Contract with the Young Master ( CVS #1 ) Completed ✓

CHAPTER 23

CHAPTER 23

NAGING maayos naman ang first day ko sa klase. May ilang kumakausap sa akin at may ilan din na gusto lang magpapansin kay Sage na pinaglihi yata sa sama ng loob. Sinusungitan kasi agad nito ang mga nagtatangkang kumausap sa kanya.

Sanay naman na daw ang iba dahil matagal na nilang kilala si Sage at kabisado na ang ugali.

Ang unfair 'no?

Kahit gaano pa kasungit ng lalaking iyon, ang dami pa ring nagtatangkang lumapit at kumausap. Kahit na parang hanging dideadmahin ka lang naman. At higit sa lahat, sa kabila ng kasungitan nito at pagiging mailap sa mga babae, marami pa ring nagkakagusto.

Palibhasa gwapo kaya ang lakas makahatak ng babae.

Ang unfair lang.

Maliban sa kakaibang tingin sa akin ng ibang estudyante, wala namang nangyaring kakaiba. Masasanay din ako sa titig nila na para bang hindi ako nababagay sa lugar na ito kasam nila.

Sa ngayon, deadma na lang muna.

Limang oras lang ang pang gabing klase sa Oxford del Silvenia —6:00 pm to 10:00 pm. Kaklase ko si Sage sa limang subject at magkaiba na kami ng klase from 9:00 to 10:00. Ang last class ko ay sa kitchen lab na.

Pagkatapos ng huling klase, ako lang ang mag-isang uumuwi ng mansion. Paglabas namin kanina nasa parking lot na si Kuya Migs, naghihintay para ihatid ako pauwi.

Sa condo daw kasi si Sage mamamalagi ng ilang araw, sa kadahilanang hindi ko alam. Siguro bored na ito sa mansion dahil palagi na lang nasa kwarto at minsan lang lumabas.

Sabagay, kung ako man ay nabobored din kapag maghapon walang pinapagawa sa akin. Wala man lang tv o kahit anong appliance na maaaring mapanooran at mapaglibangan. Sobrang tahimik pa ng buong lugar at walang malapit na mapapasyalan, bukod sa haciendang nasa loob ng gubat sa likod ng mansion na hindi ko pa napupuntahan. Pero si Tyron ang namumugad doon.

Nakarating kami ng maaga ni Kuya Migs sa mansion. Inaya ko muna s'yang pumasok pero tumanggi naman. Uuwi pa kasi ito sa kanila at gumagabi na kaya hindi ko na rin pinilit pa.

Pumasok ako sa loob ng mansion pero hindi ko naabutan si Sir Boss sa sala. Wala rin sa kusina. Kaya siguro nasa kwarto o kaya naman ay nasa opisina pa n'ya.

Umakyat muna ako sa kwarto upang magpalit ng pambahay na damit saka ako bumaba para magluto ng dinner. Nasa hagdan na ako nang may maalala.

"Sheyytt! Oo nga pala, iyong mga hinuli kong lulutuin ngayon."

Tinakbo ko ang hallway para agad na makarating sa kwarto. Kinuha ko ang timba at lakad-takbong tinungo ang kusina. Kailangan kong makapagluto kaagad bago pa bumaba ang boss kong magaling.

Prinipare ko muna ang mga sangkap bago ko simulang hiwain at tanggalin ang lamang loob ng aking lulutuing putahe for tonight. Anim na piraso lang naman ng nahuli ko kaya mabilis lang akong natapos. Noong highschool tinuruan na kami kung paano ang tamang pag-aalis ng laman-loob ng isang hayop. Experiment namin iyon sa subject na Science.

Hindi ko alam na maiaapply ko iyon ngayon.

Kalahating oras yata akong nakaharap sa kitchen counter. Katatapos ko lang magluto at naglalagay na ako ng ulam sa mangkok nang makarinig ako ng yabag pababa.

Napangiti ako. Sure akong si Sir Boss na ang pababa.

Hindi ako nagluto ng steak n'ya at itong niluto ko ang ipapatikim ko sa kanya. Pero sana lang hindi ako masisante ng dahil dito.