوني اوي اوي ..... عارفه أن فصل اختطفها ولكن كان قصير بس أن شاء الله خلال يومين ينزل فصل كويس .....الروايه فاضل ليها حوالي أربع فصول وتخلص وبعدها احتمال ابدء في تنزيل الروايه الجديده اللي فعلا محتاره جدا انزل حكايه عمر ولا حريم ال سلطان .... قيد من دهب كانت اجتماعيه وطويله وقبلها كانت ورد فريد برضه طويله ففعلا انا نفسي كنت مضغوطه جدا في السنتين دول عشان انزل باستمرار وعشان كده اخدت اجازة طويله شويه وحاليا متردده انزل روايه جديده عشان مش عاوزة التزامات وانتوا بتزعلوا لما بتأخر ....ولكن ده ميمنعش انكم وحشتوني وفعلا نفسي انزل روايه حلوة تعجبكم ومفتقده المناقشات والاراء في الجديد اللي بقدمه .... عموما قولت انزل ليكم اقتباس من حكايه عمر اللي هو ابن عاصم السيوفي بطل روايه المتملك والشرسه
وبكرة هنزل اقتباس من حريم ال سلطان وهستني رايكم وترشيحكم لأي روايه شدت انتبهاكم اكتر
هستني رأيكم في الاقتباس ونزلت قبله مجموعه اقتباسات هبقي اجمعها وانزلها ليكم تاني علي بعضها. ... وعشان السؤال المتكرر مش لاقين الروايه دي لسه منزلتش ونزلت مجرد اقتباسات
وبالنسبه لمتابعين واتباد انا بشكر كل اللي بيعلق ليا تعليق جميل وإيجابي وفعلا مش بفوت اي تعليق ولكن للاسف مش بقدر ارد عليها كلها وفعلا مش معني اني نزلت بعض الروايات القديمه علي تطبيق اخر اني نسيتكم بالعكس أنا بدأت هنا واللي متابعني فعلا هيعرف أن الروايات اللي راحت دريمي دي نزلت وفضلت سنين واتباد واني كل الجديد بنزله هنا اولا ووعدتكم اسيب قيد من دهب منشورة هنا لأطول فترة ووفيت بوعدي وبرضه إرضاء للجميع عملت مدونه بلوجر وعليها كامل الروايات ...طولت عليكم بس كان في تعليق لطيف كده من واحده اعتقد حقوده متخيله أنها بتشمت فيا عشان بقولكم فين التعليقات فبتقولي ( انتي عملتي في نفسك كده عشان سبتي واتباد ) متعرفش حاجه خالص وسطحيه وسخيفه زي تعليقها متعرفش أن التعليقات والفوتس مش بتفرق معايا حاجه لان اي روايه بتتقاس بعدد المشاهدات اللي الحمد لله حلوة جدا جدا في كل الروايات بس بتفرق معايا معنويا جدا لاني بكتب عشان الناس تقرء وتقولي رأيها. ...عموما انا كل مره بقول حاجه اخيره ونصيحه انا بنصح بيها نفسي قبلكم وهي ياريت نرقي بنفسنا واخلاقنا ...التنظير والحقد أو الكلام الجارح أو سواه ينم عن سوء اخلاق وبيئه وضيعه ....الكلمه الطيبه حلوة اوي يا بنات ...دائما في كل خطوة سيبي ليكي أثر طيب ....مابالك في عالم افتراضي محدش يعرفك فيه بتقولي كلام سخيف امال في الحياه هتكوني ايه ....بجد في حياتكم وشغلكم جربوا تسيبوا كلمه حلوة ولو مفيش يبقي نسكت احسن هتحسوا بفرق ....حطوا هدف في بدايه السنه الجديده انك تصلحي من نفسك وعيوبك ومتبصيش لعيوب غيرك وهنا قبل ما اقول باي افتكرت بنت دخلت تكلمني كتيرررر عن ازاي اقولكم كل سنه وانتوا طيبين ودخلنا في الدين واتقي الله وغيره .... مع أن الضحكه الحلوة وتمني الخير في كل وقت جميل العالم حوالينا بيسوء بس لو بصينا هنلاقي اننا نفسنا اللي بنسوء بسبب سوء طباعنا خلينا حمله لإرجاع حسن الخلق ....مش لازم ننظر ولا نتكلم علي بعض ...بطلوا تتكلموا عن عيوب غيركم ....بلاش مقارنات ....بلاش انا محسوده ....بلاش دي بتغير مني ولو شوفتي كده قولي كلمه حلوة هتفرق كتيرر......باي ♥️♥️
❤️❤️❤️ دمتم سالمين
الاقتباس
ارتسمت ملامح الملل علي شفاه عمر ولم يحاول اخفاءها بينما نظر إليه أخيه الأكبر سيف باستنكار حينما قال عمر بلامبالاه : المحاضره لسه قدامها كتير
عقد سيف حاجبيه مرددا : محاضره !
اوما عمر قائلا بمزاح ليس محله : أيوة ياسيفو محاضره كل كام يوم عن الأخلاق والتربيه ....ياعم والله حفظتها
رفع سيف حاجبه : وطالما حفظتها امال مش بتعمل بيها ليه ...نظر الي أخيه وتابع مستخدما نفس كلمته : ياعم .!
ضحك عمر واعتدل واقفا ليتجه الي المرأه المعلقه بجانب الغرفه ويقف امامها بغروره المعتاد يهندم من ملابسه بينما يقول : عشان انا كده ياسيفو .....ضحك وغمز لأخيه من خلال المراه : انا مش متربي وحابب نفسي كده
زم سيف شفتيه وقام وهو يزفر ليقف خلف أخيه ويقول بجديه : بس احنا مش حابين انك تبقي كده يا عمر
التفت له عمر بلا مبالاه كعادته : وحابين ابقي ازاي ؟! ....مرر يداه علي ربطه عنق أخيه المضبوطه ليقول بمرح : ابقي واد ابن ناس متربي زيك ....توء ياسيفو خليك انت لوحدك صاحب اللقب ده بجداره ....إنما أنا خليني زي ما انا المستهتر.... !
نظر سيف إليه بعجز حقيقي عن الخوض في حديث ويأخذه أخيه علي محمل الجد ولكنه لم ييأس يوم من المحاوله ليقول بجديه : عمر انا بتكلم جد
هز عمر كتفه وأخذ أحدي زجاجات العطر الخاصه بأخيه من فوق منضده الزينه يفتحها ويشم رائحتها قائلا : وانا بتكلم جد ....انا عاجب نفسي اوي كده ....وكعادته غاير الموضوع ليقول وهو يلوي شفتيه : ايه ياسيفو البرفيوم ده ....ده قديم اوي ...غمز له بمرح وتابع : ده شبه بتاع ابوك ....!
نظر له سيف بغيظ بينما يتملص منه كالزئبق ليمسك بزجاجه العطر بحنق ويعيدها الي مكانها : عجباني ...خلينا في موضوعنا
نظر عمر لأخيه بانتصار بينما بدهاء مستتر وصل إلي مايريد ليقول بجديه : وصلت للمفيد....اهو انا كمان عاجب نفسي زي ما انت عاجبك البرفيوم بتاعك .....بوغت سيف بدهاء أخيه في اثبات وجهه نظره ليقول : ماشي ياعمر حتي لو عندك حق في انك تكون عاجب نفسك ومش عاجبنا.... بس علي الاقل حاول تفكر في كلامنا وان كلنا خايفين عليك ...ياعمر انت كبرت وبقيت راجل ولازم تخف شويه من استهتارك ده .... اللي عملته غلط ومالكش اي مبرر فيه إلا أنك بتفرد عضلاتك وخلاص
اهتزت نظرات عمر للحظه ولكنه سرعان ما استعاد نظراته البارده بينما يقول لأخيه وهو يهز كتفه : ولو ليا مبرر هتفرق
اوما سيف : اكيد ...
ابتلع عمر ومال تجاه إذن أخيه ليهمس من بين أسنانه بغضب شديد سري بعروقه : كان لازم اضربه واكسر عضمه ولو شوفته قدامي تاني هخلص عليه مش بس هخليه متكسر .....خانتني معاه !
اتسعت عيون سيف ليرفع رأسه ينظر لأخيه الذي بلحظه محي كل نظرات الغضب من عيناه وعادت نظراته صفحه هادئه بارده لاتكترث لشيء ليصفر بمرح ويلقي نظره اخيره علي مظهره في المراه ويتجه الي باب الغرفه تاركا أخاه في حيرة لا تنتهي بينما لم يسطع يوما فك شفره شخصيه أخاه. .....!
مش لوحدك يا سيف اعتقد انا والقراء كمان مش هتعرف نفك الشفره ....قراءه ممتعه بقلم رونا فؤاد
