بيت مهنـا/
تحديدًا بصالة النسوان،
جالسين حول سفرة الفطور كلهم والبنات حالتهم حاله
تثاوبت رسن وهي تمسك القرص بيدها قبل تنزله بتكشيره: الحين من ياكل هالشيء الدسم من صبح الله خير!
مزون ناظرتها بنقد: اقول ام كراعين ماتبين العيشه قومي اذلفي من الحين مب تقعدين تعيبين ف نعمة ربي وش تبينا ناكل اجل
اقبال بنعاس: ابي فرنش توست مافيه؟
مزون ضيقت عيونها: وش تسته وش تخربطين انتي
تذكار وهي تحط صحن المقلقة بحماس : ماعليك منها يمه مسويه فرنسيه الاخت شوفي بس هذا الذ مقلقل فيك يا الدنيا وصل
الزين بابتسامه: مقلقل رائد ما بعده كلام .. غريب انه مسويه اليوم
اقبال جعدت وجهها وهي تاخذ كوب الحليب وتقوم: اشرب حليب لحاله افضل
مزون طيرت عيونها: هو علامها ذي ما تاكل من الانعام الي على السفره اشكال والوان
تذكار : اتركيها جديده بنت الضاحيه مسويه يعنني ياي ما اكل مقلقل وقرص
تباهي وهي توقف: الله يديم النعمه
جمايل : جتكم الثانيه! خير وهذا من بياكله
تذكار بحماس وهي تاخذ صحن المقلقل الي قدام تباهي: خليهم احسن باكلهم انا
مزون ضربت يد تذكار وهي تسحب الصحن من يدها: ابلعي من الي قدامتس ماعاد كفاتس يا المشفوحه
تذكار بتبويز: جديده انتي بتخليني اكل ولا شلون
سلوى قرصت بنتها: بنت اسمعي كلام عمتي واهجدي هذا الصحن قدامك بيظهر من فمه اكلي منه لين تشبعين
الهنوف: وش فيكم على تذكار اكلي يمه ماعليك منهم
تذكار ابتسمت: محد منصفني غيرك عميمه
اشعار رجعت وهي تبتسم بوسّع، ناظرتها الهنوف بإستغراب: وين الشوربه ؟
اشعار بفهاوه: هاه؟
الهنوف : هاو شفيك انتي اقولك الشوربه الشوربه وينهي
اشعار بورطه: الشوربه؟ ايه الشوربه ذكرتها.. لا بس طلعت ماهي زينه و كبيتها
شهقت مزون بينما تذكار غصت بلقمتها من الضحك ورسن وجهها صار احمممر وهي كاتمه الضحكه
مزون وسعت عيونها وهي شوي وتنجلط: وشهو!!! كبيتي النعمه الله لا يعطي عدوتس عافيه يا اشعار يا خايبه هذي نعمه نعمه نعنبو دارتس ما تحاسبين ولا تفكرين وبعدين كيف طلعت ماهي زينه ليه وين عقلتس وانتي تزينين بها يالرفلا هذا وانا اقول اشعار اعقل حفيداتي واسنعهن ما اقول الا مالت بس
تذكار وهي تهز راسها وتقلد حركة يدين جدتها : مالت بس اي والله مالت
رسن بتأييد وهي تكش على اشعار نفس ما سوت جدتها
ناظرتهم مزون بنرفزه: ريا وسكينه والله لو ما تخلوني بحالي ان يجيكم شين ما يسركن
تذكار بسرعه وهي تبلع لقمتها : وش سوينا هالحين قاعدين ندافع معك
مزون ضربتها على خفيف : كم مره اقول لا تتكلمين وبفمك شيء
تذكار بوزت وهي تمسك يدها بدراما وصراخ: اييي جديده اوجعتيني علامك علي والله لو اني متزوجه رجلك ما سويتي كذا
مزون حطت يدها على راسها : يمه يمه يا العبو الي بهالبنت حتى يدي ما لمستس و بعدين وش الي متزوجه رجلك يا قليلة الحيا والله الي ما عاد به لا سحى ولا مستحى انا لو اقعد شوي زياده مع هالبنت بتجيني جلطه بعدو خلوني اقوم من هنيا
الزين مسكتها بسرعه وهي تكتم ضحكتها وتناظر تذكار : تذكاروه خلاص عاد اعقلي عن امي وخليها بحالها
جمايل بحميّه : افا بس يا جده تقومين انتي ! هي الي تقوم *لفت على تذكار وهي تسحب الخبز من يدها* قومي قومي اذلفي خلاص باقي تاكلينا حنا حاسبي على عمرك
تذكار عضت يد جمايل الي صرخت وهي تسحب شوشتها تحاول تبعّد يدها
رسن الي بجنب تذكار سحبت تذكار من جمايل
مزون وعيونها طارت وهي تضرب تذكار بعصاتها : اهبي يا ذا البنيه حشى قرد ماهي ادمي
تذكار : جديده صدقيني لو انتي مانتيب جدتي كان عرفت وش اسوي معتس
مزون ضيقت عيونها: عشتو يا بنت رويجح وش بتسوين لي يلا اشوف
تذكار بتكشيره : بسكت احترامًا لكبر سنك و الصله الي بيننا
قلبت عيونها مزون وهي ترتشّف من حليبها ، و ظلو على هالحال تذكار ورسن يعصبون في مزون الي تتنرفز بسرعه وتفور عليهم ..
سلوى وهي تناظر ساعتها : وش رايك نزرق على راعي الجلابيات اليوم السبت بيجي
مزون : اييه حتى راعي الاقط يجي السبت بمرن اخذ لي منّه
الهنوف : ايه ذكرتيني بشتري لي قطعه واشتري قطع كسوه لام بدر بيجون القابله من الشرقيه مع تيام
مزون بنقد : وتيام هذا وراه ناقع بالشرقيه ياكافي ما كان له خوال مير ماعاد يعرفنا ابد حتى السماعه ما يرفعها علينا
الهنوف بتنهيده : وش اقولك يا يمه الولد مدري وش صايبه حتى حنا ما عاد يقعد معنا طول وقته بالشرقيه و ذبحنا الا شغل وشغل
تذكار بضحكه : هذا لا يكون متزوج وحده من الشرقيه وانتم ما تدرون
شهقت الهنوف وهي تحط يدها على صدرها : ياويلي على ولدي لا يكون مسويها صدق!!! *نفضت اشعار الي كانت تاكل* قومي قومي افزعي جيبي جوالي ادق على الخايب هذا
اشعار غصت بلقمتها : ايي يمه وش فيك علي توني قاعده باكل بعدين من جدك انتي تسمعين كلام تذكار البزر من يسمع كلامها هذي يا حبها للتفتين *لفت على تذكار وهي تضربها على راسها* ووجعيه ماتعرفين تنظمين انتي
تذكار بتحريش: شوفي يا عميمه من ردة فعلها هذا وجهي اذا ما كانت تدري به ومعاونته على الموضوع
الهنوف لفت على اشعار بحده: بنت اعترفي اخوك من ماخذ منهي بنته وليه مخبي علينا وليه انتي ساكته يا خايبة الرجا والله ما اخليك يا اشعار
مزون بشهقه : يا كبرها عند ربي متزوج وانتي خابره اعقبي يا اشعار انتي واخوتس الله اكبر عليكم جيبي الجوال والله لا اسمعه الي يربيه وانتي دواتس عندي عقب ما اخلص منه مالت عليك يا الهنوف عز الله ما عرفتي تربين
اشعار وسعت عيونها : انتم وش فيكم علي والله مدري عني شي ولا هو متزوج انتم منجدكم تصدقون الخبل هذي *لفت على تذكار بتهديد* والله ما اخليك يا شيطان الانس
فزت تذكار وهي تضحك وتركض منحاشه من اشعار الي قامت تركض وراها بقهر
