•تحبوا تشربوا ايه
-اتنين قهوه مظبوط .. بس سؤال معلش انا مستغرب انكوا فاتحين هو مش المفروض معمول حظر على القهاوى والكافيهات
•والله يا بيه احنا بنفتح ساعتين فى المدارى كده وجايبين كوبايات كرتون عشان منستعملش الازاز عشان القهوه .. والله يا بيه وما ليك عليه حلفان احنا اتخرب بيتنا فى موضوع الكرونا ده
*الناس كلها موقوف حالها يا بنى
•انت بتشتغل ايه يا حاج لا مؤاخذه
*موظف
•طيب يعنى كبيرك الاسعار خليت عليك شويه فى شويه حاجات مش عارف تشتريها وفى الاخر مرتبك ماشى .. لكن احنا وطقم الصنيعيه بيتنا اتخرب
-ربنا يكون فى عونكوا يا بنى
•معلش وجعت دماغكوا .. هروح اجيبلكوا القهوه
-شايف المبنى الى هناك ده يا عاطف هو ده المدرسه
*بس ده واضح انه مقفول
-اماكن اثريه كتير يتبقى مقفول يا عاطف خصوصا الاثار بتاعك العصر الاسلامى دى زى المدارس والحمامات والسبل
*حمامات ايه يا خال دى
-الحمامات الشعبيه يا عاطف .. ايه مش عارفها
*لا عرفتها خلاص الى فيها تكيس وبخار وكده دى
-ايوه هى دى
*المهم كويس ان المدرسه دى مقفوله كده
-المشكله انها فى منطقه شعبيه يعنى الناس حواليها طول الوقت عشان كده .. موضوع الكرونا جه فى مصلحتنا
*انا شايف اننا نشرب القهوه ونتكل على الله قبل الحظر ما يبتدى .. بس اعمل حسابك مش همش تانى
-يا عم هركبك توك توك
***********************************
-صباح الخير يا حاج
*تعالى اقعد ووطى صوتك
-ليه فى ايه
*انت مش شايف الحمار ابن خالتك الى اسمه سامى واقف مع امك
-ايوه يعنى بيعملوا ايه
*بيصوروا اول فيديو على قناة امك
-قناة امى يا حلاوه
*امك بتقول فانزاتى
-ماما بقى ليها فانزات ينهار ابيض على الفضايح
*امك هتبقى ترند وهتفضحنا يا احمد
-يا ريت ترسى على كده .. امى هتبقى من الاسترونج ومن ومش هنعرف نكلمها بعد كده يا حاج
*ايه استرونج ومن دى ياد
-الفيمنست يا حاج .. الفلوس هتجرى فى اديها ويمكن تسيب البيت بعد كده
*يا ريت يا اخويا تسيب البيت وتاخدك معاها واخلص منك انت وامك
•الصوت شويه يا جماعه مش عارفين نشتغل
*جرى ايه يلا يا ابن سناء انت هتكتمنا فى بيتنا
~ايه يا محسن متسيب سامى يشتغل
*اشتغلوا يا ختى اشتغلوا
-لم الدور يا حاج مش عاوزين فضايح قصاد الفانزات بتوع ماما
*100 نيله عليك وعلى امك .. قوم افتح الباب شوف مين اجرى
-اهلا يا خال
> ايه ده فى ايه
-لا عادى يا خال دى ماما عامله لايف على اليوتيوب
*شايف يا عبده منك لله يا اخى
>انا مالى يا محسن
*مش انت الى جوزتهالى منك لله تانى
>ايه يا عم مش انت الى شوفتها وعجبتك وقولتلى عاوز اتجوزها
*كنت نصحتنى يا احى
-تعالى يا خال ندخل جوه
*اه خده وادخل يا خويا وسبونى فى الهم ده لوحدى
-تعالى يا خال ادخل
>ابوك هيتجنن ياد يا احمد
-اختك هتخلى مخه يضرب يا خال
> ربنا يكون فى عونه
-المهم روحتوا انت وعم عاطف
>اه روحنا
-طيب وايه الاخبار
>المكان مقفول معلهوش حراسه ولا حاجه .. بس المنطقه شعبيه يعنى حواليه ناس طول الوقت .. بس اليومين دول بعد الحظر الدنيا بتبقى فاضيه
-ده معناه اننا لازم ننفذ بسرعه محدش عارف الحظر ده هيخلص امتى
>ماشى ايدى على كتفك
-احنا كده لازم نروح السلطان حسن بأسرع وقت وبعدين نطلب نروح المدرسه دى
>ربنا يسترها
*******************************
*صباح الخير يا استاذ فوزى
>صباح الخير يا منى
*انا قولت اجى استأذنك اننا هننزل انا واحمد واستاذ عوض نروح السلطان حسن
>طيب تعالى انا عاوزك
*نعم يا استاذ فوزى
>اصل عوض كان بيكلمنى وزعلان اوى بيقولى منى كلمتنى بطريقه وحشه
*حضرتك كنت سألتنى فى موضوعه وانا قولتلك هرد عليك .. مكنش ليه لازمه بقى هو يكلمنى
>يمكن كان عاوز يفتح معاكى كلام يا منى
*هو لجأ لحضرتك فى الاول لو كان عاوز يتكلم من نفسه كان اتكلم من الاول
>انتى متحامله عليه يا منى
*لا انا كنت هبلغ حضرتك اننا مش هننفع لبعض
>ليه يا منى ده عوض ده انسان طيب وغلبان
*معلش يا استاذ عوض انا شايفه اننا نفسيا مش هننفع لبعض
>براحتك يا منى بس مش عاوزك تبقى مضايقه كده فى الاول والاخر انتوا زمايل
*لا يا استاذ عوض مش مضايقه خالص ..هستأذنك بقى نتحرك
*اتفضلى
•صباح الخير يا احمد
-اهلا صباح الخير يا استاذ عوض
•صباح الخير يا ست البنات
*صباح الخير يا استاذ توفيق عوض
•اتفضلوا اركبوا .. احنا ان شاء الله عشر دقايق وهنبقى هتاك المكان قريب جدا .. روحت هناك قبل كده يا استاذ احمد
-اه روحت بس مدخلتش الجامع
•لا احب اقولك انك هتنبهر .. وانتى يا استاذه منى
-لا انا دخلت الجامع
•ادينا وصلنا
-شكل الجامعين قصاد بعض كده حاجه فخمه قوى
*طبعا يا احمد مسجد السلطان حسن ومسجد الرفاعى وشكلهم قصاد بعض بالشكل ده يخلى اى حد يجى يشوفهم الشكل ده. يفضل محفور فى ذاكرته
•لا والهوى هنا ايه يا ست البنات كأنه تكييف
*اه طبعا لان بين الحامعين مسقط هوى
-والجامعيين يا ترى اتبنوا فى نفس الوقت ؟
*لا يا احمد السلطان حسن اقدم كتير من الرفاعى بس هما حاولوا ان مسجد الرفاعى يخلوه يضاهى السلطان حسن .. هما الاتنين اثار اسلاميه مهمه طبعا لكن السلطان حسن هو تقريبا اهم اثر اسلامى فى الشرق الاوسط
•اتفضلوا .. اتفضلوا .. هنا بقى ممر هنمشى فيه وهيدخلنا على ساحة المسجد
-ايه ده يا سلام على الجمال
*صور يا احمد الساحه .. الساحه هنا بيتوسطها فسقيه كبيره فى المنتصف عشان الوضوأ والساحه مفتوحه من الاعلى وبعدين الجمامع متقسم اربع اتجاهات فى كل اتجاه مكان للصلاه .. ومعمول بالشكل ده عشان يبقى جامع ومدرسه يتدرس فيه الاربع مذاهب الشافعيه والحنفيه والحنبليه والمالكيه .. الجامع اتكلف اموال كتير جدا عشان يتبنى والمأذنه بتعته هى اعلى مأذنه فى مصر و المسجد اتبنى فى اربع سنين .. وقت بناء السلطان حسن سقط جزء من المأذنه على الطلاب و مات 300 وكانت حادثه ضخمه جدا
مؤرخين كتير اتكلموا عنه ومستشرقين ووصفوه ان درة العماره الاسلاميه فى الشرق
-ايه العظمه دى الصور هتبقى جميله جدا زى جمال المكان .. المكان هنا المفروض يبقى من اهم المزارات الاثريه .
*هو بيجيلوا سياح كتير ديما .. بس يستحق اكتر من كده طبعا .. وكمان يستحق ان المصريين يزروه ويشوفوا التحفه المعماريه دى
وازاى الناس زمان كانت حضاراتهم بتتعرف من اثارهم وان احيانا اثارهم بتكون اقوى من حكمهم الناس دى فهمت انهم بيمدوا جذورهم فى التاريخ والمستقبل باثارهم الى بيسبوها للأجيال الى بعد كده
•احنا بقى هنسيب ايه
-احنا زى ما جينا زى ما روحنا يا استاذ عوض .. تعالى نتوضى ونصلى ركعتين
يتبع
الجزء الثالث عشر
Start from the beginning
